Matthieu 11 - NYANMIƐN NDƐ'N 1998

Sran bɔ Zan batɛm yofuɛ'n sunmannin be'n

¹ Kɛ Jésus nin i sɔnnzɔnfuɛ blu-nin-nnyɔn'm be dili ngaliɛ sɔ'n wieli'n, ɔ tu i bo lɛ ɔli be klɔ'm be su like klelɛ nin ndɛ kanlɛ.

² Kɛ Zan o bisua lɔ'n, ɔ tili sa nga Krist yo be'n, nan ɔ'a sun-mɛn i sɔnnzɔnfuɛ'm be kɛ be ko usɛ i kɛ:

³ «?Sran nga be kɛn i ndɛ kɛ ɔ ´ba'n yɛlɛ wɔ annzɛ sran sɔ'n tɛ o siɛn ?»

⁴ Jésus seli be kɛ: «An `ko kan ndɛ nga an tili'n nin like nga an wunnin i'n kle Zan.

⁵ An ´se i kɛ, anyansifuɛ'm be wun ase, cɛcɛwafuɛ'm be nanti, kokowefuɛ'm be kokowe'n wie, sutrefuɛ'm be ti sa, be nga be wuli'n be cɛn, yɛ be bo jasin fɛ'n kle yalɛfuɛ mun .

⁶ Sran nga i ti nun a saci-man min ti'n, i liɛ su ti ye!»

⁷ Kɛ be ɔli'n, Jésus kan Zan ndɛ kleli sran'm be kɛ: «?Nguɛ yɛ an ɔli i nianlɛ aawlɛ flɛnnɛn nun lɔ nin-ɔn?

⁸ An ko nian ndɛma bɔ aunngban keje i'n? ?Sɛ nán ndɛma'n, wuun nguɛ yɛ an ɔli i nianlɛ-ɔ? ?Sran b'ɔ wla tralɛ kpakpa-a? Sran nga be wla tralɛ kpakpa'n be o famiɛn'm be awlo.

⁹ ?Wuun nguɛ ti yɛ an ɔli-ɔ? ?An ɔli Nyanmiɛn nuan ijɔfuɛ wie nianlɛ? Ɛɛn, sanngɛ n ´kan kle amun kɛ ɔ tra Nyanmiɛn nuan ijɔfuɛ bɔbɔ.

¹⁰ I yɛ be klɛli i wun ndɛ kɛ: ‹Nian, n ´sunman min ndolo bofuɛ'n. Ɔ ´dun mmua ko yo ɔ nyrun atin'n kpa› nin-ɔn .

¹¹ Nanwlɛ, be kwlaa nga bla wuli be'n, be nun wie fi nun-man lɛ bɔ i dan tra Zan batɛm yofuɛ nin-ɔn. Sanngɛ be nga Nyanmiɛn sie be'n be nun kaanfuɛ'n i dan trɛ i.

¹² Kɛ ɔ fin Zan batɛm yofuɛ'n i blɛ su lele b'ɔ ´fa ju ndɛ'n, be fa bé wun man Nyanmiɛn kekle su, yɛ yakpafuɛ mun yɛ be yo man Nyanmiɛn sie be-ɔ.

¹³ Afin Nyanmiɛn nuan ijɔfuɛ nin mmla klɛfuɛ'm be kwlaa be kannin sa b'ɔ wa yo'n i ndɛ lele fa ju Zan blɛ su.

¹⁴ Zan sɔ'n yɛ ɔ ti Eli bɔ be kɛnnin i ndɛ kɛ ɔ ´ba nin-ɔn . An lafi i sɔ bɔ be kannin'n su.

¹⁵ Sran ng'ɔ si fa sie'n, man ɔ fa sie.

¹⁶ ?Wan mun yɛ n `fa ajulisufuɛ nga mun ´sunnzun be-ɔ? Be fa ba kanngan mun bɔ be ti ase guasu lɛ be kpan se be wiengu'm be kɛ:

¹⁷ ‹E boli blo kleli amun, sanngɛ amu'an si-man able, E boli amun sɛ, sanngɛ amu'an bo-man awuyomo.›

¹⁸ Afin kɛ Zan bali'n, kɛ ɔ di-man like b'ɔ nɔn-man nzan'n ti'n, sran'm be waan like wie su i su.

