Mmla'n 12 - NYANMIƐN NDƐ'N 1998

ANANNGANMAN I MMLA MUN

¹ Amun wa ko tran mɛn nga Anannganman amún nannan'm be Nyanmiɛn'n ɔ'a fa man amun'n nun lɔ. Mmla fanunfanun b'ɔ fata kɛ amun nian nun nanti bé su titi lele fa ju amun wie cɛn, be yɛ be o yɛ.

Lika nga Anannganman ɔ'a kpɛ i kɛ ɔ ´tran nun'n, lɔ yɛ an `ko yi be tɛ nin-ɔn

² Sran nga amun su ko fa be mɛn'n lɛ'n, be lika nga be sɔ be amuɛn nun'n, amun `bubu be kwlaa. Lika nga be o oka'm bé su o, nin kpɔlɛ'm bé su o, ɔ nin nga be o waka mɔnnɛn'm bé bo o, amun `bubu be.

³ Amun `bubu be amuɛn sɔwlɛ mun, amun `bubu be yɛbuɛ nga be takali be mun, amun `yra be waka nga be sɔ be'n, amun `bubu be amuɛn nga be yoli be mun, yɛ amun `nunnun be dunman'n lika nga be o nun lɛ'n be nun.

⁴ Anannganman amun Nyanmiɛn'n i liɛ'n, nán amun su i kɛ nvle sɔ'm be nunfuɛ'm be fa sɔ be amuɛn mun'n sa.

⁵ Lika nga Anannganman amun Nyanmiɛn'n ko kle amun kɛ lɛ yɛ be `bo i dunman nan lɛ yɛ ɔ ´tran'n, lɛ kunngba yɛ amun `ko su i-ɔ.

⁶ Amún tɛ nga be yra be nnɛn'n kɔlikɔli'n, nin amun sraka mun, nin amun blusu mun, nin amun fie su ninnge klikli mun, nin nda talɛ nuan ninnge mun, nin amun klun klo ninnge nga amun ´fa man'n, ɔ nin amun nannin mun, nin amun bua mun, nin amun boli mun nnɛn sɔ'm be talua ba mun, lɛ yɛ amun `fa be bla-a.

⁷ Anannganman amun Nyanmiɛn'n i nyrun lɛ yɛ amun nin amun osufuɛ mun amun `di sraka aliɛ mun-ɔn. Amun `di amun junman nuan like nga Anannganman amun Nyanmiɛn'n yoli man amun nyɛnnin i'n, amun `di i aklunjuɛ nun.

⁸ Nán amun yo kɛ e fa yo i ndɛkɛn wa yɛ'n sa, bɔ sran kun yo nga i klun klo'n, sran kun yo nga i klun klo'n.

⁹ Kɛ amun nian ju-man amun aja'n bɔ yɛlɛ wunmiɛn delɛ lika nga Anannganman amun Nyanmiɛn'n wa fa man amun'n nun lɔ'n, i ti yɛ amun yo i sɔ-ɔ.

¹⁰ Sanngɛ amun wa kpɛ Zurdɛn'n amun ´ko tran lika nga Anannganman amun Nyanmiɛn'n ´fa man amun'n nun. Amun ´de wunmiɛn amun kpɔfuɛ nga be sin yia amun'n bé sa nun, amún wun ´jɔ amun fɔuun.

¹¹ Kpɛkuun lika nga Anannganman amun Nyanmiɛn'n ko kle kɛ lɛ yɛ ɔ ´tran'n, amun `fa ninnge nga n su bobo be yɛ mun bla lɛ. Ninnge sɔ'm be yɛ: tɛ nga be yra be nnɛn'n kɔlikɔli'n, nin sraka mun, nin blusu mun, nin amun fie su ninnge klikli mun, ɔ nin amun nnɛn'm be mma klikli mun, ɔ nin nda nga amun ta Anannganman i nuan'n ninnge mun.

¹² Lɛ yɛ amun ´yi amun aklunjuɛ i nglo Anannganman amun Nyanmiɛn'n i nyrun-ɔn. Amun nin amun mma yasua mun, nin amun mma bla mun, nin amun kanga yasua mun, nin amun afanniɛn bla mun, ɔ nin Levifuɛ nga be nin amun tran lɛ mun, yɛ amun ´yi amun aklunjuɛ i nglo sɔ nin-ɔn, afin Levifuɛ'm be liɛ nun-man asiɛ nga amun ´nyɛn i'n nun wie.

¹³ Nán amun yi amun tɛ nga be yra be nnɛn'n kɔlikɔli'n lika nga amun klo'n nun.

¹⁴ Lika nga Anannganman bɔbɔ nian akpasua'm be lika'm be nun kle'n, i nun yɛ amun `yi tɛ sɔ mun-ɔn. I nun yɛ amun `yo like nga n kan kleli amun kɛ amun yo'n i kwlaa-a.

¹⁵ Sanngɛ sɛ Anannganman amun Nyanmiɛn'n ɔ'a yo man amun ninnge'm b'a yo ye, nan amun klun klo amun waan amun ´kun nnɛn di'n, amun kwla kun i kan amun tran lɛ'n. Sran ng'ɔ ti saun o, sran ng'ɔ ti-man saun o, be kwlaa be di wie-ɔ ɔ yo ye. Ɔ ti kɛ wannzannin annzɛ flete wie yɛ be su di sa.

