JÉSUS-CHRIST I DYASIN FE'N BO LUC KLELI'N 3 - NYANMIƐN NDƐ'N 1998

Zan batɛm yofuɛ'n i Nyanmiɛn ndɛ kanlɛ

¹ Kɛ be sieli Tibɛr Sezar famiɛn'n, i afuɛ blu-nin-nnun su bɔ Pɔns Pilat ti Zide nvle'n i su kpɛn'n, bɔ Erɔd sie Galile nvle'n, bɔ i niaan bian Filip sie Itire nin Trakɔnit nvle'n, bɔ Lisanias sie Abilɛni nvle'n,

² bɔ Ani nin Kaif be kusu be ti Nyanmiɛn nyrun jranfuɛ dan'n, be blɛ su yɛ Nyanmiɛn kan ndɛ kleli Zakari wa Zan aawlɛ flɛnnɛn nun lɔ-ɔ.

³ Nan ɔ'a ɔ nzue'n bɔ be flɛ i Zurdɛn'n i nuan lɔ klɔ'n kwlaa su. Ɔ ko kan kleli lɔfuɛ mun kɛ be kaci be nzuɛn'n man be yo be batɛm, nan Nyanmiɛn yaci bé wun sa'n cɛ be.

⁴ Kɛ ɔ yoli sɔ'n, ɔ man ndɛ nga Nyanmiɛn nuan ijɔfuɛ Ezai klɛli i i fluwa'n nun'n, ɔ kpɛnnin su. Ɔ seli kɛ: «I yɛ ɔ kpan aawlɛ flɛnnɛn nun lɔ nin-ɔn, ɔ se kɛ: An `siesie e Min'n i akpɔ'n, An `yo i atin'm be seiin, an `treke su.

⁵ Be ´tannintannin kongo'n kwlaa. Be ´tutu oka nin kpɔlɛ'm be ngba. Yɛ be ´tinngɛ-tinngɛ atin bɔ be ti klɛklɛ'n. Atin nga b'a saci'n, be ´yo be kpa.

⁶ Yɛ sran'm be kwlaa be ´wun delɛ nga Nyanmiɛn ´fa de be'n .»

⁷ I sɔ'n ti, ɔ seli sran kpanngban bɔ be bɛli i wun lɛ kɛ ɔ ´yo be batɛm'n be kɛ: «?Ɔnda mma mun, wan yɛ ɔ seli amun kɛ Nyanmiɛn i ya'n ɔ wa jao nan an wanndi i nyrun-ɔn?

⁸ An `yo sa kpa b'ɔ kle kɛ amu'an kaci amun nzuɛn'n, kɛ waka kpa su mma kpa'n sa. Nán an bu amun anwlɛn'n nun se kɛ: ‹E nannan yɛlɛ Abraam!› Afin n ´kan kle amun kɛ Nyanmiɛn kwla fa yɛbuɛ nga mun kaci Abraam mma mun.

⁹ Kpɛliɛ'n ɔ'a kan waka olui'n, ɔ man waka kwlaa nga i mma'n ti-man kpa'n, be ´kpɛ guɛ i sin'n nun.»

¹⁰ I sɔ'n ti sran'm be usɛli i kɛ: «?Wuun nguɛ yɛ e yo-ɔ?»

¹¹ Ɔ seli be kɛ: «Man sran ng'ɔ lɛ tralɛ nnyɔn'n, ɔ man sran ng'ɔ lɛ-man wie'n i kun, yɛ sran ng'ɔ lɛ like diwa'n, man ɔ ´man sran ng'ɔ lɛ-man wie'n i wie.»

¹² Gua bo sika defuɛ'm be bɛli i wun lɛ kɛ ɔ yo be batɛm, be usɛli i kɛ: «?Nja, nguɛ yɛ e kusu e `yo-ɔ?»

¹³ Ɔ seli be kɛ: «Nán an de like fi tra nga be kleli amun'n su.»

¹⁴ Sonja'm be kusu be usɛli i kɛ: «?Yɛ e liɛ'n, nguɛ yɛ e `yo-ɔ?» Ɔ seli be kɛ: «Nán an de sran fi like wue kekle su, yɛ nán an tɔn sran suɛn, sanngɛ man amun klun jɔ amun kalɛ nga be fa tua amun'n su.»

¹⁵ Kɛ sran'm be kwlaa bé nyin ta Krist sin'n, bé wun blibli be, be bu i akunndan se kɛ: ?Nán Zan yɛ ɔ ti Krist nin-ɔn? Yɛ Zan seli be kwlaa be kɛ:

¹⁶ «N liɛ'n, n yo amun batɛm nzue'n nun, sanngɛ sran ng'ɔ lɛ nyrun tra min'n ɔ su ba, min nin i ngbabua nyanman'n i nyannjilɛ fata-man.

