Matthieu 5 - NYANMIƐN NDƐ'N 1998

Jésus i Nyanmiɛn ndɛ kanlɛ oka'n su

¹ Kɛ Jésus wunnin sran kpanngban sɔ mun'n, ɔ fuli oka kun su. Kɛ ɔ trannin ase'n, i sɔnnzɔnfuɛ'm be bɛli i wun lɛ,

² yɛ ɔ boli be like klelɛ'n bo-ɔ, ɔ seli be kɛ:

Sran'm be anwlɛn su nzue gualɛ

³ «Be nga be si kɛ be di Nyanmiɛn ninnge'm be yalɛ'n, be liɛ su ti ye, afin Nyanmiɛn yɛ ɔ sie be sakpa-a!

⁴ Be nga bé wla a bo'n, be liɛ su ti ye, afin Nyanmiɛn wa fɔnvɔ be !

⁵ Be nga be ti wɛtɛɛfuɛ'n, be liɛ su ti ye, afin mɛn'n ɔ wa yo be liɛ!

⁶ Be nga be konvi sɔ Nyanmiɛn klun sa yolɛ'n kɛ awe nin nzue we kun sran sa'n, be liɛ su ti ye, afin be klun wa jɔ !

⁷ Be nga be si aunnvuɛ'n, be liɛ su ti ye, afin Nyanmiɛn wa si be aunnvuɛ!

⁸ Be nga sa tɛ fi nun-man be anwlɛn'n nun'n, be liɛ su ti ye, afin be wa wun Nyanmiɛn !

⁹ Be nga be ti ndɛ siesiefuɛ'n, be liɛ su ti ye, afin Nyanmiɛn wa flɛ be i mma mun!

¹⁰ Be nga be kle be yalɛ Nyanmiɛn klun sa yolɛ'n ti'n, be liɛ su ti ye, afin Nyanmiɛn yɛ ɔ sie be sakpa-a!

¹¹ Kɛ be ´kpɛ amun nzowa, bɔ be ´kle amun yalɛ, bɔ be ´tɔn amun suɛn tɛtɛ'n kwlaa n dunman nun'n , amun liɛ su ti ye,

¹² yɛlɛ kɛ amun mo'n ɔ wa yo dan nyanmiɛn su lɔ. I sɔ'n ti, man amun klun jɔ, man amún wun blibli amun. Afin laa kɛ be kleli Nyanmiɛn nuan ijɔfuɛ'm be yalɛ sɔ-ɔ, i sin nan b'a wu amun .»

Njin nin kannin

¹³ «Amun yɛ an ti kɛ njin sa mɛn'n nun-ɔn. ?Sanngɛ sɛ njin'n i ta'n kpɔ'n, nguɛ yɛ be ´fa yo nan ɔ'a yo fɛ ekun-ɔn? Ɔ yo-man sa fi ye kun, san blo yɛ be ´yi i-ɔ, yɛ sran'm be ´tiatia su.

¹⁴ Amun yɛ an ti kɛ kannin sa mɛn'n nun-ɔn. Klɔ b'ɔ o oka su'n, ɔ fia-man.

¹⁵ Kusu be sɔ-man kannin sie-mɛn i sɛ bo, sanngɛ be fa sie like su nglo, nan ɔ `kpaja be kwlaa nga be o sua lɔ'n be nyrun.

¹⁶ I kunngba nin-ɔn, an `yo kɛ kannin sa sran'm be nyrun, man be wun amun nyoliɛ kpa'n nan be manman amun Si b'ɔ o nyanmiɛn su lɔ'n .»

Mmla'n i nun yiyilɛ

¹⁷ «Nán an bu i kɛ m bali Moiz mmla'n nin Nyanmiɛn nuan ijɔfuɛ'm be ndɛ'n bé su nunnunlɛ, be nun yiyilɛ yɛ m bali-ɔ.

¹⁸ Afin nanwlɛ, n kan kle amun kɛ be su nunnun-man mmla'n i nun fluwa mma kaan kun annzɛ i nun ndɛ kaan kun lele san kɛ nglo'n nin asiɛ'n be nun-man lɛ kun'n. San i kwlaa sɔ'n ɔ ´kpɛn su.

