Mmla'n 1 - NYANMIƐN NDƐ'N 1998

MOIZ I NDƐ'N KLIKLI'N B'Ɔ KANNIN'N

¹ Kɛ Izraɛlfuɛ'm be tɛ o Zurdɛn'n i bue kun lɔ aawlɛ flɛnnɛn'n nun lɔ lika kpɛtɛkplɛɛ ng'ɔ mantan Zif klɔ'n lɛ'n, Moiz kan ndɛ kleli be kwlakwla. Ndɛ sɔ mun yɛ be o fluwa nga nun-ɔn. Kɛ ɔ ´kɛn i sɔ'n, wuun be o Paran, nin Tɔfɛl, nin Laban, nin Azerɔt, ɔ nin Di-zaab be afiɛn'n nun.

² Kɛ a fɛ i Orɛb oka'n su lɔ bɔ a ´fa ju Kadɛs-Barnea lɛ'n, sɛ a fa Seir oka'm be atin'n, ɔ ti cɛn ba blu-nin-kun nantilɛ.

³ Kɛ Izraɛlfuɛ'm be fin Ezipt mɛn'n nun lɔ bali'n, i afuɛ ablanan'n i anglo blu-nin-kun'n su anglo'n i cɛn ba klikli'n su'n, yɛ Moiz kannin ndɛ nga Anannganman fa wlɛli i nuan'n kleli Izraɛlfuɛ mun-ɔn.

⁴ Kɛ ɔ ´yo sɔ'n, wuun ɔ'a kwla Siɔn b'ɔ ti Amɔr famiɛn'n b'ɔ tran Ɛsbɔn'n, ɔ nin Ɔg b'ɔ ti Bazan famiɛn'n b'ɔ tran Astarɔt nin Edrei'n .

⁵ Zurdɛn'n i bue kun lɔ Moab mɛn'n nun lɔ yɛ Moiz boli mmla sɔ'n i nun yiyilɛ'n bo-ɔ.

Nyanmiɛn waan Izraɛlfuɛ'm be wɔ

⁶ Moiz waan: «Kɛ e o Orɛb oka'n su lɔ'n, Anannganman e Nyanmiɛn'n seli e kɛ: Amu'an tran oka nga bo wa b'a cɛ dan.

⁷ Amun `jaso be wɔ siɛn'n. Amun `wɔ Amɔrfuɛ'm be lika'n b'ɔ ti oka-oka'm be nun lɔ. Kanaanfuɛ'm be lika nga be mantan-mantan lɛ'n, amun `wɔ lɔ. Be lika kpɛtɛkplɛɛ'm be nun o, be lika bɔ be ti oka-oka'm be nun o, be lika tɔnun'm be nun o, ngua lɔ lika'm be nun o, ɔ nin jenvie nuan lɔ lika'm be nun o, amun `wɔ lɔ. Amun `wɔ lele ju Liban lɔ, amun `ju Efrat nzue ba dan'n i nuan lɔ.

⁸ Amun `nian, n fali mɛn ng'ɔ o yɛ'n i kwlakwla mannin amun. Mɛn nga n seli kɛ n ´fa man amun nannan Abraam, nin Izaak, nin Zakɔb, ɔ nin be osu'n nunfuɛ mun'n yɛ ɔ o lɛ-ɔ, amun `ko fa.»

Jɔlɛ difuɛ mun be sielɛ bɔ Moiz fa be sieli'n

⁹ Moiz kɛnnin ekun kɛ: «I blɛ sɔ nun'n, n seli amun kɛ: N kunngba n dun amun nyrun-ɔn ɔ yo-man ye.

¹⁰ Anannganman amun Nyanmiɛn'n ɔ'a yo man amu'an trɛ, amu'an sɔn kɛ nglo lɔ nzraama'm be sa.

¹¹ Man Anannganman amun nannan'm be Nyanmiɛn'n yo nan amun ´trɛ tra nga su kpɛ akpi, nan ɔ `yo amun ye kɛ ɔ kan kleli amun'n sa.

¹² N kunngba n kwla suan-man amun afiɛn ndɛ'm be siesielɛ'n i bo. N kunngba n kwla suan-man like nga amun waan be `yo man amun'n nin amun utre-utre'm be bo.

¹³ Ɔ man amun `nian amun akpasua'm be su nan amun `man min sran nga be si ngwlɛlɛ, bɔ be si sa, bɔ sran'm be bo be dunman kpa'n, nan n `fa be n `sie amún su kpɛnngbɛn.

