JÉSUS-CHRIST I DYASIN FE'N BO LUC KLELI'N 6 - NYANMIƐN NDƐ'N 1998

Ble mma fianfianlɛ wunmiɛn-delɛ-cɛn'n nun

¹ Le kun wunmiɛn-delɛ-cɛn nun'n kɛ Jésus nin i sɔnnzɔnfuɛ mun be ´sin ble fie wie nun'n, i sɔnnzɔnfuɛ'm be fianfiannin wie be nunkunnin i bé sa nun be dili .

² Farizifuɛ wie'm be usali be kɛ: «?Nguɛ ti yɛ an yo like nga be yo-mɛn i wunmiɛn-delɛ-cɛn nun nin-ɔn ?»

³ Jésus kusu usali be kɛ: «?Kɛ awe kunnin David nin i minniɛn mun'n, sa nga be yoli'n, an nian kɛnngɛn-mɛn i le ?

⁴ Kɛ be wluli tannin sua nga Nyanmiɛn yi i wun nglo nun'n nun, kpaun bɔ be fa tɛkɛ i Nyanmiɛn nyrun bɔ sran fi di-man san Nyanmiɛn nyrun jranfuɛ'm be ngunmin cɛ yɛ be di'n, ɔ fali nan ɔ nin i minniɛn mun b'a di .»

⁵ Yɛ ɔ seli be kɛ: «M bɔ n kacili Sran'n, min yɛ n sie wunmiɛn-delɛ-cɛn nin-ɔn.»

Bian sa wuwa'n

⁶ Kɛ wunmiɛn-delɛ-cɛn'n juli ekun bɔ Jésus wluli Nyanmiɛn ndɛ suanlɛ nin i srɛlɛ sua'n nun b'ɔ ´kle be like'n, ɔ wunnin bian kun bɔ i sa fama'n ti wuwa.

⁷ Mmla klefuɛ mun nin Farizifuɛ'm be nian Jésus sɛ ɔ ´yo bian sɔ'n i juejue wunmiɛn-delɛ-cɛn'n nun o, yɛlɛ kɛ be kunndɛ i wun sa wie bɔ be ´kwla jran su be fa sɛnmɛn i.

⁸ Jésus wunnin be akunndan'n, yɛ ɔ seli bian sa wuwa'n kɛ: «Jao jran be afiɛn lɛ.» Yɛ ɔ jao jrannin-ɔn.

⁹ Jésus seli be kɛ: «N ´usa amun sa kun. ?Wunmiɛn-delɛ-cɛn nun'n be kwla yo sran ye annzɛ be yo sran tɛ, yɛ be de sran annzɛ be kun sran?»

¹⁰ Ɔ nian-niannin be nyrun, yɛ ɔ seli bian sɔ'n kɛ: «Tinngɛ ɔ́ sa'n nun.» Ɔ tinngɛli nun nan i sa'n ɔ'a yo kpa.

¹¹ Ya kunnin be dan kpa Jésus wun, nan b'a ko bu sa nga be ´yo i'n i akunndan.

Sran blu-nin-nnyɔn bɔ Jésus fali be'n

¹² Kɛ ɔ yoli sɔ'n, le kun Jésus ɔli oka kun su kɛ ɔ ko srɛ Nyanmiɛn, ɔ srɛli Nyanmiɛn lele aliɛ'n cɛnnin i.

¹³ Kɛ aliɛ'n cɛnnin'n, ɔ flɛli i sɔnnzɔnfuɛ mun nan ɔ'a fa be nun blu-nin-nnyɔn, ɔ tɔnnin be dunman kɛ i sunmanfuɛ mun. Sran sɔ'm be dunman mun yɛ:

¹⁴ Simɔn b'ɔ tɔnnin i Piɛr'n, yɛ i niaan bian Andre, nin Zak, nin Zan, nin Filip, nin Bartelemi,

¹⁵ nin Matie, nin Tomas, nin Zak b'ɔ ti Alfe wa'n, nin Simɔn bɔ be flɛ i akpuefuɛ'n,

¹⁶ nin Zak b'ɔ ti Zid wa'n, yɛ Zidas Iskariɔt b'ɔ fa Jésus mannin sran mun'n.

Jésus kan ndɛ kleli sran mun, yɛ ɔ yoli tukpacɛfuɛ'm be juejue

¹⁷ Jésus nin be fin oka'n su lɔ jrali, be wa jrannin lika kpɛkplɛkpɛ kun bɔ i sɔnnzɔnfuɛ kaka kpa be o lɛ'n nun, yɛ sran kpanngban bɔ be fin Zide mɛn wunmuan nun, nin Zerizalɛm, nin Tir, nin Sidɔn'n be o lɛ wie. Tir nin Sidɔn be o jenvie nuan lɔ.

