Mise 2 - NYANMIƐN NDƐ'N 1998

Kpɛnngbɛn nga be yo sran'm be tɛtɛ'n

¹ Be nga sa tɛ'n yɛ be bu i akunndan'n, bɔ be la kɔnguɛ-ɔ, be bu be sie, bɔ sɛ be nyɛn i jranwlɛ'n bɔ wia'n kwla tɛ-man, wuun be su yo i sɔ sa'n, be yako!

² Sɛ fie wie yɛ bé nyin blo su'n, san be ´fa. Sɛ kusu awlo wie yɛ be waan be ´fa'n, san i falɛ yɛ be ´fa-a. Be fɛn sran mun nin be awlofuɛ'm bé bo ninnge mun. Sran'm be osu'n nun be asiɛ mun bɔ be ti kɛ be aja like sa'n, be fa gblɛ be de bé sa nun .

³ I ti man Anannganman wan yoo: «Sran tɛtɛ kɛ amun sa'n, m'an dun mmua m'an bu amún nyrɛnnɛn klelɛ'n i akunndan m'an sie, an su fin-man nun be fite-man. Siɛn'n, sɛ amun ´nanti-ɔ, amun su kwla-man amún ti'n su man kun, afin i sɔ blɛ liɛ'n ´yo nyrɛnnɛn blɛ.»

⁴ Blɛ sɔ nun'n, be ´fa amun be ´kpɛ flɛn, be ´kpɛ amun wun nyrɛnnɛn jue. Jue sɔ'n be ´to be ´se kɛ yoo: «B'a wie é bo ninnge'm be fa mlɔnmlɔn, b'a de e mɛn nunfuɛ'm bé sa nun asiɛ'n kwlaa kpan. Be nga be kan e bo e fie'm be su'n, be bɔbɔ be kunngba'm be bli bé nyin be cɛ nun be fa. ?Ɔo, nguɛ sa ti yɛ man be kuankuan é bo weinwein sɔ-ɔ?»

⁵ I sɔ'n ti kusu kɛ Anannganman i nvle nunfuɛ'm be wa sunnzun asiɛ'n bɔ be ´cɛcɛ'n, amun nun sran fi sa su nyan-man wie .

Be bɔ be bu-man Mise i ndɛ'n i nanwlɛ'n

⁶ Sran wie'm be ko se kɛ yoo: «Ndɛ finfin nga be kɛn i kɛ yoo: ‹San sa yalɛ ´tɔ e su'n,› i sɔ ndɛ finfin liɛ'n be `yaci i kanlɛ man e ti sa.

⁷ ?Kɛ ɔ ´yo sɔ'n, wuun Izraɛl nvle kpa'n, sannzan o i su ti-ɔ? ?Anannganman kpa'n, kɛ ɔ fa ya ndɛndɛ titi sɔ-ɔ?» Sanngɛ ndɛ nga n kɛnnin i lɛ'n, ɔ ti be nga be yo sa i nuan su'n be cenjele ndɛ.

⁸ Anannganman waan: «Amun fa min nvle nunfuɛ mun kaci amun kpɔfuɛ. Sran nga be fin alɛ kunlɛ be ´ba-a, be klun ti-man be'n, kpɛkuun amun ko de i sɔ sran liɛ'm be tralɛ kpa nga be nyɛnnin i'n bé sa nun.

⁹ Awlo nga min nvle'n nun mmla'm be klo nun tranlɛ'n, amun ko kankan be bo i nun. Kpɛkuun anyrunnyan nga n fa mannin be mma mun'n, an deli bé sa nun.

¹⁰ An `sin be wɔ! Pɔɔ dilɛ'n wieli! Sa tɛ nga amun yoli'n i su afɛ nga an wa fɛ'n, be flɛ-mɛn i afɛ.»

¹¹ Sɛ sran wie kpɛ i ti nun se kɛ: «Nyanmiɛn waan: ‹Amun ´nyan nzan nin nzan kekleekle mun'n,› i sɔ sran finfinfuɛ liɛ'n yɛ an bu i Nyanmiɛn nuan ijɔfuɛ-ɔ .»

Izraɛlfuɛ nga be ka'n, Nyanmiɛn ɔ wa yiayia bé

¹² Anannganman wan yoo: «Zakɔb osu nunfuɛ mun, n wa yiayia amun, n ´kan Izraɛlfuɛ nga be ka mun m ´bo nun. N ´tian amún nuan kɛ bua'm bɔ be o klangla nun'n sa, n ´tian amun nuan kɛ nnɛn bɔ b'a tian bé nuan be didiwlɛ nun'n sa. Amun `bo nzra dan kpa, amun `ijɔ kpa ekee!

¹³ Sran ng'ɔ dun mmua amun nyrun'n, yɛ ɔ ´bo atin nin-ɔn. I fanngan nun man talɛ ng'ɔ si amun wun'n, amun ´kpɛ nun toklo amun ´fite. Amun famiɛn Anannganman yɛ ɔ ´dun mmua amun nyrun-ɔn .»