¹⁴ Amun tɛli min su kɛ: ‹Nga a kɛn i lɛ'n ɔ ti kpa.›

¹⁵ I ti nan m'an fa amun akpasua'm bé su kpɛnngbɛn mun, afin be ti ngwlɛlɛfuɛ, yɛ be bo be dunman kpa, nan m'an fa be m'an sie amún su kpɛnngbɛn. N fali wie mun n sieli sran akpi su kpɛn, n fali wie'm be kusu n sieli sran ya su kpɛn, n fali wie mun n sieli sran ablenun su kpɛn, yɛ n fali wie mun n sieli sran blu su kpɛn. Wie'm be kusu n sieli be amun akpasua kunngun'm bé su kɛ be `nian amun su.

¹⁶ Yɛ n seli amun jɔlɛ difuɛ'm be kɛ: Sɛ ndɛ tɔ amun niaan'm be afiɛn nan be wa kan kle amun'n, amun `tie be ndɛ'n. Sɛ be ti sran nnyɔn'n nan kun ti Izraɛlfuɛ o, nan kun ekun'n ti aofuɛ o, amun `di be ndɛ mun nanwlɛ su.

¹⁷ Nán amun nian sran'm be nyrun be bu ndɛ. Amun `tie sran ng'ɔ lɛ-man nyrun'n i ndɛ'n kɛ amun fa tie sran dan'n i liɛ'n sa. Nán amun yo srongble. Nyanmiɛn dunman nun yɛ amun di ndɛ mun-ɔn. Ndɛ nga amun nian nan amun kwlɛ-mɛn i di'n, amun wa `kan kle min.

¹⁸ I blɛ sɔ nun'n, n kannin i kwlaa nga amun ko yo'n n kleli amun.»

Kanaan mɛn'n i kpla nianfuɛ'm be sunmanlɛ

¹⁹ «I sin e jasoli Orɛb lɔ, e nantili aawlɛ flɛnnɛn dan sroesroe nga amun wunnin i lɛ'n nun, e fali Amɔrfuɛ'm be oka'n i wun lɔ atin'n kɛ Anannganman e Nyanmiɛn'n kan kleli ye'n sa. Yɛ e juli Kadɛs-Barnea lɔ-ɔ.

²⁰ Nan m'an se amun kɛ: ‹Amɔrfuɛ'm be oka nga Anannganman fa mannin ye'n yɛ amu'an ju i bo yɛ.

²¹ Amun `nian, mɛn'n yɛ Anannganman amun Nyanmiɛn'n ɔ'a fa sie amun nyrun yɛ. Amun `nian ndɛ nga Anannganman amun nannan'm be Nyanmiɛn'n kannin'n su, amun `ko fa. Nán srɛ kaan sa kun amun. Nán amun usu.›

²² Kpɛkuun amun wa toli min nan amu'an se min kɛ: ‹E `sunman sran nan be dun mmua ko nian mɛn sɔ'n, nan be `wa kan atin nga e ko fa su'n nin klɔ nga e ko sin be su'n be wun ndɛ `kle ye.›

²³ Akunndan nga amun fa bali sɔ'n, ɔ jɔli min klun. Nan m'an kpa amun nun sran blu-nin-nnyɔn, akpasua kun su sran kun, akpasua kun su sran kun.

²⁴ Yɛ be ´kɔ-ɔ. Be ko kpɛli oka'n, be ko juli Ɛskɔl tɔnun'n nun, be kplali mɛn'n be niannin.

²⁵ Be ´sa bé sin be ´ba-a, be fali mɛn sɔ'n nun lɔ waka mma'n wie be wa kleli ye. Be seli ye kɛ: ‹Mɛn nga Anannganman e Nyanmiɛn'n fa mannin ye'n ti mɛn kpa.›

²⁶ Sanngɛ amun waan amun kɔ-man mɛn sɔ'n nun. Amun yoli nyin kekle Anannganman amun Nyanmiɛn'n i su.

²⁷ Amun ijɔli Anannganman amún tannin sua'm be nun. Amun waan: ‹Kpɔlɛ yɛ Anannganman kpɔ é ti yɛ ɔ fali e Ezipt mɛn'n nun lɔ bali-ɔ, i waan ɔ ´fa e wla Amɔrfuɛ'm bé sa nun kɛ be `kun e ti-ɔ.

²⁸ ?Ninfan cɛ yɛ e ´sin bɔ e ´kpɛn lɔ-ɔ?› E niaan'm be bubuli é sa sin. Be waan: ‹Lɔ sran'm be tɛnndɛn tra ye, yɛ be lɛ wunmiɛn tra ye. Be klɔ'm be ti dandan, talɛ ng'ɔ si klɔ sɔ'm bé wun'n be ti nglo-nglo kpa, be to nyanmiɛn'n lɔ. Yɛ e wunnin Anak i anunman'm bɔ be ti sran blamiɛn'n be lɔ wie bɔbɔ.› »

²⁹ N seli amun kɛ: «Nán srɛ kun amun. Nán an sro be.