¹⁹ I sɔ'n ti sran ng'ɔ tɔn mmla i nun kun, kannzɛ i nun kaan kpafuɛ'n bɔbɔ, nan ɔ kle sran'm be kɛ be yo i kunngba sɔ'n, ɔ wa yo be bɔ Nyanmiɛn sie be'n be nun kaan kpa, sanngɛ sran ng'ɔ fa be su, nan ɔ kle sran'm be kɛ be fa su'n, ɔ wa yo be bɔ nyanmiɛn sie be'n be nun sran dan.

²⁰ Afin n ´kan kle amun kɛ, sɛ amun nzuɛn'n ɔ'a yo-man kpa a tra-man mmla klefuɛ nin Farizifuɛ'm be liɛ'n, Nyanmiɛn su sie-man amun mlɔnmlɔn!

Ya falɛ'n i su ndɛ

²¹ «An tili i kɛ be kan kleli laafuɛ'm be kɛ: ‹Nán kun sran .› Sɛ sran kun kun sran'n, be ´fɛ kɔ jɔlɛ difuɛ'm bé ja su.

²² Sanngɛ n liɛ'n, n ´kan kle amun kɛ, sran kwlaa ng'ɔ fɛ i niaan wie wun ya, be ´fɛ i kɔ jɔlɛ difuɛ'm bé ja su. Yɛ sran ng'ɔ kpɛ i niaan wie nzowa'n, be ´fɛ i kɔ jɔlɛ difuɛ dandan'm bé ja su. Sran ng'ɔ se i niaan kɛ: ‹Sinnglinfuɛ'n,› be ´fɛ i kɔ nyrɛnnɛn lika'n i sin'n nun lɔ.

²³ I sɔ'n ti, sɛ a ´fa like wie ko man Nyanmiɛn'n, bɔ w'a ju i sɔwlɛ lɛ nan sɛ ɔ́ wla kpɛn su kɛ ɔ wun ndɛ o ɔ niaan wie klun'n,

²⁴ yaci like sɔ'n lɛ, an `ko siesie amun afiɛn ka, i sin bla w'a fa ɔ like sɔ'n man.

²⁵ Kɛ a nin ɔ sanmanfuɛ'n an tɛ wo atin nun'n, an `siesie ndɛ sɔ'n wɛtɛɛ su ndɛndɛ nan ɔ'a fa-man wɔ ɔ'a man-man jɔlɛ difuɛ'n, nan i kusu ɔ'a fa-man wɔ ɔ'a wla-man sonja'n sa nun, nan b'a wla-man wɔ bisua'n ti.

²⁶ Nanwlɛ, a su fin-man lɔ fite-man, lele san w'a wie i kalɛ'n kwlaa tua, bablu kun bɔ su ka-man.»

Bian nin bla kunndɛlɛ i su ndɛ

²⁷ «Amun tili i kɛ be seli kɛ: ‹Nán kunndɛ bla ɔ́ yi bo annzɛ bian ɔ́ wun bo .›

²⁸ Sanngɛ n liɛ'n, n ´kan kle amun kɛ, sran kwlaa ng'ɔ wun bla kun b'ɔ bu i kunndɛlɛ akunndan i anwlɛn nun'n, wuun ɔ'a kunndɛ bla sɔ'n.

²⁹ Sɛ ɔ nyinma fama'n man a yo sa tɛ'n, tu yi i blo mmua. Ɔ flunman kɛ ɔ wunnɛn'n i lika kun tu lɛ nan a `di lɛ, ɔ tra kɛ Nyanmiɛn `fa ɔ wunmuan'n yi nyrɛnnɛn lika'n nun'n.

³⁰ Sɛ ɔ́ sa fama'n man a yo sa tɛ'n, kpɛ yi i blo mmua. Ɔ flunman kɛ ɔ wunnɛn'n i lika kun tu lɛ nan a `di lɛ, ɔ tra kɛ ɔ wunmuan'n wɔ nyrɛnnɛn lika nun'n.»

Bé wun yralɛ'n i su ndɛ

³¹ «Be kɛnnin i ekun kɛ: ‹Sran kwlaa ng'ɔ yrɛ i yi'n, man ɔ mɛn i fluwa b'ɔ kle kɛ ɔ'a yrɛ i.›

³² Sanngɛ n liɛ'n, n ´kan kle amun kɛ, sran kwlaa ng'ɔ yrɛ i yi'n sɛ nán bian kunndɛlɛ ti'n, ɔ man bla sɔ'n ɔ ´yo bla b'ɔ kunndɛ bian i wun bo, yɛ sran ng'ɔ ja bla bɔ b'a yrɛ i'n, wuun ɔ'a kunndɛ sran yi .»

