Matthieu 3 - NYANMIƐN NDƐ'N 1998

Zan batɛm yofuɛ'n i Nyanmiɛn ndɛ kanlɛ

¹ Blɛ sɔ'n nun'n, Zan b'ɔ ti batɛm yofuɛ'n bali, ɔ kan Nyanmiɛn ndɛ Zide aawlɛ flɛnnɛn nun lɔ.

² Ɔ se be kɛ: «An `kaci amun nzuɛn'n afin Nyanmiɛn i sielɛ blɛ'n ɔ'a mantan.

³ I yɛ Nyanmiɛn nuan ijɔfuɛ Ezai kɛnnin i ndɛ kɛ: ‹I yɛ ɔ kpan aawlɛ flɛnnɛn nun lɔ nin-ɔn, ɔ se kɛ: An `siesie e Min'n i akpɔ'n, An `yo i atin'm be seiin, an `treke su .› »

⁴ Nyɔnngɔnmɛn ndrɛ tralɛ o Zan wun, yɛ kplo kun ci i afiɛn. Lalo nin wɛma nzue yɛ ɔ di-ɔ .

⁵ Zerizalɛmfuɛ mun nin Zide mɛn nunfuɛ'n kwlaa, be nin be bɔ be fin Zurdɛn bue liɛ'n kwlaa su'n, be bɛli i wun lɛ.

⁶ Kɛ be di sa nga be yoli'n i nanwlɛ'n, ɔ yo be batɛm nzue ba bɔ be flɛ i kɛ Zurdɛn'n i nun.

⁷ Kɛ ɔ wunnin kɛ Farizifuɛ nin Sadisefuɛ kpanngban be ba kɛ ɔ `yo be batɛm'n, ɔ usali be kɛ: «?Ɔnda mma mun, wan yɛ ɔ seli amun kɛ an wanndi Nyanmiɛn i ya b'ɔ wa jao'n i bo-ɔ?

⁸ An `yo sa kpa b'ɔ kle kɛ amu'an kaci amun nzuɛn'n, amun `yo kɛ waka kpa b'ɔ su mma kpa'n sa.

⁹ Nán an bu amun anwlɛn'n nun se kɛ: ‹E nannan yɛlɛ Abraam,› afin n ´kan kle amun kɛ Nyanmiɛn kwla fa yɛbuɛ nga mun kaci Abraam mma mun .

¹⁰ Kpɛliɛ'n ɔ'a kan waka olui'n, ɔ man waka kwlaa nga i mma'n ti-man kpa'n, be ´kpɛ i gua sin'n nun.

¹¹ N liɛ'n, n yo amun batɛm nzue'n nun kɛ an `kaci amun nzuɛn'n, sanngɛ sran ng'ɔ o siɛn b'ɔ su ba'n, ɔ lɛ tinmin tra min. Min nin i ngbabua'n i sualɛ fata-man. I liɛ'n, ɔ wa fa Nyanmiɛn Wawɛ'n nin sin yo amun batɛm.

¹² I nene'n wo i sa nun, ɔ wa kpɛjɛ i ble'n b'ɔ o i bowlɛ nun'n lele ɔ ´wie, ɔ ´isa guɛ i tanngannin'n nun, yɛ ɔ ´wɔ i wla'n nun sin b'ɔ nuan-man'n nun.»

Jésus i batɛm yolɛ

¹³ Yɛ Jésus fin Galile mɛn'n nun bali Zan wun lɛ Zurdɛn'n nuan lɛ kɛ Zan ɔ wa yo i batɛm.

¹⁴ Sanngɛ Zan waan ɔ kplin-man su, nan ɔ'a se i kɛ: «Min yɛ ɔ fata kɛ a yo min batɛm-ɔn, sanngɛ a su ba ń sin kɛ n `yo wɔ-ɔ!»

¹⁵ Jésus seli i kɛ: «Yaci, yo ndɛ liɛ'n, afin ɔ ti i su kɛ e `yo sa kwlaa ng'ɔ ti Nyanmiɛn klun su'n.» Yɛ Zan yoli-ɔ.

¹⁶ Kɛ ɔ yoli Jésus batɛm b'ɔ fin nzue'n nun fiteli cɛ'n, kpɛkuun nyanmiɛn su lɔ'n i su tikeli muaan, Jésus wunnin Nyanmiɛn Wawɛ'n, ɔ jra ba kɛ auble sa, ɔ wa trɛnnin i su.

¹⁷ Kpɛkuun be tili sran kun nɛn nyanmiɛn su lɔ, ɔ seli kɛ: «Min anwlɛn su ba'n yɛ, i su yɛ m'an fa ń wla'n kwlaa m'an gua-a .»