Marc 7 - NYANMIƐN NDƐ'N 1998

Lalafuɛ'm be nzuɛn'n

¹ Farizifuɛ nin mmla klefuɛ wie mun bɔ be fin Zerizalɛm'n be yiali Jésus wun lɛ.

² Be wunnin i sɔnnzɔnfuɛ'm be nun wie bɔ be fa bé wun fiɛn di like, afin b'a wunnzin-man bé sa kɛ be seli kɛ be wunnzin'n sa.

³ Yɛlɛ kɛ Zuif mun bɔ be ti Farizifuɛ'n be nin Zuif kun mun kwlaa sɛ b'a wunnzin-man bé sa nun kpa'n, be di-man like, afin be fa lalafuɛ kpɛnngbɛn'm be nzuɛn'n su.

⁴ Kɛ be fin gua bo ba'n, sɛ be nian wunnzin-man'n, be di-man like mlɔnmlɔn. Be lɛ nzuɛn uflɛ kpanngban ekun. I wie yɛlɛ klowa, nin ondoman, ɔ nin aaba'm be nun wunnzinlɛ.

⁵ Yɛ Farizifuɛ mun nin mmla klefuɛ'm be usali Jésus kɛ: «?Nzu ti yɛ ɔ sɔnnzɔnfuɛ'm be fa-man lalafuɛ kpɛnngbɛn'm be nzuɛn'n su bɔ be fa bé sa fiɛn di like-ɔ?»

⁶ Jésus seli be kɛ: «Dunman klofuɛ mun, amún wun ndɛ bɔ Ezai klɛli'n ti nanwlɛ, afin ɔ klɛli i kɛ: ‹Sran nga'm be kɛn i bé nuan bui su kɛ be bu n sran, Sanngɛ be anwlɛn'n nun-man n su,

⁷ Be manman min ngbɛn, yɛ be kle like nga sran'm be kan'n kɛ ɔ ti Nyanmiɛn mmla'n .› »

⁸ Yɛ Jésus seli kɛ: «An yaci Nyanmiɛn mmla'n an jran lalafuɛ'm be nzuɛn'n su.»

⁹ Ɔ seli ekun kɛ: «An yi Nyanmiɛn mmla'n i blo mlɔnmlɔn, an fa amun lalafuɛ nzuɛn'm be su.

¹⁰ Afin Moiz kannin kɛ: ‹Bu ɔ si nin ɔ nin be sran,› yɛ ‹sran ng'ɔ kɛn i si annzɛ i nin i ndɛ tɛ'n man be kun i .›

^11-12 Sanngɛ amun liɛ'n, an se kɛ: ‹Sɛ sran kun se i si annzɛ i nin kɛ, like ng'ɔ ko fa ko mɛn i'n ɔ ti kɔrban'n, ɔ ti-man b'ɔ yo like mɛn i si nin i nin be kun.› (Kɔrban i bo kle kɛ b'a sie like sɔ'n b'a man Nyanmiɛn.)

¹³ Kɛ an yo sɔ'n, an bu-man Nyanmiɛn ndɛ'n i like fi amun bɔbɔ amun lalafuɛ nzuɛn'n i klelɛ bɔ an fa kle wie mun'n ti. Yɛ an yo be wunsu sa sunman kpa ekun.»

Like ng'ɔ saci sran'n

¹⁴ Ɔ flɛli sran mun ekun nan ɔ'a se be kɛ: «Amun kwlaa an `tie min ndɛ'n, an `bu i akunndan.

¹⁵ Like kwlaa nga sran di'n, i wie fi kwla saci-mɛn i, sanngɛ like ng'ɔ fin sran klun fite'n yɛ ɔ saci i-ɔ. [

¹⁶ Sran ng'ɔ si fa sie'n, man ɔ fa sie.]»

¹⁷ Kɛ ɔ jaoli sran'm be afiɛn lɛ b'ɔ wluli awlo lɔ'n, i sɔnnzɔnfuɛ'm be usɛli i nyanndra sɔ'n bo.

¹⁸ Ɔ seli kɛ: «?Amun kusu, an si-man ngwlɛlɛ? ?An si-man kɛ like kwlaa nga sran di'n, i wie fi kwla saci-mɛn i?

¹⁹ Afin nán i anwlɛn'n nun yɛ ɔ wlu-ɔ, sanngɛ ɔ kɔ i klun lɔ, i sin ɔ kɔ i atin nun kɔwlɛ'n nun. Kɛ ɔ kan sɔ'n, ɔ kle kɛ like diwa'n kwlaa ti kpa.»