³⁰ Anannganman amun Nyanmiɛn b'ɔ dun mmua amun nyrun'n, i bɔbɔ ɔ ´kun amún ti alɛ kɛ ɔ fa yoli i Eziptfuɛ'm bé su amun bɔbɔ amun nyrun'n sa,

³¹ ɔ nin kɛ ɔ fa yoli amun aawlɛ flɛnnɛn'n nun lɔ'n sa. Amun bɔbɔ amun wunnin kɛ Anannganman amun Nyanmiɛn'n lololi amun kɛ sran fa lolo i wa'n sa, ɔ yoli i sɔ atin nga amun nantili nun lele fa juli lika nga nun wa'n.

³² Sanngɛ i blɛ sɔ nun'n, amu'an fa-man amún wla b'a gua-man Anannganman amun Nyanmiɛn'n su.

³³ Kusu wuun i yɛ ɔ dun mmua amun nyrun yɛ ɔ kunndɛ amun ngblaliɛ kpɛwlɛ mun-ɔn. Kɔnguɛ'n, ɔ fa sin'n kpaja amún bo nan amun wun atin nga amun ko sin nun'n. Wia'n nun'n, ɔ fa sin wɛnsrɛn'n kle amun atin'n.

³⁴ Anannganman tili ijɔlɛ tɛtɛ bɔ amun ijɔli'n, nan ɔ'a fa ya. Ɔ tali nda seli kɛ:

³⁵ ‹Akpasua tɛ nga nun sran wie fi nyinma su ta-man mɛn nga n seli be nannan'm be kɛ n ´fa man be'n.

³⁶ Sanngɛ Zɛfine i wa Kalɛb i liɛ'n, ɔ ´wun mɛn sɔ'n. Kɛ bɔ ɔ'a kpɔci-man min'n ti'n, lika ng'ɔ sinnin lɛ'n, n ´fa mɛn i nin i mma mun.›

³⁷ Amun dunman nun ti Anannganman fali ya mín wun. Ɔ seli min kɛ: ‹Ɔ kusu a su ju-man mɛn sɔ'n nun lɔ wie.

³⁸ Ɔ sufuɛ Zozie b'ɔ ti Nɛn i wa'n i liɛ ɔ ´ju lɔ. Cici i wla, afin i yɛ man Izraɛlfuɛ'm be ´fa mɛn sɔ nin-ɔn.

³⁹ Amun mma kanngan bɔ amun waan be wa ka aawlɛ flɛnnɛn'n nun lɔ nan alɛ ´di be'n, ɔ nin amun mma nga kɛ e ´se yɛ'n be nian wun-man tɛ'n nin kpa'n be ngbaciɛ'n, be yɛ be ´ju mɛn sɔ'n nun lɔ-ɔ, be yɛ n ´fa man be-ɔ. Be yɛ be ´fa-a.

⁴⁰ Nan amun liɛ'n, amun `sa amun sin amun `fa ndɛma jenvie'n i atin'n, amun `wɔ aawlɛ flɛnnɛn'n nun lɔ.»

⁴¹ Kpɛkuun amun tɛli min su kɛ: «Fɔnlɛ yɛ e fɔnnin Anannganman i wun-ɔn. Nan sɛ ɔ ti alɛ nin-ɔn, e wa ko kun i kɛ Anannganman e Nyanmiɛn'n waan e yo'n sa.» Amun fali amun alɛ ninnge mun, amun fa be san-sannin amun bo, amun buli i kɛ wuun oka fuɛ'n i falɛ ti pɔpɔ.

⁴² Anannganman seli min kɛ: «Se be kɛ, nán be wɔ alɛ'n kunlɛ, e nin be e nun-man nun. Sɛ be kɔ-ɔ, be kpɔfuɛ'm be ´kwla be.»

⁴³ N kɛnnin sɔ n kleli amun, sanngɛ amu'an fa-man amun ti b'a de-man. Amun yoli nyin kekle Anannganman su. Amun sili amun wue nun be ɔli oka-oka lika'n nun lɔ,

⁴⁴ nan Amɔrfuɛ nga be tran oka sɔ'm be nun'n be nin amun b'a yia nun Seir lika'n nun lɔ. Be suli amun su kɛ awɛma'm be su fuan sran sa lele be kpɛnnin Ɔrma.

⁴⁵ Be kwlali amun. Amun sali amun sin be bali, amun wa sun kleli Anannganman. Anannganman ɔ'a tɛ-man amun su, ɔ'a bua-man amun ndɛ nun.

⁴⁶ Amun trannin Kadɛs lɛ cɛli lɛ lɔuun kpa.