Mise 1 - NYANMIƐN NDƐ'N 1998

¹ Zida famiɛn mun Zɔtam nin Akaz, ɔ nin Ezekias be blɛ su'n Anannganman fa ndɛ wlali Mise b'ɔ fin Mɔresɛt'n i nuan kɛ ɔ kan . Aolia nun sa ng'ɔ wunnin i Samari klɔ'n nin Zerizalɛm klɔ'm bé wun ndɛ-ɔ:

Anannganman nin i sran mun b'a nyɛn i

² Nvle-nvlefuɛ mun, amun kwlaa amun `sie amun su `tie. Asiɛ, a nin be nga be tran ɔ su'n be kwlaa amun `sie amún su kpa! Anannganman'n fin i tranwlɛ lɔ ´ba, ɔ nin amun be wa yia nun.

³ Sakpa, Anannganman yɛ ɔ fin i tranwlɛ'n nun lɔ ɔ su ba yɛ, ɔ su jra, ɔ su nanti asiɛ'n su oka'm bé ti su nglo lɔ .

⁴ Kɛ ɔ ´nanti ba'n, wuun oka'm be ´kan ase. Kongokongo'm be kusu be klo, be klo kɛ sin ɔ'a kan awɛma'm be sua nan ɔ su klo sa. Be sonji kɛ wie kusu-ɔ nzue ɔ'a kpɛn ndroliɛ nun nan ɔ su sonji sa.

⁵ Sa ti bɔ i sɔ ninnge'm be ´yo'n, yɛlɛ sa tɛ bɔ Zakɔb i osu nunfuɛ mun be yoli'n, yɛlɛ tɛ bɔ Izraɛl nvle'n yoli'n. ?Zakɔb i osu nunfuɛ'm bé sa tɛ'n bɔ be yo'n i bo'n ɔ fin wan? I bo'n fin Samarifuɛ mun. ?Zidafuɛ'm be kusu be amuɛn sɔlɛ'n i bo'n ɔ fin wan? I bo'n fin Zerizalɛmfuɛ mun.

⁶ «I sɔ'n ti n ´yo man Samari mɛn'n ɔ ´bubu, ɔ ´kaci vinyi fie diwlɛ. Yɛbuɛ nga be fa kplannin'n be ´ka ijre nun, be ´kondo be ´gua kongo'n nun lɔ, i bo ase wlawlɛ'm be ´fite su .

⁷ I amuɛn'm be kwlaa be nun ´wie bubu. Sa tɛ junman nga i nunfuɛ'm be dili'n i nuan ninnge nga be nyɛnnin i'n, be ´to be guɛ i sin nun. Amuɛn nga be sili tekle yɛ be toli be'n, n ´saci be. Afin i sɔ amuɛn mun'n, tekle bɔ be sili'n, i nuan sika yɛ be fa toli be-ɔ. Ɔ man ninnge sɔ'm be kusu be ´yo tekle uflɛ silɛ nuan akatua.» Anannganman'n yɛ ɔ kan sɔ-ɔ.

Nyrɛnnɛn'n ɔ'a tɔ Zerizalɛm su

⁸ I sɔ'n ti n ´sun, n ´koko, n ´nanti mín ja ngbɛn ɔ nin mín wun ngbɛn. N ´kpan kɛ nsoso sa, n ´kplin kɛ klɔnsoklo sa.

⁹ Afin yɛlɛ kɛ Samari i wie like yɛ ɔ'a yo i lɛ. Kpɛkuun like sɔ'n ɔ'a sa Zida, ɔ'a trɛ i lele ɔ'a ju Zerizalɛm klɔ'n i anuan'n nun, ɔ'a ju min nvlefuɛ'm be tranwlɛ'n i anuan'n nun.

¹⁰ Nán be bo jasin nga Gat lɔ, nán an sun man be ti i lɔ, amun `di la kondo ndutre'n nun Bɛt-leafra lɔ.

¹¹ Safirfuɛ mun, an `fa amun nyrun nyannzuɛn'n nin amun wun ngbɛn'n be `sin be wɔ. Ɔ kle-man Zaananfuɛ'm be kɛ be `fin klɔ'n nun be `fite, nyinmuɛn'n b'ɔ o Bɛt-Aɛzɛl nyin bo'n ti. Ɔ man an kunman be kɔ i su-ɔ ɔ yo-man ye kun.

¹² Marɔtfuɛ'm bé wun usu be afin be wun-man kɛ be yo nan b'a di alaje-ɔ. Afin nyrɛnnɛn nga Anannganman fa ba'n ɔ'a tɔ Zerizalɛm su wie. Anannganman'n yɛ ɔ nin i ba-a.

¹³ Lakisfuɛ mun, amun `tanndan amun nnɛn kpanngɔ mun. Sa tɛ nga Izraɛlfuɛ'm be yoli'n, amun niannin su be yoli wie. Kpɛkuun amun kusu amun wlawlali Zerizalɛmfuɛ mun man bé nyin yoli kekle.

¹⁴ I sɔ'n ti, amun nin Mɔresɛt-Gatfuɛ mun amun afiɛn ´fɔn. Akzib klɔ'n sufuɛ'm be kusu, Izraɛl famiɛn'm be ´fua be-ɔ, be ´fua be wati.

¹⁵ Maresafuɛ mun, Anannganman'n man kwlafuɛ uflɛ ɔ wa fa amun mɛn'n. Izraɛl kpɛnngbɛn'm be wa ko fia Adilam yɛbuɛ buɛ'n nun .

¹⁶ Amun mma bɔ amun klo be'n ti, an `yi amún ti mun. Amun `kpu amun ti'm be su, amun `kpu be su treketreke kɛ apɛtɛkuasi liɛ'n sa, afin be su wa tra amun mma mun ´kɔ mɛn wie nun.