Marc 8 - NYANMIƐN NDƐ'N 1998

Sran akpi nnan (4.000) bɔ Jésus mannin be like be dili'n

¹ I blɛ sɔ'n nun'n, kɛ sran'm be yiali dan kpa ekun bɔ be lɛ-man like diwa'n, Jésus flɛli i sɔnnzɔnfuɛ mun nan ɔ'a se be kɛ:

² «Nzrafuɛ nga'm be yo min annvɔ, afin be o min wun wa i le nsan yɛ, yɛ siɛn'n be lɛ-man like diwa kun.

³ Sɛ m man be atin kɛ be fa be klun awe'n wɔ be klɔ'n, be ´glɔ atin nun, afin be nun wie'm be fin mmua.»

⁴ I sɔnnzɔnfuɛ'm be seli i kɛ: «?Ɔ ´yo sɛ yɛ be ´kwla nyan like diwa aawlɛ flɛnnɛn nga nun wa man be bɔ be ku ´yi-ɔ?»

⁵ Ɔ usali be kɛ: «?An lɛ kpaun nnyɛ?» Be seli kɛ: «E lɛ nso.»

⁶ Yɛ ɔ flɛli sran mun kɛ be wa tran ase-ɔ, nan ɔ'a fa kpaun nso'n, kɛ ɔ lali Nyanmiɛn ase'n, ɔ bubuli be nun, ɔ fa mɛnnin i sɔnnzɔnfuɛ mun kɛ be fa cɛ be, yɛ be fa cɛli be-ɔ.

⁷ Be lɛ kpatra kanngan wie mun ekun, ɔ lali Nyanmiɛn ase, ɔ seli be kɛ be fa cɛ be ekun.

⁸ Be dili, be ku yili, be isɛli i sinsin b'ɔ kali'n gbogbo nso.

⁹ Sran sɔ'm be ju bɔ akpi nnan (4.000) kun. Nan Jésus a man be atin kɛ be wɔ.

¹⁰ Kpɛkuun ɔ nin i sɔnnzɔnfuɛ'm be fuli alie'n nun be ɔli Dalmanita mɛn'n nun.

Atrɛ nga be srɛli Jésus kɛ ɔ yi'n

¹¹ Farizifuɛ'm be bali kpɛkuun be nin Jésus su si akplowa. Be waan be kɛn i nian ti be seli i kɛ ɔ yi nyanmiɛn su lɔ atrɛ kun.

¹² Jésus deli wunmiɛn kaklaka kun, nan ɔ'a se kɛ: «?Nguɛ ti yɛ ajulisufuɛ nga'm be kunndɛ atrɛ-ɔ? Nanwlɛ, be su yi-man atrɛ fi kle-man be.»

¹³ Kpɛkuun ɔ jaoli bé wun lɛ, ɔ fu alie'n nun ekun kɛ ɔ ´sin fɛtɛ'n bue kun lɔ.

Farizifuɛ'm be nin Erɔd be kpaun ayre'n

¹⁴ I sɔnnzɔnfuɛ'm bé wla fili b'a fa-man kpaun, san kunngba cɛ yɛ ɔ o bé sa nun alie'n nun-ɔn.

¹⁵ Jésus wlali bé su nun kɛ be sasa bé wun kpa Farizifuɛ mun nin Erɔd be kpaun ayre'n i lika.

¹⁶ I sɔnnzɔnfuɛ'm be seli be wiengu kɛ: «Kpaun bɔ e lɛ-mɛn i'n ti yɛ ɔ seli sɔ-ɔ.»

¹⁷ Jésus tili yɛ ɔ seli kɛ: «?Nguɛ ti yɛ an ijɔ-ɔ? ?Kpaun bɔ an lɛ-mɛn'n ti-ɔ? ?An si-man ngwlɛlɛ, an wun-man sa wlɛ? ?Amu'an jinmin?

¹⁸ ?Amun nyinma'n wo lɛ ngbɛn, an wun-man ase? ?Amún su'n wo lɛ ngbɛn, an ti-man sa ?

¹⁹ ?Kɛ m bubuli kpaun nnun'n nun mannin sran akpi nnun'n (5.000), an wla ɔ'a fi? ?I sinsin bɔ an isali'n ti gbogbo nnyɛ?» Be tɛli su kɛ: «Ɔ ti blu-nin-nnyɔn.»

²⁰ Ɔ usali be ekun kɛ: «?Kɛ m bubuli kpaun nso'n nun mannin sran akpi nnan'n (4.000), i sinsin bɔ an isali'n ti gbogbo nnyɛ?» Be tɛli su kɛ: «Ɔ ti nso.»

