Matthieu 12 - NYANMIƐN NDƐ'N 1998

Jésus i sɔnnzɔnfuɛ'm be fianfiannin ble mma wie wunmiɛn-delɛ-cɛn nun

¹ I blɛ sɔ'n nun'n, wunmiɛn-delɛ-cɛn nun bɔ Jésus nin i sɔnnzɔnfuɛ'm be ´sin ble fie wie nun'n, awe kunnin i sɔnnzɔnfuɛ mun, be tɔli ble mma'n i fianfianlɛ su, be fianfiannin wie nan b'a di .

² Kɛ Farizifuɛ'm be wunnin i sɔ'n, be seli Jésus kɛ: «Nian, ɔ sɔnnzɔnfuɛ'm be yo like nga sran lɛ-man atin kɛ ɔ `yo i wunmiɛn-delɛ-cɛn'n nun'n.»

³ Sanngɛ Jésus usali be kɛ: «?Kɛ awe kunnin David nin i minniɛn mun'n, like ng'ɔ yoli'n, an nian kɛnngɛn-mɛn i le ?

⁴ Kɛ ɔ wluli Nyanmiɛn i sua nun'n, ɔ dili kpaun bɔ be fa tɛkɛ i Nyanmiɛn nyrun'n bɔ i bɔbɔ annzɛ i minniɛn'm be lɛ-man atin kɛ be di'n, san Nyanmiɛn nyrun jranfuɛ'm be ngunmin yɛ be lɛ atin be di-ɔ.

⁵ ?Yɛ kɛ Nyanmiɛn nyrun jranfuɛ'm be saci wunmiɛn-delɛ-cɛn'n titi Nyanmiɛn i sua'n nun bɔ be bu-mɛn i kɛ be yo sa tɛ'n, an nian kɛnngɛn-mɛn i mmla'n nun le ?

⁶ Sanngɛ n ´kan kle amun kɛ, like ng'ɔ ti dan tra Nyanmiɛn i sua'n yɛ n wa kle amun yɛ.

⁷ Be kɛn i kɛ: ‹N klo aunnvuɛ nga be si sran'n tra tɛ nga be yi be man min'n.› Sɛ ɔ ti kɛ an si ndɛ sɔ'n i bo'n, wuun an bu-man sran nga b'a di-man fɔ'n be fɔ .

⁸ Afin m bɔ n kacili Sran'n min yɛ n sie wunmiɛn-delɛ-cɛn nin-ɔn.»

Bian sa wuwa'n

⁹ Kɛ ɔ fin lɛ'n, ɔ ɔli be Nyanmiɛn ndɛ suanlɛ nin i srɛlɛ sua'n nun lɔ.

¹⁰ Bian kun o lɛ bɔ i sa'n ti wuwa. Be usali Jésus kɛ: «?Be kwla yo sran juejue wunmiɛn-delɛ-cɛn nun?» Be usɛli i sɔ nan be ´jran su be sɛnmɛn i.

¹¹ Ɔ usali be kɛ: «?Amun nun onin yɛ sɛ ɔ lɛ i bua ba kunngba cɛ b'ɔ tɔ kunman nun wunmiɛn-delɛ-cɛn nun'n ɔ yi-mɛn i-ɔ?

¹² ?Sran ti-man kpa tra-man bua'n kpɛ blu? I sɔ'n ti, be kwla yo sa kpa wunmiɛn-delɛ-cɛn nun.»

¹³ Yɛ ɔ seli bian'n kɛ: «Tinngɛ ɔ́ sa'n nun.» Ɔ tinngɛli nun, nan i sa sɔ'n ɔ'a yo kpa ekun kɛ kun'n sa.

¹⁴ Farizifuɛ'm be fite ko wunnin bé wun, be kunndɛ i wafa nga be jran su fa kun i'n.

Sran nga Nyanmiɛn fɛli i'n

¹⁵ Sanngɛ kɛ Jésus sili sɔ'n, ɔ jasoli lika sɔ'n nun. Sran kpanngban kpa be suli i su. Ɔ yoli be kwlaa be juejue,

¹⁶ yɛ ɔ wlali bé su nun kpa kɛ nán man be kan ndɛ sɔ'n

¹⁷ nan ndɛ nga Nyanmiɛn nuan ijɔfuɛ Ezai kannin'n ɔ'a kpɛn su. Ɔ seli kɛ:

¹⁸ «Amun nian, n sran bɔ n fɛli i kɛ ɔ su min'n yɛ. Ɔ ti min anwlɛn su sran, i su yɛ m'an fa ń wla'n kwlaa m'an gua-a. N ´yo man n Wawɛ'n ´bɛ i wun, yɛ ɔ ´bo jɔlɛ dilɛ'n su kle nvle-nvle mun.

