Matthieu 13 - NYANMIƐN NDƐ'N 1998

Awie guafuɛ'n i wun nyanndra

¹ Le kunngba sɔ'n, Jésus fin awlo lɔ fiteli, ɔ wa trannin fɛtɛ'n nuan lɛ.

² Sran kpanngban kpa be yiɛli i wun lɛ, i sɔ'n ti, ɔ fu trannin alie kun nun. Sran'm be kwlaa kusu be guali nzue kpa'n nuan lɛ.

³ Ɔ kannin ndɛ kpanngban kleli be nyanndra nun, ɔ seli be kɛ: «Awie guafuɛ kun ɔli awie gualɛ.

⁴ Kɛ ɔ ´sanndi awie'n, wie tɔli atin mma'n nun, yɛ anunman'm be wa dili.

⁵ Wie kusu tɔli akpuɛ su. Ɔ fifili ndɛndɛ kpa, afin asiɛ nun-man lɛ kpa.

⁶ Sanngɛ kɛ wia'n ´bo'n, ɔ wɔnsɔnnin, ɔ wuli, ndin bɔ ɔ'a nyɛn-mɛn i wlawlɛ kpa'n ti.

⁷ Wie kusu tɔli nduin mma'n nun, kɛ nduin'n buali'n, ɔ trɛli i.

⁸ Wie'm be kusu be tɔli asiɛ kpa su, be wlɔli, tre kun wlɔli ya, kun wlɔli ablesiɛn, yɛ kun kusu wlɔli ablasan.

⁹ Man sran ng'ɔ si fa sie'n, ɔ fa sie.»

Sa nga ti yɛ Jésus buli nyanndra'n

¹⁰ I sɔnnzɔnfuɛ'm be wunngeli i wun lɛ, yɛ be usɛli i kɛ: «?Nguɛ ti yɛ a kan ndɛ'm be nyanndra nun kle be-ɔ?»

¹¹ Jésus seli be kɛ: «Amun yɛ be yi Nyanmiɛn sielɛ'n i wun akunndan bɔ sran wun-mɛn i wlɛ'n i nglo kleli amun-ɔn, sanngɛ be nga'm be liɛ'n, b'a sie-mɛn i sɔ.

¹² Afin sran ng'ɔ lɛ like'n, i yɛ be ´mɛn i wie-ɔ, yɛ ɔ ´nyan wie kpanngban, sanngɛ sran ng'ɔ lɛ-man like'n, kaan ng'ɔ wo i sa nun bɔbɔ'n, be ´de.

¹³ I sɔ'n ti yɛ n kan ndɛ'm be nyanndra nun kle be nin-ɔn, afin kɛ be wun i'n, be wun-mɛn i wlɛ.

¹⁴ Kɛ ɔ yo sɔ'n, ndɛ nga Ezai kannin'n ɔ ´kpɛn su be lika, ɔ seli kɛ: ‹Amun wa ti i kpa, sanngɛ an su wun-mɛn i wlɛ le. Amun wa niɛn i kpa, sanngɛ an su wun-mɛn i mlɔnmlɔn.

¹⁵ Afin sran sɔ'm b'a tri. B'a bu bé su nun waka, b'a muanmuan bé nyin nan be nyinma a wun-mɛn i, bé su a ti-man, b'a wun-mɛn i wlɛ, yɛ b'a sa-man bé sin min wun nan m'an yo-man be juejue .›

¹⁶ Sanngɛ amun liɛ'n, amun liɛ su ti ye, afin an wun ase, yɛ an ti sa!

¹⁷ Nanwlɛ, Nyanmiɛn nuan ijɔfuɛ mun nin sran nanwlɛfuɛ kpanngban kpa be klo kɛ be ´wun like nga an wun be yɛ'n, sanngɛ b'a wun-man be, be klo kɛ be ´ti ndɛ nga an ti be yɛ'n, sanngɛ b'a ti-man.»

Nyanndra ng'ɔ buli'n i bo tulɛ

¹⁸ «I sɔ'n ti, amun liɛ'n, an `tie awie guafuɛ'n i wun nyanndra'n i bo'n.

¹⁹ Kɛ bɔ sran kun ti Nyanmiɛn sielɛ'n ndɛ'n, b'ɔ wun-mɛn i wlɛ'n, kpɛkuun Klunwifuɛ'n ɔ wa yo man ndɛ ng'ɔ tili'n ɔ mlin i klun. I sɔfuɛ'n yɛ ɔ ti kɛ atin mma'm sa bɔ awie'n tɔli nun nin-ɔn.

²⁰ Akpuɛ'n bɔ awie'n tɔli su'n yɛlɛ sran ng'ɔ ti Nyanmiɛn ndɛ'n bɔ i klun jɔ su ɔ fa su kpɛkun nin-ɔn.

²¹ Sanngɛ ɔ'a nyan-man ndin wlawlɛ, ɔ ti sran bɔ i anwlɛn'n sɔ-man, kɛ afɛ'n nin yalɛ klelɛ'n tɔ i su Nyanmiɛn ndɛ'n ti'n, kpɛkuun ɔ'a yaci Nyanmiɛn sulɛ'n.

