Mmla'n 11 - NYANMIƐN NDƐ'N 1998

Ndɛ nga Moiz kan mannin Izraɛl kpɛnngbɛn mun'n

¹ Amun `klo Anannganman amun Nyanmiɛn'n, amun `fɛ i mmla fanunfanun'm be kwlaa bé su tititi.

² Siɛn'n, nán ba kanngan nga be si-man sa nga Anannganman fa kleli amun'n, bɔ sa sɔ'm be ´ju-ɔ, b'a wun-man nun mun'n yɛ n kan ndɛ nga mun n kle be-ɔ, amun kpɛnngbɛn mun yɛ n kan man amun-ɔn. Amun liɛ'n, amun wunnin fɔ nga Anannganman amun Nyanmiɛn'n ɔ buli sran mun'n, amun wunnin kɛ Anannganman i dan'n fa ti ju'n, amun wunnin kɛ sran fi kwla jrɛn-mɛn i nyrun.

³ Amun wunnin atrɛ ng'ɔ yili mun nin junman ng'ɔ dili be Ezipt lɔ'n. Amun wunnin sa ng'ɔ fa yoli Ezipt famiɛn'n nin i mɛn wunmuan'n.

⁴ Amun wunnin sa ng'ɔ fa yoli Ezipt sonja mun, nin be nnɛn kpanngɔ mun, ɔ nin be kakaklolo mun'n. Amun wunnin kɛ ɔ yoli man ndɛma jenvie ɔ katali be su, yɛ ɔ nunnunnin be i nun bɔ be fuan be'n.

⁵ Amun si nga kusu b'ɔ yoli amun aawlɛ flɛnnɛn'n nun lɔ lele bɔ amu'an fa ju lika nga nun wa yɛ'n.

⁶ Amun si sa ng'ɔ fa yoli Eliab i wa Datan nin Abiram'n. Be ti Ribɛn akpasua'n sufuɛ mun. Asiɛ'n nun kpacili, ɔ mɛnnin be nin be awlofuɛ mun, nin bé tannin sua mun, ɔ nin sran nga be jin be sin'n be kwlakwla kpan .

⁷ Sa dandan nga Anannganman yoli'n, amun wunnin be.

⁸ Ɔ man ndɛ nga n ´kan kle amun ndɛ yɛ'n, amun `fa be sie nan amu'an nyan fanngan, nan amu'an ɔ mɛn nga amun su kɔ i falɛ'n nun lɔ.

⁹ Amun `fa ndɛ sɔ'n be sie, nan amu'an cɛ mɛn nga Anannganman tali nda kɛ ɔ ´fa man amun nannan'm be nin be osu nunfuɛ mun'n nun. Mɛn sɔ'n i asiɛ'n ɔ yo like ye kpa. I kunngba'n ɔ ti nnɛn tawlɛ klanman.

Amun `fa Nyanmiɛn i nuan ndɛ'n be sie nan amu'an cɛ mɛn kpa sɔ'n nun

¹⁰ Mɛn nga amun su wa fɛ i yɛ'n, i asiɛ'n ɔ ti-man kɛ Ezipt mɛn bɔ amun fin nun lɔ'n i asiɛ'n sa. Ezipt lɔ liɛ'n, kɛ a kɔ lua ninnge mun'n, san a ´kpɛ nzue mmuɛ a ´fa nzue ba, nan w'a nyan wie w'a guagua ninnge'm be su kɛ tro fie wie sa.

¹¹ Asiɛ nga amun su wa ko fɛ i yɛ'n, ɔ ti oka-oka lika nin kongo lika ngunmin, yɛ nzue tɔ su titi.

¹² Ɔ ti asiɛ kun bɔ Anannganman amun Nyanmiɛn'n nian su. Kɛ ɔ fɛ i afuɛ'n i bo bolɛ nun lele b'ɔ ´fa ju i awieliɛ'n, Anannganman amun Nyanmiɛn'n i nyin tu-man su.

¹³ Sɛ sakpa amun fa mmla nga n ´fa man amun ndɛkɛn yɛ'n su'n, nan amun klo Anannganman amun Nyanmiɛn'n, nan amun fa amun wla'n kwlaa guɛ i su, nan amun akunndan'n kwlaa trɛn i su'n,

¹⁴ ɔ ju i blɛ-ɔ, ɔ ´tɔ nzue amun asiɛ'n su. Ɔ ´tɔ junman yolɛ blɛ nzue'n, nin wawa nzue'n. Ɔ man amun ´nyan ble, nin nzan, nin ngo kaka.

¹⁵ Ɔ ´yo man ijre nga amun nnɛn'm be di'n, ɔ ´fu amun fie'm bé su. Amun ´nyan aliɛ be di amun ku ´yi.

