Matthieu 8 - NYANMIƐN NDƐ'N 1998

Jésus yoli kokowefuɛ kun juejue

¹ Kɛ Jésus fin oka'n su lɔ jrali'n, sran kpanngban kpa be suli i su.

² Kokowefuɛ kun wa kotoli i bo, ɔ srɛli i kɛ: «Nja, yaci, yo man n kokowe'n wie weiin.»

³ Jésus tinngɛli i sa'n kɛnnin i, ɔ seli i kɛ: «M'an ti, man ɔ kokowe'n wie weiin.» Be ja osu kunngba nun lɛ kokowe'n wieli sran sɔ'n i wun.

⁴ Yɛ Jésus seli i kɛ: «Man sa sɔ'n tran ɔ klun, nán kan kle sran fi, sanngɛ fa ɔ́ wun ko kle Nyanmiɛn nyrun jranfuɛ'n, nan fa ɔ́ wun aso bolɛ like nga Moiz kleli'n fa man, man be wun kɛ w'a yo juejue .»

Jésus yoli sonja ya su kpɛn'n i gbanflɛn'n i juejue

⁵ Kɛ Jésus juli Kapɛrnaɔm b'ɔ ´wlu klɔ nun'n, sonja ya su kpɛn kun bɛli i wun lɛ. Ɔ kan kleli Jésus aunnvuɛ su kɛ:

⁶ «Nja, n gbanflɛn'n ɔ'a bubu ɔ la awlo lɔ, i wunnɛn'n yo i ya dan kpa.»

⁷ Jésus seli i kɛ: «E wɔ, n ´ko yo i juejue.»

⁸ Sonja ya su kpɛn'n seli kɛ: «Nannan, ɔ ti-man bɔ a ´tu ɔ́ ja kɔ min awlo lɔ-ɔ, sanngɛ kan ndɛ kpɔlɛ kunngba cɛ, yɛ n gbanflɛn'n ´yo juejue.

⁹ Afin m bɔ sran'm be sie min'n, n kusu n sie sonja mun, sɛ n se kun kɛ ɔ wɔ'n, ɔ kɔ, yɛ sɛ n se kun kɛ ɔ bla'n, ɔ ba. Sɛ n se n gbanflɛn'n kɛ ɔ `yo like wie'n, ɔ yo.»

¹⁰ Kɛ Jésus tili ndɛ sɔ'n, ɔ boli i nuan dan kpa, yɛ ɔ seli be nga be su i su sɔ'm be kɛ: «Nanwlɛ, Izraɛl nvle'n nun bɔbɔ'n, m'an wun-man sran fi b'ɔ lafi Nyanmiɛn su dan kɛ nga sa-a.

¹¹ N ´kan kle amun kɛ, sran sunman be wa fin wia afiliɛ nin wia atɔliɛ be ´ba, be nin Abraam, nin Izaak, nin Zakɔb be ´tran tabli sin Nyanmiɛn mɛn'n nun.

¹² Sanngɛ be wa fa be nga be ti diewa mɛn sɔ'n nun'n yi be guasu lɔ aosin'n nun kan be sun be di be je lɔ'n .»

¹³ I sin Jésus seli sonja ya su kpɛn'n kɛ: «Kɔ, man ɔ yo kɛ a lafi ń su ju'n sa.» Yɛ i osu kunngba'n nun i gbanflɛn'n yoli juejue-ɔ.

Jésus yoli Piɛr sia bla'n i juejue

¹⁴ I sin Jésus wluli Piɛr i awlo lɔ, ɔ wunnin kɛ ayrɛ a guɛ i sia bla'n wun i ti ɔ'a la.

¹⁵ Ɔ utili i sa'n, yɛ ayrɛ'n tuli i wun-ɔn. Ɔ jasoli, nan ɔ'a kunndɛ like diwa a mɛn i.

Jésus yoli tukpacɛfuɛ kpanngban be juejue

¹⁶ Kɛ aliɛ jɔli'n, be fa sran sunman bɔ asiɛ usu ɔ'a saci be'n blɛli Jésus. Kɛ ɔ ijɔli asiɛ usu sɔ mun'n, be jasoli sran'm be su, yɛ ɔ yoli tukpacɛfuɛ'm be kwlaa be juejue.

