Matthieu 15 - NYANMIƐN NDƐ'N 1998

Lalafuɛ'm be nzuɛn'n

¹ Farizifuɛ mun nin mmla klefuɛ wie'm be fin Zerizalɛm be bali Jésus wun lɛ nan b'a usɛ i kɛ:

² «?Nguɛ ti yɛ ɔ sɔnnzɔnfuɛ'm be fa-man e nannan'm be nzuɛn'n su-ɔ? ?Nguɛ ti yɛ be wunnzin-man bé sa nan b'a di like-ɔ?»

³ I kusu usali be kɛ: «?Amun kusu, nguɛ ti yɛ amun nannan'm be nzuɛn'n i falɛ'n ti an tɔn Nyanmiɛn mmla nin-ɔn?

⁴ Afin Nyanmiɛn kannin kɛ: ‹Bu ɔ si nin ɔ nin be sran.› Ɔ kɛnnin i ekun kɛ: ‹Sran ng'ɔ kɛn i si annzɛ i nin ndɛ tɛ'n, be `kun i .›

⁵ Sanngɛ amun liɛ'n, an se kɛ sran ng'ɔ se i si annzɛ i nin kɛ, like nga be ko nyɛn i sa nun'n ɔ'a fa man Nyanmiɛn be jran-man su kɛ ɔ niɛn i si nin i nin be lika kun.

⁶ I sɔ'n ti amun nzuɛn'n i falɛ'n nun an yi Nyanmiɛn ndɛ'n blo.

⁷ Dunman klofuɛ mun, amún wun ndɛ bɔ Ezai kannin'n ti nanwlɛ. Ɔ seli kɛ:

⁸ ‹Sran nga'm be kɛn i bé nuan bui su kɛ be bu n sran, sanngɛ be anwlɛn nun-man min su.

⁹ Be manman min ngbɛn, yɛ be kle like nga sran'm be kan'n kɛ ɔ ti Nyanmiɛn mmla .› »

Like ng'ɔ saci sran'n

¹⁰ Jésus flɛli sran mun nan ɔ'a se be kɛ: «An `sie amún su tie.

¹¹ Nán like nga sran di'n yɛ ɔ saci i-ɔ, sanngɛ like ng'ɔ o sran klun lɔ'n i yɛ ɔ saci i-ɔ.»

¹² Yɛ i sɔnnzɔnfuɛ'm be wunngeli i wun lɛ nan b'a usɛ i kɛ: «?A si kɛ ndɛ'n bɔ a kannin'n ɔ yoli Farizifuɛ'm be ngasi?»

¹³ Ɔ seli be kɛ: «Waka kwlaa bɔ nán min Si b'ɔ o nyanmiɛn su lɔ'n yɛ ɔ tali'n, be ´tu i bo .

¹⁴ An `yaci be lɛ, be ti anyansifuɛ bɔ be tra be wiengu anyansifuɛ kpɔnman. Sɛ anyansifuɛ kun trɛ i wiengu anyansifuɛ kpɔnman'n, be nnyɔn'n be ´tɔ kunman nun.»

¹⁵ Piɛr mannin ndɛ'n su nan ɔ'a se i kɛ: «Tu nyanndra sɔ'n i bo kle ye.»

¹⁶ Yɛ Jésus seli kɛ: «?Amun kusu an wun-man sa wlɛ?

¹⁷ ?An si-man kɛ like kwlaa bɔ sran di'n ɔ kɔ i klun lɔ i sin ɔ kɔ i atin nun kɔwlɛ'n nun?

¹⁸ Sanngɛ ndɛ ng'ɔ fin sran nuan fite'n ɔ fin i anwlɛn'n nun, like ng'ɔ saci sran'n yɛ.

¹⁹ Afin akunndan tɛ'n, nin sran kunlɛ'n, nin bla nin bian bé yi annzɛ bé wun i bo kunndɛlɛ'n, nin bla nin bian kunndɛlɛ'n, nin awie'n, nin be wiengu suɛn tɔnlɛ'n, ɔ nin sran wun ndɛ kanlɛ'n, i kwlaa sɔ'n wo sran i anwlɛn'n nun.

²⁰ Amun `nian, ninnge ng'ɔ saci sran'n yɛ ɔ o lɛ-ɔ, sanngɛ sɛ be ´di like nan b'a wunnzin-man bé sa'n i sɔ'n saci-man sran.»

Kanaan bla'n

²¹ Jésus tuli i bo lɛ ɔli Tir nin Sidɔn asa'n su.