¹⁹ Ɔ su si-man akplowa, ɔ su kpan-man. Yɛ sran fi su ti-mɛn i nɛn klɔ nun atin'm be nun.

²⁰ Ndɛma nga ɔ'a bli'n, ɔ su bu-mɛn i, yɛ kannin b'ɔ fite wɛnsrɛn'n, ɔ su nuɛn-mɛn i lele san ɔ yo man nanwlɛ'n ɔ ´kwla.

²¹ Nvle-nvle'm be wa fa bé wla guɛ i su .»

Jésus nin Beɛlzebil

²² Yɛ be fali sran kun bɔ asiɛ usu ɔ'a saci i b'ɔ ti anyansifuɛ nin bobofuɛ'n blɛli Jésus, ɔ yoli i juejue, ɔ man bobofuɛ'n ijɔli, yɛ ɔ wunnin ase.

²³ Sran'm be kwlaa bé nuan'n boli bé wun nan b'a usa kɛ: «?Nán David i Anunman'n yɛ ɔ o lɛ-ɔ?»

²⁴ Kɛ Farizifuɛ'm be tili'n, be seli kɛ: «Bian nga, nɛ́n i bɔbɔ fanngan nun yɛ ɔ fuan asiɛ usu mun-ɔn, sanngɛ Beɛlzebil b'ɔ ti mmusu'm be wlengbi'n i dunman nun yɛ ɔ fuan be-ɔ.»

²⁵ Kɛ Jésus wunnin be akunndan'n, ɔ seli be kɛ: «Sɛ famiɛn kun i sran b'ɔ sie be'n be bu be wun nun'n, i mɛn ɔ ´saci, yɛ klɔ kwlaa annzɛ awlo kwlaa bɔ be nunfuɛ'm bu nun'n be su kwla cɛ-man.

²⁶ Sɛ Satan fuan i bɔbɔ wun'n, wuun ɔ'a bu i bɔbɔ wun nun. ?Ɔ ´yo sɛ yɛ ɔ ´kwla sie i sran mun-ɔn?

²⁷ ?Sɛ n fuan asiɛ usu mun Beɛlzebil dunman nun'n, wuun wan dunman nun yɛ amun mma'm be kusu be fuan be-ɔ? I sɔ'n ti, be yɛ be wa di amun ndɛ nin-ɔn.

²⁸ Sanngɛ sɛ Nyanmiɛn Wawɛ'n i dunman nun yɛ n fuan asiɛ usu mun'n, wuun kannzu Nyanmiɛn i sielɛ'n ɔ'a to amun wa.

²⁹ ?Yɛ kusu, sɛ sran kun dun-man mmua ci-man sran wunmiɛnfuɛ'n, ɔ ´yo sɛ yɛ ɔ ´kwla wlu i awlo'n nun fɛn i bo ninnge mun-ɔn? San ɔ ´ci sran sɔ'n, nan ɔ'a kwla fɛn i bo ninnge'n.

³⁰ Sran ng'ɔ nin min nun-man nun'n, ɔ ti n kpɔfuɛ, yɛ sran ng'ɔ nin min tian-man like nuan'n, ɔ trutru nun.

³¹ I sɔ'n ti'n, n ´kan kle amun kɛ, Nyanmiɛn i dunman sacilɛ'n kwlaa ɔ nin sa kwlaa nga sran yo i'n, ɔ ´yaci cɛ. Sanngɛ Nyanmiɛn Wawɛ'n i dunman sacilɛ liɛ'n, ɔ su yaci cɛ-man le.

³² Sran kwlaa ng'ɔ kan m bɔ n kacili Sran'n min wun ndɛ'n, ɔ ´yaci cɛ i. Sanngɛ sran ng'ɔ kan Nyanmiɛn Wawɛ'n i wun ndɛ'n, ɔ su yaci cɛ-mɛn i blɛ nga nun annzɛ blɛ ng'ɔ ´ba lɔ'n nun.»

Ɔ lɛ waka kun nin i mma

³³ «Man be se kɛ waka ng'ɔ ti kpa'n ɔ su mma kpakpa, yɛ waka ng'ɔ ti-man kpa'n ɔ su-man mma kpakpa, afin kɛ waka kun ti'n, yɛ i mma'n ti-ɔ .

³⁴ ?Ɔnda mma mun, amun bɔ an ti sran tɛ'n, ɔ yo sɛ yɛ ndɛ kpa kwla fin amún nuan fite-ɔ? Afin ndɛ kwlaa ng'ɔ o sran anwlɛn'n nun'n yɛ ɔ fite i nuan-an.

³⁵ Sran kpa'n ɔ yi like kpa i ninnge kpakpa'm be nun, yɛ sran tɛ'n ɔ yi like tɛ i ninnge tɛtɛ'm be nun.

