Marc 12 - NYANMIƐN NDƐ'N 1998

Vinyi fie sunianfuɛ'm bé wun nyanndra

¹ Jésus buli nyanndra wie kleli be. Ɔ seli kɛ: «Bian kun di i vinyi fie. Ɔ sili i wun, yɛ ɔ kpɛli vinyi'n i nzue cuɛnwlɛ, ɔ kplannin akpa fleiin kun, yɛ ɔ fa wlali vinyi fie sunianfuɛ'm bé sa nun nan ɔ'a ɔ mɛn wie nun .

² Kɛ ɔ juli vinyi'n i tilɛ'n, ɔ sunmɛnnin i sran kun vinyi sunianfuɛ'm be sin kɛ ɔ ko fɛ i liɛ blɛ i.

³ Be trɛli i be boli i, be kɛnnin i bo nan ɔ'a toto i sa a sɛ i sin.

⁴ Ɔ sunmɛnnin i sran kun ekun bé wun lɔ, be boli i fɛ, yɛ be yoli i tɛ kpa.

⁵ I nsan su liɛ'n b'ɔ sunmɛnnin i'n, be kunnin i. I sin ɔ sunmannin wie mun ekun, be boli wie, yɛ be kunnin wie.

⁶ Ɔ man ɔ kɛ i wa yasua'n b'ɔ ti i anwlɛn su ba'n i kunngba cɛ. Ɔ sunmɛnnin i be wun lɔ ekun, ɔ seli kɛ: ‹Min wa'n liɛ'n, be wa bu i sran.›

⁷ Sanngɛ kɛ vinyi fie sunianfuɛ sɔ'm be wunnin i'n, be seli be wiengu kɛ: ‹I aja difuɛ'n yɛ, an `bla man e kun i nan i ninnge'm be yo e liɛ.›

⁸ Yɛ be trɛ i be kunnin i-ɔ, nan b'a yi i vinyi fie'n sin lɔ.

⁹ ?Nguɛ yɛ vinyi fiefuɛ'n ɔ wa yo-ɔ? Ɔ ´ba, ɔ ´kun vinyi fie sunianfuɛ mun, yɛ ɔ ´fa vinyi fie'n wla sran uflɛ'm bé sa nun.

¹⁰ ?Nyanmiɛn Ndɛ nga be kleli i kɛ: ‹Yɛbuɛ nga sua kplanfuɛ'm be yili i blo'n, i yɛ ɔ'a kaci yɛbuɛ kpa b'ɔ tra sua'n i cɔnjɔ'n i ase'n,

¹¹ i sɔ'n fin e Min'n, yɛ kɛ e wun i'n, ɔ bo é nuan'n.› amun nian kɛnngɛn-mɛn i le ?»

¹² Kɛ be wunnin i wlɛ kɛ be ti yɛ Jésus buli nyanndra sɔ'n, be waan be ´trɛ i, sanngɛ sran'm bé wun srɛ ti be yacili i lɛ, be jaoli i wun lɛ be ɔli.

Sezar i lapo'n

¹³ Be sunmannin Farizifuɛ mun nin Erɔdfuɛ wie mun Jésus wun lɔ kɛ be ko tie i nuan bo ndɛ nan be jran su fa trɛ i.

¹⁴ Be wa seli i kɛ: «Nja, e si kɛ a di nanwlɛ. Yɛ e si ekun kɛ a sro-man sran fi, afin a nian-man sran nyrun yɛ a yo sa-a, yɛ a kle sran mun Nyanmiɛn atin'n nanwlɛ nun. ?E `su lapo man Sezar? E su, annzɛ nán man e su?»

¹⁵ Kɛ Jésus wunnin kɛ be su to i gblɛ'n, ɔ seli be kɛ: «?Nzu ti yɛ an kan min nian-an? An `fa denie kun blɛ min man n nian.»

¹⁶ Be blɛli i kun, yɛ ɔ usali be kɛ: «?Wan yɛlɛ ng'ɔ o su yɛ'n? ?Yɛ wan sanuan yɛlɛ ng'ɔ klɛ su lɛ'n?» Be seli i kɛ: «Sezar yɛ ɔ o su-ɔ, yɛ i sanuan yɛ ɔ o su-ɔ.»