¹⁷ I sɔ'n nun'n, ndɛ nga Nyanmiɛn nuan ijɔfuɛ Ezai kɛnnin i kɛ: «I bɔbɔ fali e wunnɛn ya'n, yɛ ɔ fa e tukpacɛ'n suali'n ,» ɔ kpɛnnin su.

Be nga be klo kɛ be ´su Jésus su'n

¹⁸ Kɛ Jésus wunnin sran kpanngban bɔ be sin yiɛ i lɛ'n, ɔ seli kɛ: «Man e sin nzue'n i bue kun lɔ.»

¹⁹ Mmla klefuɛ kun bɛli i wun lɛ. Ɔ seli Jésus kɛ: «Nja, lika kwlaa bɔ a ´kɔ'n, min nin wɔ e ´kɔ-ɔ.»

²⁰ Jésus seli i kɛ: «Solongbi'm be lɛ kunman be la nun, yɛ anunman'm bɔ be tu sin'n be lɛ lawlɛ, sanngɛ m bɔ n kacili Sran'n, n lɛ-man lika bɔ n la nun n de wunmiɛn bɔ kan-an.»

²¹ I sɔnnzɔnfuɛ'm be nun kun kusu seli i kɛ: «Nja, man min atin man n ko sie ń si ka.»

²² Sanngɛ Jésus seli kɛ: «Su n su. Yaci be bɔ be wu'n man be sie be sran mun.»

Jésus i aunngban dan'n i jranlɛ

²³ Jésus fuli alie'n nun nan i sɔnnzɔnfuɛ'm b'a fu i sin.

²⁴ Kpɛkuun aunngban dan kpa kpɛli fɛtɛ'n su, ɔ man nzue'n bo gua alie'n nun, sanngɛ ɔ su lafi.

²⁵ I sɔnnzɔnfuɛ'm be wunngeli i wun lɛ be tinngeli i, be seli i kɛ: «Nannan, de e o, e su wu o!»

²⁶ Ɔ usali be kɛ: «?Nguɛ ti yɛ srɛ kun amun-ɔn? ?An lafi-man Nyanmiɛn su ti-ɔ?» Ɔ jasoli, ɔ ijɔli aunngban'n nin nzue'n, nan b'a jran diin.

²⁷ Bé nuan boli bé wun, nan b'a usa be wiengu kɛ: «?Nzu sran yɛlɛ nga bɔ aunngban'n nin nzue'n bɔbɔ be sro i sɔ-ɔ?»

Jésus yoli sran nnyɔn bɔ asiɛ usu'm be sacili be'n be juejue

²⁸ Kɛ ɔ juli nzue'n i bue kun Gadarafuɛ'm be mɛn nun'n, sran nnyɔn bɔ asiɛ usu sacili be'n be fin ndia su sua'm be wun lɔ be bɛli i atin kpalɛ. Be like yolɛ yo ya kpa, ɔ man sran fi kwla sin-man lɛ.

²⁹ Be kpan usɛli i kɛ: «?Nyanmiɛn Wa Yasua, nguɛ ndɛ yɛ ɔ wo e nin wɔ ye afiɛn-ɔn? ?A bali kɛ a wa dun mmua kle e nyrɛnnɛn nan e nyrɛnnɛn klelɛ blɛ'n ɔ'a ju ?»

³⁰ Kɔkɔti fa dan kpa kun be o mmua lɔ be su didi.

³¹ Asiɛ usu'm be srɛli Jésus kpa kɛ: «Sɛ a kan e bo'n, man ye atin man e ko wlu kɔkɔti fa nga'm be nun.»

³² Ɔ seli be kɛ: «An `wɔ!» Nan b'a jao bé su b'a ko wlu kɔkɔti sɔ'm be nun. Yɛ kɔkɔti akpasua wunmuan sɔ'n be wanndi troli fɛtɛ'n i cenje'n b'ɔ seli piaa'n, nan b'a gua nzue'n nun b'a wu.

³³ Be nga be kankan be'n be wanndi ɔli klɔ lɔ be ko kannin sa nga Jésus yoli kɔkɔti mun'n i kwlaa nin sa ng'ɔ yoli sran bɔ asiɛ usu'm be sacili be'n kleli be.

³⁴ I sɔ'n ti, klɔfuɛ'm be kwlaa be fite ɔli Jésus atin kpalɛ. Kɛ be nin i yiali'n, be srɛli i kpa kɛ ɔ jao be mɛn'n nun.