Marc 5 - NYANMIƐN NDƐ'N 1998

Sran kun bɔ asiɛ usu'm be sacili i'n i juejue yolɛ

¹ Be juli fɛtɛ'n bue kun lɔ Gadarafuɛ'm be mɛn'n nun.

² Kɛ Jésus fin alie'n nun jrali cɛ'n, bian kun bɔ asiɛ usu a saci i'n, ɔ fin ndia su sua'm bé wun lɔ bɛli i wun lɛ.

³ Asieliɛ su sua'm be nun yɛ ɔ tran-an. Sran fi kwla fa-man jrɔkɔ bɔbɔ ci-mɛn i kun,

⁴ afin cɛn wie be fa blalɛ bo i kpaun, yɛ be ci i nin jrɔkɔ, sanngɛ ɔ kpɛkpɛ jrɔkɔ'n nun, yɛ ɔ bubu kpaun'n nun, sran fi kwla lo-mɛn i.

⁵ Titi kɔnguɛ nin wia'n nun ɔ wo asieliɛ nin oka'm be su, ɔ kpan, ɔ fa yɛbuɛ kpɛkpɛ i wun.

⁶ Kɛ ɔ wunnin Jésus mmua lɔ'n, ɔ wanndi ko kotoli i bo,

⁷ ɔ kpannin kekle kpa kɛ: «?Jésus, Nyanmiɛn bɔ like fi nun-mɛn i sin'n i Wa, nguɛ ndɛ yɛ ɔ o min nin wɔ ye afiɛn-ɔn? N ´srɛ wɔ, nian Nyanmiɛn'n ti, nán kle n yalɛ.»

⁸ Afin Jésus dun mmua seli i kɛ: «Asiɛ usu bɔ a saci sran'n, tu bian nga su.»

⁹ Yɛ Jésus usɛli i kɛ: «?Be flɛ wɔ sɛ?» Ɔ seli kɛ: «Be flɛ min Akpasua Kpli, afin e sɔnnin kpa.»

¹⁰ Ɔ srɛli Jésus kpa kɛ nán man ɔ fuan be mɛn sɔ'n nun.

¹¹ Kɛ ɔ ´yo sɔ'n, wuun kɔkɔti akpasua dan kpa kun o kpɔlɛ wie wun lɛ, be su didi.

¹² Asiɛ usu'm be srɛli Jésus kpa kɛ ɔ man be atin man be ko wlu kɔkɔti sɔ'm be nun.

¹³ Yɛ ɔ mannin be-ɔ, nan asiɛ usu'm b'a fite b'a ko wlu kɔkɔti sɔ'm be nun. Yɛ kɔkɔti akpasua sɔ'n bɔ be ju akpi nnyɔn (2.000) kun'n, be wanndi troli cenje'n be guali fɛtɛ'n nun, nan b'a mlɔn.

¹⁴ Be nga be kankan be'n be wanndi ko kannin ndɛ sɔ'n klɔ nin nanmue'm be nun. Sran'm be ko niannin sa ng'ɔ yoli lɔ'n.

¹⁵ Be bali Jésus wun lɛ, be wunnin bian bɔ asiɛ usu akpasua kpli'm be sacili i'n ɔ ti ase lɛ. I nyin a klo, ɔ'a wla tralɛ. Ɔ man srɛ kunnin be.

¹⁶ Sa nga Jésus yo mannin bian'n bɔ asiɛ usu'm be sacili i'n, nin like ng'ɔ yoli kɔkɔti mun'n, be nga be wunnin nun'n be kan kleli be.

¹⁷ Kpɛkuun be srɛli Jésus kɛ ɔ jao be asa'n su.

¹⁸ Kɛ ɔ fuli alie nun'n, bian'n bɔ asiɛ usu'm be sacili i'n ɔ srɛli i kpa kɛ ɔ nin i be ´tran.

¹⁹ Sanngɛ Jésus a kplin-man su, ɔ seli i kɛ: «Kɔ wɔ awlo ɔ osufuɛ'm be wun lɔ, kan sa nga ɔ Min'n sili wɔ aunnvuɛ b'ɔ yo mannin wɔ'n i kwlaa kle be.»

²⁰ Ɔ ɔli, kpɛkuun ɔ ko boli sa nga Jésus yo mɛnnin i'n i kwlaa ndolo Klɔ Blu asa'n su lɔ. Sran'm be kwlaa bé nuan boli bé wun kpa.

Zairis wa bla'n i cɛnlɛ Bla'n b'ɔ kannin Jésus i tralɛ'n b'ɔ yoli juejue'n

²¹ Jésus fuli alie'n nun ɔ sɛli i sin fɛtɛ'n bue kun lɔ. Kɛ ɔ o fɛtɛ'n nuan lɛ'n, sran kpanngban kpa be wa yiɛli i wun lɛ ekun.

