Matthieu 27 - NYANMIƐN NDƐ'N 1998

Jésus i Pilat ja su fa kɔlɛ

¹ Kɛ aliɛ cɛnnin'n, Nyanmiɛn nyrun jranfuɛ dandan mun nin mɛn kpɛnngbɛn'm be kwlaa be ko wunnin bé wun kɛ be `kun Jésus.

² Kɛ be cili i'n, be fɛ i ko mannin Pilat b'ɔ sie be'n.

Zidas i kɔmin bolɛ

³ Kɛ Zidas b'ɔ fa Jésus mannin sran mun'n ɔ wunnin kɛ be ´kun i sakpa'n, ɔ kokoli nan ɔ'a fa jɛtɛ ufue ablasan'n ɔ'a ko man Nyanmiɛn nyrun jranfuɛ dandan mun nin kpɛnngbɛn mun ,

⁴ yɛ ɔ seli kɛ: «Kɛ n fa sran bɔ ɔ'a yo-man sa tɛ fi'n mannin amun kɛ an `kun i'n, m'an yo-mɛn i kpa mlɔnmlɔn.» Yɛ be seli i kɛ: «?E ndɛ o nun? Ɔ bɔbɔ ɔ ndɛ-ɔ.»

⁵ Zidas to sika'n guali Nyanmiɛn i sua'n nun lɔ nan ɔ'a wɔ ɔ'a ko bo i kɔmin.

⁶ Nyanmiɛn nyrun jranfuɛ dandan'm be isali sika sɔ'n, yɛ be seli kɛ: «E kwla fa-man sika sɔ'n gua-man Nyanmiɛn sika'n nun, afin be fa sika sɔ'n toli sran mmoja .»

⁷ Kɛ be kannin bɔ be nɛn sɛli su'n, be fa sika sɔ'n toli sɛ ufuɛ'n i asiɛ'n kɛ be `fa yo aofuɛ'm be asieliɛ.

⁸ I sɔ'n ti, lele ndɛ be tɛ flɛ asiɛ sɔ'n Mmoja Asiɛ.

^9-10 I sɔ'n ɔ kpɛnnin Nyanmiɛn nuan ijɔfuɛ Zeremi i ndɛ'n su, afin ɔ seli kɛ: «Jɛtɛ ufue ablasan b'ɔ ti sran nga be dili i gua'n i sika'n, be fa toli sɛ ufuɛ'n i asiɛ'n kɛ e Min Nyanmiɛn'n kan kleli min kɛ n yo'n sa. Afin kɛ sran kun i gua bɔ Izraɛlfuɛ'm be kpɛli'n ɔ ti sɔ-ɔ .»

Pilat i Jésus sa usalɛ

¹¹ Kɛ be fa Jésus ɔli be kpɛnngbɛn'n i ja su sɔ'n, ɔ usɛli i kɛ: «?A ti Zuif'm be famiɛn?» Jésus tɛli i su kɛ: «Yɛ ɔ́ nuan o su lɛ-ɔ.»

¹² Sanngɛ suɛn nga Nyanmiɛn nyrun jranfuɛ dandan mun nin kpɛnngbɛn mun be tɔnnin i'n, ɔ'a tɛ-man wie fi su .

¹³ Yɛ Pilat usɛli i kɛ: «?A ti-man suɛn tɛtɛ kpa nga be ´tɔn wɔ lɛ'n?»

¹⁴ Sanngɛ Jésus a tɛ-man ndɛ sɔ'n kun sa su, i sɔ'n yɛ ɔ boli be kpɛnngbɛn'n i nuan dan nin-ɔn.

Be seli kɛ be `kun Jésus

¹⁵ Bé cɛn dilɛ kwlaa nun'n, bisuafuɛ kun nga sran'm be srɛ be kpɛnngbɛn'n kɛ ɔ yaci i nun man be'n, ɔ yaci i nun man be.

¹⁶ Kɛ ɔ ´yo sɔ'n, bisuafuɛ kun o lɛ bɔ i dunman'n ɔ'a fu dan kpa, be flɛ i kɛ Barabas.

¹⁷ Kɛ be yiali'n, Pilat usali be kɛ: «?Barabas nin Jésus bɔ be flɛ i Krist'n, be nun onin yɛ an klo kɛ n yaci i nun man amun-ɔn?»

¹⁸ Afin ɔ si kɛ bé nyin b'ɔ ci Jésus'n ti yɛ be fɛ i ko mɛnnin i-ɔ.

¹⁹ Kɛ ɔ trannin ase jɔlɛ diwlɛ lɔ'n, i yi sunmannin sran kɛ be ko se i kɛ: «Nán fa ɔ wun wla bian nanwlɛfuɛ sɔ'n i ndɛ'n nun, afin ndɛ n fɛli laliɛ nun dan kpa i ti.»

²⁰ Nyanmiɛn nyrun jranfuɛ dandan mun nin kpɛnngbɛn'm be di wlali sran'm be kɛ be srɛ Barabas ti nan be kun Jésus.

