Matthieu 26 - NYANMIƐN NDƐ'N 1998

Mɛn kpɛnngbɛn'm be Jésus wun ndɛ cicilɛ

¹ Kɛ Jésus wieli ndɛ sɔ'n kwlaa kan bɔ i nuan tɔli'n, ɔ seli i sɔnnzɔnfuɛ'm be kɛ:

² «An si kɛ ɔ ka le nnyɔn Delɛ-cɛn'n i dilɛ'n ´ju, be wa fa m bɔ n kacili Sran'n man sran mun kɛ be `bobo min waka'n su.»

³ I ti Nyanmiɛn nyrun jranfuɛ'm be su kpɛn nin mɛn kpɛnngbɛn'm be yiali Nyanmiɛn nyrun jranfuɛ dan'n bɔ be flɛ i Kaif'n i awlo lɔ

⁴ kɛ be ´kunndɛ ngwlɛlɛ wafa nga be ´fa tra Jésus be kun i'n.

⁵ Sanngɛ be waan: «Nán man ɔ yo cɛn dilɛ'n nun, sɛ ɔ yo sɔ-ɔ, ɔ cɛ-man nan sran'm b'a tri.»

Bla kun fa parfɛn guali Jésus ti'n su

⁶ Kɛ Jésus o Simɔn b'ɔ ti kokowefuɛ'n i awlo Betani lɔ'n,

⁷ bla kun bɛli i wunlɛ. Parfɛn bɔ i gua ti kekle kpa'n i albatri sɛ kun o i sa nun. Kɛ be ti aliɛ'n sin, bla sɔ'n ɔ fa parfɛn sɔ'n guɛli Jésus i ti'n su.

⁸ Kɛ i sɔnnzɔnfuɛ'm be wunnin i sɔ'n, ɔ yoli be ya, nan ba se kɛ: «?Like sacilɛ ngbɛn kɛ nga sa'n, i bo yɛlɛ onin?

⁹ Be kwla yo parfɛn nga i atɛ gua kpan be fɛ i sika'n man yalɛfuɛ mun.»

¹⁰ Jésus wunnin be akunndan'n nan ɔ'a se be kɛ: «?Nguɛ ti yɛ an fita bla'n i anwlɛn sɔ-ɔ? Like ng'ɔ yo mannin min'n ti kpa.

¹¹ Afin amun nin yalɛfuɛ mun yɛ amun ´ka titi-ɔ, sanngɛ n liɛ'n, min nin amun su tran-man wa titi .

¹² Parfɛn sɔ'n b'ɔ fa guali min wun'n, ɔ ti kɛ min nziɛ li yɛ ɔ'a sie i lɛ-ɔ.

¹³ Nanwlɛ, mɛn wunmuan'n nun'n, lika kwlaa nga be ´bo jasin fɛ nga'n, be ´kan sa nga bla nga yoli'n wie kɛ bé wla `kpɛn i su.»

Zidas i Jésus sran'm be fa manlɛ

¹⁴ Yɛ i sɔnnzɔnfuɛ blu-nin-nnyɔn'm be nun kun bɔ be flɛ i kɛ Zidas Iskariɔt'n ɔ ɔli Nyanmiɛn nyrun jranfuɛ dandan'm be wun lɔ,

¹⁵ nan ɔ'a usa be kɛ: «?Sɛ n fɛ i man amun'n, nguɛ yɛ amun ´man min-ɔn?» Nan be nɛn a sɛ su kɛ be ´mɛn i jɛtɛ ufue ablasan .

¹⁶ Kɛ ɔ fin cɛn sɔ nun'n, ɔ kunndɛli cɛn ng'ɔ ti kpa bɔ i nun ɔ ´kwla fɛ i man be'n.

Jésus nin i sɔnnzɔnfuɛ'm be dili Delɛ-cɛn'n

¹⁷ Le kunngba bɔ be ´bo kpaun bɔ be gua-man nun ayre'n i dilɛ bo'n, Jésus sɔnnzɔnfuɛ'm be wa usɛli i kɛ: «?Lika onin yɛ a klo kɛ e ko siesie nan a ´di Delɛ-cɛn nun-ɔn?»

