Matthieu 24 - NYANMIƐN NDƐ'N 1998

Jésus kannin Nyanmiɛn i sua'n i sacilɛ ndɛ

¹ Kɛ Jésus fin Nyanmiɛn i sua'n nun fiteli b'ɔ ´kɔ'n, i sɔnnzɔnfuɛ'm be wunngeli i wun lɛ nan b'a fa Nyanmiɛn i sua'n i wafa nga be fa kplannin'n b'a kle i.

² Yɛ ɔ seli be kɛ: «?An wun ninnge nga kwlaa? Nanwlɛ, yɛbuɛ fi su kɛ-mɛn i wiengu yɛbuɛ su b'ɔ su kan gua-man-an.»

Nyrɛnnɛn nga sran'm be wa wun i nan mɛn'n ɔ'a bo'n

³ Ɔ ko trannin ase Olivie Oka'n su. Yɛ i sɔnnzɔnfuɛ'm be bɛli i wun lɛ nan b'a usɛ i blɛlɛ kɛ: «?Blɛ onin yɛ sa sɔ'm be ´yo-ɔ, yɛ nguɛ yɛ ɔ ti ɔ balɛ'n nin mɛn'n i awieliɛ'n i nzɔliɛ nin-ɔn? Kle ye.»

⁴ Jésus seli be kɛ: «An `sasa amun wun kpa, nán man be laka amun.

⁵ Afin sran sunman be wa fa n dunman'n be ´se kɛ be yɛ be ti Krist nin-ɔn. Be wa laka sran kpanngban.

⁶ Amun wa ti alɛ i wun ndɛ nin i nganniɛn, nán man amun klun titi amun, afin san sa sɔ'm be ´yo.

⁷ Sanngɛ kɛ ɔ ko yo sɔ'n, wuun mɛn i awieliɛ nian ju-man ka. Nvle kun wa jao nvle kun wun, yɛ famiɛn kun wa jao i wiengu famiɛn kun wun. Lika wie'm be nun'n awe'n wa kpɛn, asiɛ'n ɔ wa keje.

⁸ I kwlaa sɔ'n ti nyrɛnnɛn'n i bue nuan kaan sa.

⁹ Be wa fa amun wla nyrɛnnɛn nun, be ´kun amun, yɛ nvle'n kwlaa be ´kpɔ amun n dunman nun.

¹⁰ Ɔ man sran sunman bé ti nun ɔ ´saci, be ´fa be wiengu wlɛ sran'm bé sa nun, be ´kpɔ be wiengu.

¹¹ Sran kpanngban bɔ be tɔn bé wun suɛn kɛ be ti Nyanmiɛn nuan ijɔfuɛ'n, be wa jao laka sran kpanngban.

¹² Sa tɛtɛ'n b'ɔ wa sɔn'n ti sran kpanngban be sran klolɛ'n ɔ ´wie.

¹³ Sanngɛ sran ng'ɔ trɛ i anwlɛn lele ju i awieliɛ'n, ɔ ´fite nun.

¹⁴ Be wa kan Nyanmiɛn sielɛ'n i jasin fɛ nga mɛn wunmuan'n nun nan sran'n kwlaa be `ti Nyanmiɛn ndɛ'n. I sin yɛ mɛn i awieliɛ'n ɔ ´ju-ɔ.»

Nyrɛnnɛn dan'n

^15-16 «I sɔ'n ti, Tete Like bɔ Nyanmiɛn nuan ijɔfuɛ Daniɛl kɛnnin i ndɛ'n, blɛ nga an wun kɛ ɔ o Nyanmiɛn lika nun'n, man be nga be o Zide'n be wanndi ɔ oka'n su lɔ. Man sran ng'ɔ kanngan ndɛ sɔ'n, ɔ bu i akunndan !

¹⁷ Yɛ sran ng'ɔ o sua ti gbagblagba'n su'n, kɛ ɔ jra'n, nán man ɔ ko fa like sua lɔ.