¹⁷ I liɛ'n, ɔ wa fa Nyanmiɛn Wawɛ'n nin sin yo amun batɛm. I nene'n wo i sa nun, ɔ wa kpɛjɛ i awie b'ɔ o i bowlɛ nun'n lele ɔ ´wie, ɔ ´isa awie'n guɛ i tanngannin'n nun, yɛ ɔ ´wɔ i wla'n nun sin b'ɔ nuan-man'n nun.»

¹⁸ Zan bo jasin fɛ'n kleli sran mun, yɛ ɔ mannin be afɔtuɛ ndɛ kpanngban kpa ekun.

¹⁹ Sanngɛ Zan ijɔli Erɔd b'ɔ sie nvle'n i bue'n, yɛlɛ kɛ ɔ deli i niaan bian yi Erɔdias, yɛ ɔ yoli sa tɛtɛ kpanngban kpa ekun.

²⁰ I sa tɛ kun ekun b'ɔ yoli'n, yɛlɛ Zan bisua wlalɛ.

Jésus i batɛm yolɛ

²¹ Kɛ be ´yo sran'm be kwlaa be batɛm'n, be yoli Jésus kusu wie. Kɛ ɔ nin Nyanmiɛn be ´ijɔ'n, nyanmiɛn su lɔ'n tili muaan,

²² yɛ Nyanmiɛn Wawɛ'n jrɛli i su kɛ auble sa. Yɛ be tili sran kun nɛn nyanmiɛn su lɔ, sran sɔ'n ɔ seli kɛ: «A ti min anwlɛn su Ba, ɔ́ su yɛ m'an fa ń wla'n kwlaa a gua-a .»

Osu nga Jésus fin nun'n

²³ Kɛ Jésus ´bo i junman'n bo'n, wuun ɔ'a di afuɛ kɔe ablasan. Be bu i kɛ ɔ ti Zozɛf wa, Zozɛf ti Eli wa,

²⁴ Eli ti Matat wa, Matat ti Levi wa, Levi ti Mɛlsi wa, Mɛlsi ti Zannai wa, Zannai ti Zozɛf wa,

²⁵ Zozɛf ti Matatias wa, Matatias ti Amɔs wa, Amɔs ti Naɔm wa, Naɔm ti Ɛsli wa, Ɛsli ti Nagai wa,

²⁶ Nagai ti Maat wa, Maat ti Matatias wa, Matatias ti Semɛi wa, Semɛi ti Zozɛk wa, Zozɛk ti Zɔda wa,

²⁷ Zɔda ti Zɔanan wa, Zɔanan ti Reza wa, Reza ti Zorobabɛl wa, Zorobabɛl ti Salatiɛl wa, Salatiɛl ti Neri wa,

²⁸ Neri ti Mɛlsi wa, Mɛlsi ti Adi wa, Adi ti Kozam wa, Kozam ti Elmadam wa, Elmadam ti Ɛr wa,

²⁹ Ɛr ti Jésus wa, Jésus ti Eliezɛr wa, Eliezɛr ti Zɔrim wa, Zɔrim ti Matat wa, Matat ti Levi wa,

³⁰ Levi ti Simeɔn wa, Simeɔn ti Zida wa, Zida ti Zozɛf wa, Zozɛf ti Zɔnam wa, Zɔnam ti Eliakim wa,

³¹ Eliakim ti Melea wa, Melea ti Mena wa, Mena ti Matata wa, Matata ti Natan wa, Natan ti David wa,

³² David ti Izai wa, Izai ti Zɔbɛd wa, Zɔbɛd ti Bɔaz wa, Bɔaz ti Sala wa, Sala ti Naasɔn wa,

³³ Naasɔn ti Aminadab wa, Aminadab ti Admɛn wa, Admɛn ti Arni wa, Arni ti Ɛsrɔm wa, Ɛsrɔm ti Farɛs wa, Farɛs ti Zida wa,

³⁴ Zida ti Zakɔb wa, Zakɔb ti Izaak wa, Izaak ti Abraam wa, Abraam ti Tara wa, Tara ti Nakɔr wa,

³⁵ Nakɔr ti Sɛrik wa, Sɛrik ti Rago wa, Rago ti Falɛk wa, Falɛk ti Ebɛr wa, Ebɛr ti Sala wa,

³⁶ Sala ti Kainam wa, Kainam ti Arfaksad wa, Arfaksad ti Sɛm wa, Sɛm ti Noe wa, Noe ti Lamɛk wa,

³⁷ Lamɛk ti Matisala wa, Matisala ti Enɔk wa, Enɔk ti Zarɛd wa, Zarɛd ti Maleleɛl wa, Maleleɛl ti Kainam wa,

³⁸ Kainam ti Enɔs wa, Enɔs ti Sɛt wa, Sɛt ti Adam wa, Adam kusu ti Nyanmiɛn wa.