¹⁶ Mmoja fuɛ'n yɛ nán amun di-ɔ. Amun `guɛ i ase kɛ nzue sa.

¹⁷ Nán amun tran amun klɔ'm be su be di amun ble'm be blusu mun nin amun ngo'm be blusu mun. Nán amun tran lɔ be nɔn amun nzan lɔflɛ'm be blusu mun. Amun nannin mun, nin amun bua mun, ɔ nin amun boli'm be mma klikli mun, nán amun tran lɔ kun be di. Nda nga amun ta Anannganman'n i nuan ninnge mun, nin amun klun klo sraka mun, ɔ nin amun fie'n su ninnge klikli mun, nán amun tran lɔ di be.

¹⁸ Kan amun `di be'n yɛlɛ lika nga Anannganman amun Nyanmiɛn'n ko kle'n i nun. Amun `di be Anannganman amun Nyanmiɛn'n i nyrun lɛ. Amun nin amun mma yasua mun nin amun mma bla mun, nin amun kanga mun, nin amun afanniɛn bla mun, ɔ nin Levifuɛ nga be nin amun tran lɛ'n yɛ amun `di be sɔ nin-ɔn. Amun junman nuan like nga amun nyannin be'n, amun `di be Anannganman amun Nyanmiɛn'n i nyrun lɛ aklunjuɛ nun.

¹⁹ Sɛ an tɛ kpɛ tɛ di'n, nán amun yi Levifuɛ'm be ase amun mɛn'n nun mlɔnmlɔn.

²⁰ Blɛ nga Anannganman amun Nyanmiɛn'n ko trɛ amun lika'n nun ko man amun kɛ ɔ kan kleli amun sa'n, blɛ kwlaa nga amun konvi sɔ nnɛn'n, amun `di nga amun klo'n.

²¹ Sɛ lika nga Anannganman amun Nyanmiɛn'n kle kɛ ɔ ´tran lɛ'n nin amun tranwlɛ'n wo mmua dan'n, amun kwla kun nannin, nin bua, nin boli nga Anannganman fa mannin amun'n wie be di kɛ n kan kleli amun'n sa. Amun `di amun klun klo liɛ'n kan amun tran lɛ'n.

²² Amun `di i kɛ be fa di wannzannin annzɛ flete sa. Sran nga be ti saun o, nga be ti-man saun o, be kwlakwla be lɛ atin be di wie.

²³ Sanngɛ mmoja fuɛ'n, nán amun di i mlɔnmlɔn. Afin mmoja nun yɛ nguan'n wo-ɔ. Nán amun di nnɛn i ba'n nin nnɛn i nguan'n.

²⁴ Nán amun di mmoja'n, amun `guɛ i ase kɛ nzue sa.

²⁵ Sɛ amun waan amun nin amun osu nunfuɛ amun wun jɔ amun fɔuun nán amun di mmoja. Amun `yo sa ng'ɔ ti kpa Anannganman nyrun'n.

²⁶ Amun ninnge nga amu'an sie be ngunmin kɛ amun ´fa man Nyanmiɛn'n, ɔ nin nda nga amun ta Nyanmiɛn'n i nuan ninnge'm be liɛ'n, amun `fa ko man Anannganman lika ng'ɔ ko kle'n i nun lɔ.

²⁷ Sɛ tɛ nga be yra be nnɛn'n kɔlikɔli'n yɛ amun yi'n, amun `fa nnɛn ba'n be sie i Anannganman amun Nyanmiɛn'n i sɔwlɛ'n su, yɛ amun `fa nnɛn'n i mmoja'n be guɛ i Nyanmiɛn sɔwlɛ kunngba'n su. Sɛ tɛ uflɛ yɛ amun yi'n, amun `fa nnɛn'n i mmoja'n be guɛ i Anannganman amun Nyanmiɛn'n i sɔwlɛ'n su kpɛkuun amun `di nnɛn ba'n.

²⁸ Amun `tie ndɛ nga n ´kan kle amun yɛ'n kpa, amun `fa sie nan amun nin amun osu nunfuɛ mun amun wun jɔ amun fɔuun tititi. Afin sɛ amun yo i sɔ'n, wuun amu'an yo sa kpa ng'ɔ nin Anannganman amun Nyanmiɛn'n i nyrun fata'n.

An `nian amún wun kpa Kanaanfuɛ'm be amuɛn'm be lika

²⁹ Kɛ Anannganman amun Nyanmiɛn'n ko nunnun mɛn nga amun su ko i falɛ'n i nunfuɛ mun'n, sɛ amun fuan be nan amun tran be osu'n,

³⁰ amun `nian amun wun kpa. Nán be aya'm be tra amun, nán amun fa be nzuɛn mun. Kɛ be ko wie nunnun bɔ be ko jaso amun nyrun lɛ'n, nán amun kpɛ be amuɛn'm bé sin atin, nán amun se kɛ: «?Nvle sɔ'm be sɔ be amuɛn sɔ'm be sɛ li? E ´nian su e `sɔ be.»

³¹ Nán amun su Anannganman amun Nyanmiɛn'n kɛ be fa sɔ be amuɛn'm be sa. Afin tete sa nga Anannganman klo-mɛn i'n yɛ be yo man be amuɛn mun-ɔn. Be yi be mma yasua nin bla mun sin nun be fa yi sraka man be amuɛn sɔ mun bɔbɔ.