Marc 16 - NYANMIƐN NDƐ'N 1998

Jésus i cɛnlɛ

¹ Kɛ wunmiɛn-delɛ-cɛn'n sinnin'n, Mari b'ɔ fin Magdala'n nin Zak i nin Mari, ɔ nin Salome be toli ayre fannin kɛ be ´fa ko gua Jésus fuɛn'n su.

² Mɔnnɛn b'ɔ ti le mɔcuɛ'n i cɛn ba klikli'n, nglɛmun ndɛ kpa kɛ wia'n ´tu i bo'n, be ɔli ndia'n su lɔ.

³ Kɛ be ´kɔ'n, be usali be wiengu kɛ: «?Wan yɛ ɔ ´yi yɛbuɛ'n ndia'n i anuan'n su man ye-ɔ?»

⁴ Kɛ be mannin bé nyin su'n, be wunnin kɛ b'a kondo yɛbuɛ dan sɔ'n.

⁵ Kɛ be wlu ndia nun'n, be wunnin gbanflɛn kun, tralɛ ufue tɛnndɛn wo i wun, ɔ ti ase fama su lɛ. Ɔ man srɛ kunnin be.

⁶ Ɔ seli be kɛ: «Nán srɛ kun amun. An su kunndɛ Jésus b'ɔ fin Nazarɛt'n bɔ be boboli i waka'n su'n, ɔ cɛnnin, ɔ nun-man wa, an `nian kan be sieli i'n yɛ .

⁷ An `ko se i sɔnnzɔnfuɛ mun nin Piɛr kɛ ɔ ´dun mmua amun nyrun Galile lɔ, lɔ yɛ amun ´wun i-ɔ, afin kɛ ɔ kan kleli amun sɔ-ɔ.»

⁸ Be fin ndia'n nun fiteli, nan b'a wanndi, afin bé wun usu be yɛ srɛ kun be. Srɛ b'ɔ kun be'n ti, b'a kan-man ndɛ fi a kle-man sran fi. [

Jésus yili i wun kleli Mari b'ɔ fin Magdala'n

⁹ Kɛ Jésus cɛnnin'n, le mɔcuɛ'n i cɛn ba klikli su nglɛmun'n, ɔ fɛli i wun kleli Mari b'ɔ fin Magdala'n b'ɔ fuannin asiɛ usu nso i wun'n.

¹⁰ Bla'n ɔli, ɔ ko kan ndɛ sɔ'n kleli be ng'ɔ nin be trannin bɔ be o sɛ'n bo lɛ be su sun'n.

¹¹ Kɛ be tili i kɛ ɔ cɛnnin nan ɔ wunnin i'n, b'a lafi-mɛn i su.

Jésus yili i wun kleli i sɔnnzɔnfuɛ nnyɔn

¹² I sin Jésus fɛli i wun kleli be nun nnyɔn bɔ be wo atin su be su kɔ lika'n, ɔ yoli i wafa uflɛ su ekun.

¹³ Be kusu be sali bé sin be wa kan kleli be wiengu mun, b'a lafi-man be su ekun.

Ngaliɛ bɔ Jésus nin i sɔnnzɔnfuɛ mun be dili'n

¹⁴ I kasiɛn su'n, kɛ i sɔnnzɔnfuɛ blu-nin-kun'm be wo aliɛ'n sin'n, ɔ fɛli i wun kleli be nan ɔ'a ijɔ be i su bɔ be lafi-man'n, nin ketelɛ bɔ b'a kete bɔ b'a fa-man be nga be wunnin i kɛ ɔ cɛnnin'n be ndɛ'n su'n ti.

¹⁵ Yɛ ɔ seli be kɛ: «An `wɔ mɛn wunmuan'n nun, an `kan jasin fɛ'n kle sran'm be kwlaa bɔ Nyanmiɛn yili be'n .

¹⁶ Sran ng'ɔ lafi su nan be yo i batɛm'n, ɔ ´fite nun, sanngɛ ng'ɔ lafi-man su'n, be ´se kɛ ɔ'a di fɔ.

¹⁷ An `nian atrɛ nga be nga be lafi su'n be wa yi-ɔ: N dunman nun be ´fuan asiɛ usu mun, be ´ijɔ aniɛn uflɛ mun,

¹⁸ be ´tra wuo mun, sɛ be nɔn like wie b'ɔ kun sran'n, ɔ su yo-man be sa fi. Be ´fa bé sa fua tukpacɛfuɛ'm be su, be ´yo juejue.»

Jésus i nyanmiɛn su kɔlɛ

¹⁹ Kɛ e Min'n kannin ndɛ sɔ'n kleli be'n, Nyanmiɛn mɛnnin i su ɔli nyanmiɛn su lɔ, ɔ trannin ase i fama su .

²⁰ Yɛ be ko kannin ndɛ'n lika'n kwlaa nun. E Min Nyanmiɛn nin be dili junman, ɔ man be yili atrɛ b'ɔ kle kɛ be ndɛ'n ti nanwlɛ.]