¹⁷ Yɛ ɔ seli be kɛ: «Sɛ ɔ ti sɔ'n, an `fa ng'ɔ ti Sezar liɛ'n mɛn i, yɛ ng'ɔ ti Nyanmiɛn liɛ'n, an `fa mɛn i.» Ndɛ ng'ɔ kannin'n boli bé nuan.

Sran'm be cɛnlɛ'n i su sa usalɛ

¹⁸ Sadisefuɛ mun bɔ be waan, sɛ sran wu-ɔ ɔ cɛn-man'n , be bali Jésus wun lɛ, be usɛli i kɛ:

¹⁹ «Nja, nian ndɛ bɔ Moiz klɛ mannin ye-ɔ, i waan: ‹Sɛ sran wie i niaan b'ɔ nin i yi'n b'a wu-man ba'n ɔ wu'n, man i niaan'n ja bla'n ekun nan ɔ nin i be wu ba, nan i niaan'n i osu'n ɔ'a nunnun-man .›

²⁰ Yasua nso be o lɛ, be ti niaan. Be nyrun kpɛn'n jali bla, i sin be nian sɔ'n ɔ wa wuli, ɔ'a nyan-man ba b'ɔ ´kɛ i osu-ɔ.

²¹ Ng'ɔ mɛntɛn i'n, ɔ jɛli i angboti'n, ɔ nin i a wu-man ba, i kusu wa wuli. Be nsan su'n nin be nga mun be jali bla kunngba'n, be kusu be wa wuli.

²² Be nso'n, be nun wie fi be nin i b'a wu-man ba. Kɛ be kwlaa be wuli'n, i sin bla'n kusu wa wuli.

²³ ?Kɛ sran'm be ´cɛn'n, bla sɔ'n ɔ ´yo be nun onin liɛ, afin be nso'n be jɛli i?»

²⁴ Jésus seli be kɛ: «Amu'an fɔn. ?An si sa ti'n? Afin an wun-man Nyanmiɛn Ndɛ nga be klɛli'n i wlɛ, yɛ kusu amun wun-mɛn i wlɛ kɛ Nyanmiɛn kwla sa kwlaa yo.

²⁵ Afin kɛ sran'm be ko cɛn'n, yasua su ja-man bla kun, yɛ bla kusu su ja-man bian kun, sanngɛ be ´yo kɛ anz'm bɔ be o Nyanmiɛn su lɔ'n sa.

²⁶ ?Be nga be wuli'n be cɛnlɛ'n i wun ndɛ liɛ'n, amu'an kanngan-man Moiz i fluwa'n b'ɔ kle susrɛ'n i wun ndɛ'n nun'n i nun le? Ɔ klɛli i kɛ: ‹N ti Abraam, nin Izaak, nin Zakɔb be Nyanmiɛn .›

²⁷ Nyanmiɛn ti-man be nga be wuli'n be Nyanmiɛn, sanngɛ ɔ ti be nga be nyin o su'n be Nyanmiɛn. Amu'an fɔn dan kpa.»

Mmla'n i nun dan'n

²⁸ Mmla klefuɛ'm be nun kun tili be ndɛ nga be kan'n. Kɛ ɔ wunnin kɛ Jésus tɛli be su kpa'n, ɔ wunngeli Jésus wun lɛ, yɛ ɔ usɛli i kɛ: «?Mmla'n i nun dan'n yɛlɛ onin?»

²⁹ Jésus seli i kɛ: «Nian, i nun dan'n yɛ: Izraɛlfuɛ mun, an `tie, e Min Nyanmiɛn'n i kunngba cɛ yɛ ɔ ti e Min nin-ɔn.

³⁰ Amun `klo amun Nyanmiɛn'n kpa, amun `fa amún wla'n kwlaa guɛ i su, man amun akunndan'n kwlaa trɛn i su, yɛ amun fa amun wunmiɛn'n kwlaa yo like ng'ɔ kle kɛ amun klo i'n.»

³¹ Yɛ nian ng'ɔ mɛntɛn i'n yɛ: «Amun klo amun wiengu kɛ amun fa klo amun bɔbɔ amun wun'n sa. Mmla wie fi nun-man lɛ bɔ i dan tra be-ɔ .»

