Mise 4 - NYANMIƐN NDƐ'N 1998

Zerizalɛm wa yo fɔundi klɔ

¹ Cɛn wie lele Anannganman i kpɔlɛ'n su sua'n, oka ndɛnndɛn kpa'm bé ti su lɔ yɛ be ´ko kplɛn i-ɔ. Kpɛkuun mɛn nunfuɛ'm be kwlaa be ti wa yia lɛ.

² Nvle-nvle be nunfuɛ mun be ´tu ajalɛ be ´kɔ, be ´se kɛ: «An `bla man e wɔ Anannganman i oka'n su lɔ. E `wɔ Zakɔb i Nyanmiɛn'n i sua'n nun lɔ nan ɔ `kle ye kɛ e `nanti'n, nan e `nanti i atin'n su, afin Siɔn lɔ yɛ mmla'n fin-ɔn. Zerizalɛm lɔ yɛ Nyanmiɛn ndɛ'n fin ba-a.»

³ Ɔ wa yo sran kpanngban be jɔlɛ difuɛ. Man i li mɛn dandan kpa'm be tran mmua sɛ, sanngɛ ɔ ´kan be afiɛn ndɛ. Be ´fa be tokofi mun be ´bo sue, be ´fa be cua mun be ´bo wlɔsɔ. Nvle kun su fa-man alɛ wlɛ-mɛn i nvle uflɛ sin kun, be su sɔnnzɔn-man alɛ kunlɛ kun .

⁴ Sran'm be ´di vinyi fie nin be olivie fie fɔuun, sran fi su wla-man bé nyin nglo-nglo kun. Anannganman b'ɔ sie mɛn wunmuan'n yɛ ɔ kɛn sɔ kle wɔ-ɔ .

⁵ Like nga nvle kun nga'm be ko yo nan ɔ'a jɔ be amuɛn'm be klun'n, yɛ be yo-ɔ. E kusu e liɛ nga e ko yo nan ɔ ko jɔ Anannganman e Nyanmiɛn'n i klun titi'n yɛ e yo-ɔ.

Zerizalɛm ɔ wa sɛ i sin yo famiɛn klɔ ekun

⁶ «Cɛn kun ɔ wa ju bɔ bua nga bé ja buli'n, n ´fa be n ´sie-ɔ. Sran nga be mlinnin'n, be nga n yoli be tɛtɛ'n, n ´yiayia be.

⁷ N ´tian be nga be ja buli'n, be nuan kɛ ɔ ´yo nan nvle'n ɔ'a nunnun-man'n ti. Be nga be ɔli mmua'n be kusu, n ´fa be n ´yo nvle dan kpa. Kpɛkuun m bɔbɔ min Anannganman'n, kɛ ɔ fɛ i sɔ cɛn liɛ'n nun lele b'ɔ ´fa yo kɛ ɔ ´yo'n, min yɛ n ´yo be siefuɛ Siɔn oka'n su lɔ-ɔ.

⁸ Zerizalɛm kpɔlɛ, wɔ bɔ a ti kɛ min nnɛn'm be sasawlɛ lika sa'n, ɔ ka kaan a ´sa ɔ sin ´sie mɛn'n ekun kɛ laa'n sa. Zerizalɛm ɔ ´sɛ sin ´yo famiɛn klɔ ekun.»

Zerizalɛmfuɛ'm be afɛ'n

⁹ ?Izraɛlfuɛ mun, onin yɛlɛ awuyomo nga amun bo i yɛ'n? ?Famiɛn nun-man amun su kun ti-ɔ? ?Nguɛ ti yɛ amun kpita bé wun ase kɛ bla wie bɔ awuliɛ ɔ'a to i sa nin-ɔn? ?Amun ngwlɛlɛ klefuɛ mun b'a wie wu ti-ɔ?

¹⁰ Ɛɛn, an `kpita bé wun ase kɛ bla bɔ awuliɛ ɔ'a to i'n sa. Afin amun wa jaso klɔ'n su wa be ´ko la blo. Amun ´kɔ lele be ´ju Babilɔni lɔ kwlaa nan amu'an nyan amún ti, nan Anannganman'n ɔ'a de amun amun kpɔfuɛ'm bé sa nun.

¹¹ Kɛ e ´se yɛ'n, mɛnfuɛ nga bé bo ɔ'a yo kun amún wun'n be sɔnnin. Be ijɔ be se kɛ: «Man Izraɛl sokpa nan e niɛn i.»

¹² Sran sɔ'm be si-man sa nga Anannganman ɔ'a gugu ɔ'a sie'n. Be si-man like ng'ɔ o i klun kɛ ɔ ´yo'n. Be si-man kɛ ɔ su tian bé nuan kɛ ble sɔlɛ bɔ be su wa kpukpu be ble bolɛ lika'n su'n sa.

¹³ «Siɔnfuɛ mun, an `jaso be `kpukpu ble'n. Ɔ ti wunmiɛn-ɔn, m ´man amun. Amun ´nyan wunmiɛn kɛ nannin b'ɔ lɛ blalɛ wɛ'n sa, kɛ nannin b'ɔ lɛ aaba ja bui'n sa. Amun ´nunnun nvle dandan mun, kpɛkuun bé bo ninnge nga an isa'n, an ´fa man min bɔ n sie mɛn wunmuan'n .»

¹⁴ Sanngɛ Zerizalɛmfuɛ mun, le nnyɔn nga nun amun wa bobo amún wun ngɔlɛ sa yalɛ'n dunman nun. An `yiayia amun sonja mun. Amun kpɔfuɛ'm b'a bo b'a sin b'a yia amun klɔ'n, be su finfin Izraɛl kpɛn'n i nyrun nun nyantiaan.