Matthieu 19 - NYANMIƐN NDƐ'N 1998

Bé wun yralɛ

¹ Kɛ Jésus wieli ndɛ sɔ'n kan'n, ɔ tuli i bo Galile lɛ ɔ ɔli Zide mɛn'n nun Zurdɛn'n i sin lɔ.

² Sran kpanngban kpa be suli i su, nan ɔ'a yo be nun tukpacɛfuɛ'm be juejue lika sɔ'n nun.

³ Farizifuɛ'm be bɛli i wun lɛ, be waan be kɛn i nian ti be usɛli i kɛ: «?Yasua kun lɛ atin kɛ ɔ `yrɛ i yi sa wie ti?»

^4-5 Ɔ tɛli be su kɛ: «Kɛ Nyanmiɛn ´yi sran'n, ɔ yili yasua nin bla nan ɔ'a se kɛ: ‹I sɔ'n ti yɛ man yasua ´kpaci i si nin i nin yɛ ɔ ´fɛ i wun mɛntɛn i yi yɛ be nnyɔn'n be kaci sran wunmuan nin-ɔn.› ?An nian kɛnngɛn-mɛn i le ?

⁶ Kɛ ɔ ko yo sɔ'n, be ti-man sran nnyɔn kun, sanngɛ be ti sran wunmuan. Ɔ man like nga Nyanmiɛn kan be bo nun'n, nán man sran fi ti be nun.»

⁷ Yɛ be usɛli i kɛ: «?Sɛ ɔ ti sɔ'n, wuun nguɛ ti yɛ Moiz klɛli i kɛ: ‹Sɛ sran kun waan ɔ ´yrɛ i yi'n, ɔ `mɛn fluwa b'ɔ kle kɛ ɔ'a yrɛ nin-ɔn ?› »

⁸ Yɛ ɔ seli be kɛ: «Amun ketelɛ bɔ amu'an kete'n ti yɛ man Moiz mannin amun atin kɛ an yra amún yi mun nin-ɔn, sanngɛ kɛ Nyanmiɛn yili sran'n, ɔ'a sie-mɛn i sɔ.

⁹ Sanngɛ n liɛ'n n ´kan kle amun kɛ, sran kwlaa ng'ɔ yrɛ i yi'n, sɛ nán kɛ ɔ'a kunndɛ bian i bo ti'n, nan ɔ ja uflɛ'n, wuun ɔ'a kunndɛ bla i yi bo .»

¹⁰ I sɔnnzɔnfuɛ'm be seli i kɛ: «Sɛ kɛ yasua'n i ndɛ ti kɛ nga sa bla'n i lika'n, wuun man be kpɛ kpo, nán man be ja.»

¹¹ Yɛ ɔ seli be kɛ: «Ndɛ nga, sran ngba kwla fa-man su, san be nga Nyanmiɛn sie be sɔ'n be yɛ be kwla fa su-ɔ.

¹² Afin yasua wie o lɛ, ɔ ti-man yasua, ɔ nin i sɔ'n fin i nin klun, wie liɛ'n be sɛli i, yɛ wie kusu yo i bɔbɔ i wun sɔ Nyanmiɛn i sielɛ'n ti. Man sran ng'ɔ kwla fa su'n, ɔ `fa.»

Ba kanngan mun

¹³ I sin sran wie'm be fa ba kanngan mun blɛli Jésus kɛ ɔ fɛ i sa fua be su ɔ yrɛ i nuan kɛ Nyanmiɛn nian be su. Sanngɛ i sɔnnzɔnfuɛ'm be ijɔli be.

¹⁴ Yɛ Jésus seli be kɛ: «An `yaci ba kanngan'm be nun man be bla min sin, nán an fuan be, afin be bɔ be yo bé wun kɛ ba kanngan nga'm be sa'n, be yɛ Nyanmiɛn sie be-ɔ.»

¹⁵ Ɔ fɛ i sa fuali be su, nan ɔ'a tu i bo lɛ ɔ'a wɔ.

