Matthieu 23 - NYANMIƐN NDƐ'N 1998

Jésus i mmla klefuɛ mun nin Farizifuɛ'm be kputulɛ

¹ Yɛ Jésus kan ndɛ kleli sran mun nin i sɔnnzɔnfuɛ mun-ɔn, ɔ seli be kɛ:

² «Mmla klefuɛ mun nin Farizifuɛ mun be sinnin Moiz ja nun.

³ I sɔ'n ti, like nga be kle amun'n, an `fa su, an `yo, sanngɛ nán an nian be nzuɛn'n su. Afin be kan ndɛ'n, sanngɛ be bɔbɔ be fa-man su.

⁴ Be wlawla trɔ nɔnnin-nɔnnin jin sran'm bé ti su, sanngɛ be bɔbɔ be fa-man be sama bɔ kun sa kɛn-mɛn i.

⁵ Like kwlaa nga be yo'n, be yo i kɛ sran'm be `wun be. Be wla sɛbɛ dandan mun, yɛ be yo be tralɛ'n i nuan njɔlɛ'n tɛnndɛn .

⁶ Kɛ be ´di like nzra nun'n, be klo sran dandan'm be tranwlɛ'n nun tranlɛ, be klo Nyanmiɛn ndɛ suanlɛ nin i srɛlɛ sua nun bia kpakpa'm be su tranlɛ.

⁷ Be klo kɛ sran'm be ´yo be like nzra nun yɛ be ´flɛ be Nannan.

⁸ Sanngɛ amun liɛ'n, nán an yo amún wun kɛ be `flɛ amun Nannan, afin amún su kpɛn b'ɔ ti amun like klefuɛ'n ti kunngba cɛ, yɛ amun kwlaa an ti niaan.

⁹ Nán an flɛ klɔ sran fi amún si, afin amún Si'n ti kunngba cɛ, i yɛ ɔ o nyanmiɛn su lɔ nin-ɔn.

¹⁰ Nán an yo amún wun kɛ be flɛ amun sran'm bé su kpɛn, afin amún su kpɛn'n ti kunngba cɛ, yɛlɛ Krist.

¹¹ Sran ng'ɔ ti dan tra amun kwlaa'n, man ɔ su i wiengu mun.

¹² Sran ng'ɔ yo i wun dandan'n, Nyanmiɛn wa guɛ i nyin ase, sanngɛ sran ng'ɔ tu-mɛn i wun'n, Nyanmiɛn man ɔ ´nyan nyrun.

¹³ Amun mmla klefuɛ mun nin Farizifuɛ mun amun ti dunman klofuɛ mun'n, an yako! Yɛlɛ kɛ an man-man sran'm be atin kɛ be fa bé wun man Nyanmiɛn kɛ ɔ `sie be. Amun bɔbɔ an fa-man amún wun man-man Nyanmiɛn kɛ ɔ `sie amun, yɛ be nga be waan be ´yo'n, an kplin-man be su. [

¹⁴ Amun mmla klefuɛ mun nin Farizifuɛ mun bɔ amun ti dunman klofuɛ mun, an yako! Yɛlɛ kɛ an de angboti mmla'm be awlo'n, yɛ an kan ndɛ tɛnndɛn kle Nyanmiɛn lelele kɛ sran'm be `bu amun sran kpa. I sɔ'n ti amun fɔ tulɛ liɛ'n ɔ wa yo tɛ kpa.]

¹⁵ Amun mmla klefuɛ mun nin Farizifuɛ mun bɔ amun ti dunman klofuɛ mun, an yako! Yɛlɛ kɛ an wlan jenvie'n nin asiɛ'n be lika'n kwlaa kɛ amun ´kunndɛ sran kun nan ɔ `kaci Zuif. Kɛ an ko nyɛn i'n, amun man ɔ kaci nyrɛnnɛn lika'n nun lɔfuɛ tra amun bɔbɔ kpɛ blu.

¹⁶ Amun anyansifuɛ'm bɔ an kle sran atin'n, an yako! Afin an se kɛ, sɛ sran wie di Nyanmiɛn i sua'n, ndɛ fi nun-man nun, sanngɛ sɛ sran wie di Nyanmiɛn i sua'n nun sika ɔkwlɛ'n, be `de i like.

¹⁷ Anyansifuɛ bɔ amun ti sinnglinfuɛ'n, sika ɔkwlɛ'n nin Nyanmiɛn i sua'n b'ɔ man sika ɔkwlɛ sɔ'n kaci Nyanmiɛn liɛ'n, be nun onin yɛ ɔ ti dan tra kun-ɔn ?

¹⁸ Yɛ an se kɛ, sɛ sran wie di Nyanmiɛn sɔwlɛ'n, ndɛ fi nun-man nun, sanngɛ sɛ sran wie di nnɛn'n bɔ be fa sɔ Nyanmiɛn b'ɔ o i sɔwlɛ'n su'n, be `de i like.

¹⁹ ?Anyansifuɛ mun, nnɛn'n yɛ ɔ ti dan annzɛ Nyanmiɛn sɔwlɛ'n bɔ i su yɛ Nyanmiɛn fa nnɛn nin-ɔn?

²⁰ Sran ng'ɔ di Nyanmiɛn sɔwlɛ'n, wuun ɔ'a di Nyanmiɛn sɔwlɛ'n nin like kwlaa ng'ɔ o su'n.

²¹ Yɛ sran ng'ɔ di Nyanmiɛn i sua'n, wuun ɔ'a di Nyanmiɛn i sua'n nin Nyanmiɛn bɔbɔ b'ɔ tran nun'n .

