Matthieu 9 - NYANMIƐN NDƐ'N 1998

Jésus yoli bubuwafuɛ kun juejue

¹ Jésus fuli alie'n nun ɔ kpɛli fɛtɛ'n, ɔ sɛli i sin i klɔ lɔ.

² Be sua bubuwafuɛ kun tɛ nun blɛli i. Kɛ Jésus wunnin kɛ be lafi i su'n, ɔ seli bubuwafuɛ'n kɛ: «N wa, gua ɔ́ wla ase, sa nga a yoli Nyanmiɛn'n ɔ'a yaci a cɛ wɔ.»

³ Kɛ ɔ seli i sɔ'n, mmla klefuɛ wie'm be bu i akunndan se kɛ: «Bian nga saci Nyanmiɛn dunman.»

⁴ Jésus wunnin be akunndan'n, nan ɔ'a se kɛ: «?Nguɛ ti yɛ amun akunndan'n ti tɛ sɔ-ɔ?

⁵ ?Kɛ be se kɛ, Nyanmiɛn a yaci sa nga a yoli i'n ɔ'a cɛ wɔ'n, annzɛ, jao nanti kɔ'n, i nnyɔn'n, onin yɛ i kanlɛ ti pɔpɔ tra kun-ɔn?

⁶ An `jran man n kle amun weiin kɛ m bɔ n kacili Sran'n n lɛ atin asiɛ'n su wa bɔ n yaci sa nga be yo Nyanmiɛn'n cɛ be-ɔ.» Ɔ seli bubuwafuɛ'n kɛ: «Jao fa ɔ́ bɛ'n kɔ wɔ awlo.»

⁷ Ɔ jaoli, nan ɔ'a wɔ i awlo.

⁸ Kɛ sran'm be wunnin i sɔ'n, srɛ kunnin be, be manmannin Nyanmiɛn b'ɔ tin sran mun kɛ nga sa'n.

Matie i flɛlɛ

⁹ Kɛ Jésus fin lɛ ɔli i nyrun lɔ kan'n, ɔ wunnin bian kun be flɛ i kɛ Matie, ɔ de gua bo sika, ɔ ti i junman diwlɛ lɛ. Jésus seli i kɛ: «Bla wa su n su.» Yɛ ɔ jao wa suli i su-ɔ.

¹⁰ Kɛ Jésus nin i sɔnnzɔnfuɛ'm be o awlo lɔ be di like'n, gua bo sika defuɛ nin sa tɛtɛ yofuɛ kpanngban be nin i yɛ be di like nin-ɔn.

¹¹ Kɛ Farizifuɛ'm be wunnin i sɔ'n, be usɛli i sɔnnzɔnfuɛ'm be kɛ: «?Nguɛ ti yɛ amún si nin gua bo sika defuɛ nin sa tɛtɛ yofuɛ mun di like-ɔ?»

¹² Jésus tili ndɛ sɔ'n, nan ɔ'a se be kɛ: «Nán sran ng'ɔ ti juejue'n yɛ ɔ kɔ ayrefuɛ sin-ɔn, sanngɛ tukpacɛfuɛ yɛ ɔ kɔ-ɔ.

¹³ An `wɔ ko bu ndɛ ng'ɔ o yɛ'n i akunndan nan amun wun i wlɛ. Ndɛ sɔ'n yɛlɛ kɛ: ‹Afin n klo aunnvuɛ nga be si sran'n tra tɛ nga be yi be man min'n› afin m'an ba-man sran kpa'm be flɛlɛ, sanngɛ sa tɛtɛ yofuɛ mun yɛ m bali be flɛlɛ-ɔ .»

Srɛ nun kpɛlɛ'n i su sa usalɛ

¹⁴ Yɛ Zan i sɔnnzɔnfuɛ'm be bali Jésus wun lɛ nan b'a usɛ i kɛ: «?Ɔ yo sɛ ti yɛ e nin Farizifuɛ mun e kpɛ srɛ nun bɔ ɔ liɛ'm be kpɛ-man wie-ɔ?»

¹⁵ Jésus seli be kɛ: «?Sɛ yasua kun su fa atɔnvlɛ'n b'ɔ nin i janvuɛ'm b'ɔ yiali be'n be tɛ o lɛ'n, bé wla bo? Le kun be wa de yasua sɔ'n bé sa nun, blɛ sɔ'n nun yɛ be ´kpɛ srɛ nun-ɔn.

¹⁶ Sran fi fa-man tannin sin uflɛ bɔ be nian kpu-mɛn le'n ta-man tralɛ nvuɛn nun, afin sɛ be fa ta nun sɔ'n, ɔ ´cuɛn-cuɛn tannin nvuɛnfuɛ'n ɔ ´titi, yɛ i titilɛ'n ɔ ´yo tɛ tra laa'n.

¹⁷ Be fa-man nzan lɔflɛ kusu gua-man kplo kotokun nvuɛn nun, sɛ be fa gua nun sɔ'n, kɛ ɔ ´kete'n, kotokun'n ´kpuke, ɔ ´saci, yɛ nzan ´gua. Sanngɛ be fa nzan lɔflɛ'n be guɛ i kplo kotokun b'ɔ ti uflɛ'n nun yɛ i nnyɔn'n ka lɛ-ɔ.»

