Matthieu 20 - NYANMIƐN NDƐ'N 1998

Sran bɔ be fali be kɛ be ko di junman'n

¹ «Nyanmiɛn sielɛ'n fa awlo bo kpɛn kun bɔ le kun ɔ jao nglɛmun kɛ ɔ ´ko kunndɛ junman difuɛ nan be ko di junman i vinyi fie'n su'n.

² Kɛ ɔ nin junman difuɛ ng'ɔ nyannin be'n be nɛn sɛli le kun denie kun su'n, ɔ fa be ɔli i vinyi fie'n su lɔ.

³ Ɔ fiteli nglɛmun wia nun yɛ ɔ wunnin sran wie mun ekun bɔ be gua gua'n su be lɛ-man junman.

⁴ Ɔ seli be kɛ: ‹Amun kusu an wɔ n vinyi fie'n su lɔ wie, yɛ sika ng'ɔ ti i nuan su'n, n ´fa man amun.›

⁵ Yɛ be ɔli-ɔ. Ɔ fiteli wia jran nin nnɔsua wia nun ekun, ɔ fali wie mun ekun.

⁶ Ɔ fiteli nnɔsua nun ekun, ɔ wunnin wie mun bɔ be gua lɛ be lɛ-man junman nan ɔ'a usa be kɛ: ‹?Nguɛ ti yɛ kɛ aliɛ cɛnnin lalaa'n an gua wa bɔ an di-man junman-an?›

⁷ Yɛ be waan: ‹Sran fi a fa-man ye.› Yɛ ɔ seli be kɛ: ‹Amun kusu, an wɔ vinyi fie'n su lɔ.›

⁸ Kɛ aliɛ jɔli'n, vinyi fie i fuɛ'n flɛli i junman difuɛ'm bé su kpɛn'n nan ɔ'a se i kɛ: ‹Flɛ junman difuɛ mun nan tua be kalɛ, bo i bo kasiɛnfuɛ'm be su fa kɔ kliklifuɛ'm be su .›

⁹ Be nga be fali be nnɔsua nun'n be bali, be tuali be denie kunngun.

¹⁰ I sin be nga be fali be klikli'n be bali, be bu kɛ be liɛ'n ɔ wa tra be nga'm be liɛ'n, sanngɛ be kusu be nyannin denie kunngun.

¹¹ Kɛ be nyɛnnin i sɔ'n, be ijɔli awlo bo kpɛn'n,

¹² be seli i kɛ: ‹Be nga be ba kasiɛn bɔ be dili dɔ kun'n, yɛ e bɔ e dili cɛn ba wunmuan kun'n bɔ wia'n boli ye, bɔ nvufle tuli ye lele'n, e kalɛ'n sɛ!›

¹³ Ɔ seli be nun kun kɛ: ‹Janvuɛ, m'an di-man wɔ lufle mlɔnmlɔn. ?E nuan a sɛ-man le kun denie kun su?

¹⁴ Fa ɔ sika'n, nan kɔ. N ´tua kasiɛnfuɛ'n kɛ n fa tua wɔ'n sa.

¹⁵ ?N lɛ-man atin kɛ n ´fa like ng'ɔ ti n liɛ'n n ´yo like nga n klo'n? ?Nguɛ ti yɛ n klun-ufue bɔ n yo'n, ɔ yo wɔ ya-a?› » Yɛ Jésus seli kɛ:

¹⁶ «Be nga be ka siɛn'n, be wa dun mmua, yɛ be nga be dun mmua'n, be kusu be wa ka siɛn.»

Jésus i kunlɛ'n nin i cɛnlɛ'n i su bolɛ kpɛ nsan su

¹⁷ Kɛ Jésus ´kɔ Zerizalɛm bɔ be wo atin nun'n, ɔ flɛli i sɔnnzɔnfuɛ blu-nin-nnyɔn'n be aamiɛn nan ɔ'a se be kɛ:

¹⁸ «An `nian, e su kɔ Zerizalɛm, be wa fa m bɔ n kacili Sran'n wla Nyanmiɛn nyrun jranfuɛ dandan nin mmla klefuɛ'm bé sa nun.