²² Sran ng'ɔ di nyanmiɛn b'ɔ la nglo lɔ plaii'n, wuun ɔ'a di Nyanmiɛn i bia'n nin Nyanmiɛn bɔbɔ b'ɔ tran su'n .

²³ Amun mmla klefuɛ mun nin Farizifuɛ mun bɔ amun ti dunman klofuɛ mun, an yako! Yɛlɛ kɛ an yi mant'n, nin anɛt'n, ɔ nin kumɛn'n be blusu'n, sanngɛ an yaci mmla ng'ɔ ti cinnjin'n, nin nanwlɛ dilɛ'n, nin aunnvuɛ silɛ'n, ɔ nin sa kpa yolɛ b'ɔ man sran'm be fa bé wla gua amun su'n. Sa sɔ'm be yolɛ'n yɛ ɔ ti i su nin-ɔn, sanngɛ nán an yaci wie'm be yolɛ.

²⁴ Amun anyansifuɛ'm bɔ an kle sran atin'n, an kpukpu nzue'n an yi kakaa ba kun b'ɔ o nun'n, sanngɛ an mɛn nyɔnngɔnmɛn .

²⁵ Amun mmla klefuɛ mun nin Farizifuɛ mun bɔ amun ti dunman klofuɛ mun, an yako! Yɛlɛ kɛ an wunnzin klowa nin talie'm bé sin'n, sanngɛ like nga an nyɛnnin i wue kekle su amun konvi kpli'n ti'n yɛ ɔ o nun-ɔn.

²⁶ Farizifuɛ anyansifuɛ, dun mmua wunnzin klowa'n nin talie'm be klun lɔ nan i sin'n kusu ɔ'a yo yɛiin.

²⁷ Amun mmla klefuɛ mun nin Farizifuɛ mun bɔ amun ti dunman klofuɛ mun, an yako! Yɛlɛ kɛ an ti kɛ ndia su sua bɔ b'a kɛn i ayre ufue'n sa, i talɛ'n yo klanman, sanngɛ i klun lɔ'n ti sran owie nin ninnge tɛtɛ wafa'n kwlaa.

²⁸ Amun kusu kɛ an ti sɔ-ɔ. Kɛ sran'm be wun amun'n, an fa sran kpa, sanngɛ dunman klolɛ'n nin sa tɛtɛ'n kwlaa be o amun anwlɛn'n nun.

²⁹ Amun mmla klefuɛ mun nin Farizifuɛ mun bɔ amun ti dunman klofuɛ mun, an yako! Yɛlɛ kɛ an kplan Nyanmiɛn nuan ijɔfuɛ'm be ndia'm be su sua, yɛ an yo sran kpakpa'm be asieliɛ'm be klanman.

³⁰ An se kɛ: ‹Sɛ ɔ ti kɛ é si'm be blɛ su e o lɛ'n, wuun e nin be é bo a yo-man kun y'a kun-man Nyanmiɛn nuan ijɔfuɛ mun.›

³¹ I sɔ'n nun amun bɔbɔ an kle kɛ an ti be nga be kunnin Nyanmiɛn nuan ijɔfuɛ'm bé wa.

³² Sɛ ɔ ti sɔ'n, like nga amún si'm be boli i bo'n, an `guɛguɛ i bo.

³³ ?Wuo mun, ɔnda mma mun, sɛ yɛ amun ´yo nan b'a bu-man amun fɔ nan b'a fa-man amun a ɔ-man nyrɛnnɛn lika'n nun-ɔn?

³⁴ Ɔ man, n ´sunman Nyanmiɛn nuan ijɔfuɛ mun nin ngwlɛlɛfuɛ mun, ɔ nin mmla klefuɛ mun amún sin. Amun wa kun wie, amun ´bobo wie waka'n su, amun ´bo wie mun nin ngble amun Nyanmiɛn ndɛ suanlɛ nin i srɛlɛ sua'm be nun, yɛ amun ´kle be yalɛ klɔ'm be su

³⁵ nan be kwlaa nga b'a yo-man sa tɛ fi bɔ be kunnin be'n kɛ ɔ fin Abɛl nanwlɛfuɛ'n i blɛ su lele fa juli Barasi wa Zakari bɔ an kunnin i Nyanmiɛn i sua'n nin Nyanmiɛn sɔwlɛ'n be afiɛn'n, bé wie ndɛ'n ɔ'a ka amun su .

³⁶ Nanwlɛ, i kwlaa sɔ'n ɔ ti ajulisufuɛ nga'm be ndɛ .»

Kokolɛ nga Jésus kokoli i Zerizalɛmfuɛ'm ti'n

³⁷ «Ɔo Zerizalɛmfuɛ mun! Zerizalɛmfuɛ'm bɔ an kun Nyanmiɛn nuan ijɔfuɛ mun'n, bɔ an fin be nga be sunman be amún sin'n be yɛbuɛ'n, blɛ sunman n klo kɛ n ´flɛ amun kɛ akɔ ta kun flɛ i mma mun b'ɔ utu be su'n sa, sanngɛ amu'an kplin-man su!

³⁸ An `nian, amun awlo'n ɔ wa ka amún sa nun, yɛ ndɛ kun bɔ n ´kan kle amun'n yɛ: an su wun-man min kun

³⁹ lele san amun ´se kɛ: ‹Sran ng'ɔ ba e Min i dunman nun'n, man ɔ yo i liɛ i ye .› »