Mmla'n 10 - NYANMIƐN NDƐ'N 1998

Nyanmiɛn yacili bé wun sa'n cɛli be

¹ I blɛ sɔ nun'n, Anannganman seli min kɛ: «Sɛ yɛbuɛ paplaapla nnyɔn kɛ klikli liɛ'm be sa, nan yo waka alaka kun, kpɛkuun fu oka'n su.

² Mmla nga n klɛli i yɛbuɛ paplaapla klikli nga a bubuli be nun'n be su'n, n wa klɛ i kunngba sɔ'n yɛbuɛ nga a wa sɛ be lɛ'n bé su, kpɛkuun fa be sie alaka'n nun.»

³ Yɛ n fali akasia waka n `fa yoli alaka nin-ɔn. Yɛ n sɛli yɛbuɛ paplaapla nnyɔn kɛ klikli liɛ'm be sa-a, nan m'an fu oka'n su lɔ. Kɛ n ´fu'n, yɛbuɛ paplaapla nnyɔn'm be o n sa nun.

⁴ Nan Anannganman ɔ'a klɛ yɛbuɛ paplaapla nnyɔn'm bé su kɛ ɔ fa klɛli klikli liɛ'm bé su'n sa. Ɔ klɛli mmla blu yɛbuɛ sɔ'm be su. Kɛ amun yiali'n, mmla sɔ'n yɛ ɔ jrannin sin nun kan kleli amun nin-ɔn. Kɛ ɔ ´kan'n, wuun ɔ o oka'n su lɔ. I sin ɔ fali be mannin min.

⁵ Yɛ n fin oka'n su lɔ n jrali nan m'an fa yɛbuɛ paplaapla nnyɔn mun m'an sie be alaka'n nun. Be kali alaka'n nun lɛ kɛ Anannganman kan kleli min'n sa.

⁶ I sin'n, Izraɛlfuɛ'm be fɛli i Zakanfuɛ'm be nzue gbo i wun lɛ be ɔli Mɔzera. Lɛ yɛ Aarɔn wuli-ɔ. Be sieli i lɛ, nan i wa Eleazar ɔ'a sin i ajalɛ nun, ɔ yoli Nyanmiɛn nyrun jranfuɛ.

⁷ Izraɛlfuɛ'm be jasoli lɛ be ɔli Gidgɔda, kpɛkuun be fɛli i Gidgɔda lɛ be ɔli Zɔtbata kan nzue ba kpanngban o lɔ'n.

⁸ I blɛ sɔ'n nun yɛ Anannganman sieli Levi akpasua'n sufuɛ'm be ngunmin kɛ be `sua i alaka nin-ɔn. I waan be jrɛn i nyrun be `su i. Yɛ i waan be `fɛ i dunman'n be yra sran'm be nguan. Lele ndɛ be tɛ di i sɔ junman mun.

⁹ I sɔ'n ti yɛ Levifuɛ'm b'a nyan-man asiɛ kɛ be niaan'm be sa nin-ɔn. Be like liɛ nga be nyɛnnin i'n yɛlɛ Anannganman i sulɛ kɛ Anannganman amun Nyanmiɛn'n kan kleli be'n sa.

¹⁰ N kali oka'n su lɔ cɛn ba ablanan kɔnguɛ nin wia su kɛ klikli liɛ'n sa. Anannganman tili min srɛlɛ'n, ɔ man ɔ'a nunnun-man amun.

¹¹ Anannganman seli min kɛ: «Jaso, dun Izraɛlfuɛ'm be nyrun mmua, man be ko fa mɛn nga n tali be nannan'm be nda kɛ n ´fa man be'n.»

Nyanmiɛn waan amun `klo i nan amun `fɛ i mmla'm be su

¹² ?Izraɛlfuɛ mun, like nga Anannganman amun Nyanmiɛn'n waan amun `yo'n yɛlɛ onin? ?Ɔ'a se-man kɛ amun nyin yi i? ?Ɔ'a se-man kɛ amun fɛ i atin su? ?Ɔ'a se-man kɛ amun klo i? ?Ɔ'a se-man kɛ amun su i nan amun fa amun wla kwlaa'n guɛ i su nan amun akunndan'n kwlaa trɛn i su?

¹³ ?Nán i ndɛ nin i mmla nga n ´fa man amun ndɛkɛn yɛ'n i su falɛ yɛ i waan amun fa nan amun wun jɔ amun fɔuun-ɔn?

¹⁴ Afin Anannganman amun Nyanmiɛn'n i liɛ yɛlɛ nglo lɔ lika wunmuan'n nin asiɛ'n nin i su ninnge'n ngba.

¹⁵ Amun nannan'm be kunngba cɛ yɛ Anannganman fɛli i wun mantannin be-ɔ. Be kunngba cɛ yɛ ɔ kloli be-ɔ. Ɔ man nvle'm be kwlaa be nun'n, ɔ fali amun bɔ amun wo lɛ ndɛkɛn yɛ'n, bɔ amun ti be anunman mun'n. Amun si sɔ.

¹⁶ Ɔ man i ti'n, amun `fa amun wun mɛn i mlɔnmlɔn. Nán amun yo nyin kekle i su kun.

¹⁷ Yɛlɛ kɛ Anannganman amun Nyanmiɛn'n ɔ ti dan tra amuɛn'm be ngba. Ɔ ti miɛn'm be Miɛn. Ɔ ti Nyanmiɛn Kpli, ɔ lɛ wunmiɛn, ɔ yo sro, ɔ kpa-man sran nun, be cɛ i like kɛ ɔ jran bé sin-ɔn ɔ yo-man ye.

¹⁸ Ɔ kan aika mma mun nin angboti bla'm bé ti ndɛ, ɔ klo aofuɛ mun, ɔ man be aliɛ be di, ɔ man be tannin be kla.

¹⁹ I sɔ'n ti, amun kusu amun `klo aofuɛ mun, afin amun bɔbɔ amun yoli aofuɛ Ezipt mɛn'n nun lɔ.

²⁰ Amun `nyin yi Anannganman amun Nyanmiɛn'n, amun `su i, amun `fa amún wun `mɛntɛn i. Amun `fɛ i dunman yɛ amun fa ta nda-a.

²¹ I yɛ ɔ ti bɔ amun `mɛnmɛn i-ɔ. Nyanmiɛn ng'ɔ yoli sa dandan'n, Nyanmiɛn ng'ɔ yoli sa sroesroe mun amun bɔbɔ amun nyrun'n, i-ɔ.

²² Kɛ amun nannan'm be ´kɔ Ezipt mɛn'n nun lɔ'n, be ti sran ableso. Yɛ Anannganman Nyanmiɛn'n ɔ'a yo man amu'an sɔn kɛ nyanmiɛn su lɔ nzraama'm be sa yɛ.