²² Yɛ nduin'n bɔ awie'n tɔli nun'n, yɛlɛ sran ng'ɔ ti Nyanmiɛn ndɛ'n, sanngɛ mɛn'n nun ninnge'n i ngokoɛ'n nin anyanbeun'n i klolɛ'n ɔ tra Nyanmiɛn ndɛ'n, ɔ man ndɛ sɔ'n yo-man kpa.

²³ Asiɛ kpa nga kusu bɔ awie'n tɔli su'n, yɛlɛ sran ng'ɔ ti Nyanmiɛn ndɛ'n b'ɔ wun i wlɛ'n. Ɔ ti kɛ awie b'ɔ yo ye'n sa, tre kun wlɔ ya, kun wlɔ ablesiɛn, yɛ kun ekun wlɔ ablasan.»

Awie ijre'n i wun nyanndra

²⁴ Ɔ bu nyanndra uflɛ ekun kleli be, ɔ seli kɛ: «Nyanmiɛn sielɛ'n ɔ fa sran kun b'ɔ fa awie guɛli i fie'n su.

²⁵ Kɛ sran'm be ´lafi'n, i kpɔfuɛ'n bali, ɔ wa guali awie'n nun awie ijre mma nan ɔ'a wɔ.

²⁶ Kɛ awie'n fifili b'ɔ ´wlɔ'n, be wunnin kɛ awie ijre sɔ'n wo nun.

²⁷ Awlo bo kpɛn sɔ'n i junman difuɛ'm be wa usɛli i kɛ: ?Baba, w'a gua-man awie ɔ fie'n su? ?Ninfan yɛ awie ijre nga fin b'ɔ juli fie'n su wa-a?

²⁸ Ɔ seli be kɛ: N kpɔfuɛ'n yɛ ɔ wa fa guali nun-ɔn. Yɛ i junman difuɛ sɔ'm be usɛli i kɛ: ?A klo kɛ e ko tutu ijre sɔ'n i bo?

²⁹ Ɔ seli be kɛ: Cɛcɛ, man ɔ tran lɛ, sɛ amun waan amun ´tutu'n, amun ´tu awie'n wie bo.

³⁰ An `yaci be nnyɔn'n be lɛ man ɔ fa ju awie kpɛlɛ blɛ'n, sɛ awie kpɛlɛ'n ju'n, n ´se awie i kpɛfuɛ'm be kɛ be dun mmua kpɛ awie ijre'n be cici fiɛnfiɛn be wɔ nun, nan be fa awie'n gua n tanngannin'n nun.»

Mutard'n i wun nyanndra

³¹ Ɔ bu nyanndra uflɛ ekun kleli be, ɔ seli kɛ: «Nyanmiɛn sielɛ'n ɔ fa tro bɔ be flɛ i mutard'n bɔ sran kun fa guali i fie'n su'n.

³² I mma'n ɔ ti kaan tra ninnge mma bɔ be lua be'n be kwlaa, sanngɛ kɛ ɔ ko nyin'n, ɔ yo dan tra tro'n kwlaa, yɛ ɔ yo waka, ɔ man anunman'm be wa yo bé sua i sama'm be su.»

Kpaun ayre'n i wun nyanndra

³³ Ɔ bu nyanndra kun ekun kleli be, ɔ seli kɛ: «Nyanmiɛn sielɛ'n ɔ fa kpaun ayre bɔ bla kun fa guali kpaun nzuɛn b'ɔ kwla ju kilo ablaɔn-nin-nnun nun'n, nan i wunmuan'n ɔ'a wla.»

Sa ti bɔ Jésus bu nyanndra'n

³⁴ Jésus kɛn i kwlaa sɔ'n kleli sran kpanngban sɔ mun nyanndra nun, ɔ'a kan-man ndɛ fi a kle-man be b'ɔ ti-man nyanndra nun-ɔn.

³⁵ Kɛ ɔ ´yo nan ndɛ nga Nyanmiɛn nuan ijɔfuɛ'n ɔ kannin'n, ɔ'a kpɛn su'n ti yɛ ɔ kɛnnin i sɔ-ɔ. Ɔ seli kɛ: «N ´uke min nuan'n, m ´bu nyanndra, Yɛ ninnge nga be fia su kɛ ɔ fin mɛn'n i bo bolɛ nun'n, n ´kɛn i ndɛ kle amun .»

Awie ijre'n i wun nyanndra'n i bo tulɛ

³⁶ Kɛ ɔ yoli sɔ'n, nan ɔ'a yaci sran sɔ'm be lɛ a wlu awlo lɔ. I sɔnnzɔnfuɛ'm be wunngeli i wun lɛ nan b'a se i kɛ: «Kle ye nyanndra nga a buli i awie ijre b'ɔ o awie fie nun'n i bo.»

³⁷ Ɔ seli be kɛ: «Awie'n i guafuɛ'n yɛlɛ m bɔ n kacili Sran'n.