³² Mmla klefuɛ'n seli i kɛ: «Nja, ɔ ti kpa, kɛ a se kɛ Nyanmiɛn ti kunngba yɛ uflɛ nun-mɛn i sin'n, ɔ ti nanwlɛ.

³³ Yɛ kɛ be klo i kpa'n, bɔ be fa bé wla'n kwlaa guɛ i su'n, bɔ be akunndan'n kwlaa trɛn i su'n, bɔ be fa be wunmiɛn'n kwlaa yo like ng'ɔ kle kɛ be klo i'n, bɔ be klo be wiengu kɛ be bɔbɔ sa'n, i sɔ'n ti kpa tra tɛ nga be yrɛ i nnɛn kɔlikɔli'n, nin like nga be fa man Nyanmiɛn'n i kwlaa .»

³⁴ Kɛ Jésus wunnin kɛ ɔ tɛ su kpa'n, ɔ seli i kɛ: «Ɔ ka kan a ´yo mɛn nga Nyanmiɛn sie'n i nunfuɛ.» Ɔ man sran fi a trɛ-mɛn i anwlɛn a usɛ-mɛn i sa kun.

?Krist ti David i Anunman?

³⁵ Kɛ Jésus ´kle like Nyanmiɛn i sua nun'n, ɔ usali kɛ: «?Ɔ yo sɛ yɛ mmla klefuɛ'm be kwla se kɛ Krist ti David anunman nin-ɔn?

³⁶ Nyanmiɛn Wawɛ'n man David bɔbɔ seli kɛ: ‹E Min Nyanmiɛn'n seli min Min liɛ'n kɛ: Tran ase min fama su wa lele man n yi ɔ kpɔfuɛ'm be ase ɔ bo nan n fa be n yo ɔ ja siesiewlɛ .›

³⁷ David bɔbɔ flɛli i i Min. ?Sɛ ɔ ti sɔ'n, ɔ yo sɛ yɛ ɔ ti i anunman-an? Sran kpanngban sɔ'n bɔ be tie i ndɛ'n, ɔ yo be fɛ.»

Jésus seli be kɛ be sasa bé wun mmla klefuɛ'm be lika

³⁸ Kɛ ɔ ´kle be like'n, ɔ seli be kɛ: «An `sasa amun wun mmla klefuɛ'm bɔ be klo tralɛ tɛnndɛn wla wlan sinlɛ'n, bɔ be klo kɛ be yo be like nzra nun'n, be lika.

³⁹ Kɛ be ´di like nzra nun'n, be klo sran dandan'm be tranwlɛ'n nun tranlɛ, yɛ be klo Nyanmiɛn ndɛ suanlɛ nin i srɛlɛ sua'n nun bia kpakpa su tranlɛ.

⁴⁰ Be de angboti mmla'm be awlo'n, yɛ be kan ndɛ tɛnndɛn kle Nyanmiɛn lelele kɛ sran'm be `bu be sran kpa. Be fɔ tulɛ liɛ'n ɔ wa yo tɛ kpa.»

Angboti bla kun i Nyanmiɛn sika yilɛ

⁴¹ Kɛ Jésus ti Nyanmiɛn i sua'n nun sika guawlɛ'n i nyrun ndɛnman su lɛ'n, ɔ nian wafa nga sran'm be yi sika be gua nun'n. Anyanbeunfuɛ sunman be gua nun kpanngban.

⁴² Angboti bla yalɛfuɛ kun kusu fa jɛtɛ mma kanngan nnyɔn b'ɔ ju kɛ bablu kun sa'n ɔ fa guali nun.

⁴³ Yɛ Jésus flɛli i sɔnnzɔnfuɛ mun nan ɔ'a se be kɛ: «Nanwlɛ, angboti bla yalɛfuɛ nga i sika liɛ'n b'ɔ yili'n ɔ tra be nga'm be liɛ nga be yi guali sika guawlɛ nun'n,

⁴⁴ afin be kwlaa nga'm be liɛ nga be yi'n, ɔ bu-man be kplɛ, sanngɛ bla nga liɛ'n, ɔ yili i yalɛ liɛ kan'n, i kwlaa ng'ɔ lɛ i b'ɔ fa di like'n yɛ ɔ fa mannin-ɔn.»