¹⁸ Be bali kɛ be wa tie i ndɛ'n nan ɔ `yo be juejue. Be nga asiɛ usu b'ɔ saci sran'n kle be yalɛ'n, be nyan bé ti.

¹⁹ Sran'm be kwlaa be waan be ´kɛn i, afin be wun kɛ ɔ yo be kwlaa be juejue.

Muae nin nyrɛnnɛn

²⁰ Jésus niɛnnin i sɔnnzɔnfuɛ mun yɛ ɔ seli be kɛ: «Amun bɔ an ti yalɛfuɛ'n, amun liɛ su ti ye, afin Nyanmiɛn yɛ ɔ wa sie amun-ɔn!

²¹ Amun bɔ awe kun amun ndɛ'n, amun liɛ su ti ye, afin cɛn wie amun ku wa yi! Amun bɔ amun su sun ndɛ'n, amun liɛ su ti ye, afin cɛn wie amun wa sri!

²² Kɛ sran'm be ´kpɔ amun, bɔ be ´kan amun bo, bɔ be ´kpɛ amun nzowa, bɔ be ´saci amun dunman m bɔ n kacili Sran'n min ti'n, amun liɛ su ti ye !

²³ Kɛ be ´yo amun sɔ'n, man amun klun jɔ, yɛ an `si able, yɛlɛ kɛ amun mo'n ɔ wa yo dan nyanmiɛn su lɔ, afin kɛ be nannan'm be yoli Nyanmiɛn nuan ijɔfuɛ'm be sɔ-ɔ.

²⁴ Sanngɛ amun anyanbeunfuɛ mun, an yako, afin amu'an dun mmua nyan amun klun ninnge liɛ'n!

²⁵ Amun bɔ amun ku ɔ'a yi ndɛ'n, an yako, afin cɛn wie awe wa kun amun! Amun bɔ an su sri ndɛ'n, an yako, afin cɛn wie amun wa kaci sɛnvuɛ, yɛ amun ´sun!

²⁶ Kɛ sran'm be kwlaa be ´bo amun dunman kpa'n, an yako, afin kɛ be nannan'm be boli be bɔ be tɔn bé wun suɛn kɛ be ti Nyanmiɛn nuan ijɔfuɛ'n be dunman sɔ-ɔ!»

Be kpɔfuɛ'm be klolɛ

²⁷ «Sanngɛ n ´kan kle amun bɔ an tie min ndɛ'n kɛ be nga be nin amun kun'n, an `klo be, be nga be kpɔ amun'n, an `yo be kpa.

²⁸ Be nga be wua amun amuɛn'n, an `yra amún nuan man be, yɛ be nga be yo amun tɛtɛ'n, an `srɛ Nyanmiɛn kɛ ɔ yo be kpa.

²⁹ Sɛ sran wie kpaci ɔ nyrun'n i bue kun'n, kaci i bue kun ekun mɛn i. Sɛ sran wie de ɔ tralɛ dan'n, nán se kɛ a fa-man tralɛ kaan kusu'n mɛn-mɛn i.

³⁰ Sran kwlaa ng'ɔ srɛ wɔ like'n, fa mɛn i, sɛ sran wie fa like ɔ́ sa nun'n, nán kɔ i sin kɛ ɔ fa man wɔ.

³¹ Like nga an klo kɛ sran yo man amun'n, an `yo i wunsu man be.

³² ?Sɛ be nga be klo amun'n be ngunmin yɛ an klo be'n, nguɛ yɛ amun ´nyɛn i i sɔ yolɛ nun-ɔn? Sa tɛ yofuɛ'm be kusu be klo be klofuɛ mun.

³³ ?Sɛ be nga be yo amun kpa'n be ngunmin yɛ an yo be kpa'n, nguɛ yɛ amun ´nyɛn i i sɔ yolɛ nun-ɔn? Sa tɛ yofuɛ'm be kusu be yo i sɔ wie.

³⁴ ?Yɛ sɛ sran nga an lafi i su kɛ sɛ an bo i bosia-a ɔ ´yi man amun'n i ngunmin yɛ an bo i bosia'n, nguɛ yɛ amun ´nyɛn i i sɔ yolɛ nun-ɔn? Sa tɛ yofuɛ'm be kusu be bo be wiengu sa tɛ yofuɛ'm be bosia nan be `yo wie man be.

³⁵ Sanngɛ an `klo amun kpɔfuɛ mun, an `yo be ye, yɛ an `bo sran bosia, nán an fa amún nyin sie su kɛ be yi man amun. Sɛ an yo sɔ'n, be ´yo amun mo dan, yɛ amun ´kaci Nyanmiɛn bɔ like fi nun-mɛn i sin'n i mma mun, afin ɔ yo be nga be si-man ye'n ɔ nin klunwifuɛ'm be ye.