¹⁶ Amun `nian amún wun kpa. Nán amún ti nun saci, nán amun yaci atin kpa'n lɛ amun ko su amuɛn mun, nán amun koto bé bo.

¹⁷ Sɛ ɔ yo sɔ-ɔ, Anannganman ´fa amún wun ya. Ɔ ´tannin nzue'n, nyanmiɛn su nzue'n su tɔ-man, kpɛkuun fie'm bé su yo-man ye, yɛ mɛn klanman bɔ Anannganman fa mannin amun'n, amun su cɛ-man nun .

¹⁸ An `fa ndɛ sɔ mun `sie amun klun, man be tran amun anwlɛn'n nun tititi. Amun `fa cici amún sa kɛ nzɔliɛ sa, amun `fa sie amun ngban su amun nyinma nnyɔn'm be afiɛn.

¹⁹ Amun `fa kle amun mma mun sɛ an ti amun awlo lɔ o, amun `kan, sɛ amun o atin'n su amun su kɔ lika o, amun `kan, sɛ amun wa la o, sɛ amun tinnge o, amun `kan.

²⁰ Amun `fa be klɛ amun anuan'm be kadri'm be su nin amun klɔ'm be anuan'm bé su.

²¹ I liɛ'n, amun nin amun osu nunfuɛ mun amun ´cɛ mɛn nga Anannganman tali amun nannan'm be nda kɛ ɔ ´fa man be'n i nun. Sɛ nyanmiɛn ng'ɔ la nglo lɔ plaii yɛ'n ɔ nian sin-man'n, wuun amun nian sin-man.

²² Afin sɛ amun fa mmla nga n ´fa man amun yɛ bé sie'n, nan amun fa su'n, sɛ amun klo Anannganman amun Nyanmiɛn'n, nan amun fɛ i atin'n su'n, nan amun fa bé wun mɛntɛn i'n,

²³ Ɔ ´fuan nvle nga be o amun nyrun lɔ'n i nunfuɛ mun, yɛ amun ko fa nvle bɔ be dandan tra amun liɛ'n bɔ i nunfuɛ'm be kekle tra amun'n.

²⁴ Lika kwlaa bɔ amun ja tia lɛ'n, ɔ ti amun liɛ. Amun mɛn'n ´fɛ i aawlɛ flɛnnɛn b'ɔ o ngua lɔ'n nun lele fa ju nglo lɔ lika nun Liban lɔ. Kpɛkuun ɔ ´fɛ i wia afiliɛ lɔ nzue ba dan bɔ be flɛ Efrat'n i nuan lɔ lele ɔ fa ju wia atɔliɛ lɔ jenvie bɔ be flɛ i Mediterane'n i nuan.

²⁵ Sran fi su kwla jran-man amun nyrun. Lika kwlaa nga amun ´kɔ lɛ'n, Anannganman amun Nyanmiɛn'n ɔ ´yo man be ´sro amun yɛ be ´usu amun nyrun kɛ ɔ kan kleli amun'n sa.

²⁶ Muae'n nin sokpalɛ'n yɛ n ´fa sie amun nyrun ndɛkɛn yɛ.

²⁷ Sɛ amun fa Anannganman amun Nyanmiɛn'n i mmla nga n fa man amun ndɛ yɛ'n bé su'n, amun ´nyan muae.

²⁸ Sɛ kusu amu'an ti-man Anannganman amun Nyanmiɛn'n i mmla'n, nan amun yaci atin nga n ´kle amun ndɛkɛn yɛ'n i lɛ amun ko sɔ amuɛn bɔ amun si-man be laa'n, amun ´sokpa.

²⁹ Kɛ Anannganman amun Nyanmiɛn'n ko fa amun ko wɔ mɛn nga amun su ko fa'n nun lɔ'n, amun `jran Garizim oka'n su amun `kan muae ndɛ mun, yɛ amun `jran Ebal oka'n su kusu, amun `kan sokpalɛ ndɛ mun .

³⁰ Oka sɔ'm be o Zurdɛn'n i sin lɔ wia atɔliɛ lɔ atin'n i sin lɔ. Kanaanfuɛ nga be tran Zurdɛn'n i lika kpɛtɛkplɛɛ nun'n be mɛn'n nun lɔ-ɔ. Yɛ be o Gilgal nyrun ndɛnman su lɛ Mɔre oka'm bé wun koko lɔ.

³¹ Zurdɛn'n yɛ amun su wa kpɛ amun ´ko fa mɛn nga Anannganman amun Nyanmiɛn'n ɔ'a fa man amun'n lɛ-ɔ. Kɛ amun fa mɛn sɔ'n, amun ´tran nun lɛ'n,

³² amun `nian nun be nanti mmla fanunfanun nga n ´fa sie amun nyrun ndɛ yɛ'm bé su.