Matthieu 16 - NYANMIƐN NDƐ'N 1998

Atrɛ nga be srɛli Jésus kɛ ɔ yi'n

¹ Farizifuɛ mun nin Sadisefuɛ'm be bali Jésus wun lɛ kɛ be ´kɛn i nian, be seli i kɛ ɔ yi nyanmiɛn su lɔ atrɛ kun kle be.

² Jésus seli be kɛ: «Nnɔsua nun an se kɛ ainman lika'n ɔ wa kpaja, afin nyanmiɛn'n su lɔ ɔ'a blo.

³ Yɛ nglɛmun an se kɛ nzue'n wa tɔ ndɛkɛn, afin wia'n tuli i bo ndɛ. An si nyanmiɛn su lɔ ninnge'm be nzɔliɛ, sanngɛ an si-man blɛ'm be nzɔliɛ.

⁴ Ajulisufuɛ tɛtɛ bɔ be ti kɛ bla b'ɔ kunndɛ bian i wun bo sa Nyanmiɛn nyrun'n, be waan be yi atrɛ kle be. Be su yi-man atrɛ fi kle-man be, san Zonas liɛ'n cɛ yɛ be ´yi-ɔ .» I sin ɔ yaci be lɛ ɔli.

Farizifuɛ'm be nin Sadisefuɛ'm be kpaun ayre'n

⁵ Kɛ i sɔnnzɔnfuɛ'm be ´kɔ fɛtɛ'n i bue kun lɔ'n, bé wla fili b'a fa-man kpaun.

⁶ Jésus seli be kɛ: «An `nian amún wun kpa Farizifuɛ mun nin Sadisefuɛ'm be kpaun ayre'n i lika.»

⁷ I sɔnnzɔnfuɛ'm be buli i akunndan be se be wiengu kɛ: «Kpaun bɔ y'a fa-man'n ti yɛ ɔ se sɔ-ɔ.»

⁸ Kɛ Jésus tili'n, ɔ seli kɛ: «?An lafi-man Nyanmiɛn su? ?Nguɛ ti yɛ kpaun bɔ amu'an fa-man'n ti an ijɔ-ɔ?

⁹ ?An nian wun-mɛn i wlɛ ekun, yɛ amún wla kpɛn-man kpaun nnun bɔ sran akpi nnun (5.000) be dili'n, nin i onga bɔ an isali'n, i gbogbo'n i nuan'n su?

¹⁰ ?Yɛ amún wla kpɛn-man kpaun nso bɔ sran akpi nnan (4.000) be dili'n nin i onga bɔ an isɛli i gbogbo dandan'm be nun'n su? ?Amun wla kpɛn-man gbogbo sɔ'm be nuan'n su?

¹¹ ?Kɛ n kan kleli amun kɛ an nian amún wun Farizifuɛ mun nin Sadisefuɛ'm be kpaun ayre'n i lika'n, ɔ yo sɛ ti yɛ amu'an wun-mɛn i wlɛ kɛ nán kpaun ndɛ yɛ n kan kleli amun-ɔn?»

¹² Yɛ be wunnin i wlɛ kɛ nán kpaun ayre'n i lika yɛ i waan be nian bé wun nin-ɔn, sanngɛ like nga Farizifuɛ mun nin Sadisefuɛ'm be kle'n i lika yɛ i waan be nian bé wun nin-ɔn.

Wafa nga Piɛr bu kɛ Jésus ti b'ɔ kannin'n

¹³ Kɛ Jésus juli Sezare Filip asa liɛ'n su'n, ɔ usɛli i sɔnnzɔnfuɛ'm be kɛ: «?Sran'm be waan wan yɛlɛ m bɔ n kacili Sran'n?»

¹⁴ Be tɛli su kɛ: «Sran wie'm be waan Zan batɛm yofuɛ'n yɛlɛ wɔ, wie'm be waan Eli yɛlɛ wɔ, wie'm be kusu be waan Zeremi, annzɛ Nyanmiɛn nuan ijɔfuɛ'm be nun kun yɛlɛ wɔ.»

