Mise 6 - NYANMIƐN NDƐ'N 1998

Anannganman nin Izraɛl be afiɛn jɔlɛ

¹ An `sie amún su be `tie ndɛ nga Anannganman kan'n. Ɔ se min kɛ yoo: «Jaso, a nin oka mun be `ko kan ndɛ. Man ɔ nɛn'n su man kpɔlɛ'm be ti.»

² Oka mun nin asiɛ bɔ oka'm be bo'n taka su'n, amun `sie amún su, Anannganman nin i mma'm b'a nyan ndɛ, ɔ'a fa ndɛ ɔ'a mian Izraɛlfuɛ'm bé sa. I waan Izraɛlfuɛ'm b'a yo i sa.

³ Ɔ usa be kɛ: «?Min sran mun, nguɛ sa yɛ n yoli amun-ɔn? ?Tɛ onin yɛ n yoli amun-ɔn? An `kan man n ti.

⁴ ?Kɛ amun wo Ezipt lɔ bɔ amun ti kanga'n, bɔ n ko deli amun'n, bɔ n fali amun lɔ m bali'n, bɔ n yili Moiz, nin Aarɔn, ɔ nin Mari kɛ be dun mmua amun nyrun'n, tɛ yɛ n yoli amun-ɔn?

⁵ Min sran mun, akunndan nga Balak b'ɔ ti Moab famiɛn'n buli i amun wun'n, nin ndɛ nga Bɛɔr i wa Balaam fa tɛli i su'n, man amun wla kpɛn su. Sunmanlɛ nga kɛ amun fɛ i Sitim lele be fa juli Gilgal bɔ n ko sunmannin amun'n, man amun wla kpɛn su. Amun wla kpɛn su kɛ ɔ ´yo nan amu'an wun aklunye nga m bɔbɔ min Anannganman n yoli amun'n ti .»

Like ng'ɔ ti bɔ sran yo'n

⁶ «?Kɛ e ´ko yi tɛ e ´man Anannganman bɔ like fi nun-mɛn i sin'n, nguɛ like yɛ e `fa ko mɛn i-ɔ? ?Nannin ba nga be lɛ afuɛ kunngun'n be yɛ be `fa be ko yi tɛ nga, be yra be nnɛn'n kɔlikɔli'n be `mɛn i-ɔ?

⁷ ?Bua nene kaka yɛ Anannganman kunndɛ-ɔ? ?Ngo kaka yɛ Anannganman kunndɛ-ɔ? ?Nyin kekle bɔ e yoli i su, ɔ nin sa tɛ bɔ e yoli'n ti e `fa e klun ba klikli nga e wuli be'n e `mɛn i nan ɔ'a guɛ i ya'n i ase?»

⁸ Atin ng'ɔ ti atin kpa'n, bɔ Anannganman waan amun fa su'n, like nga i waan amun yo'n, be dun mmua kan kleli amun. Like nga i waan amun yo'n yɛlɛ kɛ i waan nán an bu amun wiengu lufle, klun-ufue su like'n yɛ amun `yo-ɔ, yɛ atin nga amun Nyanmiɛn'n kle amun'n, amun `fa su nin amun wun ase kanlɛ .

Sa nga klɔfuɛ'm be si-mɛn i'n, Anannganman wa kle be

⁹ Anannganman se klɔfuɛ'm be kɛ be nga bé nyin yi i'n, be ´nyan bé ti. «Zida akpasua sufuɛ mun, amun kwlaa nga amun yia klɔ'n su yɛ'n, an `tie!

¹⁰ Ninnge nga sran tɛtɛfuɛ'm be wuali b'ɔ si bé sua'm be nun'n, ɔ nin be toe bɔ be kpɛ i kilo'n su'n, i sɔ tete like liɛ'n, n su yaci cɛ-man be.

¹¹ Be bɔ be kpɛ be toe'n i jayɛbuɛ'm be su, bɔ be jayɛbuɛ ng'ɔ o be pata'n nun'n ti-mɛn i su'n, n yaci n cɛ-man be .

¹² Klɔ nga su anyanbeunfuɛ mun, sa tɛtɛ'n yɛ be waan be `fa man be nan be yo-ɔ. Klɔ sufuɛ mun bé nuan nun ndɛ'n ti nnyɔn-nnyɔn, gblɛ'n yɛ be waan be `fa man be nan be kpɛ-ɔ.

¹³ I sɔ'n ti kusu sa nga n ´fa wla amun nun'n ti-man blɛblɛ, amún tɛ'm be dunman nun ti. Sa nga amun si-mɛn i'n, n wa kle amun.

¹⁴ Aliɛ nga amun ´nyɛn i be ´di'n, ɔ su yi-man amun klun. Awe'n ´kun amun. Like nga amun waan amun ´fa sie'n, ɔ su ka-man lɛ. like ng'ɔ ka lɛ'n n ´yo man alɛ'n ´di.

¹⁵ Amun ´lua ninnge mun, sanngɛ an su nyan-man nun like fi. Amun ´yi olivie ngo, sanngɛ an su nyan-man wie yo-man like fi nun. Amun ´yi nzan, sanngɛ an su nɔn-man.

¹⁶ Famiɛn Ɔmri ɔ nin i wa Akab i awlofuɛ'm bé sa tɛtɛ nga be yo'n, i su yɛ amun nian-an. Like nga be yo'n, yɛ amun yo-ɔ. I sɔ'n ti amun klɔ'n ɔ ´bo. Amun kusu bɔ amun wo klɔ'n su'n, srisrilɛ yɛ be ´srisri amun-ɔn. Nyannzuɛn trɔ nga bɔ yɛ ɔ jin min mɛn wunmuan'n i ti su yɛ'n, amun yɛ amun ´suɛ i sɔ nyannzuɛn trɔ liɛ nin-ɔn.»