¹⁸ Yɛ sran ng'ɔ o fie su'n, nán man ɔ sɛ i sin kɛ ɔ wa fɛ i tralɛ dan'n.

¹⁹ Blɛ sɔ'n nun'n, wunnzɛfuɛ mun nin bla ta mun be yako!

²⁰ An `srɛ Nyanmiɛn kɛ nán man amun wanndilɛ'n yo ayrɛ nun annzɛ wunmiɛn-delɛ-cɛn'n nun.

²¹ Afin blɛ sɔ'n nun'n, nyrɛnnɛn'n ɔ ´yo dan bɔ kɛ ɔ fin mɛn'n i bo bolɛ'n nun lele ndɛ, i wunsu nian yo-man le yɛ i wunsu su yo-man kun le .

²² Sɛ Nyanmiɛn a kpɛ-man cɛn sɔ'n su'n, sran fi su fite-man nun, sanngɛ be b'ɔ fali be'n be ti, ɔ ´kpɛ cɛn sɔ'n su.

²³ I blɛ sɔ'n nun'n, sɛ sran wie se amun kɛ Krist o wa'n annzɛ ɔ o le sa'n, nán an fa su.

²⁴ Afin be bɔ be tɔn bé wun suɛn kɛ be ti Krist'n, ɔ nin be bɔ be tɔn bé wun suɛn kɛ be ti Nyanmiɛn nuan ijɔfuɛ'n, be wa jao yɛ be ´yi atrɛ, yɛ be ´yo abonuan sa mun lele kɛ be nga Nyanmiɛn fali be'n sɛ be laka be-ɔ ɔ yo ye'n, be waan wuun be ´laka be.

²⁵ M'an dun mmua m'an bo su a kle amun.

²⁶ I sɔ'n ti, sɛ be se amun kɛ ɔ o aawlɛ flɛnnɛn nun lɔ'n, nán an wɔ, sɛ be se amun kɛ an `nian ɔ o sua lɔ'n, nán an fa su.

²⁷ Afin kɛ nyanmiɛn'n kpa sin wia afiliɛ lɔ b'ɔ kpaja lele ju wia atɔliɛ lɔ'n, kɛ m bɔ n kacili Sran'n m balɛ'n ɔ ´yo sɔ-ɔ.

²⁸ Lika nga like fuɛn o lɛ'n, lɛ yɛ apɛtɛkuasi'm be yia-a .»

Jésus b'ɔ kacili Sran'n i balɛ

²⁹ «Kɛ cɛn sɔ'n nun nyrɛnnɛn liɛ'n ko sin cɛ'n, wia'n ´kaci tuun, anglo'n su ta-man kun, nzraama'm be ´fin nyanmiɛn su lɔ gua, yɛ be wa keje nyanmiɛn su lɔ ninnge ngbli-ngbli'm be nun .

³⁰ Yɛ nzɔliɛ ng'ɔ kle kɛ m bɔ n kacili Sran'n n su ba'n, ɔ ´fite nyanmiɛn su lɔ, nvle-nvle'n kwlaa be ´bo awuyomo, be ´wun m bɔ n kacili Sran'n kɛ n wo nyanmiɛn ble'n su n su ba. M ´ba yasua su, kɛ ɔ ´yo sɔ'n, min nyrun o ´yo nyannyan yɛ ɔ ´yo sro .

³¹ Kɛ awɛ'n ko tɛ'n, n ´sunman min anz mun, be wa yia be bɔ Nyanmiɛn fali be bɔ be o mɛn wunmuan'n nun'n, kɛ ɔ fin nyanmiɛn b'ɔ la nglo lɔ plaii'n i bue kun su lele fa ju i bue kun ekun su lɔ'n yɛ ɔ ´yo i sɔ nin-ɔn .»

Figie'n i su ndɛ

³² «An `fa sunnzun figie'n be nian. Kɛ ɔ ´nyrɛn, bɔ i nnya'n ´trɛ'n, an si kɛ munngun'n ɔ'a mantan.

