Mmla'n 14 - NYANMIƐN NDƐ'N 1998

Kɛ sran wu, like nga sran'm be fa yo bé wun'n, i atin tanninlɛ

¹ Amun ti Anannganman amun Nyanmiɛn'n i mma mun. Sɛ amun sran wu'n, nán amun bobo amun wun kannin, nán amun yi amun ti'n i bue kun amun ngban su wa .

² Afin amun ti Anannganman amun Nyanmiɛn i sran mun klonglo. Anannganman niannin mɛn'n nun nvle'm be kwlaa be nun ɔ kpali amun kɛ amun yo i liɛ mlɔnmlɔn.

Nnɛn ng'ɔ fata kɛ be di'n ɔ nin ng'ɔ fata kɛ be ci'n

³ Nán amun di like b'ɔ ti fiɛn Anannganman i nyrun'n.

⁴ Nnɛn nga an kwla di be'n be yɛ: nannin, bua, boli,

⁵ wannzannin, yɛ flete'm be akpasua liɛ mun, yɛ janne.

⁶ Amun `di nnɛn kwlaa nga bɔ i ja bui'n nun ti kpaciwa'n, kpɛkuun ɔ kpu like di'n.

⁷ Sanngɛ nán amun di nnɛn nga i ja bui'n nun ti kpaciwa sanngɛ b'ɔ kpu-man like di-man'n, annzɛ nnɛn ng'ɔ kpu like di kpɛkuun i ja bui'n nun ti-man kpaciwa'n. Nnɛn sɔ'm be yɛ: nyɔnngɔnmɛn, gbanmlɔ, yɛ oya'n. Be kpu like be di, sanngɛ bé ja bui'n nun ti-man kpaciwa, be ti fiɛn.

⁸ Nán amun di kɔkɔti'n kusu, i ja bui'n nun ti kpaciwa, sanngɛ ɔ kpu-man like di-man. I kusu ɔ ti fiɛn. Nnɛn fiɛn sɔ mun, nán amun di be, nán amun kan bé fuɛn'n.

⁹ Nnɛn nga be o nzue nun'n, nga amun `di'n yɛlɛ be nga be lɛ mmɛ nin wun bui'n.

¹⁰ Sanngɛ nán amun di be nga be lɛ-man mmɛ nin wun bui'n. Be ti fiɛn.

¹¹ Amun kwla di anunman nga be ti saun'n.

¹² Be nga nán amun di be'n be yɛ: anunman nyin'n be akpasua liɛ mun,

¹³ apɛtɛkuasi'm be akpasua liɛ mun,

¹⁴ kɔkɔkuankuan'm be akpasua liɛ mun,

^15-18 klɔnsoklo mun, akpatue fanunfanun mun, asri'm be akpasua liɛ mun, kayɔbuɛ'n, anunman'n b'ɔ tra jue sie i konvi bo'n, awieman'n, wɔngɔ nin i wafa'n kwlaa, beyra'n, yɛ akpannin'n.

¹⁹ Kakaa nga be lɛ ndɛwa'n be kusu be ti fiɛn, nán amun di be.

²⁰ Sanngɛ kakaa nga be ti saun'n, amun kwla di be.

²¹ Nán amun di nnɛn fuɛn. Amun `fa man aofuɛ nga be tran amun afiɛn mun man be di, annzɛ kusu amun `yo i atɛ aofuɛ wie'm bé sa nun. Amun liɛ'n, amun ti Anannganman amun Nyanmiɛn'n i nvle nun sran mun, amun ti i liɛ klonglo. Nán amun tɔn boli ba i nin i nyɔnflɛn nzue'n nun.

Blusu'n i su mmla

²² Afuɛ kwlakwla amun `yi amun fie su lɔ ninnge'm be blusu'n.

²³ Lika nga Anannganman amun Nyanmiɛn'n kle kɛ lɛ yɛ ɔ ´tran'n, amun `wɔ lɔ. Amun `ko di amun ble, nin amun nannin mun, nin amun bua mun, ɔ nin amun boli'm be mma klikli mun. Amun `ko nɔn amun nzan lɔflɛ'n nin amun ngo'n be blusu'n i nyrun lɔ. Kpɛkuun amun nyin `yi Anannganman amun Nyanmiɛn'n titi.

^24-25 Wienun-ɔn, Anannganman amun Nyanmiɛn'n ɔ ´yo man amun ninnge'm be ´yo ye. Kpɛkuun sɛ amun klɔ'n nin klɔ nga Anannganman'n amun Nyanmiɛn ɔ kleli kɛ lɛ yɛ ɔ ´tran'n be afiɛn'n ti nun'n, amun ´yo amun blusu sɔ'n be atɛ. Afin amun su kwla sua kɔ-man. Kpɛkuun amun `fa sika'n tra nun be ɔ kan Anannganman amun Nyanmiɛn'n ɔ kleli kɛ lɛ yɛ ɔ tran'n.

²⁶ Sɛ amun ju lɔ'n, like kwlaa nga amun waan amun ´to'n amun su to. Amun `to nannin mun, nin bua mun, nin nzan, ɔ nin nzan kekleekle mun. Yɛ amun nin amun osufuɛ mun amun `fa ninnge sɔ mun `di cɛn Anannganman amun Nyanmiɛn'n i nyrun lɛ.

²⁷ Kɛ amun ´yo sɔ'n, nán amún wla tra Levifuɛ nga amun nin be tran lɛ'n bé su, afin be lɛ-man asiɛ'n wie kɛ amun sa.

²⁸ Afuɛ nsan kwlaa ng'ɔ ju'n, amun `fa amun fie su ninnge'm be blusu'm be `tian be nuan amun klɔ'n su lɛ,

²⁹ nan Levifuɛ'm bɔ be lɛ-man asiɛ'n wie kɛ amun liɛ'n sa'n, nin aofuɛ nga be sike amun'n, nin aika ba mun, ɔ nin angboti bla nga be o amun klɔ'n su'n, be wa fa wie be `di nan be ku `yi. Nan Anannganman amun Nyanmiɛn'n kusu ɔ'a yo nan like kwlaa nga amun yo'n ɔ'a yo ye'n ti.