Mise 7 - NYANMIƐN NDƐ'N 1998

Nyanmiɛn nuan ijɔfuɛ'n Mise i awuyomo bolɛ

¹ Be `nian nyrɛnnɛn bɔ n wo nun-ɔn! M'an yo kɛ sran bɔ b'a ti waka mma b'a sin, kpɛkuun ɔ'a ɔ i osu nun nian-nianlɛ'n sa. M'an ɔ vinyi sɔsɔwa kunndɛlɛ. N ´ju lɔ-ɔ vinyi sɔsɔwa waan: ?A sieli min nin? Figie mma nga min konvi o su'n ɔ'a tu anunman.

² Cuekee! Sran nga be nin Nyanmiɛn be tran klanman'n b'a wie mɛn'n nun, sran fi di-man nanwlɛ kun. Sran kunlɛ akunndan'n yɛ be bu-ɔ, ɔ lɛ-man be nun kun, be sua-sua be wiengu wun aya.

³ Sa tɛ'n, b'a yo i lele b'a si i yo kekleke. Kpɛnngbɛn mun nin jɔlɛ difuɛ'm be mianmian sran mun kɛ be man be ninnge mun. Sran dandan'm be kusu be like liɛ kun nga be waan be ´fɛ i sran sa nun'n, be fia-man bé wun, be fɛ i wue kekle su.

⁴ Be nun kun ng'ɔ flunman kan'n, i like b'ɔ fɛ i'n yɛlɛ ako owie. Be nun nanwlɛfuɛ'n i gblɛ'n i tɛ'n tra agualɛ. Amun fɔ tulɛ cɛn nga amun klɔ sasafuɛ'm be kɛnnin i ndɛ'n kusu yɛ ɔ ´ba lɛ. Nanwlɛ, kɛ e ´se yɛ'n, amun klun titi amun.

⁵ Nán an fa amún wla guɛ i amun janvuɛ'm be su. Sran nga bɔ yɛ amun nin i be ti koko nnya nun-ɔn, ɔ ti-man'n, nán an fa amún wla guɛ i su .

⁶ Afin ba yasua'm be kpɛ bé si nzowa, ba bla'm be nin be nin mun be kpɛ ndɛ, bla'm be nin be sewi'm be kpɛ ndɛ. Sran'm be kpɔ be bɔbɔ be awlo'n nunfuɛ mun .

⁷ Min liɛ'n, Anannganman nyrun yɛ min nyin ta-a. Nyanmiɛn b'ɔ de min'n i su yɛ n lafi-ɔ. Min Nyanmiɛn'n ɔ ´ti min aniɛn.

Nán an sri Izraɛlfuɛ mun, Anannganman'n ´jran bé sin cɛn wie!

⁸ E kpɔfuɛ mun nan, nán an sri ye. E tɔli sɔ, sanngɛ e ´jaso. Aosin'n li ɔ'a lu ye su sɔ, sanngɛ Anannganman'n ti é kannin.

⁹ Sɛ Anannganman'n fa é wun ya'n, i su-ɔ, afin e fɔnnin i wun. Sanngɛ ɔ ju i blɛ-ɔ, Anannganman ´jran é sin, ɔ ´di é ti ndɛ, ɔ ´yi ye fite weiin nun. I sɔ sa kpakpa ng'ɔ yo man ye'n, e bɔbɔ e ´wun i .

¹⁰ Kɛ e kpɔfuɛ'm be wun i sɔ'n, be ´wun nyannzuɛn afin be usali kɛ: «?Ai! Anannganman amun Nyanmiɛn kpa'n, nguɛ yɛ ɔ o lɛ yo-ɔ? Kɛ be wa nanti be su kɛ akpɔ su fa sa'n, wuun e ´nian be e ´sri.»

¹¹ Cɛn wie lele be si amun klɔ'n i wun talɛ'n ekun. I sɔ cɛn'n nun'n, be ´trɛ amun mɛn'n nun .

¹² I sɔ cɛn liɛ'n nun sran'm be ´fin Asiri nin Ezipt lɔ be ´ba. Be ´fin Ezipt nzue ba'n nin Efrat nuan lɔ be ´ba. Be ´fin jenvie'm bé nuan nin oka'm be su be ´ba.

¹³ Mɛn'n ɔ ´bo, sran nga be tran nun'n be aeliɛ tɛtɛ'n ti mɛn'n ɔ ´bo.

¹⁴ Anannganman, ɔ kpɔnman nga a fa kankan nnɛn'n, fa nan fa kankan ɔ mɛn'n nunfuɛ mun, be ti ɔ liɛ. B'a cuɛn bé wun be gua bo ble wie afiɛn. Fa be kɔ Bazan nin Galaad mɛn'n nun lɔ nan be ko di like kɛ a fa yo i laa'n sa.

¹⁵ Yo abonuan sa mun man be kɛ laa bɔ be fin Ezipt lɔ be ´ba bɔ a yoli'n sa.

¹⁶ Man mɛn kun nga'm be nunfuɛ'm be ´yo kwlafuɛ sɛ, sanngɛ kɛ be wun i sɔ sa liɛ mun'n, be nyin ´gua ase. Be su si-man wie se, ɔ ´bo bé nuan .

¹⁷ Be ´nɔn ndutre'n kɛ wuo nin nnɛn nga be cuɛn bé wun ase'n be sa. Be ´fin be fiawlɛ'm be nun be ´ba-a be lɛ usulɛ. Be ´ba wɔ Anannganman bɔ a ti e Nyanmiɛn'n ɔ sin, srɛ ´kun be, be wa sro wɔ.

¹⁸ Nanwlɛ, Anannganman, like wie fi nin wɔ sɛ-man. Ɔ mɛn'n nun sran nga b'a wu-man'n, a nian be lika, yɛ kusu sa tɛ nga be yoli'n, a yaci cɛli be. A fa-man ya sie-man ɔ klun, afin a tu ɔ klun a yo klun-ufue.

¹⁹ A ´si ye aunnvuɛ ekun, a su bu-man é sa tɛ'm be akunndan, a ´to é sa tɛ mun a ´guɛ i jenvie'n nun .

²⁰ A nin Zakɔb osu nunfuɛ mun amun ´tran klanman, a ´yi ɔ klun-ufue'n i nglo ´kle Abraam i osu'n nunfuɛ mun. A ´yi kle be kɛ a fua kleli e nannan mun lalafuɛ nun'n sa .