³⁶ N ´kan kle amun kɛ, jɔlɛ dilɛ cɛn nun'n, ndɛ ngbɛn kwlaa bɔ sran'm be kannin'n, be bɔbɔ yɛ be ´kan bé su ndɛ-ɔ.

³⁷ Afin ndɛ ng'ɔ fin ɔ́ nuan fite'n yɛ man ɔ́ wun ´sa-a, yɛ ndɛ ng'ɔ fin ɔ́ nuan fite'n i su yɛ be ´fa bu ɔ fɔ-ɔ.»

Atrɛ bɔ Jésus a yi-man'n

³⁸ Yɛ mmla klefuɛ wie mun nin Farizifuɛ wie'm be mannin ndɛ'n su be seli kɛ: «Nja, e klo kɛ a yi atrɛ kun kle ye.»

³⁹ Yɛ ɔ seli be kɛ: «Ajulisufuɛ tɛtɛ bɔ be ti kɛ bla b'ɔ kunndɛ bian i wun bo sa Nyanmiɛn nyrun'n, be klo kɛ be `yi atrɛ kle be. Be su yi-man atrɛ fi kle-man be san Nyanmiɛn nuan ijɔfuɛ Zonas liɛ'n cɛ.

⁴⁰ Afin kɛ Zonas dili le nsan jue dan'n i klun'n i kunngba nin-ɔn, m bɔ n kacili Sran'n, n kusu n ´di le nsan asiɛ'n bo .

⁴¹ Jɔlɛ dilɛ cɛn'n nun'n, Niniv yasua'm be wa jao bu ajulisufuɛ nga'm be fɔ, afin kɛ Zonas kannin Nyanmiɛn ndɛ'n, be kacili be nzuɛn'n, yɛ nian, sran kun o wa bɔ i dan tra Zonas .

⁴² Jɔlɛ dilɛ cɛn nun'n, famiɛn bla'n b'ɔ fin Zerizalɛm papla nun mmua lɔ'n, ɔ wa jao bu ajulisufuɛ nga'm be fɔ, afin bla sɔ'n fin asiɛ'n i awieliɛ lɔ kɛ ɔ wa tie Salomɔn i ngwlɛlɛ ndɛ'n, yɛ amun nian, sran kun o wa bɔ i dan tra Salomɔn .»

Asiɛ usu'n i sin salɛ

⁴³ «Kɛ asiɛ usu b'ɔ saci sran'n ɔ ko jao sran su'n ɔ ko wlan-wlan lika wie bɔ be nyan-man nzue nun'm be nun'n, ɔ kunndɛ wunmiɛn dewlɛ. Kɛ ɔ nyan-man wie mlɔnmlɔn'n,

⁴⁴ ɔ se kɛ: ‹M ma sa min sin ń sua nga n fin nun fiteli'n nun.› Kɛ ɔ sɛ i sin b'ɔ ´ju lɛ'n, ɔ wun kɛ sua sɔ'n ɔ o lɛ ngbɛn, b'a kuan nun, b'a siesie i nun ninnge mun.

⁴⁵ Ɔ kɔ ko fɛ i wiengu asiɛ usu nso bɔ be tɛ liɛ'n trɛ i liɛ'n, be wa wlu sua sɔ'n nun, be tran nun, yɛ sran sɔ'n i sacilɛ b'ɔ saci siɛn'n, ɔ yo tɛ dan tra laa liɛ'n. Kɛ ajulisufuɛ tɛtɛ nga'm be liɛ'n ɔ wa yo sɔ-ɔ.»

Jésus i nin'n nin i niaan mun

⁴⁶ Kɛ Jésus nuan tɛ o ndɛ ng'ɔ kan kle sran mun su'n, i nin nin i niaan bian mun be bali. Be jrannin guasu lɔ, be waan be ´wun i wun.

⁴⁷ Sran wie seli i kɛ: «Ɔ nin nin ɔ niaan'm be jin guasu lɔ be waan be ´wun ɔ wun.»

⁴⁸ Jésus usali sran ng'ɔ kan ndɛ sɔ'n kleli i'n i kɛ: «?Wan yɛ ɔ ti min nin nin-ɔn? ?Wan mun yɛ be ti min niaan mun nin-ɔn?»

⁴⁹ Kpɛkuun ɔ tinngɛli i sa i sɔnnzɔnfuɛ'm bé wun, yɛ ɔ seli kɛ: «Nian, min nin nin min niaan mun yɛ.

⁵⁰ Afin sran ng'ɔ yo n Si b'ɔ o nyanmiɛn su lɔ'n i klun sa'n, i yɛ ɔ ti min niaan bian, nin min niaan bla, ɔ nin min nin nin-ɔn.»