¹⁸ Ɔ seli be kɛ: «An wɔ klɔ lɔ sran kun awlo nan an `se i kɛ: ‹Nja waan, e `se wɔ kɛ i blɛ'n ɔ'a mantan nan ɔ lika wa yɛ ɔ nin i sɔnnzɔnfuɛ'm be ´di Delɛ-cɛn nin-ɔn.› »

¹⁹ Jésus sɔnnzɔnfuɛ'm be yoli likɛ ng'ɔ kan kleli be kɛ be yo'n, nan b'a ko tɔn Delɛ-cɛn'n i aliɛ'n .

²⁰ Kɛ aliɛ jɔli'n, ɔ nin i sɔnnzɔnfuɛ blu-nin-nnyɔn'm be trannin aliɛ'n sin.

²¹ Kɛ be ´di like'n, ɔ seli kɛ: «Nanwlɛ, amun nun kun wa fa min man sran mun.»

²² Bé wla boli dan kpa nan b'a usa bé ti nun ti nun kɛ: «?Nannan, min-ɔn?»

²³ Ɔ seli kɛ: «Sran nga be nin min wlali asa icra'n, be nun kun yɛ ɔ ´fa min man sran mun-ɔn.

²⁴ M bɔ n kacili Sran'n n su kɔ kɛ be fa klɛli min wun ndɛ'n nun'n sa, sanngɛ sran ng'ɔ ´fa min man sran mun'n, i yako! Ɔ flunman kɛ b'a wu-man sran sɔ'n.»

²⁵ Zidas b'ɔ fɛ i mannin sran mun'n ɔ usɛli i kɛ: «?Baba, min-ɔn?» Jésus seli i kɛ: «Ɛɛn, yɛ ɔ́ nuan o su lɛ-ɔ.»

Kɔminiɔn falɛ'n i ba kpɛlɛ

²⁶ Kɛ be ´di like'n, Jésus fali kpaun yɛ ɔ lali Nyanmiɛn ase. Kɛ ɔ lali Nyanmiɛn ase wieli'n, ɔ bubuli nun fa mɛnnin i sɔnnzɔnfuɛ mun nan ɔ'a se be kɛ: «Kpaun ng'ɔ o yɛ'n ti min wunnɛn, an `fa di»

²⁷ I sin ɔ fali klowa kun yɛ ɔ lali Nyanmiɛn ase. Kɛ ɔ lali Nyanmiɛn ase wieli'n, ɔ fa mannin be yɛ ɔ seli be kɛ:

²⁸ «Amun kwlaa an `nɔn nzan ng'ɔ o nun'n, afin nzan sɔ'n ɔ ti min mmoja b'ɔ ti aenguɛ uflɛ nga Nyanmiɛn waan ɔ nin sran'm be tra'n i nzɔliɛ. Sran sunman be ti yɛ be ´guɛ i ase-ɔ, ɔ man Nyanmiɛn ´yaci bé sa bɔ be yoli i'n cɛ be .

²⁹ N ´kan kle amun kɛ, kɛ ɔ fin ndɛ'n, n su nɔn-man vinyi mma'n i nzue nga kun lele san cɛn nga min nin amun e ´nɔn uflɛ n Si i mɛn'n nun lɔ'n.»

³⁰ Kɛ be toli Nyanmiɛn manmanlɛ jue'n, be ɔli Olivie Oka'n su lɔ.

Jésus seli kɛ Piɛr wa se kɛ ɔ si-mɛn i

³¹ Yɛ Jésus seli be kɛ: «Ndɛ kɔnguɛ nga amun kwlaa amún ti nun wa saci min ti, afin be klɛli i kɛ: ‹M ma bo bua tafuɛ'n, yɛ bua fa sɔ'n be ´bo sanndi .›

³² Sanngɛ kɛ n wu bɔ n ko cɛn'n, n ´dun mmua amun nyrun Galile lɔ.»

