Marc 10 - NYANMIƐN NDƐ'N 1998

Bé wun yralɛ ndɛ bɔ Jésus kannin'n

¹ Jésus tuli i bo lɛ ɔli Zide mɛn'n nun ɔ nin Zurdɛn'n i sin lɔ. Sran kpanngban kpa be yiɛli i wun lɛ ekun, ɔ kle be like afin ɔ yo i sɔ titi.

² Farizifuɛ wie'm be bɛli i wun lɛ. Be waan be kɛn i nian ti be usɛli i sɛ yasua lɛ atin kɛ ɔ yrɛ i yi o.

³ I kusu usali be kɛ: «?Moiz seli amun sɛ?»

⁴ Be waan: «Moiz mannin atin kɛ be `klɛ yralɛ fluwa man bla'n nan b'a yrɛ i .»

⁵ Yɛ Jésus seli kɛ: «Amun ketelɛ bɔ amu'an kete'n ti yɛ Moiz klɛ mmla sɔ'n mannin amun-ɔn.»

⁶ Sanngɛ mɛn'n i bo bolɛ nun «Nyanmiɛn yili yasua nin bla .

⁷ I sɔ'n ti yɛ ɔ fata kɛ yasua kpaci i si nin i nin, yɛ ɔ fɛ i wun mɛntɛn i yi

⁸ nan be nnyɔn'n be kaci sran wunmuan nin-ɔn.» Kɛ ɔ ko yo sɔ'n, be ti-man sran nnyɔn kun, sanngɛ be ti sran wunmuan .

⁹ Ɔ man like nga Nyanmiɛn kan bé bo nun'n, nán man sran fi ti be nun.

¹⁰ Kɛ be wluli awlo lɔ'n, i sɔnnzɔnfuɛ'm be usɛli i ndɛ sɔ'n nun ekun.

¹¹ Ɔ seli be kɛ: «Sran kwlaa ng'ɔ yrɛ i yi nan ɔ ja uflɛ'n, wuun ɔ'a kunndɛ bla i yi bo.

¹² Yɛ bla ng'ɔ yrɛ i wun nan ɔ ja uflɛ'n, wuun ɔ'a kunndɛ bian i wun bo .»

Jésus yra ba kanngan'm be nguan

¹³ Sran'm be fali ba kanngan mun blɛli i kɛ ɔ fɛ i sa fua be su, sanngɛ i sɔnnzɔnfuɛ'm be ijɔli be.

¹⁴ Kɛ Jésus wunnin i sɔ'n, ɔ'a yo-mɛn i fɛ, nan ɔ'a se be kɛ: «An `yaci ba kanngan'm be nun man be bla n sin, nán an fuan be, afin be bɔ be yo bé wun kɛ ba kanngan nga mun sa'n, be yɛ Nyanmiɛn sie be-ɔ.

¹⁵ Nanwlɛ, sran ng'ɔ yo-mɛn i wun kɛ bakan sa, b'ɔ fɛ-mɛn i wun man-man Nyanmiɛn kɛ ɔ sie i'n, ɔ su yo-man mɛn nga Nyanmiɛn sie'n i nunfuɛ mlɔnmlɔn.»

¹⁶ Ɔ to i sa blali be, ɔ fɛ i sa fuafuali be su, yɛ ɔ yrali be nguan.

Gbanflɛn anyanbeunfuɛ'n

¹⁷ Kɛ Jésus fali atin'n su b'ɔ ´kɔ'n, sran kun wanndi wa kotoli i bo, ɔ usali Jésus kɛ: «?Nja, ɔ bɔ a ti like klefuɛ kpa'n, nguɛ yɛ n `yo nan man nyan anannganman nguan nin-ɔn?»

¹⁸ Jésus seli i kɛ: «?Nguɛ ti yɛ a flɛ min kɛ n ti kpa nin-ɔn? Sran fi ti-man kpa san Nyanmiɛn kunngba cɛ.

¹⁹ A si mmla'n b'ɔ se kɛ: Nán kun sran, nán kunndɛ bla annzɛ bian ɔ́ yi annzɛ ɔ́ wun bo, nán wua, nán tɔn sran suɛn, nán di ndrunmun, bu ɔ́ si nin ɔ nin be sran .»