²² Kanaan bla kun b'ɔ o mɛn sɔ nun'n ɔ kpan seli i kɛ: «Nannan, David Anunman, yo n ye!

²³ Asiɛ usu kun kle ń wa talua'n i nyrɛnnɛn dan kpa.» Sanngɛ Jésus a tɛ-mɛn i su mlɔnmlɔn. Yɛ i sɔnnzɔnfuɛ'm be wunngeli i wun lɛ nan b'a se i kɛ: «Ɔ kpan su ye su, i ti kɛn i bo.»

²⁴ Yɛ i waan: «Izraɛl osu'n nun bua'm bɔ b'a mlin'n bé sin yɛ be sunmannin min-ɔn.»

²⁵ Sanngɛ bla'n wa kotoli i bo nan ɔ'a se i kɛ: «Nannan, si min aunnvuɛ.»

²⁶ Yɛ ɔ seli i kɛ: «Kɛ be ´fa ba kanngan'm be kpaun'n gua alua'm be bo'n, ɔ ti-mɛn i su»

²⁷ Bla'n waan: «Nannan, ɔ ti sɔ, sanngɛ kusu alua'm be di kpaun i munmun b'ɔ gua bé si tabli'n bo'n.»

²⁸ Yɛ Jésus seli i kɛ: «Eee, bla nga, a lɛ anwlɛn o, like nga a kunndɛ'n be wa yo man wɔ.» Nan i wa'n ɔ'a yo juejue i osu kunngba'n nun.

Jésus yoli tukpacɛfuɛ kpanngban be juejue

²⁹ Jésus tuli i bo lika sɔ'n nun lɛ, ɔ ko wlan-wlannin Galile fɛtɛ'n nuan lɔ, nan ɔ'a fu oka'n su ɔ'a tran ase.

³⁰ Yɛ sran kpanngban kpa be fa cɛcɛwafuɛ mun, nin bubuwafuɛ mun, nin anyansifuɛ mun, nin bobofuɛ mun, ɔ nin tukpacɛfuɛ kpanngban wie mun ekun bali Jésus wun lɛ, be sieli be i nyrun lɛ, nan ɔ'a yo be juejue.

³¹ Kɛ sran'm be wunnin kɛ bobofuɛ'm be ijɔ'n, kɛ be wunnin kɛ bubuwafuɛ'm be yo juejue'n nan cɛcɛwafuɛ'm be nanti seiin'n yɛ anyansifuɛ'm be wun ase'n, ɔ boli bé nuan nan b'a manman Izraɛl Nyanmiɛn'n.

Sran akpi nnan (4.000) bɔ Jésus mannin be like be dili'n

³² Jésus flɛli i sɔnnzɔnfuɛ mun nan ɔ'a se be kɛ: «Sran nga'm be yo min annvɔ, afin kɛ be o min wun wa'n, be le nsan yɛ, be lɛ-man like diwa kun. Sanngɛ n klo-man kɛ m man be atin man be fa be klun awe wɔ, sɛ n yo sɔ-ɔ, ɔ cɛ-man nan b'a glɔ atin'n nun.»

³³ I sɔnnzɔnfuɛ'm be usɛli i kɛ: «?E ´yo i sɛ nan y'a nyan like b'ɔ kwla ju sran kpanngban kɛ nga sa mun aawlɛ flɛnnɛn nga nun wa?»

³⁴ Jésus usali be kɛ: «?Kpaun'n b'ɔ o amún sa nun'n ti nnyɛ?» Yɛ be waan: «Ɔ ti nso, yɛ e lɛ jue kanngan wie mun ekun.»

³⁵ Yɛ ɔ flɛli sran sɔ mun kɛ be wa tran ase.

³⁶ Ɔ fali kpaun nso'n nin jue mun, kɛ ɔ lali Nyanmiɛn ase'n, ɔ bubuli nun fa mɛnnin i sɔnnzɔnfuɛ mun nan b'a fa cɛ sran mun.

³⁷ Be kwlaa be dili be ku yili nan b'a isɛ i sinsin b'ɔ kali'n gbogbo dandan nso.

³⁸ Be nga be dili'n be ti akpi nnan (4.000), sanngɛ b'a ka-man bla nin ba kanngan mun b'a wla-man nun.

³⁹ Kɛ ɔ mannin sran'm be atin bɔ be ɔli'n, ɔ fu alie'n nun ɔli Magadan asa liɛ'n su.