²² Nyanmiɛn ndɛ suanlɛ nin i srɛlɛ sua su kpɛn kun bɔ be flɛ Zairis'n bali lɛ. Kɛ ɔ wunnin Jésus'n, ɔ kotoli i bo,

²³ ɔ srɛli i kpa, ɔ seli kɛ: «N wa bla kaan'n su wu cinnjin kpa. Bla wa fa ɔ́ sa fuɛ i su, man ɔ yo juejue nan ɔ nyan nguan.»

²⁴ Jésus nin i be ɔli, kɛ be ´kɔ'n, sran kpanngban kpa be su i su, be miɛn i.

²⁵ Bla kun o lɛ, mannza tɛnndɛn tɔli i wun ɔ'a di afuɛ blu-nin-nnyɔn.

²⁶ Ɔ'a fɛ dan kpa ayrefuɛ sunman bé sa nun, ɔ sacili i ninnge b'ɔ o i sa nun'n kwlaa, sanngɛ ɔ'a yo-man ye, i tukpacɛ'n ɔli i nyrun tititi.

²⁷ Ɔ tili Jésus ngan yɛ ɔ wa kɛnnin i tralɛ'n i sin lɔ sran'm be nun.

²⁸ Afin ɔ seli kɛ: «Sɛ n kwla kɛn i tralɛ'n bɔ cɛ'n, n ´yo juejue.»

²⁹ I osu kunngba'n nun i mannza'n wieli, kpɛkuun ɔ wunnin i kɛ i tukpacɛ'n ɔ'a wie.

³⁰ Kpɛkuun Jésus wunnin i kɛ fanngan kun ɔ'a fin i nun ɔ'a fite. Ɔ kpɛli i wun sran'm be su, ɔ usali kɛ: «?Wan yɛ ɔ kannin n tralɛ nin-ɔn?»

³¹ Yɛ i sɔnnzɔnfuɛ'm be seli i kɛ: «A wun sran nga be mian wɔ yɛ'n, yɛ a tɛ usa kɛ: ?Wan yɛ ɔ kannin min-ɔn?»

³² Ɔ kpɛli i nyin ɔ kunndɛli sran ng'ɔ yoli sa sɔ'n.

³³ Kɛ bla'n wunnin like ng'ɔ yoli i'n, srɛ kunnin i, i wun usuli i, yɛ ɔ wa kotoli i bo nan ɔ'a di i kwlaa nanwlɛ a kle i.

³⁴ Nan Jésus a se i kɛ: «N wa, Nyanmiɛn su bɔ a lafi'n ti, w'a nyan ɔ́ ti. Gua ɔ́ wla ase, kɔ, man ɔ tukpacɛ'n wie.»

³⁵ Kɛ i nuan nian tɔ-man'n, kpɛkuun sran'm be fin Nyanmiɛn ndɛ suanlɛ nin i srɛlɛ sua su kpɛn sɔ'n i awlo lɔ be bali, be wa seli i kɛ: «Ɔ wa'n ɔ'a wu. ?Nguɛ ti yɛ a tɛ kle bian'n yalɛ-ɔ?»

³⁶ Sanngɛ Jésus ɔ'a sie-man i su ndɛ sɔ'n su, ɔ seli Nyanmiɛn ndɛ suanlɛ nin i srɛlɛ sua su kpɛn'n kɛ: «Nán srɛ kun wɔ, `gua ɔ wla ase.

³⁷ Ɔ'a man-man sran fi atin kɛ ɔ ko sun-mɛn i, san Piɛr, nin Zak ɔ nin i niaan bian Zan.

³⁸ Kɛ be juli bian'n i lika lɔ'n, Jésus wunnin awuyomo bɔ sran'm be bo'n, ɔ nin sunlɛ bɔ be sun'n, ɔ nin kpanlɛ bɔ be kpan'n.

³⁹ Ɔ wluli sua lɔ, ɔ seli be kɛ: «?Nguɛ ti yɛ an bo awuyomo bɔ an sun sɔ-ɔ? Ba'n ɔ'a wu-man, lafilɛ yɛ ɔ su lafi-ɔ.»

⁴⁰ Nan b'a sri i. Yɛ ɔ kannin be kwlaa be bo be fiteli-ɔ. Ɔ nin ba'n i si, nin i nin, yɛ be nga be ɔli i sunmanlɛ'n be wluli kan ba'n wo lɔ'n.

⁴¹ Ɔ utili ba'n i sa nan ɔ'a se i kɛ: «Talita kumi.» I bo'n kle kɛ: Talua jao!

⁴² Kpɛkuun talua'n ɔ'a jao ɔ su nanti. Kɛ ɔ ´yo sɔ'n, wuun talua sɔ'n ɔ'a di afuɛ blu-nin-nnyɔn. Bé nuan boli bé wun dan kpa.

⁴³ Jésus wlali bé su nun kpa kɛ nán man sran fi ti sa sɔ'n, yɛ ɔ seli be kɛ be man talua'n i like man ɔ di.