²⁰ Yɛ ɔ seli kɛ: «Like ng'ɔ fin sran klun fite'n yɛ ɔ saci i-ɔ.

²¹ Afin sran klun lɔ'n, i anwlɛn nun yɛ akunndan tɛ'n wo-ɔ: bla b'ɔ ti-man bé yi annzɛ bian b'ɔ ti-man bé wun i kunndɛlɛ, , awie, sran kunlɛ,

²² bla bé yi bo kunndɛlɛ annzɛ bian bé wun bo kunndɛlɛ, bé nyin b'ɔ yi-man like'n, klunwi, gblɛ, sa sukusuku yolɛ, anyinbloɛ, sran wun ndɛ kanlɛ, wun tulɛ nin sinnzin yolɛ.

²³ Like kainkain sɔ'm be kwlaa be o sran i klun lɔ, be yɛ be saci i-ɔ.»

Nvle wie nun bla'n b'ɔ lafili Jésus su'n

²⁴ Jésus tuli i bo lɛ ɔli Tir asa'n su. Ɔ wluli awlo kun nun, ɔ klo-man kɛ sran fi si kɛ ɔ o lɛ, sanngɛ ɔ kwla fia-man.

²⁵ Yɛlɛ kɛ bla kun bɔ asiɛ usu a saci i wa bla kan'n, ɔ tili i ndɛ bɔ be kan'n, nan ɔ'a koto i bo.

²⁶ Bla sɔ'n fin Fenisi b'ɔ o Siri mɛn'n nun. Ɔ ijɔ Grɛk. Ɔ srɛli i kɛ ɔ fuan asiɛ usu'n b'ɔ su i wa'n su'n.

²⁷ Jésus seli i kɛ: «Yaci man ba kanngan'm be ku yi ka, afin sɛ be fa ba kanngan'm be aliɛ'n gua alua'm be bo'n, ɔ ti-mɛn i nuan su.»

²⁸ Yɛ bla'n seli kɛ: «Nannan, ɔ ti sɔ, sanngɛ alua'm bɔ be o tabli'n bo'n, be di ba kanngan'm be aliɛ onga-onga'n.»

²⁹ Yɛ Jésus seli i kɛ: «Ndɛ nga a kannin'n ti, kɔ, asiɛ usu'n ɔ'a jao ɔ́ wa'n su.»

³⁰ Kɛ ɔ sɛli i sin i awlo lɔ'n, ɔ wunnin bakan'n ɔ la bɛ'n su lɛ asiɛ usu'n ɔ'a jao i su.

Jésus yoli sutrefuɛ kun juejue

³¹ Jésus tuli i bo Tir asa'n su kɛ ɔ ´kɔ Galile fɛtɛ'n nuan lɔ. Kɛ ɔ ´kɔ'n, ɔ sinnin Sidɔn nan ɔ'a kpɛ Klɔ Blu asa'n.

³² Be fali sutrefuɛ kun b'ɔ kwla ijɔ-man kpa'n blɛli i, be srɛli i kpa kɛ ɔ fɛ i sa fuɛ i su.

³³ Ɔ fɛ i jaoli sran'm bé wun lɛ, nan b'a ɔ be ngunmin. Ɔ fɛ i sama'n wlɛli i su'n be nun, yɛ ɔ fɛ i nuan nzue'n kɛnnin i taaman'n.

³⁴ Ɔ mɛnnin i nyin su nyanmiɛn su lɔ, ɔ deli wunmiɛn kaklaka kpa kun, nan ɔ'a se kɛ: «Efata!» I bo kle kɛ, tike.

³⁵ Kpɛkuun sran sɔ'n i su'm b'a tike, i taaman'n ɔ'a yo kpa, yɛ ɔ kwla ijɔli kpa-a.

³⁶ Jésus wlali bé su nun kpa kɛ nán man be kan ndɛ sɔ'n kle sran fi, sanngɛ kɛ ɔ wlali bé su nun sɔ'n, i li bɔ yɛ ɔ kle be kɛ be kan-an.

³⁷ Bé nuan'n boli be wun dan kpa nan b'a se kɛ: «Like kwlaa ng'ɔ yo'n ɔ yo ye, ɔ man sutrefuɛ'm be ti sa yɛ bobofuɛ'm be ijɔ!»