Matthieu 22 - NYANMIƐN NDƐ'N 1998

Atɔnvlɛ falɛ i aliɛ dilɛ'n i wun nyanndra

¹ Jésus buli nyanndra kun ekun kleli be, ɔ seli kɛ:

² «Nyanmiɛn sielɛ'n ɔ fa famiɛn kun b'ɔ fa atɔnvlɛ mɛnnin i wa.

³ Ɔ sunmɛnnin i sran'm be kɛ be ko flɛ be b'ɔ yiali be atɔnvlɛ'n bo'n, sanngɛ be klo-man kɛ be ´ba.

⁴ Ɔ sunmɛnnin i sran uflɛ mun ekun, ɔ seli be kɛ: ‹An `ko se be nga n yiali be'n be kɛ m'an wie yo, m'an kun min nannin mun nin min nnɛn nga bɔ b'a lo'n, m'an tɔn, i kwlaa ɔ'a be, an bla atɔnvlɛ'n bo.›

⁵ Sanngɛ b'a bu-man flɛlɛ sɔ'n i akunndan, be ɔli be like'm be yolɛ, wie ɔli i fie su, yɛ wie kusu ɔli i aata dilɛ.

⁶ Yɛ wie'm be trɛli i sran sɔ mun nan b'a yo be tɛtɛ i sin be kunnin be.

⁷ Famiɛn'n fali ya dan kpa nan ɔ'a sunmɛn i sonja mun kɛ be ko kun sran kunfuɛ sɔ mun nan be wɔ be klɔ'n nun.

⁸ Yɛ ɔ seli i sran'm be kɛ: ‹M'an wie atɔnvlɛ falɛ ninnge'n yo, aliɛ'n ɔ'a be, sanngɛ be bɔ n yiali be'n b'a ba-man.

⁹ I sɔ'n ti, an wɔ anngɔnda'm be su, sran nga an wun be'n, an `flɛ be kwlaa man be bla atɔnvlɛ'n bo.›

¹⁰ Yɛ i sran sɔ'm be fali atin'm be su-ɔ, sran nga be wun be'n, sran tɛ o, sran kpa o, be flɛ be kwlaa, ɔ man sran'm be yili sua nga be fa atɔnvlɛ nun'n.

¹¹ Kɛ famiɛn'n wluli lɔ b'ɔ ´nian be b'ɔ yiali be atɔnvlɛ'n bo'n, ɔ wunnin sran kun bɔ ɔ'a wla-man tralɛ nga be fa kɔ atɔnvlɛ bo'n wie.

¹² Ɔ usɛli i kɛ: ‹?Janvuɛ, ɔ yo sɛ yɛ w'a wla-man tralɛ nga be fa kɔ atɔnvlɛ bo'n bɔ a wluli wa-a?›

¹³ Bian sɔ'n ɔ'a uke-mɛn i nuan. Yɛ famiɛn'n seli i minniɛn'm be kɛ: ‹An `ci i sa nin i ja'n nan an `yi i guasu lɔ aosin nun bɔ lɔ yɛ be sun be di be je'n.»

¹⁴ Yɛ Jésus seli kɛ: «Be flɛli sran kpanngban, sanngɛ be nun kaan sa yɛ be fali be-ɔ.»

Sezar i lapo'n

¹⁵ Yɛ Farizifuɛ'm be ko wunnin be wun-ɔn, be kunndɛ kɛ be ´tie Jésus nuan bo ndɛ nan be ´jran su fa trɛ i.

¹⁶ Be sunmannin be sɔnnzɔnfuɛ mun nin Erɔdfuɛ mun Jésus wun lɔ, be wa seli i kɛ: «Nja, e si kɛ a di nanwlɛ yɛ a kle sran mun Nyanmiɛn atin'n nanwlɛ nun, yɛ e si kɛ a sro-man sran fi, afin a nian-man sran nyrun yɛ a yo sa-a.

¹⁷ ?E su lapo man Sezar annzɛ nán man e su mɛn i? Nga bɔ a bu i su'n kan kle ye.»

¹⁸ Sanngɛ Jésus b'ɔ si be akunndan tɛ bɔ be bu'n, ɔ usali be kɛ: «?Gblɛ tofuɛ mun, nguɛ ti yɛ an kan min nian-an?

¹⁹ An `fa lapo'n i nun jɛtɛ mma kun bla n nian.» Yɛ be fa denie kun mɛnnin i-ɔ.

²⁰ Ɔ usali be kɛ: «?Wan yɛlɛ ng'ɔ o su yɛ'n? ?Yɛ wan sanuan yɛlɛ ng'ɔ klɛ su lɛ'n?»

²¹ Yɛ be waan: «Sezar yɛ ɔ o su-ɔ, yɛ i sanuan yɛ ɔ o su-ɔ.» Yɛ ɔ seli be kɛ: «Sɛ ɔ ti sɔ'n, an `fa ng'ɔ ti Sezar liɛ'n mɛn i, yɛ ng'ɔ ti Nyanmiɛn liɛ'n, an `fa mɛn i.»

²² Bé su tɛlɛ b'ɔ fa tɛli be'n, ɔ boli bé nuan, nan b'a jao i wun lɛ b'a wɔ.