²⁰ Yɛ ɔ seli i kɛ: «Nja, kɛ ɔ fin m ba kaan nun'n, n fɛ i kwlaa su.»

²¹ Jésus niɛnnin, ɔ kloli i sa, nan ɔ'a se i kɛ: «Ɔ tɛ ka wɔ like kun yolɛ, kɔ, ko yo ɔ ninnge'm be atɛ, fɛ i sika'n man yalɛfuɛ mun, yɛ a ´nyan ninnge kpakpa nyanmiɛn su lɔ. Nan bla wa su n su.»

²² Ndɛ sɔ'n ti ɔ mlɛnnin i nyrun, ɔ yoli i ya, ɔ jao ɔli, yɛlɛ kɛ ɔ ti anyanbeunfuɛ dan.

²³ Kɛ Jésus niɛnnin i sɔnnzɔnfuɛ'm bɔ be sin yiɛ i lɛ'n, ɔ seli be kɛ: «Kɛ anyanbeunfuɛ kun fɛ i wun man Nyanmiɛn kɛ ɔ sie i'n, ɔ ti kekle!»

²⁴ I ndɛ sɔ'n boli i sɔnnzɔnfuɛ'm bé nuan dan kpa. Yɛ ɔ seli be ekun kɛ: «M mma mun, kɛ sran kun b'ɔ fɛ i wla guɛ i anyanbeun'n su'n ɔ `fɛ i wun man Nyanmiɛn kɛ ɔ sie i'n, ɔ ti kekle!

²⁵ Nyɔnngɔnmɛn i dɔlua buɛ nun sinlɛ'n ti pɔpɔ tra kɛ anyanbeunfuɛ kun fɛ i wun man Nyanmiɛn kɛ ɔ sie i'n.»

²⁶ Ɔ boli i sɔnnzɔnfuɛ'm bé nuan dan kpa ekun, nan b'a usa bé wun kɛ: «?Sɛ ɔ ti sɔ'n, wuun waan yɛ ɔ ´kwla fite nun-ɔn?»

²⁷ Jésus niannin be nan ɔ'a se be kɛ: «Sa sɔ'n, sran kwlɛ-mɛn i yo, sanngɛ Nyanmiɛn kwla yo, afin Nyanmiɛn kwla sa'n kwlaa yo.»

²⁸ Yɛ Piɛr seli i kɛ: «Nian, e liɛ'n, y'a yaci e ninnge'n kwlaa y'a su ɔ su.»

²⁹ Jésus seli kɛ: «Nanwlɛ, sran kwlaa nga min nin jasin fɛ'n ti ɔ yaci i awlo, nin i niaan mun, ɔ nin i nin, nin i si, nin i mma mun ɔ nin i asiɛ'n,

³⁰ ɔ ´nyɛn i wunsu sɔ kpɛ ya, sua o, niaan o, niɛn o, ba o, asiɛ o, ɔ nin yalɛ klelɛ kɛ e o yɛ'n, yɛ ɔ ´nyan Anannganman nguan blɛ ng'ɔ ba lɔ'n.

³¹ Be nga be dun mmua'n, be nun sunman be wa ka siɛn, yɛ be nga be ka siɛn'n, be nun sunman wa dun mmua.»

Jésus i kunlɛ'n nin i cɛnlɛ'n i su bolɛ i kpɛ nsan su

³² Kɛ be fali atin'n su bɔ be ´kɔ Zerizalɛm'n, Jésus yɛ ɔ dun be mmua-a. I sɔnnzɔnfuɛ'm be akunndan ti sannganwa, yɛ srɛ kunnin be nga be su be su'n. Yɛ Jésus fɛli i sɔnnzɔnfuɛ blu-nin-nnyɔn mun be ɔli be ngunmin ekun-ɔn, ɔ kan sa ng'ɔ wa tɔ i su'n kleli be.

³³ Ɔ seli kɛ: «An `nian, e su kɔ Zerizalɛm, be wa fa m bɔ n kacili Sran'n man Nyanmiɛn nyrun jranfuɛ dandan mun nin mmla klefuɛ mun. Be ´se kɛ m'an di fɔ nan be `kun min, be ´fa min man be nga be ti-man Zuif'n,

³⁴ be ´yo n finfin, be ´gua min wun ngɔsrɛ, be ´bo min nin ngble, yɛ be ´kun min, kɛ n di le nsan'n, n ´cɛn.»