Zairis wa bla'n i cɛnlɛ. Bla'n b'ɔ kannin Jésus tralɛ'n b'ɔ yoli juejue'n

¹⁸ Jésus nuan nian tɔ-man kpɛkuun, Nyanmiɛn ndɛ suanlɛ nin i srɛlɛ sua su kpɛn kun bɛli i wun lɛ, ɔ kotoli i bo nan ɔ'a se i kɛ: «N wa bla'n ɔ'a wu icra'n, sanngɛ bla wa fa ɔ́ sa fuɛ i su man ɔ cɛn.»

¹⁹ Jésus jaoli, nan ɔ nin i sɔnnzɔnfuɛ mun b'a su i su.

²⁰ Kɛ be ´kɔ'n, bla kun bɔ mannza tɛnndɛn tɔli i wun ɔ'a di afuɛ blu-nin-nnyɔn'n, ɔ bali Jésus sin lɛ, ɔ kɛnnin i tralɛ'n i nuan njɔlɛ'n .

²¹ Afin bla sɔ'n seli i bɔbɔ wun kɛ: «Sɛ n kwla kɛn i tralɛ'n bɔ cɛ'n, n ´yo juejue.»

²² Jésus kpɛli i nyin, kɛ ɔ wunnin i'n, ɔ seli kɛ: «N wa bla, gua ɔ́ wla ase. Kɛ a lafi su kɛ n kwla yo wɔ juejue'n ti, w'a yo juejue.» Nan bla sɔ'n ɔ'a yo juejue i osu kunngba'n nun.

²³ Kɛ Jésus juli Nyanmiɛn ndɛ suanlɛ nin i srɛlɛ sua'n su kpɛn'n i awlo lɔ b'ɔ wunnin blo bofuɛ mun nin sran bɔ be ´bo awuyomo'n, ɔ seli kɛ:

²⁴ «An `fite, ba'n ɔ'a wu-man, lafilɛ yɛ ɔ su lafi-ɔ. Nan b'a sri i.»

²⁵ Kɛ ɔ kannin sran'm bé bo'n, ɔ wluli sua lɔ, ɔ sɔli talua kan'n i sa'n, nan ɔ'a jao.

²⁶ Ndɛ sɔ'n truli mɛn sɔ'n i akpasua'n kwlaa su.

Anyansifuɛ nnyɔn be ase wunlɛ

²⁷ Kɛ Jésus ´kɔ'n, anyansifuɛ nnyɔn be su i su be kpan se kɛ: «David Anunman, si e aunnvuɛ yo e ye!»

²⁸ Kɛ Jésus juli awlo lɔ'n, anyansifuɛ'm be wunngeli i wun lɛ, nan ɔ'a usa be kɛ: «?An lafi su kɛ n kwla yo?» Be seli i kɛ: «Ɛɛn, a kwla yo.»

²⁹ Yɛ ɔ fɛ i sa fuali be nyinma'n su-ɔ, i sin ɔ seli be kɛ: «Man ɔ yo kɛ an fa lafi su ju'n sa.»

³⁰ Yɛ be wunnin ase-ɔ. Jésus wlali bé su nun kpa kɛ nán man be kan ndɛ sɔ'n kle sran fi.

³¹ Sanngɛ kɛ be fiteli cɛ'n, be truli Jésus dunman'n mɛn wunmuan sɔ'n nun.

Bobofuɛ'n i juejue yolɛ

³² Kɛ be ´kɔ'n, sran wie'm be fa bobofuɛ kun bɔ asiɛ usu sacili i'n blɛli i.

³³ Ɔ fuannin asiɛ usu sɔ'n, nan bobofuɛ'n ɔ'a ijɔ. Sran'm bé nuan b'ɔ bo bé wun n ti be seli kɛ: «E nian wun-man abonuan sa kɛ nga sa Izraɛl mɛn'n nun le.»

³⁴ Sanngɛ Farizifuɛ'm be waan: «Mmusu'm be wlengbi'n i dunman nun yɛ ɔ fuan asiɛ usu mun-ɔn.»

Jésus sili sran'm be aunnvuɛ

³⁵ Jésus wlan-wlan klɔ dandan nin klɔ kanngan'm be kwlaa be su, ɔ kle be like be Nyanmiɛn ndɛ suanlɛ nin i srɛlɛ sua'm be nun, ɔ kan Nyanmiɛn sielɛ'n i jasin fɛ'n kle be, yɛ ɔ wie be tukpacɛ nin be wunnɛn ya'n kwlaa.

³⁶ Kɛ Jésus wunnin sran mun'n, be yoli i annvɔ, afin be ti afɛfuɛ yɛlɛ kɛ b'a bo je kɛ bua bɔ be lɛ-man sunianfuɛ'n sa .

³⁷ Yɛ ɔ seli i sɔnnzɔnfuɛ'm be kɛ: «Fie'n ɔ'a yo ye, sanngɛ i su junman difuɛ'm b'a sɔn-man.

³⁸ I sɔ'n ti, an `se fie i fuɛ'n man ɔ fa sran wie mun ekun man be ko di i junman'n.»