³⁶ An `si aunnvuɛ, kɛ amun Si kusu si aunnvuɛ'n sa.»

Sran'n i fɔ bulɛ

³⁷ «Nán an kan sran wun ndɛ, yɛ Nyanmiɛn su kan-man amún wun ndɛ, nán an bu sran fɔ, yɛ Nyanmiɛn su bu-man amun fɔ, an `yaci sa nga be yo amun'n cɛ , yɛ Nyanmiɛn kusu ɔ ´yaci amun liɛ'n cɛ amun-ɔn.

³⁸ An `cɛ sran like, yɛ Nyanmiɛn kusu ɔ `cɛ amun wie-ɔ, ɔ ´man amun kpanngban kɛ like bɔ be su be tintin su, yɛ be kejekeje i, b'ɔ yi bu gua'n sa, afin suliɛ nga an su nun man sran wie mun'n, i kunngba'n nun yɛ Nyanmiɛn ´su nun man amun-ɔn.»

³⁹ Ɔ bu be nyanndra kun kusu kɛ: «Anyansifuɛ kun kwla trɛ-mɛn i wiengu anyansifuɛ kpɔnman, sɛ ɔ yo sɔ'n, be nnyɔn'n be ´tɔ kunman nun.

⁴⁰ Sran b'ɔ suan like'n ti-man dan tra-man sran b'ɔ kle i like'n, sanngɛ sran kwlaa b'ɔ wie i like'n suan'n, ɔ yo kɛ sran b'ɔ kle i like'n sa.

⁴¹ ?Ɔ yo sɛ yɛ a wun wla'n b'ɔ o ɔ niaan'n i nyin su sanngɛ a wun-man janvlɛ'n b'ɔ o ɔ bɔbɔ ɔ nyinma su nin-ɔn?

⁴² ?Wɔ bɔ a wun-man janvlɛ'n b'ɔ o ɔ bɔbɔ ɔ nyinma su'n, ɔ yo sɛ yɛ a se ɔ niaan'n kɛ: ‹Min niaan, jran man n yi ɔ́ nyin su wla nin-ɔn?› Dunman klofuɛ, yi janvlɛ'n b'ɔ o ɔ bɔbɔ nyin su'n ka nan w'a wun ase a yi ɔ niaan'n i nyin su wla'n.»

Ɔ lɛ waka kun nin i mma

⁴³ «Waka kpa'n ɔ su-man mma tɛtɛ, yɛ waka b'ɔ ti-man kpa'n, ɔ su-man mma kpakpa.

⁴⁴ Afin kɛ waka kun ti'n, yɛ i mma'n ti-ɔ. Be ti-man figie mma owie-owie nun yɛ be ti-man vinyi mma flɔn su.

⁴⁵ Sran kpa'n ɔ yi like kpakpa b'ɔ o i anwlɛn b'ɔ ti kɛ bɛtrɔ sa'n nun, sran tɛ'n kusu yi like tɛtɛ i bɛtrɔ'n nun, afin ndɛ kwlaa ng'ɔ o sran i anwlɛn nun'n, yɛ ɔ fite i nuan-an.»

Sua kplanfuɛ nnyɔn

⁴⁶ «?Nguɛ ti yɛ an flɛ min Nannan, Nannan sanngɛ an yo-man like nga n kle amun nin-ɔn?

⁴⁷ Sran kwlaa ng'ɔ ba ń sin'n, b'ɔ tie min ndɛ'n nan ɔ fa su'n, m ma kle amun sran ng'ɔ fɛ i'n.

⁴⁸ Ɔ ti kɛ sran kun b'ɔ su kplan sua sa. Ɔ kpɛ kunman kploun, kunman sɔ'n ɔ kpɛn yɛbuɛ su, sran sɔ'n ɔ wla sua'n i bo ase yɛbuɛ sɔ'n su. Nzue dan kun yi ba kpuu, ɔ dili sua sɔ'n, sanngɛ ɔ'a yo-mɛn i like fi yɛlɛ kɛ be kplɛnnin i kpa.

⁴⁹ Sanngɛ sran ng'ɔ tie min ndɛ'n b'ɔ fa-man su'n, ɔ ti kɛ sran b'ɔ kplannin sua asiɛ ngbɛn'n su bɔ ɔ'a wlɛ-mɛn i bo ase'n sa. Nzue dan'n ɔ wa dili sua sɔ'n, kpɛkuun ɔ buli mlɔnmlɔn.»