¹⁹ M bɔ n kacili Sran'n m bali, n di like yɛ n nɔn nzan, i ti sran'm be waan n ti aliɛ safuɛ nin nzan nɔnfuɛ, yɛ n ti gua bo sika defuɛ nin sa tɛtɛ yofuɛ'm be janvuɛ. Nyanmiɛn i nyoliɛ'n kle kɛ ɔ ti ngwlɛlɛfuɛ.»

Klɔ nga i nunfuɛ'm be lafi-man Jésus su'n

²⁰ Kpɛkuun klɔ nga be su yɛ Jésus yoli i sa kekleekle'm be dan lika'n, ɔ su ijɔ be sufuɛ mun, yɛlɛ kɛ b'a kaci-man be nzuɛn'n.

²¹ Ɔ seli kɛ: «Kɔrazɛnfuɛ mun, an yako, Bɛtsaidafuɛ mun, an yako, afin sɛ ɔ ti kɛ sa kekleekle bɔ be yoli be amun klɔ'n su'n yɛ be yoli be Tir nin Sidɔn'n, wuun lɔfuɛ'm be wasa bé wun nzuɛn'n, wuun be wla bajɛ tralɛ'n, wuun be kacili be nzuɛn'n ɔ'a cɛ .

²² I sɔ'n ti, n ´kan kle amun kɛ, jɔlɛ dilɛ cɛn'n nun'n, Tirfuɛ mun nin Sidɔnfuɛ mun be nyrɛnnɛn liɛ'n ɔ ´yo sɔsɔ tra amun liɛ'n.

²³ ?Kapɛrnaɔmfuɛ mun amun kusu, amun tu amún wun lele fa ju nyanmiɛn su lɔ? Be wa gua amún nyin ase lele ju blɔlɔ lɔ, afin sɛ ɔ ti kɛ sa kekleekle bɔ be yoli be amun klɔ'n su'n yɛ be yoli be Sodɔm'n, wuun lele ndɛ ɔ tɛ o lɛ.

²⁴ I sɔ'n ti, n ´kan kle amun kɛ jɔlɛ dilɛ cɛn nun'n Sodɔmfuɛ'm be nyrɛnnɛn liɛ'n ɔ ´yo sɔsɔ tra amun liɛ'n.»

An `bla min sin, n ´sike amun

²⁵ I blɛ sɔ'n nun'n Jésus seli kɛ: «N Si, ɔ bɔ a ti nyanmiɛn su lɔ'n nin asiɛ'n be Min'n, kwla o, yɛlɛ kɛ a fa ninnge nga mun fiali ngwlɛlɛfuɛ nin be bɔ be si sa'n bé wun, sanngɛ a yi be nglo kleli be bɔ be ti kɛ ba kanngan mun sa'n.

²⁶ N Si, kwla o, ɔ klun sa nga a yoli'n ti.

²⁷ N Si yɛ ɔ fa like'n kwlaa mannin min-ɔn. Sran fi si-man Nyanmiɛn i Wa'n, san i Si kunngba yɛ ɔ si i-ɔ, yɛ sran fi si-man Nyanmiɛn i Wa'n i Si'n, san Ba'n bɔbɔ ɔ nin sran ng'ɔ klo kɛ ɔ ´fɛ i Si'n kle i'n, be yɛ be si i-ɔ.

²⁸ Amun kwlaa bɔ an sua trɔ bɔ amu'an fɛ'n, an bla min sin, n ´sike amun, yɛ amun ´de wunmiɛn.

²⁹ An `fa amún ti wla n kɔmin su waka'n bo, yɛ an `fa min nzuɛn'n su, afin n ti sran wɛtɛɛ yɛ min anwlɛn'n ti flɔlɔ. Yɛ amún wla wa gua ase .

³⁰ Afin n kɔmin su waka'n i sualɛ yo fɛ, yɛ n trɔ'n yo-man nɔnnin.»