Matthieu 7 - NYANMIƐN NDƐ'N 1998

Sran'n i fɔ bulɛ

¹ «Nán an bu sran fɔ man Nyanmiɛn bu amun fɔ,

² afin fɔ kunngba nga an fa bu sran'n, yɛ Nyanmiɛn wa fa bu amun-ɔn, yɛ like nga an fa sunnzun sran'n, i kunngba sɔ'n yɛ Nyanmiɛn wa fa sunnzun amun-ɔn.

³ ?Ɔ yo sɛ yɛ a wun wla'n b'ɔ o ɔ niaan i nyin su'n, sanngɛ a wun-man janvlɛ'n b'ɔ o ɔ bɔbɔ ɔ nyinma su nin-ɔn?

⁴ ?Ɔ yo sɛ yɛ a se ɔ niaan kɛ: ‹Jran man n yi ɔ́ nyin su wla'n,› sanngɛ janvlɛ o ɔ bɔbɔ ɔ́ nyin su nin-ɔn?

⁵ Dunman klofuɛ, yi janvlɛ'n b'ɔ o ɔ́ nyin su'n ka, nan w'a wun ase a yi ɔ niaan'n i nyin su wla'n.

⁶ Nán an fa ninnge ng'ɔ ti Nyanmiɛn liɛ'n man alua mun, yɛ nán an fa amun nɛnnglɛnman'n gua kɔkɔti'm be bo man be tiatia be su nan be kpɛ bé nyin amún su be tɔ amún su.»

An `srɛ, an `kunndɛ, an `bobo anuan'n

⁷ «An `srɛ, be ´fa man amun, an `kunndɛ, amun ´nyɛn, an `bobo, be ´tike amun anuan.

⁸ Afin sran kwlaa ng'ɔ srɛ like'n, be mɛn i, sran ng'ɔ kunndɛ like'n, ɔ nyɛn i, yɛ sran ng'ɔ bobo anuan'n, be tike.

⁹ ?Amun nun onin yɛ sɛ i wa se i kɛ ɔ `mɛn i kpaun'n, ɔ fa yɛbuɛ mɛn i-ɔ?

¹⁰ ?Annzɛ sɛ ɔ se i kɛ ɔ `mɛn i kpatra'n ɔ fa wuo mɛn i-ɔ?

¹¹ Sɛ amun bɔ an ti sran tɛ'n, an fa like kpa cɛ amun mma mun'n, amun Si b'ɔ o nyanmiɛn su lɔ'n i kusu ɔ ´fa like kpa man be nga be srɛ i'n kpɛ blu.

¹² Like kwlaa nga an klo kɛ sran yo man amun'n, an `yo i kunngba sɔ'n man be, i yɛ ɔ ti Moiz mmla nin Nyanmiɛn nuan ijɔfuɛ'm be ndɛ nin-ɔn.»

Anuan fii'n

¹³ «An `sin anuan fii'n nun, afin sɛ be sin anuan tɛtrɛ'n nun'n, be kpɛn atin dan'n bɔ i awieliɛ ti nyrɛnnɛn'n nun, yɛ be nga be fa atin sɔ'n su'n, be sɔnnin.

¹⁴ Sanngɛ anuan nin atin nga be sin nun-ɔn be nyan nguan'n be ti kaan, yɛ be nga be kunndɛ be wun i'n, b'a sɔn-man .»

Waka kun nin i mma

¹⁵ «An `sasa amún wun be nga be tɔn bé wun suɛn kɛ be ti Nyanmiɛn nuan ijɔfuɛ'n be lika. Be fa bua kplo wla bé wun, be ba amún wun, sanngɛ be ti gboklo be saci nnɛn mun .

¹⁶ Be nzuɛn'n yɛ amun ´fa si be-ɔ. ?Be ti vinyi mma owie-owie nun? ?Be ti figie mma flɔn su?

¹⁷ I kunngba nin-ɔn, waka kpa kwlaa su mma kpakpa, sanngɛ waka b'ɔ ti-man kpa'n kusu ɔ su-man mma kpakpa.

¹⁸ Waka kpa'n ɔ kwla su-man mma tɛtɛ, yɛ waka b'ɔ ti-man kpa'n ɔ kwla su-man mma kpakpa.

¹⁹ Waka kwlaa b'ɔ su-man mma kpa'n, be ´kpɛ yi i sin nun.

²⁰ I sɔ'n ti, be nzuɛn'n yɛ amun ´fa si be-ɔ.»

N si-man amun mlɔnmlɔn

²¹ «Nán sran'm be kwlaa bɔ be flɛ min be Min'n be ngba yɛ Nyanmiɛn ´sie be sakpa-a, san sran ng'ɔ yo min Si b'ɔ o nyanmiɛn su lɔ'n i klun sa'n, i yɛ ɔ ´sie be sakpa-a.

²² Jɔlɛ dilɛ cɛn nun'n, sran kpanngban kpa be wa usa n kɛ: ‹?Nannan, Nannan, ɔ dunman nun y'a kan-man Nyanmiɛn ndɛ? ?Ɔ dunman nun y'a fuan-man asiɛ usu? ?Yɛ ɔ dunman nun y'a yo-man sa kekleekle mun?›

²³ Yɛ n ´se be kɛ: ‹Amun bɔ an saci mmla'n, an `fa jao min wun lɛ. N si-man amun mlɔnmlɔn .› »

Sua kplanfuɛ nnyɔn

²⁴ «I sɔ'n ti, sran kwlaa ng'ɔ tie ndɛ nga n ´kɛn i yɛ'n nan ɔ fa su'n, ɔ ti kɛ ngwlɛlɛfuɛ b'ɔ kplɛnnin i sua yɛbuɛ su'n sa.

²⁵ Nzue'n tɔli, ɔ yili lika'n, aunngban'n dan ɔ fitali, sanngɛ sua'n ɔ'a bu-man, yɛlɛ kɛ be kplɛnnin i yɛbuɛ su.

²⁶ Sanngɛ sran ng'ɔ tie ndɛ nga n ´kɛn i yɛ'n b'ɔ fa-man su'n, ɔ ti kɛ sinnglinfuɛ b'ɔ kplɛnnin i sua'n aunnyan'n nun'n sa.

²⁷ Nzue'n tɔli, ɔ yili lika'n, aunngban'n dan ɔ fitali, nan sua'n ɔ'a bu mlɔnmlɔnmlɔn.»

Jésus i atin b'ɔ lɛ'n

²⁸ Kɛ Jésus kan ndɛ sɔ'n kleli sran mun wieli'n, fɔ sɔ'n b'ɔ tuli be'n ɔ boli bé nuan,

²⁹ afin fɔ wafa ng'ɔ fa tu be'n nin be mmla klefuɛ'm be liɛ'n ti-man kun, yɛlɛ kɛ i liɛ'n kle kɛ ɔ lɛ sin jranfuɛ.