²¹ Kpɛnngbɛn'n usali be ekun kɛ: «?Be nnyɔn'n be nun onin yɛ an klo kɛ n yaci i nun man amun-ɔn?» Yɛ be waan: «Barabas-ɔ.»

²² Pilat usali be kɛ: «?Yɛ n ´yo Jésus bɔ be flɛ i Krist'n i sɛ?» Be kwlaa be waan: «Man be bobo i waka'n su!»

²³ Yɛ ɔ usali be ekun kɛ: «?Sa tɛ onin bɔ cɛ yɛ ɔ yoli-ɔ?» Yɛ be kpannin kekle kpa ekun kɛ: «Man be bobo i waka'n su!»

²⁴ Kɛ Pilat wunnin kɛ ɔ su kwla yo-man sa fi bɔ alowa'n yo dan tra su'n, ɔ fa nzue wunnzinnin i sa nun sran'm be nyrun lɛ, yɛ ɔ seli kɛ: «Sran nanwlɛfuɛ nga i kunlɛ'n, n liɛ nun-man nun, amun bɔbɔ amun ndɛ-ɔ .»

²⁵ Yɛ sran'm be kwlaa be seli i kɛ: «Man i wie ndɛ'n ka e nin e mma mun ye su .»

²⁶ Yɛ Pilat yi Barabas mannin be-ɔ. Kɛ ɔ yoli bɔ be boli Jésus'n, ɔ fɛ i mannin be kɛ be ko bobo i waka'n su.

Sonja'm be Jésus finfin yolɛ

²⁷ Yɛ Pilat i sonja'm be fa Jésus ɔli i awlo lɔ nan b'a yia sonja'm bɔ be o lɛ'n be kwlaa kɛ be wa yiɛ i wun lɛ.

²⁸ Be yili i wun tralɛ'n nan b'a fa tralɛ dan kun b'ɔ ti ɔkwlɛ kankankan'n b'a wlɛ i wun.

²⁹ Be wɔli owie kɛ sika kle sa be fa wlɛli i ti, yɛ be fa ndɛma kun wlɛli i sa fama'n nun, be kotoli i bo, be yoli i finfin be seli kɛ: «Zuif'm be famiɛn, man a cɛ o!»

³⁰ Be guɛli i wun ngɔsrɛ, be fali ndɛma'n b'ɔ o i sa nun'n finnin i ti'n su.

³¹ Kɛ be yoli i finfin sɔ wieli'n, be yili i wun tralɛ dan'n, nan b'a fɛ i bɔbɔ liɛ'n b'a wlɛ i wun ekun, yɛ be fɛ ɔli i waka'n su bobolɛ-ɔ.

Jésus i waka'n su bobolɛ

³² Kɛ be fin lɔ be ´fite'n, be nin Sirɛni bian kun bɔ be flɛ i kɛ Simɔn'n be yiali nan b'a miɛn i kɛ ɔ sua Jésus waka'n.

³³ Kɛ be juli lika bɔ be flɛ i Gɔlgota'n bɔ i bo yɛlɛ Ti Kongloman Lika'n nun lɔ'n,

³⁴ be mɛnnin i nzan bɔ be fa like wiwi wie guali nun'n kɛ ɔ `nɔn, sanngɛ kɛ ɔ wɔli su'n, ɔ'a nɔn-man.

³⁵ Kɛ be boboli i waka'n su'n, be tuli i tralɛ'm bé wun fɔtɔ .

³⁶ I sin be trannin ase lɛ be niɛnnin i.

³⁷ Be klɛli sa nga ti yɛ be boboli i waka'n su'n sieli i ti su lɛ, bɛ klɛli kɛ: «Jésus b'ɔ ti Zuif'm be famiɛn'n yɛ.»

³⁸ Be boboli i nin kodiawiefuɛ nnyɔn, kun o i fama su, kun o i bɛ su.

³⁹ Be nga be ´sin lɛ'n, be di i tɛ, be kpukpu bé ti nun , be se kɛ:

⁴⁰ «Ɔ bɔ ɔ waan a ´bubu Nyanmiɛn i sua'n nan a ´kplɛn i le nsan'n, de wɔ wun siɛn'n, yɛ sɛ a ti Nyanmiɛn Wa sakpa'n, fin waka'n su jra.»

⁴¹ Nyanmiɛn nyrun jranfuɛ dandan mun nin mmla klefuɛ'm be nin kpɛnngbɛn mun be yoli i finfin, be seli kɛ:

⁴² «Ɔ deli sran wie mun, sanngɛ ɔ kwla de-mɛn i bɔbɔ wun. Ɔ ti Zuif'm be famiɛn! Man ɔ fin waka'n su jra, sɛ ɔ yo i sɔ'n yɛ e ´lafi i su-ɔ.

⁴³ Ɔ fɛ i wla guali Nyanmiɛn su, sɛ Nyanmiɛn sɔ'n klo i'n, man ɔ de i siɛn'n, afin i waan ɔ ti Nyanmiɛn Wa.»

⁴⁴ Kodiawiefuɛ bɔ be boboli be nin i'n be kusu be dili i tɛ wie.