¹⁵ Yɛ ɔ usali be kɛ: «?Yɛ amun kusu amun waan wan yɛlɛ min?»

¹⁶ Simɔn Piɛr tɛli su kɛ: «A ti Krist, Nyanmiɛn'n b'ɔ lafi-man i Wa'n yɛlɛ wɔ.»

¹⁷ Jésus seli i kɛ: «Simɔn, Zonas wa, ɔ liɛ su ti ye, afin nán sran yɛ ɔ yili sa sɔ'n nglo kleli wɔ-ɔ, sanngɛ min Si b'ɔ wo nyanmiɛn su lɔ nin-ɔn.

¹⁸ N kusu, n ´kan kle wɔ kɛ, be flɛ ɔ Piɛr (bɔ i bo'n yɛlɛ yɛbuɛ'n). Yɛbuɛ tanda'n su yɛ m ma kplan min asɔnun nin-ɔn, yɛ wie'n su kwla saci-mɛn.

¹⁹ M ma fa Nyanmiɛn i lika ng'ɔ sie'n i lakle'n man wɔ. Like nga a ko tannin i asiɛ'n su wa'n, be wa tannin i nyanmiɛn su lɔ, yɛ nga a ko mɛn i wun atin asiɛ'n su wa'n, be wa mɛn i wun atin nyanmiɛn su lɔ .»

²⁰ Yɛ ɔ wlɛli i sɔnnzɔnfuɛ'm bé su nun kpa kɛ nán man be kan kle sran fi kɛ ɔ ti Krist.

Jésus i kunlɛ bɔ be wa kun i'n i su bolɛ

²¹ Kɛ ɔ fin cɛn sɔ'n nun'n, Jésus boli i sɔnnzɔnfuɛ'm be kan klelɛ bo kɛ, san ɔ ´kɔ Zerizalɛm ɔ ´wun nyrɛnnɛn dan kpɛnngbɛn mun, nin Nyanmiɛn nyrun jranfuɛ dandan mun, ɔ nin mmla klefuɛ'm bé sa nun nan be ´kun i, yɛ i le nsan su, ɔ ´cɛn.

²² Piɛr fɛ i ɔli aamiɛn nan ɔ'a ijɔ i, ɔ seli i kɛ: «N kpla e! Nannan, nán man Nyanmiɛn di su man sa nga tɔ wɔ su.»

²³ Sanngɛ Jésus kpɛli i nyin seli Piɛr kɛ: «Satan fa jao min wun lɛ, a su saci min ti nun, afin wɔ akunndan'n ti-man Nyanmiɛn liɛ, sran liɛ-ɔ.»

²⁴ Kɛ ɔ yoli sɔ'n, ɔ seli i sɔnnzɔnfuɛ'm be kɛ sran nga i waan ɔ ´su n su'n, man ɔ klɛn i wun man min, yɛ ɔ ´suɛ i waka'n nan ɔ su n su.

²⁵ Afin sran ng'ɔ klo kɛ ɔ ´sɛsɛ i wun'n, ɔ ´kpɛ i nguan'n sin, sanngɛ sran ng'ɔ kpɛ i nguan'n sin min ti'n, ɔ ´nyɛn i ekun.

²⁶ ?Sɛ sran kun nyan mɛn wunmuan'n, nan i ti i nguan'n kpɛ sin'n, nguɛ yɛ ɔ yo ye mɛn i-ɔ? ?Yɛ nguɛ like yɛ sran kun kwla fa to i nguan nin-ɔn?

²⁷ M bɔ n kacili Sran'n min nin n Si i anz mun e ´ba i dunman nun, be ´wun kɛ i nyrun ti nyannyan ɔ yo sro, yɛ kɛ sran kun i nyoliɛ'n ti ju'n, m ´mɛn i nuan like .

²⁸ Nanwlɛ, be nga be o wa yɛ'n, nán be ngba yɛ wie'n ´kun be nan b'a wun kɛ m bɔ n kacili Sran'n n su ba m ma di n famiɛn nin-ɔn.