Sran'm be cɛnlɛ'n i su sa usalɛ

²³ I le kunngba sɔ'n, Sadisefuɛ'm bɔ be waan sɛ sran wu-ɔ ɔ cɛn-man'n be bali Jésus wun lɛ nan b'a se i kɛ:

²⁴ «Nja, Moiz waan: ‹Yasua kun b'ɔ nin i yi b'a wu-man ba'n, sɛ ɔ wu'n, man i niaan'n jɛ i angboti'n nan ɔ nin i be wu ba kɛ ɔ yo nan i niaan'n i osu'n ɔ'a nunnun-man'n ti .›

²⁵ Sran nso bɔ be ti niaan'n, be o e nun wa laa. Be nyrun kpɛn'n jali bla, kpɛkuun be niaan sɔ'n wa wuli. Kɛ ɔ nin i bla'n b'a nyan-man ba b'ɔ ´kɛ i osu'n, i angboti'n kɛli i niaan kun sa nun.

²⁶ Be nnyɔn su'n, ɔ jɛli i kpɛkuun ɔ wa wuli. Be nsan su'n ɔ jɛli i kpɛkuun ɔ wa wuli ekun, ɔ yo sɔ lele fa juli be nso su'n.

²⁷ Kɛ be kwlaa be wuli'n, bla'n kusu ɔ wa wuli.

²⁸ ?Kɛ sran'm be ´cɛn'n, bla sɔ'n ɔ ´yo be nun onin liɛ, afin be nso'n be jɛli i?»

²⁹ Jésus seli be kɛ: «Amu'an fɔn, afin an wun-man Nyanmiɛn Ndɛ nga be klɛli'n i wlɛ, yɛ kusu an si-man kɛ Nyanmiɛn kwla like kwlaa yo.

³⁰ Afin kɛ sran'm be ko cɛn'n, yasua su ja-man bla, yɛ bla kusu su ja-man bian, sanngɛ be ´yo kɛ anz'm bɔ be o nyanmiɛn su lɔ'm be sa.

³¹ ?Be nga be wuli'n be cɛnlɛ'n i wun ndɛ'n, amu'an kanngan-man ndɛ nga Nyanmiɛn kan kleli amun kɛ,

³² ‹ɔ ti Abraam, nin Izaak, nin Zakɔb be Nyanmiɛn'n› i le? Nyanmiɛn ti-man be nga be wuli'n be liɛ, sanngɛ ɔ ti be nga be nyin o su'm be Nyanmiɛn.»

³³ Kɛ sran'm be tili ndɛ nga Jésus kan kleli be'n, ɔ boli bé nuan.

Mmla'n i nun dan'n

³⁴ Kɛ Farizifuɛ'm be tili i kɛ Jésus ndɛ'n kwlali Sadisefuɛ mun'n, be ko yiali.

³⁵ Nan be nun kun b'ɔ ti mmla'n i sifuɛ'n ɔ'a usɛ i sa kun kɛ ɔ ´fa sɛ i nian. Ɔ usɛli i kɛ:

³⁶ «?Nja, mmla'n i nun dan'n yɛlɛ onin?»

³⁷ Jésus tɛli i su kɛ: «Klo ɔ Min Nyanmiɛn'n kpa, fa ɔ́ wla'n kwlaa guɛ i su, man wɔ akunndan'n kwlaa trɛn i su.

³⁸ I yɛ ɔ ti mmla klikli nin i nun dan nin-ɔn.

³⁹ Yɛ i nnyɔn su b'ɔ fɛ'n yɛ ɔ o yɛ: Klo ɔ wiengu kɛ a fa klo ɔ bɔbɔ wun'n sa.

⁴⁰ Mmla nnyɔn nga su yɛ mmla'n nin Nyanmiɛn nuan ijɔfuɛ'm be ndɛ'n kwlaa taka-a.»

?Krist ti David i Anunman?

⁴¹ Kɛ Farizifuɛ'm be yiali'n, Jésus usali be kɛ:

⁴² «?An bu Krist sɛ? ?Ɔ ti waan wa?» Be seli i kɛ: «Ɔ ti David i anunman.»

⁴³ Yɛ Jésus seli be kɛ: «?Sɛ ɔ ti sɔ'n, wuun ɔ yo sɛ yɛ man Nyanmiɛn Wawɛ'n fanngan nun David flɛli i i Min nin-ɔn? ?Ɔ yo sɛ yɛ ɔ kannin ndɛ'n nga-a? Ɔ seli kɛ:

⁴⁴ ‹E Min Nyanmiɛn'n seli min Min liɛ'n kɛ: Tran ase n fama su, Lele m man a ´tia ɔ kpɔfuɛ'm be su ?›

⁴⁵ ?Sɛ David flɛli i i Min'n, wuun ɔ yo sɛ yɛ man ɔ ko yo i anunman-an?»

⁴⁶ Be nun wie fi a kwla tɛ-mɛn i su nin ndɛ kpɔlɛ bɔ kun. Kɛ ɔ fin cɛn sɔ nun'n, sran fi a kwla usɛ-mɛn i sa kun.