Matthieu 25 - NYANMIƐN NDƐ'N 1998

Talua blu bé wun nyanndra

¹ «I blɛ sɔ'n nun'n Nyanmiɛn sielɛ'n ɔ ´yo kɛ talua blu bɔ be fali bé kannin mun kɛ be ´ko kpa yasua kun b'ɔ su fa atɔnvlɛ'n i atin'n sa.

² Be nun nnun be ti sinnglinfuɛ, yɛ nnun be ti ngwlɛlɛfuɛ.

³ Sinnglinfuɛ'm be fali bé kannin'n, sanngɛ b'a fɛ-mɛn i nzue wie a tra-man nun.

⁴ Sanngɛ ngwlɛlɛfuɛ'm be fali bé kannin mun, yɛ be guɛ i nzue'n wie like wie nun trali nun.

⁵ Kɛ yasua sɔ'n cɛli b'ɔ ba-man'n, lafilɛ'n fali be kwlaa nan b'a lafi.

⁶ Kɛ lika'n buli nun'n, sran wie kpan seli kɛ: ‹An `nian, bian'n su ba, an `fite ko kpɛ i atin.›

⁷ Talua sɔ'm be kwlaa be jaoli nan b'a yo bé kannin'm be kpa.

⁸ Sinnglinfuɛ'm be seli ngwlɛlɛfuɛ'm be kɛ: ‹An `man ye amún kannin nzue'n wie, afin é kannin liɛ'm be su nuan.›

⁹ Ngwlɛlɛfuɛ'm be seli be kɛ: ‹E bu-mɛn i kɛ ng'ɔ o e sa nun'n ɔ ju e nin amun, ɔ man an `wɔ kan be yo i atɛ lɔ'n an `ko to amun liɛ.›

¹⁰ Kɛ be ´kɔ i tolɛ'n yɛ bian'n juli lɛ-ɔ, be nga be buabuali bé wun'n, be nin bian'n be wluli kan be fa atɔnvlɛ'n lɔ'n nan b'a to anuan'n nun.

¹¹ Kɛ ɔ cɛ lɔuun kan'n yɛ talua nga'm be bali-ɔ, be seli kɛ: ‹Nja, Nja tike ye anuan!›

¹² Sanngɛ ɔ seli be kɛ: ‹Nanwlɛ, n si-man amun.›

¹³ Yɛ Jésus seli be kɛ: I ti'n, an `tran minndɛ, afin an si-man cɛn'n nin dɔ'n.»

Junman difuɛ nsan bé wun nyanndra

¹⁴ «Ɔ wa yo kɛ bian kun bɔ kɛ ɔ wa kɔ lika'n ɔ flɛli i sran mun yɛ ɔ fɛli i ninnge'n kwlaa wlali bé sa nun'n sa.

¹⁵ Ɔ mannin kun talan nnun, ɔ mannin kun nnyɔn, yɛ ɔ mannin kun ekun kun, kɛ sran kun i wunmiɛn'n fa ti ju'n i su yɛ ɔ niannin fa mɛnnin i-ɔ, yɛ ɔ ɔli-ɔ.

¹⁶ Kɛ ɔ yoli sɔ'n, nga be mɛnnin i talan nnun'n, ɔ fa ko dili aata nan ɔ'a nyan su nnun.

¹⁷ I kunngba'n, nga be mɛnnin i talan nnyɔn'n, ɔ nyannin nnyɔn ukali su.

¹⁸ Nga kusu bɔ be mɛnnin i kun'n, ɔ ko kpɛli kunman nan ɔ'a fa i min'n i sika'n ɔ'a fia nun.

¹⁹ Kɛ ɔ cɛli kpa'n, sran sɔ'm be min'n bali, ɔ flɛli be kɛ be bla man be bu sika b'ɔ mannin be'n i akunndan.

²⁰ Nga b'ɔ mɛnnin i talan nnun'n, ɔ fa nnun ekun bali yɛ ɔ seli kɛ: ‹Baba, a mannin min talan nnun, nian, m'an nyan nnun ekun.›

²¹ I min'n seli i kɛ: ‹Ɔ ti kpa. A ti sran kpa, a ti nanwlɛfuɛ, like kaan nga n fa mannin wɔ'n, a yoli i kpa, i sɔ'n ti n kusu n ´fa wɔ sie like dan su. Bla man e si able.›

²² Nga b'ɔ mɛnnin i nnyɔn'n, i kusu bali yɛ ɔ seli kɛ: ‹Baba, a mannin min talan nnyɔn, nian, m'an nyan nnyɔn ekun.›

²³ I min'n seli i kɛ: ‹Ɔ ti kpa. A ti sran kpa, a ti nanwlɛfuɛ, like kaan nga n fa mannin wɔ'n, a yoli i kpa, i sɔ'n ti n ´fa wɔ sie like dan su. Bla man e si able.›

²⁴ I sin, nga b'ɔ mɛnnin i kun'n bali yɛ ɔ seli kɛ: ‹Baba, n si kɛ a ti sran bɔ ɔ like yolɛ yo ya: lika nga a gua-man awie lɛ'n, a kpɛ awie lɛ, yɛ a isa awie bɔ nán wɔ yɛ a boli'n.

²⁵ Srɛ kunnin min ɔ́ wun nan m'an fa ɔ talan'n m'an ko wlɛ i ase, nian, ɔ sika'n yɛ, de.›

²⁶ I min'n seli i kɛ: ‹A ti sran tɛ, a ti fuɛnfuɛ, ɔ fin ɔ nuan kɛ lika nga m'an gua-man awie lɛ'n, n kpɛ awie lɛ, yɛ n isa awie bɔ nán min yɛ m boli'n.

