Marc 3 - NYANMIƐN NDƐ'N 1998

Bian sa wuwa'n

¹ Le kun ekun Jésus wluli Nyanmiɛn ndɛ suanlɛ nin i srɛlɛ sua'n kun nun. Bian kun o lɛ i sa'n ti wuwa.

² Be nga be o lɛ'n, kɛ ɔ ´yo nan b'a kwla sanman Jésus'n ti, be niɛn-niɛn i sɛ ɔ ´yo bian sɔ'n juejue wunmiɛn-delɛ-cɛn nun o.

³ Jésus seli bian'n bɔ i sa ti wuwa'n kɛ: «Jao jran be afiɛn lɛ.»

⁴ I sin ɔ usali be kɛ: «?Wunmiɛn-delɛ-cɛn'n nun be kwla yo sran ye annzɛ be yo sran tɛ, yɛ be de sran annzɛ be kun sran?» Sanngɛ b'a uke-man bé nuan.

⁵ Be ketelɛ bɔ b'a kete'n yoli i ya lele ɔ boli i wla, yɛ ɔ nian-niannin be ya su, kpɛkuun ɔ seli bian'n kɛ: «Tinngɛ ɔ́ sa'n nun.» Ɔ tinngɛli i sa'n nun nan i sa sɔ'n ɔ'a yo kpa kɛ laa'n sa.

⁶ Kpɛkuun Farizifuɛ'm be fiteli, nan be nin Erɔd i minniɛn mun b'a ko cici kɛ be ´kunndɛ like nga be ´yo be fa kun Jésus'n.

Sran kpanngban be yiali Jésus wun fɛtɛ'n nuan lɛ

⁷ Jésus nin i sɔnnzɔnfuɛ'm be cuɛn be wun ɔli fɛtɛ'n nuan lɔ. Sran kpanngban kpa be suli i su. Be fin Galile, nin Zide,

⁸ nin Zerizalɛm, nin Idime, nin Zurdɛn'n i sin lɔ, nin Tir nin Sidɔn be asa su lɔ. Sa ti bɔ sran kpanngban sɔ'm be bɛli i wun lɛ'n yɛlɛ kɛ be ti sa ng'ɔ yo be'n.

⁹ Jésus seli i sɔnnzɔnfuɛ'm be kɛ be sie alie kaan kun lɛ mɛn i nan sran sɔ'm b'a miɛn-mɛn i.

¹⁰ Afin kɛ b'ɔ yo sran sunman be juejue'n, be kwlaa nga be ti tukpacɛfuɛ'n be klo kɛ be ´kɛn i. I sɔ'n ti be wunndun i su.

¹¹ Cɛn kwlaa kɛ asiɛ usu'm be wun i'n, be koto i bo, be kpan se kɛ: «A ti Nyanmiɛn Wa.»

¹² Sanngɛ ɔ wla bé su nun kpa kɛ nán man be tɛ i dunman'n nglo.

Sran blu-nin-nnyɔn bɔ Jésus fali be'n

¹³ I sin ɔ fuli oka kun su, ɔ flɛli be ng'ɔ klo kɛ be bla'n, nan b'a bɛ i wun lɛ.

¹⁴ Ɔ sieli be nun blu-nin-nnyɔn kɛ be nin i tran, yɛ ɔ sunman be kɛ be ko kɛn i ndɛ'n.

¹⁵ Ɔ mannin be atin kɛ be fuan asiɛ usu mun.

¹⁶ Sran blu-nin-nnyɔn sɔ'n b'ɔ sieli be'n be dunman'm be yɛ: Simɔn b'ɔ ukɛli i dunman'n su kɛ Piɛr'n,

¹⁷ nin Zebede i wa Zak nin i niaan Zan b'ɔ ukali be dunman'n su kɛ Boanɛrzɛs'n, i bo yɛlɛ Nyanmiɛn sran bɔ be lɛ fanngan kɛ ngblannan sa,

¹⁸ nin Andre, nin Filip, nin Bartelemi, nin Matie, nin Tomas, nin Alfe i wa Zak, nin Tade, nin Simɔn b'ɔ o akpuefuɛ'm be akpasua'n su'n,

¹⁹ ɔ nin Zidas Iskariɔt b'ɔ fa Jésus mannin sran mun'n.

Jésus i osufuɛ'm be bɛli i falɛ

²⁰ Kpɛkuun ɔ sɛli i sin awlo lɔ nan sran kpanngban kpa b'a yia lɛ ekun, ɔ man be kwla di-man like bɔbɔ.

²¹ Kɛ Jésus i osufuɛ'm be tili i sɔ'n, be bɛli i falɛ, afin be waan: «I ti a saci.»

²² Mmla klefuɛ'm bɔ be fin Zerizalɛm'n be waan: «Beɛlzebil a fɛ i. Mmusu'm be wlengbi'n i dunman nun yɛ ɔ fuan asiɛ usu mun-ɔn.»

²³ Jésus flɛli be nan ɔ'a bu be nyanndra kɛ: «?Ɔ yo sɛ yɛ Satan kwla fuɛn i bɔbɔ wun-ɔn?»

²⁴ Sɛ famiɛn kun i sran b'ɔ sie be'n be bu bé wun nun'n, i mɛn'n su kwla cɛ-man.

²⁵ Yɛ sɛ awlo kun nunfuɛ'm be bu be wun nun'n, awlo sɔ'n su kwla cɛ-man.

²⁶ I kunngba nin-ɔn, sɛ Satan jao i bɔbɔ wun'n, wuun ɔ'a bu i bɔbɔ wun nun, ɔ su kwla sie cɛ-man, i liɛ'n ´wie.

²⁷ Sran fi kwla wlu-man sran wunmiɛnfuɛ kun i awlo lɔ kɛ ɔ ´fɛn i bo ninnge'n sɛ ɔ'a dun-man mmua ɔ'a ci-man sran wunmiɛnfuɛ sɔ'n, sanngɛ sɛ ɔ dun mmua ci i'n, ɔ kwla fɛn .

²⁸ Nanwlɛ, sa tɛ kwlaa nga sran ko yo'n ɔ nin Nyanmiɛn dunman sacilɛ kwlaa nga be ko saci'n, ɔ ´yaci cɛ be.

²⁹ Sanngɛ sran ng'ɔ saci Nyanmiɛn Wawɛ'n i dunman'n, ɔ su yaci cɛ-mɛn i le, i sa tɛ'n ´kɛ i wun tititi.

³⁰ Sa ti bɔ Jésus kannin sɔ'n yɛlɛ kɛ be waan: «Asiɛ usu kun a fɛ i.»

Jésus i nin'n nin i niaan mun

³¹ I nin nin i niaan bian'm be bali, be jrannin guasu lɔ be sunmannin sran kɛ ɔ ko flɛ i.

³² Sran'm bé ti sin yiɛ i lɛ nan b'a se i kɛ: «Nian, ɔ nin nin ɔ niaan'm be o guasu lɔ be waan be ´wun wɔ wun.»

³³ Yɛ ɔ usali be kɛ: «?Wan mun be yɛ be ti min nin nin min niaan mun-ɔn?»

³⁴ Ɔ niannin be nga bé ti sin yiɛ i lɛ'n, ɔ seli be kɛ: «An `nian, mín nin nin min niaan'm be yɛ.

³⁵ Sran ng'ɔ yo Nyanmiɛn klun sa'n, i yɛ ɔ ti min niaan bian, nin min niaan bla, nin min nin nin-ɔn.»