Nda talɛ'n i su ndɛ

³³ «An tili i ekun kɛ be kan kleli laafuɛ'm be kɛ: ‹Nán ta nda ngbɛn, sanngɛ nda nga a ta e Min Nyanmiɛn'n, yiɛ i nuan.›

³⁴ Sanngɛ n liɛ'n, n ´kan kle amun kɛ, nán an ta sran fi nda mlɔnmlɔn, nán an flɛ nyanmiɛn su lɔ'n be di, afin ɔ ti Nyanmiɛn i bia .

³⁵ Yɛ nán an flɛ asiɛ'n be di, afin ɔ ti Nyanmiɛn i ja takatakawlɛ, nán an flɛ Zerizalɛm asiɛ'n be di, afin Zerizalɛm'n ti Famiɛn Dan'n i klɔ .

³⁶ Yɛ nán amun ta amun bɔbɔ an wun nda, afin amun kwla yo-man amun ti ndrɛ kun ufue annzɛ ble.

³⁷ Sɛ an se kɛ ɛɛn, man ɔ ka su, yɛ sɛ an se kɛ cɛcɛ'n, man ɔ ka su, afin ndɛ nga be kan gua su'n ɔ fin Klunwifuɛ'n .»

Klunngbɔ tulɛ'n i su ndɛ

³⁸ «An tili i kɛ be seli kɛ: ‹Sɛ sran wie bo sran kun i nyinma'n, be `bo i liɛ'n wie sie i osu, sɛ sran wie tu sran kun i je'n, be tu i liɛ'n wie sie i osu .›

³⁹ Sanngɛ n liɛ'n, n ´kan kle amun kɛ, sɛ sran yo wɔ tɛ'n, nán yo i wie, sɛ sran kpaci ɔ fuka fama'n su'n, kaci bɛ'n kusu mɛn i.

⁴⁰ Sɛ sran wie sanman wɔ, nan i waan ɔ ´de ɔ tralɛ kaan'n, fa ɔ tralɛ dan'n nannan su mɛn i.

⁴¹ Sɛ sran wie mian wɔ kɛ a `ko sunmɛn i lika kilo kun'n, sunmɛn i ju kilo nnyɔn.

⁴² Sran ng'ɔ srɛ ɔ like'n, fa mɛn i, yɛ sran ng'ɔ klo kɛ ɔ ´fɛ like ɔ́ sa nun'n, nán kaci ɔ́ sin si i .»

Be kpɔfuɛ'm be klolɛ

⁴³ «An tili i kɛ be seli kɛ: ‹Klo ɔ wiengu, yɛ kpɔ ɔ kpɔfuɛ.›

⁴⁴ Sanngɛ n liɛ'n, n ´kan kle amun kɛ, an `klo amun kpɔfuɛ mun, yɛ be nga be wua amun amuɛn'n, an `yra be nguan. Be nga be kpɔ amun'n, an `yo be kpa, yɛ be nga be yo amun tɛtɛ bɔ be kle amun yalɛ'n, an `srɛ Nyanmiɛn kɛ ɔ yo be kpa .

⁴⁵ I sɔ'n nun'n, amun wa yo amun Si b'ɔ o nyanmiɛn su lɔ'n i mma mun, afin ɔ bo wia'n man be bɔ be ti tɛ'n nin be bɔ be ti kpa'n, yɛ ɔ tɔ nzue'n man nanwlɛfuɛ nin be bɔ be ti-man nanwlɛfuɛ'n.

⁴⁶ ?Afin sɛ an klo amun klofuɛ'm be ngunmin'n, nguɛ like yɛ amun ´nyɛn i-ɔ? ?Gua bo sika defuɛ mun bɔbɔ be klo-man be klofuɛ mun?

⁴⁷ ?Sɛ an yo amun niaan'm be ngunmin be like'n, wuun nzu like dan yɛ amu'an yo-ɔ? ?Be bɔ be ti-man Zuif mun bɔbɔ be yo-man be niaan'm be like?

⁴⁸ I sɔ'n ti, an `yo sran kpa kɛ amun Si b'ɔ o nyanmiɛn su lɔ'n ɔ ti kpa'n sa .»