¹⁹ Be ´se kɛ m'an di fɔ nan be `kun min, be ´fa min wla be bɔ be ti-man Zuif'm bé sa nun kɛ be `yo n finfin, be ´bo min nin ngble, be ´bobo min waka'n su, yɛ i le nsan su n ´cɛn.»

Like bɔ Zak nin Zan be nin'n srɛli'n

²⁰ Kɛ ɔ yoli sɔ'n, Zebede wa yasua'm be nin'n, ɔ nin i mma'm be bali Jésus wun lɛ, be kotoli i bo kɛ be ´srɛ i like.

²¹ Jésus usali bla'n kɛ: «?Nguɛ yɛ a klo kɛ a ´srɛ-ɔ?» Bla'n seli i kɛ: «Cɛn nga a ´di ɔ famiɛn'n, yo man ń wa yasua nnyɔn'n bɔ be o yɛ'n be tran ɔ́ wun lɛ, kun `tran ɔ fama su yɛ kun tran ɔ bɛ su.»

²² Yɛ Jésus waan: «An si-man like nga an srɛ'n. ?Klowa nga m ma nɔn nun'n, an kwla nɔn nun wie?» Be waan: «Ɛɛn, e kwla nɔn nun wie.»

²³ Yɛ ɔ seli be kɛ: «Ɔ ti nanwlɛ kɛ amun wa nɔn n klowa'n nun wie, sanngɛ n fama su nin m bɛ su tranlɛ liɛ'n, nán min yɛ m man-an, san be nga n Si sie mannin be'n, be yɛ be ´tran lɛ-ɔ.»

²⁴ Kɛ be blu nga'm be tili ndɛ sɔ'n, be fali ya aniaan nnyɔn sɔ'm be wun.

²⁵ Jésus flɛli be, ɔ seli be kɛ: «An si kɛ nvle wie'm be famiɛn'm be mianmian be sran mun, yɛ sran dandan'm be tin be sran'm be su.

²⁶ Amun liɛ'n su yo-man sɔ, sanngɛ amun nun sran ng'ɔ klo kɛ ɔ ´yo dan'n, man ɔ su i wiengu mun,

²⁷ yɛ amun nun sran ng'ɔ klo kɛ ɔ ´yo su kpɛn'n, man ɔ yo i wiengu'm be kanga.

²⁸ M bɔ n kacili Sran'n kɛ m balɛ'n ɔ ti sɔ-ɔ, afin m'an ba-man kɛ be su min, sanngɛ m bali kɛ n ´su sran, nan n ´fa min wun kpɔ sran sunman bé ti.»

Jésus yoli anyansifuɛ nnyɔn be juejue

²⁹ Kɛ be ´tu bé bo Zeriko lɛ'n, sran kpanngban kpa be suli Jésus su.

³⁰ Be ´nian-an, anyansifuɛ nnyɔn be titi atin nuan lɛ. Kɛ be tili i kɛ Jésus su sin'n, be kpan seli kɛ: «Nannan, David Anunman, si ye aunnvuɛ yo e ye!»

³¹ Sran'm be kpan be su kɛ be muan bé nuan, sanngɛ be kpannin kekle tra laa liɛ'n kɛ: «Nannan, David Anunman, si e aunnvuɛ yo e ye!»

³² Jésus jrannin nan ɔ'a flɛ be ɔ'a usa be kɛ: «?Nguɛ yɛ an klo kɛ n yo man amun-ɔn?»

³³ Be seli i kɛ: «Nannan, tike é nyin.»

³⁴ Be yoli Jésus annvɔ, ɔ kannin be nyinma'n, be ja osu kunngba'n nun lɛ be wunnin ase nan b'a su i su.