Matthieu 28 - NYANMIƐN NDƐ'N 1998

Jésus i cɛnlɛ

¹ Kɛ wunmiɛn-delɛ-cɛn sinnin'n, mɔnnɛn'n b'ɔ ti le mɔcuɛ'n i cɛn ba klikli'n i njɛnniɛn su Mari b'ɔ fin Magdala'n nin Mari kun'n be ɔli ndia'n i nianlɛ.

² Kpɛkuun asiɛ'n kejeli dan kpa, afin e Min Nyanmiɛn'n i anz kun fin nyanmiɛn su lɔ jrali, kpɛkuun ɔ kondoli yɛbuɛ bɔ be fa nyinnin ndia i anuan'n, ɔ trannin su.

³ I wun'n kpaja kɛ nyanmiɛn i sin b'ɔ kpa'n sa, yɛ i tralɛ'n fɛn fitafita kɛ nyanmiɛn ufue sa.

⁴ Srɛ kunnin sonja mun dan kpa, bé wun usuli be, nan b'a kaci kɛ b'a wu sa.

⁵ Sanngɛ anz'n seli bla'm be kɛ: «Amun liɛ'n, nán srɛ kun amun, afin n si kɛ an su kunndɛ Jésus bɔ be boboli i waka'n su'n.

⁶ Ɔ nun-man wa, ɔ'a cɛn kɛ ɔ kan kleli amun kɛ ɔ ´cɛn'n sa. An `bla be wa nian lika ng'ɔ lali nun'n

⁷ nan an `wɔ trɛlɛlɛ ko kan kle i sɔnnzɔnfuɛ'm be kɛ ɔ'a cɛn. Ɔ'a dun mmua amun nyrun Galile lɔ, lɔ yɛ amun ´wun i-ɔ. Yɛ m'an kan kle amun lɛ-ɔ.»

⁸ Srɛ'n nin aklunjuɛ'n kunnin be kpo, nan b'a jao ndia'n su lɛ ndɛndɛ kɛ be ´ko kan jasin sɔ'n kle i sɔnnzɔnfuɛ mun.

⁹ Kpɛkuun Jésus fiteli be nyrun atin'n nun, yɛ ɔ seli be kɛ: «Amun anyin o!» Be wunngeli i wun lɛ, be kotoli i bo, yɛ be trɛli i ja'n.

¹⁰ Yɛ Jésus seli be kɛ: «Nán srɛ kun amun, an `wɔ ko se n niaan'm be kɛ be wɔ Galile lɔ, lɔ yɛ be ´wun min-ɔn.»

Ndɛ nga ndia sunianfuɛ'm be wa kannin'n

¹¹ Kɛ bla'm be tɛ o atin nun'n, sonja'm be wie bali klɔ lɛ, be wa kan sa ng'ɔ yoli lɔ'n kwlaa kleli Nyanmiɛn nyrun jranfuɛ dandan mun.

¹² Kɛ Nyanmiɛn nyrun jranfuɛ dandan mun nin kpɛnngbɛn'm be yiali bɔ be wunnin bé wun'n, be mannin sonja'm be sika lɔuun kpa nan

¹³ b'a se be kɛ: «An `se kɛ: ‹Kɛ e ´lafi kɔnguɛ'n, i sɔnnzɔnfuɛ'm be wa fɛli i fuɛn'n.›

¹⁴ Sɛ kpɛnngbɛn'n ti ndɛ sɔ'n, e ´kpɛtɛ i, e ´de amun, ɔ man ɔ su kle-man amun yalɛ.»

¹⁵ Sonja'm be sɔli sika sɔ'n nun nan b'a yo kɛ be kan kleli be kɛ be yo'n sa. Be ndɛ sɔ'n truli Zuif'm be nun lele fa ju ndɛ.

Ngaliɛ bɔ Jésus nin i sɔnnzɔnfuɛ'm be dili'n

¹⁶ Jésus i sɔnnzɔnfuɛ blu-nin-kun'n be ɔli Galile oka'n b'ɔ kleli be'n su.

¹⁷ Kɛ be wunnin i'n, be kotoli i bo, sanngɛ be wie'm b'a lafi-man su kpa.

¹⁸ Jésus wunngeli bé wun lɛ nan ɔ'a se be kɛ: «Nyanmiɛn mannin min atin kɛ n sie nyanmiɛn su lɔ nin asiɛ'n su ninnge'n kwlaa.

¹⁹ I sɔ'n ti, an `wɔ ko kle nvle-nvle'n kwlaa be like man be kaci n sɔnnzɔnfuɛ, yɛ an `yo be batɛm e Si Nyanmiɛn, nin i Wa'n, ɔ nin i Wawɛ'n be dunman nun .

²⁰ Yɛ like kwlaa nga n kleli amun'n, amun kusu an `kle be man be fa su. An `nian, min nin amun e o cɛn kwlaa lele mɛn'n ´fa wie.»