Marc 2 - NYANMIƐN NDƐ'N 1998

Jésus yoli bubuwafuɛ kun juejue

¹ Kɛ ɔ dili le nnyɔn kun'n, Jésus ɔli Kapɛrnaɔm lɔ ekun. Sran'm be tili i kɛ ɔ o awlo lɔ,

² ɔ man be yiali lɛ kaka lele be sɔn-man anuan'n nun lɛ bɔbɔ nan se kɛ sua lɔ. Ɔ kannin Nyanmiɛn ndɛ kleli be.

³ Be fali bubuwafuɛ kun bɔ sran nnan be suɛ i'n be blɛli i.

⁴ Kɛ sran'm be ti be kwla fɛ-mɛn i wlu-man sua lɔ'n, be kpali sua'n i lika nga Jésus o lɛ'n i ndɛnman sɛsɛsɛ, nan b'a fa tɛ nga bubuwafuɛ'n la nun'n b'a jrɛ i toklo sɔ'n nun.

⁵ Kɛ Jésus wunnin kɛ be lafi Nyanmiɛn su'n, ɔ seli bubuwafuɛ'n kɛ: «Min wa, sa nga a yoli Nyanmiɛn'n, b'a yaci a cɛ wɔ.»

⁶ Mmla klefuɛ wie'm be ti lɛ, be seli be klun lɔ kɛ:

⁷ «? Nguɛ ti yɛ ɔ kɛn i ndɛ liɛ sɔ-ɔ? Ɔ saci Nyanmiɛn dunman. ? Sɛ nán Nyanmiɛn kunngba cɛ'n, wan yɛ ɔ kwla yaci sran i wun sa cɛ i-ɔ?»

⁸ Kpɛkuun Jésus wunnin be akunndan'n, nan ɔ'a se be kɛ: «?Nzu ti yɛ an bu akunndan kɛ nga sa-a?

⁹ ?Kɛ n se bubuwafuɛ'n kɛ: ‹B'a yaci ɔ wun sa'n b'a cɛ wɔ'n,› annzɛ, ‹Jao fa ɔ tɛ'n nanti kɔ'n,› onin yɛ i kanlɛ ti pɔpɔ tra kun-ɔn?

¹⁰ Sanngɛ n klo kɛ amun `si kɛ m bɔ n kacili Sran'n n lɛ atin asiɛ'n su wa n yaci sa nga sran'm be yo Nyanmiɛn'n n cɛ be.»

¹¹ Yɛ ɔ seli bubuwafuɛ'n kɛ: «N wa, jao, fa ɔ bɛ'n kɔ wɔ awlo.»

¹² I osu kunngba'n nun'n, ɔ jao fɛli i bɛ'n ɔ fiteli be kwlaa be nyrun lɛ. I sɔ'n ti be kwlaa bé nuan boli bé wun kpa, be manmannin Nyanmiɛn, yɛ be seli kɛ: «E nian wun-man sa nga i wunsu le mlɔnmlɔn.»

Jésus flɛlɛ levi kɛ ɔ su i su

¹³ Jésus fite ɔli fɛtɛ'n i nuan lɔ ekun, sran'm be kwlaa be bɛli i wun lɛ, yɛ ɔ kleli be like.

¹⁴ Kɛ ɔ ´sin'n, ɔ wunnin Alfe i wa yasua Levi b'ɔ de gua bo sika'n, ɔ ti i junman diwlɛ lɛ. Ɔ seli i kɛ: «Bla a su n su.» Yɛ Levi jao suli i su-ɔ.

¹⁵ Kɛ Jésus nin i sɔnnzɔnfuɛ'm be ´di like Levi awlo lɔ'n, gua bo sika defuɛ kpanngban nin sa tɛtɛ yofuɛ'm be o be nun wie, afin be nga be su i su'n be sɔnnin.

¹⁶ Kɛ mmla klefuɛ bɔ be ti Farizifuɛ'n be wunnin kɛ ɔ nin gua bo sika defuɛ mun nin sa tɛtɛ yofuɛ mun be su di like'n, be seli i sɔnnzɔnfuɛ'm be kɛ: «?Nguɛ ti yɛ ɔ nin gua bo sika defuɛ mun nin sa tɛtɛ yofuɛ mun di like-ɔ?»