Jésus i wulɛ

⁴⁵ Kɛ wia'n jrannin'n, aosin'n wlali mɛn wunmuan'n nun lele fa juli nnɔsua wia nun.

⁴⁶ Nnɔsua wia sɔ'n nun, Jésus kpannin kekle kpa, ɔ seli kɛ: «?Eli, Eli, lama sabaktani?» I bo'n yɛlɛ: ?Min Nyanmiɛn, min Nyanmiɛn, nguɛ ti yɛ a kaci ɔ sin a si min-ɔn ?

⁴⁷ Be nga be o lɛ'n be nun wie tili, yɛ be seli kɛ: «An `nian, ɔ su flɛ Eli.»

⁴⁸ Kpɛkuun be nun kun wanndi ko fali mlɛn boli vinɛgri nun, ɔ fa blɛblɛli i ndɛma kun su, ɔ fa mɛnnin i kɛ ɔ `nɔn .

⁴⁹ Sanngɛ be wie'm be seli kɛ: «Yaci i lɛ man e nian, sɛ Eli wa de i o.»

⁵⁰ Jésus kpannin kekle kpa ekun, nan ɔ'a wu.

⁵¹ Kpɛkuun tannin dan'n bɔ be fa kpɛ Nyanmiɛn i sua nun'n, ɔ kpacili i nglo lɔ lele fa juli i ngua wa, asiɛ'n kejeli, yɛbuɛ'm be kpukeli .

⁵² Ndia'm be buli, yɛ Nyanmiɛn i sran'm bɔ be wuli'n, be sunman be cɛnnin.

⁵³ Kɛ Jésus cɛnnin'n, be kusu be fin ndia nun fiteli, be ɔli Zerizalɛm b'ɔ ti Nyanmiɛn klɔ'n su lɔ, sran sunman be wunnin be.

⁵⁴ Sonja ya su kpɛn'n nin be nga be o lɛ be nian Jésus su'n, kɛ be wunnin asiɛ'n b'ɔ kejeli'n nin sa ng'ɔ yoli'n, srɛ kunnin be dan kpa nan b'a se kɛ: «Nanwlɛ, bian sɔ'n ti Nyanmiɛn Wa sakpa.»

⁵⁵ Bla kpanngban bɔ be nin Jésus fin Galile bali bɔ be niɛn i lika'n, be o lɛ, be jran mmua lɔ be niɛn i.

⁵⁶ Mari b'ɔ fin Magdala'n, nin Mari Zak nin Zozɛf bé nin'n, yɛ Zan nin Zak bɔ be ti Zebede i wa'n bé nin'n, be o be nun wie.

Jésus i sielɛ

⁵⁷ Kɛ aliɛ jɔli'n, bian anyanbeunfuɛ kun bɔ be flɛ i kɛ Zozɛf'n, b'ɔ fin Arimate'n, bɔ i kusu ti Jésus sɔnnzɔnfuɛ kun'n, ɔ bali.

⁵⁸ Ɔ ɔli Pilat wun lɔ ko srɛli Jésus fuɛn'n, yɛ Pilat waan, be fa mɛn i.

⁵⁹ Zozɛf fali Jésus fuɛn'n, ɔ fa tannin kpa kun cicili i,

⁶⁰ nan ɔ'a ko sie i i bɔbɔ i ndia uflɛ bɔ be ko sie i nun'n, b'ɔ man be kpɛli i yɛbuɛ nun'n i nun. Yɛ ɔ kondoli yɛbuɛ dan kun sieli ndia sɔ'n i anuan'n nun nan ɔ'a wɔ.

⁶¹ Mari b'ɔ fin Magdala'n nin Mari kun'n be o lɛ, be ti ndia'n i nyrun ndɛnman su lɛ.

Ndia'n i sunianlɛ

⁶² Kɛ Zuif'm be buabuali bé wun ya'n bɔ aliɛ'n cɛnnin'n, Nyanmiɛn nyrun jranfuɛ dandan mun nin Farizifuɛ'm bé bo yoli kun be ɔli Pilat wun lɔ be ko seli i kɛ:

⁶³ «Nannan, é wla kpɛn ndɛ kun bɔ kɛ bian gblɛfuɛ dan sɔ'n i nyin o su'n ɔ kannin'n su, i waan sɛ be kun i nan ɔ di le nsan'n, ɔ ´cɛn.

⁶⁴ I sɔ'n ti, se sonja mun man be ko nian ndia'n su lele ɔ di le nsan nan i sɔnnzɔnfuɛ'm b'a fɛ-mɛn i fuɛn'n b'a se-man sran'm be kɛ ɔ'a cɛn'n ti. Sɛ ɔ yo sɔ'n, gblɛ nga be wa to i kasiɛn'n, ɔ ´tra laa liɛ'n.»

⁶⁵ Pilat seli be kɛ: «Sonja'm be yɛ be o lɛ-ɔ, an `fa be wɔ man be ko nian su kɛ an klo'n sa.»

⁶⁶ Be fa be ɔli. Kɛ be tali ndia'n su'n, be sieli i nzɔliɛ yɛ be sieli sonja'm be lɛ.