²¹ Yɛ ɔ seli be kɛ: «?I kwlaa sɔ'n, an nian wun-mɛn i wlɛ?»

Jésus tikeli anyansifuɛ kun nyinma Bɛtsaida lɔ

²² Be ɔli Bɛtsaida, be fa anyansifuɛ kun blɛli i, be srɛli i kpa kɛ ɔ kɛn i.

²³ Ɔ trali anyansifuɛ'n i sa, ɔ fɛ ɔli klɔ'n i sin lɔ, nan ɔ'a fɛ i nuan nzue a kpɛ i nyin su. Ɔ fɛ i sa'n fuɛli i su nan ɔ'a usɛ i kɛ: «?A wun ase?»

²⁴ Ɔ ukeli i nyin yɛ ɔ seli kɛ: «N wun sran mun, sanngɛ be ti kɛ waka mun yɛ be su nanti sa.»

²⁵ Jésus fɛ i sa'n fuɛli i nyin'n su ekun, kɛ anyansifuɛ'n tikeli i nyin ekun'n, kpɛkuun i nyinma'n ɔ'a yo kpa, ɔ'a wun ase weiin kpa.

²⁶ Jésus seli i kɛ ɔ wɔ i awlo nan nán ɔ wlu klɔ'n nun.

Wafa nga Piɛr bu kɛ Jésus ti b'ɔ kannin'n

²⁷ Jésus nin i sɔnnzɔnfuɛ'm be ɔli Sezare Filip akpasua su klɔ'm be su, kɛ be ´kɔ'n, ɔ usali be kɛ: «?Sran'm be waan wan yɛlɛ min?»

²⁸ Be seli i kɛ: «Be waan Zan batɛm yofuɛ'n yɛlɛ wɔ, wie'm be waan Eli yɛlɛ wɔ, wie'm be kusu be waan a ti Nyanmiɛn nuan ijɔfuɛ.»

²⁹ Yɛ ɔ usali be kɛ: «?Sanngɛ amun liɛ'n, amun waan wan yɛlɛ min?» Piɛr seli i kɛ: «A ti Krist.»

³⁰ Jésus wlali bé su nun kpa kɛ nán man be kɛn i ndɛ kle sran fi.

Jésus i kunlɛ nin i cɛnlɛ'n i su bolɛ

³¹ Yɛ ɔ boli be kan klelɛ'n bo kɛ ɔ fata kɛ i b'ɔ kacili Sran'n ɔ wun nyrɛnnɛn dan, nan kpɛnngbɛn mun, nin Nyanmiɛn nyrun jranfuɛ dandan mun, nin mmla klefuɛ mun be ´yi i blo yɛ be ´kun i, sanngɛ i le nsan su'n, ɔ ´cɛn.

³² Ɔ kan ndɛ sɔ'n kleli be weiin. Piɛr fɛ ɔli aamiɛn nan ɔ'a ijɔ i.

³³ Yɛ Jésus kpɛli i wun niɛnnin i sɔnnzɔnfuɛ mun, ɔ ijɔli Piɛr, ɔ seli i kɛ: «Satan, jao n nyrun lɛ, afin wɔ akunndan'n ti-man Nyanmiɛn liɛ, sran liɛ-ɔ.»

³⁴ I sin ɔ flɛli sran mun nin i sɔnnzɔnfuɛ mun, ɔ seli be kɛ: «Sran nga i waan ɔ wa su n su'n, man ɔ klɛn i wun man min, ɔ suɛ i waka'n nan ɔ su n su.»

³⁵ Afin sran nga i waan ɔ ´sɛsɛ i wun'n, ɔ ´kpɛ i nguan'n sin, sanngɛ sran ng'ɔ kpɛ i nguan'n sin min nin jasin fɛ'n ti'n, wuun sran sɔ'n ɔ sɛsɛ i nguan'n sakpa.

³⁶ ?Sɛ sran kun nyan mɛn'n nun ninnge'n kwlaa nan sɛ i nguan'n kpɛ sin'n, nguɛ yɛ ɔ yo ye mɛn i-ɔ?

³⁷ ?Nguɛ yɛ sran kun kwla fa to i nguan nin-ɔn?

³⁸ Nyanmiɛn nyrun'n, ajulisufuɛ tɛtɛ nga'm be ti kɛ bla b'ɔ kunndɛ bian i wun bo sa. Sran kwlaa nga be o be nun, nyannzuɛn kun be min nin min ndɛ'n ti. Kɛ m bɔ n kacili Sran'n min nin Nyanmiɛn i anz mun e ´ba n Si i dunman nun'n, bɔ be ´wun kɛ i nyrun ti nyannyan ɔ yo sro'n, nyannzuɛn wa kun min kusu be ti.