Like bɔ Zak nin Zan be srɛli'n

³⁵ Zebede wa yasua nnyɔn'n, Zak nin Zan, be wunngeli Jésus wun lɛ, yɛ be seli i kɛ: «Baba, like nga e wa srɛ wɔ yɛ'n, yo man ye.»

³⁶ Ɔ usali be kɛ: «?Nguɛ yɛ amun waan n yo man amun-ɔn?»

³⁷ Be seli i kɛ: «Kɛ a ´di ɔ famiɛn'n, yo man e nun kun tran ɔ fama su, yɛ man kun tran ɔ bɛ su.»

³⁸ Jésus seli be kɛ: «An si-man like nga an srɛ'n. ?Klowa nga m wa nɔn nun'n, an kwla nɔn nun wie? ?Yɛ batɛm nga be wa yo min'n, an kwla yo wie?

³⁹ Be seli kɛ: «Ɛɛn, e kwlɛ i yo.» Yɛ ɔ seli be kɛ: «Ɔ ti nanwlɛ kɛ klowa nga m wa nɔn nun'n, amun ´nɔn nun wie, yɛ batɛm nga be wa yo min'n, be ´yo amun wie,

⁴⁰ sanngɛ n fama su nin m bɛ su tranlɛ liɛ'n, nán min yɛ m man-an, ɔ ti be nga Nyanmiɛn siesie mannin be'n be liɛ.»

⁴¹ Kɛ be blu nga'm be tili ndɛ sɔ'n, ya kunnin be Zak nin Zan bé wun.

⁴² Jésus flɛli be kwlaa, nan ɔ'a se be kɛ: «An si kɛ be nga be sie be kɛ be sie nvle wie mun'n, be mianmian be sran mun, yɛ sran dandan'm be tin be sran'm be su.

⁴³ Amun liɛ'n su yo-man sɔ, sanngɛ amun nun sran ng'ɔ klo kɛ ɔ ´yo dan'n, man ɔ su i wiengu mun,

⁴⁴ yɛ amun nun sran ng'ɔ klo kɛ ɔ ´yo amún su kpɛn'n, man ɔ yo i wiengu'm be kwlaa be kanga.

⁴⁵ Afin m bɔ n kacili Sran'n m'an ba-man kɛ be su min, sanngɛ sran'm be sulɛ ti yɛ m bali-ɔ nan n ´fa min wun n kpɔ sran sunman bé ti.»

Jésus tikeli Bartime b'ɔ ti anyansifuɛ'n i nyin

⁴⁶ Kɛ be juli Zeriko lɔ bɔ Jésus nin i sɔnnzɔnfuɛ mun ɔ nin sran kpanngban be fin lɛ be ´kɔ'n, Time wa yasua Bartime b'ɔ ti anyansifuɛ'n b'ɔ srɛsrɛ like'n, ɔ ti atin nuan lɛ.

⁴⁷ Kɛ ɔ tili kɛ Jésus b'ɔ fin Nazarɛt'n yɛ ɔ su sin'n, ɔ kpan seli kɛ: «Jésus, David Anunman, si min aunnvuɛ yo n ye!»

⁴⁸ Be nun sunman kpa be ijɔli i kɛ ɔ muɛn i nuan, sanngɛ ɔ kpannin kekle kpa trali laa liɛ'n kɛ: «David Anunman, si min aunnvuɛ!»

⁴⁹ Jésus jrannin nan ɔ'a se kɛ: «An `flɛ i man ɔ bla.» Be flɛli anyansifuɛ'n, be seli i kɛ: «Gua ɔ́ wla ase, jao, ɔ su flɛ wɔ.»

⁵⁰ Ɔ toli i tralɛ dan'n guɛli i lɔ, ɔ jaoli waka, ɔ bali Jésus wun lɛ.

⁵¹ Jésus usɛli i kɛ: «?Nguɛ yɛ ɔ waan n yo man wɔ-ɔ?» Anyansifuɛ'n seli i kɛ: «Baba, yo man n wun ase.»

⁵² Jésus seli i kɛ: «Kɔ, Nyanmiɛn su bɔ a lafi'n ti, w'a yo juejue. Kpɛkuun ɔ'a wun ase nan ɔ'a su Jésus su .»