Gbanflɛn anyanbeufuɛ'n

¹⁶ Yɛ sran kun bali Jésus wun lɛ nan ɔ'a usa Jésus kɛ: «?Nja, nguɛ like kpa yɛ n ´yo nan m'an nyan anannganman nguan nin-ɔn ?»

¹⁷ Ɔ seli i kɛ: «?Nguɛ ti yɛ a usa min like ng'ɔ ti kpa'n i wun ndɛ-ɔ? Nyanmiɛn kunngba cɛ yɛ ɔ ti kpa-a. Sɛ a klo kɛ a ´nyan nguan'n, fa mmla'n su.»

¹⁸ Ɔ usali Jésus kɛ: «?Mmla onin?» Yɛ i waan: «Mmla sɔ'n yɛ ɔ o yɛ: nán kun sran, nán kunndɛ bla annzɛ bian ɔ́ yi annzɛ ɔ́ wun bo, nán wua, nán tɔn sran suɛn, bu ɔ́ si nin ɔ nin be sran,

¹⁹ yɛ klo ɔ wiengu kɛ ɔ fa klo ɔ bɔbɔ wun'n sa .»

²⁰ Gbanflɛn'n seli i kɛ: «N fɛ i kwlaa sɔ'n su. ?Nguɛ yɛ ɔ tɛ ka ekun-ɔn?»

²¹ Yɛ Jésus waan: «Sɛ a klo kɛ a ´wie i ngba su fa weiin'n, ko yo ɔ ninnge'm be atɛ, fɛ i sika'n man yalɛfuɛ mun, yɛ a ´nyan ninnge kpakpa nyanmiɛn su lɔ. Nan bla wa su min su.»

²² Kɛ gbanflɛn'n tili ndɛ sɔ'n, ɔ yoli i ya, ɔ jao ɔli yɛlɛ kɛ ɔ ti anyanbeunfuɛ dan.

²³ Jésus seli i sɔnnzɔnfuɛ'm be kɛ: «Nanwlɛ, kɛ anyanbeunfuɛ kun fɛ i wun man Nyanmiɛn kɛ ɔ sie i'n, ɔ ti kekle.

²⁴ N ´kan kle amun ekun kɛ, nyɔnngɔnmɛn i dɔlua buɛ nun sinlɛ'n ti pɔpɔ tra kɛ anyanbeunfuɛ kun `fɛ i wun man Nyanmiɛn kɛ ɔ sie i'n.»

²⁵ Kɛ i sɔnnzɔnfuɛ'm be tili ndɛ sɔ'n, ɔ boli bé nuan dan kpa nan b'a usa kɛ: «?Sɛ ɔ ti sɔ'n, wuun waan yɛ ɔ kwla fite nun-ɔn?»

²⁶ Jésus niannin be nan ɔ'a se be kɛ: «Sa sɔ'n, sran kwlɛ-mɛn i yo, sanngɛ Nyanmiɛn kwla sa'n kwlaa yo .»

²⁷ Yɛ Piɛr waan: «Nian, y'a yaci e ninnge'n kwlaa y'a su ɔ su. ?Nguɛ yɛ e ´nyɛn i-ɔ?»

²⁸ Yɛ Jésus seli be kɛ: «Nanwlɛ, kɛ be wa bo mɛn'n i uflɛ ekun'n, bɔ m bɔ n kacili Sran'n n ´yi n famiɛn nglo bɔ n ´tran m bia'n su'n, amun bɔ an suli n su'n, amun kusu an wa tran bia blu-nin-nnyɔn su, amun ´di Izraɛl nvle blu-nin-nnyɔn'm be jɔlɛ.

²⁹ Yɛ sran kwlaa nga min ti ɔ yaci sɛ i awlo o, sɛ i niaan bian o, sɛ i niaan bla o, sɛ i si o, sɛ i nin o, sɛ i wa o, sɛ i asiɛ o, ɔ ´nyan be wunsu kpɛ ya, yɛ ɔ ´nyan anannganman nguan.

³⁰ Be nga be dun mmua'n, be nun sunman be wa ka siɛn, yɛ be nga be ka siɛn'n, be nun sunman be wa dun mmua.»