¹⁷ Kɛ Jésus tili ndɛ nga be kan'n, ɔ seli be kɛ: «Nán sran ng'ɔ ti juejue'n yɛ ɔ kɔ ayrefuɛ sin-ɔn, tukpacɛfuɛ'n yɛ ɔ kɔ-ɔ. M'an ba-man sran kpa'm be flɛlɛ, sa tɛtɛ yofuɛ mun yɛ m bali be flɛlɛ-ɔ.»

Srɛ nun kpɛlɛ i su sa usalɛ

¹⁸ Le kun Zan i sɔnnzɔnfuɛ'm bɔ be nin Farizifuɛ'm be su kpɛ srɛ nun, be wa usali Jésus kɛ: «?Nguɛ ti yɛ Zan i sɔnnzɔnfuɛ'm be nin Farizifuɛ'm be liɛ'n be kpɛ srɛ nun, sanngɛ ɔ sɔnnzɔnfuɛ'm be kpɛ-man wie-ɔ?»

¹⁹ Jésus seli be kɛ: «?Kɛ yasua b'ɔ su fa atɔnvlɛ'n nin i janvuɛ mun be tɛ o lɛ'n, be kwla kpɛ srɛ nun? Kɛ yasua sɔ'n nin be tɛ o lɛ'n, be kwla kpɛ-man srɛ nun.

²⁰ Le kun be wa de yasua sɔ'n bé sa nun, blɛ sɔ'n nun yɛ be ´kpɛ srɛ nun-ɔn.

²¹ Sran fi fa-man tannin sin uflɛ bɔ be nian kpu-mɛn i le'n ta-man tralɛ nvuɛn nun, sɛ ɔ yo sɔ-ɔ, tannin sin uflɛ'n ´cuɛn-cuɛn tannin nvuɛnfuɛ'n ɔ ´titi, yɛ i titilɛ'n ɔ ´yo tɛ tra laa'n.

²² Yɛ sran fi fa-man nzan lɔflɛ guɛ-mɛn i kplo kotokun nvuɛn nun, sɛ ɔ yo sɔ-ɔ, nzan'n kpuke kotokun'n yɛ nzan nin kotokun'n be ´saci. Sanngɛ man be fa nzan lɔflɛ'n gua kplo kotokun ng'ɔ ti uflɛ'n nun.»

Ble mma fianfianlɛ wunmiɛn-delɛ-cɛn'n

²³ Le kun wunmiɛn-delɛ-cɛn nun'n, kɛ Jésus nin i sɔnnzɔnfuɛ mun be ´sin ble fie wie nun'n, i sɔnnzɔnfuɛ'm be tɔli ble'n i fianfianlɛ su .

²⁴ Farizifuɛ'm be seli kɛ: «?Nian, nguɛ ti yɛ be yo like nga sran lɛ-man atin kɛ ɔ yo i wunmiɛn-delɛ-cɛn nun nin-ɔn? »

²⁵ Jésus seli be kɛ: «?Kɛ awe kunnin David nin i minniɛn'm bɔ bé sa miannin'n, sa nga be yoli'n, an nian kɛnngɛn-mɛn i le?

²⁶ Kɛ ɔ wluli tannin sua nga Nyanmiɛn yi i wun nglo nun'n Abiatar b'ɔ ti Nyanmiɛn nyrun jranfuɛ'm be su kpɛn'n i blɛ su'n, ɔ dili kpaun bɔ be fa tɛkɛ Nyanmiɛn nyrun'n nan ɔ'a mɛn i minniɛn'm be wie. Sran fi lɛ-man atin kɛ ɔ di kpaun sɔ'n san Nyanmiɛn nyrun jranfuɛ'm be ngunmin yɛ be lɛ atin be di-ɔ .»

²⁷ I sin Jésus seli be ekun kɛ: «Be sie wunmiɛn-delɛ-cɛn'n mannin sran, nán wunmiɛn-delɛ-cɛn'n ti yɛ sran o lɛ-ɔ .»

²⁸ Ɔ man m bɔ kacili Sran'n, wunmiɛn-delɛ-cɛn bɔbɔ kpa'n min yɛ n sie i-ɔ.