³³ Piɛr sɔli su nan ɔ'a se i kɛ: «Kannzɛ wɔ ti be kwlaa bé ti nun ´saci'n, n liɛ'n su saci-man wie mlɔnmlɔn.»

³⁴ Jésus seli i kɛ: «Nanwlɛ, ndɛ kɔnguɛ nga bɔbɔ, a wa se kɛ a si-man min sɔ kpɛ nsan nan akɔ nyinman'n ɔ'a bo.»

³⁵ Piɛr seli i kɛ: «Kannzɛ min nin wɔ e ´wu'n, san e ´wu, n su se-man kɛ n si-man wɔ le.» Nan i sɔnnzɔnfuɛ'm be kwlaa b'a kan ndɛ kunngba'n.

Jésus kɔ srɛ Nyanmiɛn Zɛtsemane lɔ

³⁶ Kɛ ɔ yoli sɔ'n, Jésus nin i sɔnnzɔnfuɛ'm be ɔli lika bɔ be flɛ i Zɛtsemane'n nun lɔ. Kɛ be juli lɔ'n, ɔ seli be kɛ: «An `tran wa, n kusu n ´kɔ n nyrun lɔ, n ´kɔ srɛ min Si.»

³⁷ Ɔ fali Piɛr nin Zebede wa yasua nnyɔn'm be ɔli, akluntitiɛ'n tɔli i su, yɛ awlaboɛ'n boli i kunlɛ bo-ɔ,

³⁸ yɛ ɔ seli be kɛ: «Awlaboɛ'n su kun min, an `ka wa, an `tran bé nyin su uka min.»

³⁹ Yɛ ɔ ɔli i nyrun lɔ kaan nan ɔ'a la ɔ'a utu i nyin ase, yɛ ɔ seli i Si kɛ: «N Si, sɛ nyrɛnnɛn wie nga kwla to fuan min'n, man ɔ to fuan min, nán yo nga n klo kɛ ɔ `yo su'n, sanngɛ yo nga a klo kɛ ɔ `yo su'n.»

⁴⁰ Kɛ ɔ sɛli i sin b'ɔ ´to i sɔnnzɔnfuɛ mun-ɔn, be o lɛ be su lafi, yɛ ɔ seli Piɛr Kɛ: «Amu'an kwla tran-man amún nyin su a uka-man min dɔ bɔ kun!

⁴¹ Man amún nyin tran su, yɛ amun `srɛ Nyanmiɛn nan Lakafuɛ'n ɔ'a laka-man amun. Amun anwlɛn'n wo su kɛ amun `yo, sanngɛ an lɛ-mɛn i wun fanngan.»

⁴² Ɔ yaci be ɔli ekun nan ɔ'a se i Si kɛ: «N Si, sɛ ɔ ti-man bɔ nyrɛnnɛn wie nga to fuan min'n, man n wun nyrɛnnɛn sɔ'n. Sa nga a klo kɛ a ´yo'n, yo.»

⁴³ Ɔ bali ekun, ɔ ´to be-ɔ, be su lafi, afin lafilɛ'n wo bé nyin su.

⁴⁴ Ɔ yacili be lɛ ɔli ekun, ɔ ko kan ndɛ kunngba'n kleli i Si ekun.

⁴⁵ I sin ɔ sɛ i sin bɛli i sɔnnzɔnfuɛ'm bé wun lɛ nan ɔ'a se be kɛ: «An `de wunmiɛn, an `lafi siɛn'n! An `nian, dɔ nga be ´fa m bɔ n kacili Sran'n man sa tɛ yofuɛ mun'n ɔ'a ju.

⁴⁶ An `jao man e wɔ, sran ng'ɔ ´fa min man sran mun'n ɔ su ba.»

