Mise 3 - NYANMIƐN NDƐ'N 1998

Izraɛl kpɛnngbɛn'm be `nian bé wun

¹ Zakɔb anunman'm bé su kpɛnngbɛn mun, Izraɛl nvle'n nun jɔlɛ difuɛ mun, an `sie amún su man n kan ndɛ n `kle amun. ?Nán amun yɛ ɔ fata bɔ an si mmla nin-ɔn?

² Sanngɛ kpɛkuun sa kpa'n, amun klo-mɛn i yolɛ, san sa tɛfuɛ'n cɛ yɛ amun klo i yolɛ-ɔ. An yi sran'm bé kplo'n nin be nnɛn'n, kpɛkuun be owie ngbɛn'n gua su.

³ Be di min sran'm be nnɛn'n, be yi bé kplo'n, be bu be owie mun, be kpɛkpɛ be nun kpekpe kɛ nnɛn bɔ be su fa wlɛ i sɛ nun be ´tɔn'n sa.

⁴ I sɔ'n ti, cɛn nga be wa kpan flɛ Anannganman'n, ɔ su tɛ-man be su. Ɔ ´kaci i sin si be, be sa tɛ nga be yoli'n ti .

Be nga be tɔn be wun suɛn kɛ be ti Nyanmiɛn nuan ijɔfuɛ'm be wun ndɛ

⁵ Ndɛ nga Anannganman kan man be nga be tɔn be wun suɛn kɛ be ti Nyanmiɛn nuan ijɔfuɛ be lakalaka i mɛn nunfuɛ mun'n yɛ: «Be bɔ sran ng'ɔ cɛ be like'n be se i kɛ: ‹Sa tɛ fi su nyan-man wɔ'n,› nga kusu bɔ ɔ'a man-man be like-ɔ, be nin i be lɛ i'n,

⁶ i ti siɛn'n, aolia nun like ng'ɔ ´ba'n, amun lafi kɔnguɛ-ɔ, amun su wun-mɛn i kun. Amun su cɛn-man laliɛ kun, amun tɛ wun-man ase kun, amún ti nun ´si.»

⁷ I sɔ blɛ'n nun'n, be nga bé ti wun ase'n be ´wun nyannzuɛn. Nyannzuɛn'n dunman nun ti be ´kata bé nyin, afin be flɛ Nyanmiɛn-ɔn, ɔ su tɛ-man be su kun.

⁸ Sanngɛ min liɛ'n, n lɛ wunmiɛn kpa. Anannganman i Wawɛ'n i fanngan nun ti srɛ kun-man min nanwlɛ dilɛ'n nun. Sa tɛ nga Zakɔb i osu nunfuɛ'm be yo'n, sa tɛ nga Izraɛlfuɛ'm be yo'n, n ´kan kle be weiin.

Izraɛl kpɛnngbɛn'm be dunman nun ti, Siɔn ɔ wa bo mlɔnmlɔnmlɔn

⁹ Zakɔb anunman'm bé su ngbɛn mun, Izraɛl jɔlɛ difuɛ mun, amun yɛ n kan ndɛ nga m man amun-ɔn. Amun bɔ an klo-man nanwlɛ dilɛ, bɔ gblɛ'n yɛ amun kpɛ'n,

¹⁰ amun bɔ sran kunlɛ'n yɛ an fa kplan Siɔn'n, bɔ klunwi aeliɛ'n yɛ an fa kplan Zerizalɛm'n, b'ɔ ti Nyanmiɛn i klɔ'n,

¹¹ sa ti bɔ n flɛ amun'n yɛlɛ kɛ klɔ'n su jɔlɛ difuɛ mun'n, sran ng'ɔ cɛ be like'n, i yɛ be bu i ndɛ'n klanman-an. Nyanmiɛn nyrun jranfuɛ'm be kusu be tannin be kalɛ nan b'a kle Nyanmiɛn i mmla mun. Nyanmiɛn nuan ijɔfuɛ'm be kusu, sɛ be ´kan Anannganman i nuan su ndɛ'n, san b'a tannin be kalɛ. Sanngɛ be yo bé wun kɛ Anannganman su yɛ be lafi sa. Be ko se kɛ: «?Anannganman nin ye o nun kwlaa nin-ɔn, nguɛ sa cɛ yɛ ɔ kwla nyan ye-ɔ ?»

¹² Amun dunman nun ti, Siɔn ´kaci kɛ fie wie bɔ b'a tu i su kacɛ'n sa. Zerizalɛm ´bubu mlɔnmlɔnmlɔn, oka nga Nyanmiɛn i sua'n kplan su'n ɔ ´kaci bo .