²⁷ ?B'ɔ li a si sɔ'n, sɛ ɔ ti kɛ a fali n sika'n ko mannin sika siefuɛ mun'n, wuun kɛ n sa n sin bali'n, bɔ n ´ko fa'n, wuun n nyan-man su nvasuɛ?

²⁸ I sɔ'n ti, an `de talan kun ng'ɔ o i sa nun'n, an `fa uka sran ng'ɔ lɛ talan blu'n i liɛ'n su.

²⁹ Afin sran ng'ɔ lɛ like'n yɛ be ´mɛn i wie-ɔ, yɛ ɔ ´nyan kpanngban, sanngɛ sran ng'ɔ lɛ-man like'n, kaan ng'ɔ o i sa nun'n bɔbɔ, be ´de.

³⁰ Yɛ n sran b'ɔ o yɛ'n b'ɔ lɛ-man nyanko'n, an `fɛ yi guasu lɔ aosin'n nun kan be sun be di bé je lɔ'n.› »

Jɔlɛ dilɛ'n i atabo

³¹ «M bɔ n kacili Sran'n bɔ min nyrun ti nyannyan ɔ yo sro'n, kɛ min nin min anz'm be kwlaa e ba'n, n ´yi n famiɛn'n nglo n ´tran m bia'n su.

³² Nvle-nvle'm be kwlaa be ´yia min nyrun lɛ, m ´bu be nun kɛ nnɛn tafuɛ'n bu i bua mun nin i boli'm be nun gua be ngunmin-ngunmin'n sa .

³³ N ´gua bua mun ń sa fama su, yɛ n ´gua boli mun ń sa bɛ su.

³⁴ Yɛ m bɔ n ti famiɛn'n n ´se be nga be gua n fama su'm be kɛ: ‹Amun bɔ n Si yoli amun ye'n, an `bla be wa di famiɛn bɔ kɛ be ´bo mɛn'n i bo'n be sie mannin amun'n.

³⁵ Afin kɛ awe kunnin min'n, an mannin min like, kɛ nzue we kunnin min'n, an mannin min nzue, kɛ n ti aofuɛ'n, an sikeli min,

³⁶ kɛ min wun ti kplɛn'n, an mannin min tannin, kɛ n tɔli tukpacɛ'n, an niannin n lika, kɛ be wlali m bisua'n, an niannin n osu .›

³⁷ Yɛ nanwlɛfuɛ'm be wa usa n kɛ: ‹?Nannan, cɛn onin yɛ e wunnin wɔ bɔ awe kun wɔ bɔ e mannin wɔ like-ɔ, yɛ cɛn onin yɛ e wunnin wɔ bɔ nzue we kun wɔ bɔ e mannin wɔ nzue-ɔ?

³⁸ ?Cɛn onin yɛ e wunnin wɔ bɔ a ti aofuɛ bɔ e sikeli wɔ-ɔ, yɛ cɛn onin yɛ e wunnin kɛ ɔ́ wun ti kplɛn bɔ e mannin wɔ tannin-ɔn?

³⁹ ?Yɛ cɛn onin ekun yɛ e wunnin kɛ a tɔli tukpacɛ annzɛ b'a wla ɔ bisua bɔ e niannin ɔ osu-ɔ?›

⁴⁰ Yɛ m bɔ n ti famiɛn'n n ´se be kɛ: ‹Nanwlɛ, like kwlaa nga an yo mannin n niaan nga be yalɛ'n tra wie'm be liɛ'n be nun kun'n, wuun min yɛ an yo mannin min-ɔn .›

⁴¹ I sin n ´se be nga be gua m bɛ su'm be kɛ: ‹Amun bɔ n Si boli amun sannzan'n, an `jao min wun lɛ wɔ anannganman sin bɔ be trɔ mannin mmusu'm bé si Satan nin i anz mun'n nun.

⁴² Afin kɛ awe kunnin min'n, amu'an man-man min like, kɛ nzue we kunnin min, amu'an man-man min nzue.

⁴³ Kɛ n ti aofuɛ'n, amu'an sike-man min, kɛ min wun ti kplɛn'n, amu'an man-man ń tannin, kɛ n tɔli tukpacɛ, amu'an nian-man n lika, kɛ be wlali m bisua, amu'an nian-man n osu.›

⁴⁴ Yɛ be kusu be ´usa n kɛ: ‹?Nannan, cɛn onin yɛ e wunnin wɔ bɔ awe kunnin wɔ, annzɛ nzue we kunnin wɔ, annzɛ a ti aofuɛ, annzɛ ɔ́ wun ti kplɛn, annzɛ a tɔli tukpacɛ, annzɛ be wlali ɔ bisua bɔ y'a nian-man ɔ lika-a?›

⁴⁵ Yɛ n ´se be kɛ: ‹Nanwlɛ, sɛ amu'an yo-man like b'a man-man n niaan nga be yalɛ'n tra wie'm be liɛ'n be nun kun'n, wuun min yɛ amu'an yo-man a man-man min-ɔn.›

⁴⁶ Sran sɔ'm be liɛ'n, be ´kɔ lika bɔ lɔ nyrɛnnɛn'n wie-man'n nun'n, sanngɛ nanwlɛfuɛ'm be ´nyan anannganman nguan .»