Matthieu 4 - NYANMIƐN NDƐ'N 1998

Jésus i lakalɛ

¹ Yɛ Nyanmiɛn Wawɛ'n fa Jésus ɔli aawlɛ flɛnnɛn nun lɔ kɛ mmusu'm bé si Satan ko lɛkɛ i.

² Ɔ kpɛli srɛ nun kɔnguɛ nin wia'n nun cɛn ba ablanan, i sin awe kunnin i .

³ Lakafuɛ'n bɛli i wun lɛ, ɔ seli i kɛ: «Sɛ ɔ waan a ti Nyanmiɛn Wa sakpa'n, se yɛbuɛ nga mun man be kaci aliɛ.»

⁴ Sanngɛ Jésus seli i kɛ, be klɛli i kɛ: «Nán aliɛ kunngba yɛ ɔ man sran nguan-an, sanngɛ ndɛ kwlaa ng'ɔ fin Nyanmiɛn nuan fite'n, i yɛ ɔ man sran nguan-an .»

⁵ Mmusu'm bé si Satan fɛ i ɔli Nyanmiɛn klɔ'n su lɔ, ɔ fɛ i sieli Nyanmiɛn i sua'n su , ɔ seli i kɛ:

⁶ «Sɛ ɔ waan a ti Nyanmiɛn Wa sakpa'n, tu kpɛn asiɛ wun lɔ, afin be klɛli i kɛ: ‹Ɔ ´se i anz'm be kɛ be sɔ wɔ nun, kɛ ɔ ´yo nan ɔ́ ja ɔ'a kpla-man yɛbuɛ wie'n ti .› »

⁷ Jésus kusu seli i kɛ: «Be klɛli i kusu kɛ: ‹Nán kunndɛ ɔ Min Nyanmiɛn i nuan .› »

⁸ Mmusu'm bé si Satan fɛ i ekun ɔli oka fleiin kpa kun su, ɔ fa mɛn'n i famiɛn diwlɛ'n kwlaa nin i nun ninnge b'ɔ ba be nyrunnyan'n kleli i, ɔ seli i kɛ:

⁹ «Sɛ a koto m bo a manman min'n, n ´fa ninnge nga kwlaa man wɔ.»

¹⁰ Yɛ Jésus seli i kɛ: «Satan, jaso lɛ! Afin be klɛli i kɛ: ‹Koto ɔ Min Nyanmiɛn'n i bo, yɛ su i kunngba cɛ .› »

¹¹ Yɛ mmusu'm bé si Satan yacili i nun-ɔn, nan anz'm b'a bɛ i sulɛ.

Jésus boli i junman'n bo Galile mɛn'n nun

¹² Kɛ Jésus tili kɛ b'a wla Zan bisua'n, ɔ ɔli Galile mɛn'n nun.

¹³ Ɔ tuli Nazarɛt, ɔ wa trannin Kapɛrnaɔm b'ɔ o fɛtɛ'n nuan lɛ Zabilɔn mɛn'n nin Nɛftali mɛn'n be akpasua'n su

¹⁴ nan Nyanmiɛn nuan ijɔfuɛ Ezai i ndɛ'n ɔ `kpɛn su, ɔ seli kɛ:

¹⁵ «Zabilɔn mɛn'n nin Nɛftali mɛn'n , be o Galile b'ɔ ti be nga be ti-man Zuif'n be mɛn'n nun. Be mantan fɛtɛ'n b'ɔ o Zurdɛn'n i sin lɔ'n.

¹⁶ Be nun sran nga be tran aosin nun'n, be wunnin kɛ lika'n kpaja dan kpa, yɛ be nga be tran wie'n i mɛn tuun'n nun'n, lika'n kpajali be su.»

¹⁷ Kɛ ɔ fin lɛ'n, Jésus boli Nyanmiɛn ndɛ'n kanlɛ'n bo, ɔ se kɛ: «An `kaci amun nzuɛn'n, afin Nyanmiɛn i sielɛ blɛ'n ɔ'a mantan.»

Jésus flɛli jue trafuɛ nnan kɛ be su i su

¹⁸ Kɛ ɔ ´sin Galile fɛtɛ'n nuan lɛ'n, ɔ wunnin Simɔn bɔ be flɛ i kɛ Piɛr'n nin Andre. Be sran nnyɔn'n be ti niaan, kɛ ɔ ´wun be'n, wuun be su gua lala fɛtɛ'n nun, afin be ti jue trafuɛ.

¹⁹ Jésus seli be kɛ: «An `bla wa su n su, n ´fa amun kaci sran'm be trafuɛ kɛ jue trafuɛ sa.»

²⁰ Kpɛkuun be yacili lala'm be lɛ, yɛ be suli i su-ɔ.

²¹ Kɛ ɔ ɔli i nyrun lɔuun'n, ɔ wunnin sran nnyɔn ekun bɔ be kusu be ti niaan. Be yɛlɛ Zak nin Zan, Zebede i mma mun-ɔn. Kɛ ɔ ´wun be'n, wuun be nin bé si be o be alie'n nun be su tanndan be lala'm be nun. Jésus flɛli be,

²² kpɛkuun be yacili bé si nin alie'n lɛ, yɛ be suli i su-ɔ.

Jésus kan ndɛ kleli sran mun, yɛ ɔ yoli tukpacɛfuɛ'm be juejue

²³ Jésus wlan-wlan Galile akpasua'n kwlaa su, ɔ kle like Nyanmiɛn ndɛ suanlɛ nin i srɛlɛ sua'm be nun, ɔ kan Nyanmiɛn i sielɛ'n i jasin fɛ'n kle be, yɛ ɔ wie tukpacɛ kwlaa b'ɔ o sran'm be wun'n nin be wunnɛn ya'n kwlaa.

²⁴ I dunman'n fuli Siri mɛn wunmuan'n nun. Be fali be kwlaa nga tukpacɛ fanunfanun o be wun'n bɔ be wunnɛn yo be ya'n, nin be bɔ asiɛ usu a saci be'n, nin ngbitiɛfuɛ mun, ɔ nin bubuwafuɛ mun blɛli i, nan ɔ'a yo be juejue.

²⁵ Sran kpanngban kpa be fin Galile nin Klɔ Blu asa'n su, nin Zerizalɛm, nin Zide akpasua'n su, ɔ nin Zurdɛn'n i sin lɔ'n be su i su.