³³ I kunngba nin-ɔn, amun kusu kɛ an wun ninnge sɔ'm be kwlaa'n, man amun si kɛ m bɔ n kacili sran'n min nin amun a mantan yɛ n jin anuan'n sin.

³⁴ Nanwlɛ, sran nga be o lɛ'n, be su wie-man nan sa sɔ'm b'a yo.

³⁵ Nyanmiɛn b'ɔ la nglo lɔ plaii'n nin asiɛ'n be ´sin, sanngɛ min ndɛ'n i blɛ'n su sin-man le.»

Nyanmiɛn kunngba cɛ yɛ ɔ si Jésus balɛ cɛn-ɔn

³⁶ «Cɛn sɔ'n nin i dɔ'n, sran fi si-mɛn i, san min Si kunngba cɛ yɛ ɔ si i-ɔ. M bɔ n ti i Wa'n bɔbɔ n si-mɛn i, yɛ nyanmiɛn su lɔ anz'm be kusu be si-mɛn i.

³⁷ Kɛ m bɔ n kacili Sran'n n wa ba'n, sran'm be ´yo kɛ Noe i blɛ su'n sa.

³⁸ Blɛ sɔ'n nun'n, kɛ nzue dan'n i tɔlɛ'n ɔ ka kaan ´ju'n, sran'm be di like, be nɔn nzan, be ja bla nin bian lele fa ju cɛn nga Noe wluli mmeli nun'n.

³⁹ B'a bu-man like fi akunndan lele nzue dan'n ɔ wa fa be kwlaa ɔli. Kɛ m bɔ n kacili Sran'n m balɛ'n ɔ wa yo sɔ-ɔ .

⁴⁰ Blɛ sɔ'n nun'n, yasua nnyɔn bɔ be o fie kun su'n, be ´fa kun yɛ kun ´ka lɛ.

⁴¹ Bla nnyɔn bɔ be su si like'n be ´fa kun yɛ kun ´ka lɛ.

⁴² I sɔ'n ti, an `tran minndɛ, yɛlɛ kɛ an si-man cɛn nga amun Min'n ɔ ´ba nun-ɔn.

⁴³ Man amun wun i wlɛ kɛ, sɛ awlo bo kpɛn kun si kɔnguɛ dɔ nga awiefuɛ'n ´ba su'n, ɔ ´tran minndɛ i, ɔ su yaci-mɛn i lɛ kɛ ɔ fiti i sua'n.

⁴⁴ I sɔ'n ti, amun kusu an `buabua amún wun sie, afin m bɔ n kacili Sran'n m ´ba dɔ nga an bu-man min akunndan'n su.»

Junman difuɛ ng'ɔ ti kpa'n nin ng'ɔ ti-man kpa'n

⁴⁵ «?Sran kpa nanwlɛfuɛ b'ɔ si ngwlɛlɛ'n bɔ i min'n fɛ sie i sran'm bé su kɛ ɔ man be aliɛ blɛ ng'ɔ ti i nuan su'n i su'n, yɛlɛ wan?

⁴⁶ Junman difuɛ nga kɛ i min'n ´ba'n ɔ di i junman sɔ'n, i liɛ su ti ye!

⁴⁷ Nanwlɛ, ɔ wa fɛ i ninnge'n kwlaa wlɛ i sa nun.

⁴⁸ Sanngɛ sɛ ɔ ti junman difuɛ b'ɔ ti-man nanwlɛfuɛ b'ɔ bu akunndan kɛ

⁴⁹ i min'n i balɛ'n ɔ'a cɛ ti ɔ tɔ i wiengu junman difuɛ'm be su ɔ bo be, b'ɔ nin nzanboɛfuɛ mun be di be nɔn'n,

⁵⁰ junman difuɛ sɔ'n i min'n ɔ ´ba cɛn nga i nyin nun-mɛn i balɛ'n su kun'n nin dɔ ng'ɔ si-man kɛ i su yɛ ɔ ba'n.

⁵¹ Ɔ ´kpɛkpɛ i nun, ɔ ´fɛ i wla dunman klofuɛ'm be nun kan be sun be di be je lɔ'n.»