Marc 1 - NYANMIƐN NDƐ'N 1998

Zan batɛm yofuɛ'n i Nyanmiɛn ndɛ kanlɛ

¹ Jésus-Krist Nyanmiɛn Wa'n i jasin fɛ'n i bo bolɛ'n yɛ.

² Be klɛli i Nyanmiɛn nuan ijɔfuɛ Ezai i fluwa'n nun kɛ: «Nian, n ´sunman min ndolo bofuɛ'n, ɔ ´dun mmua ɔ nyrun, ɔ ´ko yo wɔ atin'n kpa .

³ I yɛ ɔ kpan aawlɛ flɛnnɛn nun lɔ nin-ɔn, ɔ se kɛ: ‹An `siesie e Min'n i akpɔ'n, An `yo i atin'm be seiin, an `treke su .› »

⁴ I sɔ'n su yɛ Zan batɛm yofuɛ'n ɔli aawlɛ flɛnnɛn nun lɔ b'ɔ kan kleli sran'm be kɛ be kaci be nzuɛn nin-ɔn. Yɛ ɔ kan kleli be ekun kɛ be yo be batɛm nzue'n nun nan Nyanmiɛn yaci sa nga be yoli i'n cɛ be nin-ɔn.

⁵ Zide mɛn wunmuan'n nin Zerizalɛmfuɛ'm be kwlaa be ɔli Zan wun lɔ. Kɛ be kannin sa tɛ nga be yoli'n, ɔ yoli be batɛm Zurdɛn nzue ba'n nun.

⁶ Nyɔnngɔnmɛn ndrɛ tralɛ o Zan wun, yɛ kplo kun ci i afiɛn. Lalo nin awɛma nzue yɛ ɔ di-ɔ .

⁷ Kɛ ɔ ´kan ndɛ'n, ɔ seli kɛ: «Sran kun wo lɛ, ɔ lɛ nyrun tra min ɔ o siɛn ɔ su ba, kɛ n `kan ase n nyannji i ngbabua nyanman'n, min nin i sɔ yolɛ fata-man.

⁸ N liɛ'n, n yoli amun batɛm nzue'n nun, sanngɛ i liɛ'n, ɔ wa fa Nyanmiɛn Wawɛ'n yo amun batɛm.»

Jésus i batɛm yolɛ bɔ Zan yoli'n

⁹ I blɛ sɔ'n nun'n, Jésus fin Nazarɛt bɔ o Galile mɛn'n nun bali nan Zan ɔ'a yo i batɛm Zurdɛn'n nun.

¹⁰ Kɛ Jésus ´fin nzue'n nun ´fite'n, i osu kunngba'n nun ɔ wunnin kɛ Nyanmiɛn su lɔ'n su ti muaan, yɛ Nyanmiɛn Wawɛ'n jrɛli i su kɛ auble sa.

¹¹ Ɔ tili sran kun nɛn Nyanmiɛn su lɔ, sran sɔ'n seli kɛ: «A ti min anwlɛn su Ba, ɔ su yɛ m'an fa ń wla'n kwlaa a gua-a .»

Jésus i lakalɛ bɔ Satan lɛkɛli i'n

¹² Kpɛkuun Nyanmiɛn Wawɛ'n fa Jésus ɔli aawlɛ flɛnnɛn nun lɔ.

¹³ Ɔ dili le ablanan aawlɛ flɛnnɛn nun lɔ, Satan ko lɛkɛlɛkɛli i. Ɔ nin blo nnɛn mun yɛ be o lɔ-ɔ, yɛ anz'm be su i.

Nyanmiɛn i jasin fɛ'n bɔ Jésus kɛnnin i Galile lɔ'n

¹⁴ Kɛ be wlali Zan bisua'n, i sin Jésus ɔli Galile mɛn'n nun. Ɔ kan Nyanmiɛn i jasin fɛ'n,

¹⁵ ɔ se kɛ: «Blɛ'n i nuan ɔ'a yia, yɛ Nyanmiɛn i sielɛ blɛ'n ɔ'a mantan. An `kaci amun nzuɛn'n yɛ an `lafi Nyanmiɛn i jasin fɛ'n su.»

Jue trafuɛ nnan bɔ Jésus flɛli be'n

¹⁶ Kɛ ɔ ´sin Galile fɛtɛ'n nuan'n, ɔ wunnin Simɔn nin i niaan Andre kɛ be su gua be lala'n fɛtɛ'n nun, afin be ti jue trafuɛ.

¹⁷ Jésus seli be kɛ: «Amun `su n su nan n fa amun kaci sran'm be trafuɛ kɛ jue trafuɛ sa.»

¹⁸ Kpɛkuun be yacili be lala'm be lɛ yɛ be suli i su-ɔ.

¹⁹ Kɛ ɔ ɔli i nyrun lɔuun kan'n, ɔ wunnin Zak nin i nian Zan, Zebede i mma mun-ɔn. Be kusu be o be alie'n nun be su tanndan be lala'm be nun.

²⁰ Ɔ flɛli be, kpɛkuun be yacili bé si Zebede nin junman difuɛ mun alie'n nun nan b'a su i su.

Bian bɔ asiɛ usu sacili i'n

²¹ Be ɔli klɔ'n bɔ be flɛ i Kapɛrnaɔm'n su. Wunmiɛn-delɛ-cɛn nun'n, Jésus wluli Nyanmiɛn ndɛ suanlɛ nin i srɛlɛ sua'n nun, ɔ kleli like. I like b'ɔ kle be'n boli bé nuan yɛlɛ kɛ i ndɛ b'ɔ kan'n, ɔ kle be kɛ ɔ lɛ sin jranfuɛ.