³⁸ Awie fie'n yɛlɛ mɛn'n, awie'n yɛlɛ Nyanmiɛn mma mun, yɛ awie ijre'n yɛlɛ Klunwifuɛ'n i mma mun.

³⁹ N kpɔfuɛ ng'ɔ guali awie ijre'n yɛlɛ mmusu'm be si Satan, awie i kpɛlɛ blɛ'n yɛlɛ mɛn'n i awieliɛ, awie i kpɛfuɛ mun yɛlɛ anz mun.

⁴⁰ Be kpɛ awie ijre'n bɔ o fie'n nun'n, kɛ mɛn'n i awieliɛ'n ɔ wa yo sɔ kusu-ɔ.

⁴¹ M bɔ n kacili Sran'n, n ´sunman min anz mun kɛ be wa yi be kwlaa nga be saci sran'm be ti nun'n nin be bɔ be bo tete'n min mɛn'n nun

⁴² be gua be sin dan kpa'n nun, lɔ yɛ be ´sun be ´di be je nin-ɔn.

⁴³ Sanngɛ sran nanwlɛfuɛ'm be wa yo kɛ wia'n sa, be ´kpaja be Si i mɛn'n nun. Man sran ng'ɔ si ´fa sie'n, ɔ ´fa sie.»

Like kpa kun bɔ be fa fiali'n

⁴⁴ «Nyanmiɛn sielɛ'n ɔ fa like kpa kun bɔ be fa fiali fie kun su. Sran kun wunnin i nan ɔ'a fa fia ekun. I fɛ b'ɔ yo i'n ti'n, ɔ ko yo i sa nun ninnge'n kwlaa atɛ ɔ fa toli fie sɔ'n.»

Nɛnnglɛnman kpakpa'n

⁴⁵ «Nyanmiɛn sielɛ'n ɔ fa aata difuɛ ekun aata difuɛ sɔ'n ɔ kunndɛ nɛnnglɛnman kpakpa'n.

⁴⁶ Kɛ ɔ wunnin i kpakpafuɛ'n kun'n, ɔ ko yoli i sa nun ninnge'n kwlaa atɛ fa toli nɛnnglɛnman sɔ'n.»

Lala'n

⁴⁷ «Nyanmiɛn sielɛ'n ɔ fa lala ekun. Be gua lala sɔ'n i jenvie nun, ɔ fa jue wafa-wafa'n kwlaa'n ekun.

⁴⁸ Kɛ lala'n yi'n, be cuɛn kɔ cenje'n su lɔ, be tran ase, be kpa jue'n i kpakpafuɛ'n guɛ gbogbo nun, yɛ be guɛ i tɛtɛfuɛ'n blo.

⁴⁹ Kɛ mɛn'n i awieliɛ'n ɔ wa yo sɔ-ɔ: anz'm be ´ba, be wa yi sran klunwifuɛ mun nanwlɛfuɛ'm be nun,

⁵⁰ yɛ be ´gua be sin dan kpa'n nun, lɔ yɛ be ´sun be ´di be je nin-ɔn.»

Bɛtrɔ nun ninnge uflɛ nin ninnge nvuɛn'n

⁵¹ «?Amu'an wun i kwlaa sɔ'n i bo?» Yɛ be waan: «Ɛɛn.»

⁵² Yɛ ɔ seli be kɛ: «I sɔ'n ti, mmla klefuɛ kwlaa b'ɔ suan Nyanmiɛn sielɛ nun ninnge mun'n, ɔ ti kɛ awlo bo kpɛn kun b'ɔ yi ninnge uflɛ nin ninnge nvuɛn i bɛtrɔ'n nun sa.»

Nazarɛtfuɛ'm b'a lafi-man Jésus su

⁵³ Kɛ Jésus wieli nyanndra sɔ'm be bu'n, ɔ tuli i bo lɛ.

⁵⁴ Kɛ ɔ juli i mɛn nun'n, ɔ kleli sran'm be like be Nyanmiɛn ndɛ suanlɛ nin i srɛlɛ sua'n nun. Like b'ɔ kle be'n, ɔ bo bé nuan, nan b'a usa kɛ: «?Ɔ nin i ngwlɛlɛ nin i sa kekleekle yolɛ nga fin nin?

⁵⁵ ?Nán ajuin difuɛ'n i wa nin-ɔn? ?Be flɛ-mɛn i nin Mari? ?Nɛ́n i niaan yɛlɛ Zak, nin Zozɛf, nin Simɔn, ɔ nin Zid?

⁵⁶ ?I niaan bla'm be kwlaa be nun-man wa? ?Ɔ yo sɛ yɛ ɔ si sa nga mun-ɔn?»

⁵⁷ Ɔ man b'a lafi-mɛn i su. I sɔ'n ti yɛ Jésus seli be kɛ: «Be bu Nyanmiɛn nuan ijɔfuɛ i sran lika'n kwlaa, sɛn i bɔbɔ i klɔfuɛ mun nin i awlofuɛ mun yɛ be bu-mɛn i sran-an.»

⁵⁸ Yɛ i su bɔ be lafi-man'n ti, ɔ'a yo-man sa kekleekle kpanngban lɛ.