Matthieu 2 - NYANMIƐN NDƐ'N 1998

Mɛn nun sa sifuɛ wie'm be Jésus sulɛ

¹ Be wuli Jésus Bɛtleɛm, Zide mɛn'n nun. Blɛ sɔ'n nun, famiɛn Erɔd yɛ ɔ sie nvle sɔ nin-ɔn. Mɛn nun sa sifuɛ wie'm be fin wia afiliɛ be bali Zerizalɛm lɛ,

² be usali kɛ: «?Zuif'm be famiɛn'n bɔ be wuli i icra'n ɔ o nin? Afin e wunnin i nzraama'n wia afiliɛ lɔ, yɛ e bɛli i sulɛ-ɔ .»

³ Jasin sɔ'n ti, famiɛn Erɔd nin Zerizalɛmfuɛ'm be kwlaa be klun ɔ'a jɔ-man.

⁴ Ɔ yiali Zuif'm be Nyanmiɛn nyrun jranfuɛ dandan nin be mmla klefuɛ'm be kwlaa nan ɔ'a usa be lika nga be wa wu Krist'n.

⁵ Be seli i kɛ: «Bɛtleɛm b'ɔ o Zide mɛn'n nun wa'n i su-ɔ, afin nian ndɛ nga Nyanmiɛn nuan ijɔfuɛ'n klɛli yɛ, ɔ klɛli i kɛ:

⁶ ‹Yɛ wɔ Bɛtleɛm bɔ a o Zida nvle nun'n, a ti-man kaan Zida i klɔ bɔ be lɛ nyrun'n be nun mlɔnmlɔn, afin wɔ su yɛ sran kun wa fite b'ɔ ´sie min nvle Izraɛl nin-ɔn, ɔ ´nian min sran'm be su .› »

⁷ I sin Erɔd flɛli i mɛn nun sa sifuɛ sɔ'm be aswre nan ɔ'a usa bé cɛn kpa nga nzraama'n fiteli'n.

⁸ Yɛ ɔ sunmannin be Bɛtleɛm lɔ-ɔ. Ɔ seli be kɛ: «An `wɔ ko kunndɛ bakan sɔ'n kpa, sɛ an wun i'n, an `bla be wa kan kle min man m bɔbɔ n ko su i wie.»

⁹ Kɛ be tili famiɛn'n i ndɛ'n b'ɔ kannin'n, be ɔli. Yɛ nzraama'n bɔ be wunnin i wia afiliɛ lɔ'n, ɔ dun mmua be nyrun lele ɔ ko jrannin lika nga bakan'n wo nun'n su.

¹⁰ Kɛ be wunnin kɛ nzraama'n ɔ'a jran'n, be klun jɔli dan kpa.

¹¹ Be wluli sua lɔ, be wunnin bakan'n nin i nin Mari, be kotoli i bo, be mɛnmɛnnin i. Be nyannjili be trɔ mun, be cɛli i sika ɔkwlɛ, nin ansans, ɔ nin mir.

¹² I sin be fa atin uflɛ be ɔli be mɛn nun, afin Nyanmiɛn seli be laliɛ nun kɛ nán man be sa be sin Erɔd wun lɔ kun.

Be fa Jésus wanndi ɔli Ezipt

¹³ Kɛ be ɔli'n, e Min Nyanmiɛn'n i anz kun yili i wun kleli Zozɛf laliɛ nun, ɔ seli i kɛ: «Jaso fa bakan'n nin i nin an `wanndi wɔ Ezipt, an `tran lɔ lele san n ´se wɔ kɛ a bla, afin Erɔd wa kunndɛ kɛ ɔ ´kun bakan'n.»

¹⁴ Yɛ Zozɛf jasoli kɔnguɛ-ɔ, ɔ fali bakan'n nin i nin, nan b'a wɔ Ezipt.

¹⁵ Ɔ trannin lɔ lele san Erɔd wuli, kɛ ɔ yo nan ndɛ nga e Min Nyanmiɛn'n man i nuan ijɔfuɛ'n kannin'n ɔ'a kpɛn su'n ti. Nyanmiɛn nuan ijɔfuɛ sɔ'n seli kɛ: «N flɛli n wa yasua'n kɛ ɔ jaso Ezipt lɔ bla .»

Ba kanngan'm be kunlɛ

¹⁶ Kɛ Erɔd wunnin kɛ sa sifuɛ'm b'a lɛkɛ i'n, ɔ fali ya dan kpa. Ɔ man ɔ sunmannin sran kɛ be wɔ Bɛtleɛm nin i akpasua'n kwlaa su. I waan be nian blɛ nga sa sifuɛ'm be kleli i'n su be kun ba yasua nga b'a di afuɛ nnyɔn'n nin nga be nian di-man afuɛ nnyɔn'n be kwlaa.

¹⁷ I sɔ'n ɔ kpɛnnin ndɛ nga Nyanmiɛn nuan ijɔfuɛ Zeremi kannin'n su, ɔ seli kɛ:

¹⁸ «Kpanlɛ nin sunlɛ, ɔ nin awuyomo tɛ Rama lɔ. Rasɛl yɛ ɔ su sun i mma mun-ɔn. Ɔ kplin-man su kɛ be kpɛtɛ i, Yɛlɛ kɛ i mma'm be nun-man lɛ kun .»

Be fin Ezipt ɔli Nazarɛt

¹⁹ Kɛ Erɔd wuli'n, e Min Nyanmiɛn'n i anz kun yili i wun kleli Zozɛf Ezipt lɔ laliɛ nun, ɔ seli i kɛ:

²⁰ «Jaso fa bakan'n nin i nin nan an wɔ Izraɛl mɛn'n nun, afin be nga be waan be ´kun bakan'n, b'a wie wu.»

²¹ Zozɛf jaso fali bakan'n nin i nin, nan b'a wɔ Izraɛl mɛn'n nun.

²² Sanngɛ kɛ ɔ tili kɛ Arkelais ɔ'a sin i si Erɔd osu Zide mɛn nun'n, srɛ kunnin i lɔ kɔlɛ nun. Ndɛ nga Nyanmiɛn kan kleli i laliɛ nun'n ti, ɔ ciɛli i wun ɔli Galile akpasua liɛ'n su.

²³ Nan ɔ'a tran klɔ kun bɔ be flɛ i kɛ Nazarɛt'n su nan ndɛ nga Nyanmiɛn nuan ijɔfuɛ'm be kannin'n ɔ'a kpɛn su. Be kɛnnin i kɛ: «Be wa flɛ i Nazarɛtfuɛ .»