Matthieu 14 - NYANMIƐN NDƐ'N 1998

Zan batɛm yofuɛ'n i kunlɛ

¹ Blɛ sɔ nun'n Erɔd b'ɔ sie nvle'n i bue'n, ɔ tili Jésus ndɛ bɔ be kan'n,

² yɛ ɔ seli i minniɛn'm be kɛ: «Zan batɛm yofuɛ'n yɛ ɔ'a cɛn i ti yɛ man ɔ kwla yo sa kekleekle mun-ɔn!»

³ Afin Erɔd tra Zan cili i, ɔ wlɛli bisua i niaan bian Filip i yi Erɔdias ti,

⁴ yɛlɛ kɛ titi Zan se i kɛ, bla sɔ'n i jalɛ'n ti-mɛn i su .

⁵ Erɔd waan ɔ ´kun Zan, sanngɛ srɛ kun i sran'm bé wun yɛlɛ kɛ be bu Zan Nyanmiɛn nuan ijɔfuɛ.

⁶ Kɛ Erɔd ´di i awuliɛ cɛn'n, Erɔdias wa talua'n ɔ wa sili able be bɔ Erɔd yiali be'n be nyrun lɛ, ɔ yoli i fɛ.

⁷ I sɔ'n ti, ɔ tali nda kɛ like kwlaa nga talua sɔ'n srɛ i'n ɔ ´fa mɛn.

⁸ I nin di wlɛli i kɛ ɔ se kɛ: «Man be fa Zan batɛm yofuɛ'n i ti'n talie kpɛkplɛkpɛ kun nun be blɛ min icra'n.»

⁹ Famiɛn'n i wla boli, sanngɛ nda ng'ɔ tɛli i be ng'ɔ yiali be'n be nyrun lɛ'n ti, ɔ seli kɛ be `fa mɛn i.

¹⁰ Nan ɔ'a sunman sran bisua lɔ kɛ be ko kpɛ Zan batɛm yofuɛ'n i ti'n.

¹¹ Be ko kpɛli nan b'a fa Zan ti'n b'a yi talie kpɛkplɛkpɛ kun nun b'a fa blɛ talua kan'n nan ɔ'a fa ko mɛn i nin.

¹² I sɔnnzɔnfuɛ'm be wa fɛli i fuɛn'n be ko sieli i, nan b'a ko bo a kle Jésus.

Sran akpi nnun (5.000) bɔ Jésus mannin be like be dili'n

¹³ Kɛ Jésus tili ndɛ sɔ'n, ɔ fuli alie kun nun ɔli blo lɔ kɛ ɔ ´jao lɛ kan. Kɛ sran'm be tili kɛ Jésus ɔ'a cuɛn i wun kan'n, be fin klɔ'm be su be su i su bé ja nun.

¹⁴ Kɛ ɔ fin alie'n nun fiteli'n, ɔ wunnin sran kpanngban, be yoli i annvɔ, nan ɔ'a yo tukpacɛfuɛ'm bɔ be o nun'n be juejue.

¹⁵ Kɛ aliɛ jɔli'n, i sɔnnzɔnfuɛ'm be bɛli i wun lɛ nan b'a se i kɛ: «Wa ti blo, yɛ kusu lika'n ɔ'a dun mmua jɔ, i sɔ'n ti, man sran'm be atin man be wɔ klɔ'm be su be ko to aliɛ.»

¹⁶ Yɛ Jésus waan: «Nán man be wɔ, amun bɔbɔ an `man be like.»

¹⁷ Yɛ be waan: «Kpaun nnun nin kpatra nnyɔn cɛ yɛ ɔ o é sa nun-ɔn.»

¹⁸ Yɛ ɔ seli be kɛ: «An `fa blɛ min.»

¹⁹ Jésus yoli man sran'm be trannin ase ijre'n su lɛ, ɔ fali kpaun nnun'n nin kpatra nnyɔn'n, ɔ mɛnnin i nyin su niannin nyanmiɛn su lɔ nan ɔ'a la Nyanmiɛn ase. I sin ɔ bubuli kpaun'n nun, ɔ fa mɛnnin i sɔnnzɔnfuɛ'm be kɛ be `fa cɛ sran mun, nan b'a fa cɛ be.