²² I like'n i klelɛ'n ɔ ti-man kɛ mmla klefuɛ'm be liɛ'n sa.

²³ Kɛ ɔ ´yo sɔ'n, wuun bian kun bɔ asiɛ usu b'ɔ saci sran'n ɔ'a saci i'n wo Nyanmiɛn ndɛ suanlɛ nin i srɛlɛ sua'n nun lɛ,

²⁴ ɔ kpan se kɛ: «?Jésus bɔ a fin Nazarɛt, nguɛ sa yɛ ɔ o e nin wɔ ye afiɛn-ɔn? A bali e nunnunlɛ. N si wɔ kpa, a ti Nyanmiɛn i Sran.»

²⁵ Jésus ijɔli i, ɔ seli i kɛ: «Muan ɔ nuan lɛ, jao bian nga su.»

²⁶ Asiɛ usu'n tɛli bian sɔ'n i ase, ɔ usuli i, ɔ kpannin kekle, yɛ ɔ jaoli i su.

²⁷ Sran'm be kwlaa bé nuan boli bé wun, i sɔ'n ti be usali be wun kɛ: «?Nguɛ sa yɛlɛ nga? ?Like uflɛ yɛ ɔ su kle-ɔ? Ɔ kwla asiɛ usu bɔ be saci sran'n, be sro i!»

²⁸ Kpɛkuun i dunman'n fuli Galile mɛn'n kwlaa nun.

Jésus yoli Piɛr sia bla'n i juejue

²⁹ Kɛ be fin Nyanmiɛn ndɛ suanlɛ nin i srɛlɛ sua nun fiteli'n, be nin Zak nin Zan be ɔli Simɔn nin Andre be awlo lɔ.

³⁰ Kɛ be ´ju lɛ'n, wuun ayrɛ a gua Simɔn sia bla'n i wun nan ɔ'a la. Be kɛn i ndɛ kleli Jésus.

³¹ Ɔ wunngeli i wun lɛ, ɔ utili i sa'n nun, yɛ ɔ mɛnnin i su. Ayrɛ'n tuli i wun yɛ ɔ kunndɛ like mannin be-ɔ.

Jésus yoli tukpacɛfuɛ kpanngban be juejue

³² Nnɔsua kɛ wia'n tɔli'n, be fali tukpacɛfuɛ mun nin sran bɔ asiɛ usu a saci be'n be kwlaa blɛli i.

³³ Klɔ'n sufuɛ'm be kwlaa be yiali anuan'n nun lɛ.

³⁴ Ɔ yoli tukpacɛfuɛ kpanngban bɔ be tukpacɛ'n ti fanunfanun'n be juejue. Ɔ man asiɛ usu kpanngban kusu be jaoli sran'm be su, sanngɛ ɔ man-man be atin kɛ be ijɔ, afin be si i.

Jésus kannin Nyanmiɛn ndɛ sinnin Galile mɛn'n wunmuan nun

³⁵ Nglɛmun ndɛ kpa'n kɛ lika'n tɛ dun'n, ɔ jao fitɛli, ɔ ɔli aawlɛ flɛnnɛn nun lɔ lika kun b'ɔ ti diin'n nun, ɔ nin Nyanmiɛn be ko koko yalɛ.

³⁶ Simɔn nin be nga be nin i o lɛ'n, be kunndɛli i.

³⁷ Kɛ be wunnin i'n, be seli i kɛ: «Sran'm be kwlaa be su kunndɛ wɔ.»

³⁸ Ɔ seli be kɛ: «An man e wɔ klɔ nga be mantan-mantan wa'n be su nan n kan ndɛ lɔ wie, afin i sɔ'n ti yɛ m bali-ɔ.»

³⁹ Yɛ ɔ ɔli Galile mɛn'n i lika'n kwlaa, ɔ kan ndɛ Nyanmiɛn ndɛ suanlɛ nin i srɛlɛ sua'm be nun, ɔ man asiɛ usu'm be jao sran'm be su.

Jésus yoli kokowefuɛ kun juejue

⁴⁰ Kokowefuɛ kun bɛli i wun lɛ, ɔ kotoli i bo, ɔ srɛli i aunnvuɛ su, ɔ seli i kɛ: «Yaci, yo man n kokowe'n wie weiin.»

⁴¹ Ɔ yoli Jésus annvɔ, ɔ tinngɛli i sa'n kɛnnin i, ɔ seli i kɛ: «M'an ti, man ɔ kokowe'n wie weiin.»

⁴² Be ja osu kunngba'n nun lɛ'n, kokowe'n ka lɛ wieli sran sɔ'n i wun yɛ i wunnɛn'n yoli treketreke-ɔ.

⁴³ I osu kunngba'n nun Jésus seli i kɛ ɔ wɔ, yɛ ɔ wlɛli i su nun kpa kɛ

⁴⁴ ɔ niɛn i wun kpa nan nán man ɔ kan ndɛ sɔ'n kle sran fi sanngɛ ɔ `fɛ i wun ko kle Nyanmiɛn nyrun jranfuɛ'n, yɛ ɔ `fɛ i wun aso bolɛ like bɔ Moiz kleli'n fa man, man be `wun kɛ ɔ'a yo juejue .

⁴⁵ Sanngɛ kɛ bian sɔ'n fiteli cɛ'n, yɛ ɔ tɔli ndɛ sɔ'n i jɔ bolɛ su lika'n kwlaa nun-ɔn, lele Jésus ɔ'a kwla yi-mɛn i wun nglo klɔ fi su kun. Ɔ kali klɔ'n nuan lɛ, yɛ sran'm be fin lika'n kwlaa be bɛli i wun lɛ.