Jésus i tralɛ

⁴⁷ Kɛ i nuan tɛ o ndɛ'n su kpɛkuun i sɔnnzɔnfuɛ blu-nin-nnyɔn'n be nun kun bɔ be flɛ i kɛ Zidas'n, ɔ nin sran kpanngban bɔ Nyanmiɛn nyrun jranfuɛ dandan nin mɛn kpɛnngbɛn'm be sunmannin be'n, bɔ tokofi nin klɔnman o bé sa nun'n, b'a bo nun.

⁴⁸ Zidas b'ɔ fɛ i mannin sran mun'n, ɔ kleli be nzɔliɛ kun, ɔ seli kɛ: «Sran nga n to ń sa yi i kɔmin'n, wuun i-ɔ, an `trɛ i.»

⁴⁹ Kpɛkuun ɔ wunngeli i wun lɛ nan ɔ'a se i kɛ: «Baba, anun o,» yɛ ɔ toli i sa yili i kɔmin-ɔn.

⁵⁰ Jésus seli i kɛ: «Janvuɛ, like nga a bɛli i yolɛ'n, `yo.» Nan sran sɔ'm b'a tɔ Jésus su b'a trɛ i.

⁵¹ Be nga be su Jésus su'n be nun kun cuɛn i tokofi'n ɔ fa kpɛli Nyanmiɛn nyrun jranfuɛ'm be su kpɛn'n i sran'n kun su'n.

⁵² Yɛ Jésus seli i kɛ: «Fa ɔ tokofi'n wlɛ i bua'n nun, sran kwlaa ng'ɔ tra tokofi nun'n, tokofi'n i nuan yɛ ɔ ´kɔ-ɔ .

⁵³ ?A bu i kɛ n kwla flɛ-man n Si kɛ ɔ blɛ min anz bɔ be tra akpi fa blu-nin-nnyɔn icra'n?

⁵⁴ ?Sɛ ɔ'a yo-man sɔ'n, ɔ ´yo sɛ nan ndɛ nga be klɛli i kɛ be ´yo kɛ nga sa'n, ɔ'a kpɛn su?»

⁵⁵ Kpɛkuun Jésus seli sran'm be kɛ: «An su n su nin klɔnman mun nin tokofi mun kɛ kodiawiefuɛ yɛ an bɛ i tralɛ sa. Cɛn kwlaa n tran Nyanmiɛn i sua'n nun n kle like, amu'an tra-man min.

⁵⁶ Sanngɛ be yoli i kwlaa sɔ'n nan ndɛ nga Nyanmiɛn nuan ijɔfuɛ'm be klɛli'n ɔ ´kpɛn su.» Yɛ i sɔnnzɔnfuɛ'm be kwlaa be yacili i lɛ be wanndili-ɔ.

Jésus i jɔlɛ difuɛ dandan'm bé ja su fa kɔlɛ

⁵⁷ Be bɔ be trali Jésus'n, be fɛ i ɔli Nyanmiɛn nyrun jranfuɛ'm be su kpɛn Kaif i awlo lɔ kan mmla klefuɛ nin kpɛnngbɛn'm be yiali lɔ'n.

⁵⁸ Piɛr su i su lele be juli Nyanmiɛn nyrun jranfuɛ'm be su kpɛn'n i awlo lɔ, sanngɛ ɔ'a mɛntɛn-mɛn i. Ɔ wluli lɔ, ɔ nin sua sunianfuɛ'm be trannin lɛ kɛ ɔ ´nian kɛ ndɛ sɔ'n ɔ ´fa kpɛ'n.

⁵⁹ Nyanmiɛn nyrun jranfuɛ dandan'm be nin jɔlɛ difuɛ dandan'm be kwlaa be kunndɛ Jésus wun sa kun bɔ be ´jran su fa kun i.

⁶⁰ Sran kpanngban be wa tɔnnin i suɛn, sanngɛ ɔ'a yo-man ye.

⁶¹ I sin i suɛn tɔnfuɛ nnyɔn ekun be bali, be seli kɛ: «Bian nga waan ɔ kwla bubu Nyanmiɛn i sua'n yɛ ɔ ´kplɛn i uflɛ le nsan.»