²⁰ Be kwlaa be dili yɛ be ku yili nan b'a isɛ i sinsin'n b'ɔ kali'n gbogbo blu-nin-nnyɔn.

²¹ Be nga be dili'n be ju bɔ akpi nnun kun (5.000), sanngɛ b'a ka-man bla nin ba kanngan mun b'a wla-man nun.

Jésus i nzue'n su nantilɛ

²² Kɛ ɔ yoli sɔ'n, kpɛkuun ɔ miɛnnin i sɔnnzɔnfuɛ'm be kɛ be fu alie'n nun be dun mmua i nyrun fɛtɛ'n i cenje'n i bue kun lɔ. Kɛ be ´kɔ'n, ɔ mannin sran'm be atin kɛ be wɔ.

²³ Kɛ ɔ mannin sran'm be atin bɔ be ɔli'n, i ngunmin ɔli oka'n su lɔ kɛ ɔ nin Nyanmiɛn be ko koko yalɛ. Kɛ lika'n ´dun'n, wuun i kunngba yɛ ɔ o lɛ-ɔ.

²⁴ Kɛ ɔ ´yo sɔ'n, wuun alie'n nin cenje'n be afiɛn a ti nun lɔuun kpa. Nzue'n bo guɛli i wun, afin aunngban'n fin be nyrun lɔ yɛ ɔ ba-a.

²⁵ Akɔ nyinman klikli su Jésus nantili nzue'n su kpuli be lɔ.

²⁶ Kɛ i sɔnnzɔnfuɛ'm be wunnin kɛ ɔ su nanti nzue'n su'n, bé wun usuli be, yɛ srɛ b'ɔ kun be'n ti be kpankpannin, be se kɛ: «Wunmiɛn-ɔn!»

²⁷ Kpɛkuun Jésus seli be kɛ: «An `gua amún wla ase, min-ɔn, nán srɛ kun amun .»

²⁸ Yɛ Piɛr waan: «Nannan, sɛ ɔ ti wɔ'n, flɛ min man m bla ɔ́ wun lɔ nzue'n su lɔ.»

²⁹ Yɛ Jésus seli i kɛ: «Bla!» Piɛr fin alie'n nun fiteli, ɔ nanti nzue'n su kɛ ɔ ´kɔ Jésus wun lɔ.

³⁰ Sanngɛ kɛ ɔ wunnin kɛ aunngban'n ti dan'n, srɛ kunnin i. Kɛ ɔ wunnin kɛ ɔ su mlɔn'n, ɔ kpan seli kɛ: «Nannan, de min o!»

³¹ Kpɛkuun Jésus tinngɛ i sa'n sɔli i nun, yɛ ɔ usɛli i kɛ: «A lafi-man n su kpa. ?Nguɛ ti yɛ a lafi-man n su kpa-a?»

³² Be fuli alie'n nun yɛ aunngban'n yacili kpɛlɛ-ɔ.

³³ Be nga be o alie'n nun'n be ko kotoli Jésus bo yɛ be seli i kɛ: «A ti Nyanmiɛn Wa sakpa.»

Jésus yoli Zenezarɛt tukpacɛfuɛ'm be juejue

³⁴ Kɛ be kpɛli fɛtɛ'n, be juli Zenezarɛt mɛn'n nun.

³⁵ Kɛ sran nga be o lika sɔ nun'n, be wunnin i wlɛ kɛ Jésus'n, be sunmannin sran lika nga be mantan-mantan lɛ'n be nun nan sran'm b'a fa tukpacɛfuɛ'm be kwlaa a blɛ i.

³⁶ Be srɛli Jésus kpa kɛ ɔ yaci man be kɛn i tralɛ'n i nuan njɔlɛ'n bɔ cɛ. Be kwlaa nga be kɛnnin i'n, be tukpacɛ'n wieli sekeseke .