⁶² Nyanmiɛn nyrun jranfuɛ'm be su kpɛn'n ɔ jao usali Jésus kɛ: «?A tɛ-man ndɛ fi su? ?Ndɛ nga be ´kɛn i lɛ'n, ɔ ti sɛ?»

⁶³ Sanngɛ Jésus a uke-mɛn i nuan. Yɛ Nyanmiɛn nyrun jranfuɛ'm be su kpɛn'n seli i kɛ: «N ´srɛ wɔ, nian Nyanmiɛn b'ɔ lafi-man'n ti, sɛ a ti Krist Nyanmiɛn Wa'n, kan kle ye.»

⁶⁴ Yɛ Jésus seli i kɛ: «Yɛ ɔ́ nuan o su lɛ-ɔ. N ´kan kle amun ekun kɛ, kɛ ɔ fin ndɛ'n, amun wa wun m bɔ n kacili Sran'n kɛ n ti Nyanmiɛn i fama su yɛ n wo nyanmiɛn ble'n su n su ba .»

⁶⁵ Yɛ Nyanmiɛn nyrun jranfuɛ'm be su kpɛn'n titili i bɔbɔ wun tralɛ'm be nun nan ɔ'a se kɛ: «Ɔ'a saci Nyanmiɛn dunman! ?Lalofuɛ onin yɛ e ´kunndɛ i ekun-ɔn? Afin amun bɔbɔ an tili Nyanmiɛn dunman b'ɔ saci i'n. ?An bu i sɛ ?»

⁶⁶ Yɛ be seli i kɛ: «Ɔ nin kunlɛ yɛ ɔ fata-a.»

⁶⁷ Kɛ ɔ yoli sɔ'n, yɛ be guɛli i nyrun ngɔsrɛ-ɔ, yɛ be boli i acɔliɛ-ɔ.

⁶⁸ Wie'm be kpacili nyrun yɛ be seli kɛ: «Krist, kle ye sran ng'ɔ bo wɔ'n.»

Piɛr seli kɛ ɔ si-man Jésus

⁶⁹ Kɛ ɔ ´yo sɔ'n, wuun Piɛr ti awlo lɛ. Afanniɛn kun bɛli i wun lɛ wa seli i kɛ: «Wɔ, a o Jésus b'ɔ fin Galile'n i sin wie.»

⁷⁰ Sanngɛ ɔ kɛnnin i be kwlaa be nyrun lɛ kɛ ɔ si-mɛn i, ɔ seli i kɛ: «Ndɛ nga a kan'n, n wun-mɛn i wlɛ.»

⁷¹ Kɛ Piɛr ɔli ala bo lɔ'n, afanniɛn kun ekun wunnin i, ɔ seli be nga be o lɛ'n be kɛ: «Bian nga o Jésus b'ɔ fin Nazarɛt'n i sin wie.»

⁷² Ɔ kɛnnin i ekun kɛ ɔ si-mɛn i, nan ɔ'a flɛ Nyanmiɛn ɔ'a di.

⁷³ Kɛ ɔ cɛli kan'n, be nga be o lɛ'n be wunngeli Piɛr wun lɛ nan b'a se i kɛ: «Nanwlɛ, wɔ, a o minniɛn nga'm be nun wie, afin wɔ aniɛn'n kle sɔ.»

⁷⁴ Yɛ ɔ ´fa Nyanmiɛn wɛwɛ i wun-ɔn, i sin ɔ seli kɛ: «Sɛ m bua ato'n, man Nyanmiɛn wun min. N si-man bian sɔ'n.» Kɛ ɔ yoli sɔ'n yɛ akɔ nyinman'n boli-ɔ.

⁷⁵ Yɛ Piɛr wla kpɛnnin ndɛ nga Jésus kan kleli i i su-ɔ. Ɔ kɛnnin i kɛ ɔ wa se kɛ ɔ si-mɛn i sɔ kpɛ nsan nan akɔ nyinman'n ɔ'a bo. Ɔ fiteli gua su lɔ nan ɔ'a sun dan kpa.