JÉSUS-CHRIST I DYASIN FE'N BO LUC KLELI'N 24 - NYANMIƐN NDƐ'N 1998

Jésus i cɛnlɛ

¹ Mɔnnɛn'n b'ɔ ti le mɔcuɛ'n i cɛn ba klikli'n, bla'm be fali ayre fannin'n bɔ be yoli'n be ɔli ndia'n su lɔ nglɛmun ndɛ kpa'n.

² Kɛ be juli lɔ'n, be wunnin kɛ b'a kondo ndia'n i anuan'n nun yɛbuɛ'n.

³ Be wluli lɔ, sanngɛ b'a wun-man e Min Jésus i fuɛn'n.

⁴ Kɛ be wun-man sa sɔ'n i wun akunndan buwlɛ'n, be ´nian-an, sran nnyɔn bɔ bé wun tralɛ'n ti nyɛnnyɛn kpa'n be yɛ be jin bé wun lɛ yɛ.

⁵ Srɛ b'ɔ kun bla mun'n ti, be toli bé nyin blo, yɛ sran sɔ'm be usali be kɛ: «?Nguɛ ti yɛ an kunndɛ sran nga i nyin o su'n fuɛn'm be afiɛn-ɔn?

⁶ (Ɔ nun-man wa, ɔ'a cɛn.) An `bu ndɛ nga kɛ ɔ tɛ o Galile lɔ'n ɔ kan kleli amun'n i akunndan.

⁷ Ɔ seli kɛ: ‹Kannzɛ ɔ yo sɛ, san be ´fa min bɔ n kacili Sran'n man sa tɛ yofuɛ mun, be ´bobo min waka'n su, yɛ i le nsan su n ´cɛn .› »

⁸ Yɛ bé wla kpɛnnin Jésus ndɛ'm be su-ɔ.

⁹ Be fin ndia'n su lɔ be sali bé sin, be wa kannin sa sɔ'n kwlaa kleli Jésus sɔnnzɔnfuɛ blu-nin-kun mun nin be nga mun.

¹⁰ Be nga be wa kannin sa sɔ'n kleli be nga Jésus sunmannin be'n, be yɛlɛ Mari b'ɔ fin Magdala'n, nin Zani, Zak i nin Mari, yɛ bla wie bɔ be nin be o lɛ'n.

¹¹ Sanngɛ ndɛ sɔ'n yoli sinnzin ndɛ be nyrun, ɔ man b'a lafi-man be su.

¹² (Sanngɛ Piɛr jao wanndi ɔli ndia'n su lɔ, kɛ ɔ kpɛli i nyin ase niannin ndia nun lɔ'n, ɔ'a wun-man like fi san tanmue'n b'ɔ gua lɛ'n cɛ. Kɛ ɔ ´sɛ i sin kɔ i lika lɔ'n, sa ng'ɔ wunnin i'n ti i nuan'n boli i wun.)

Emais kɔlɛ

¹³ Le kunngba sɔ'n nun'n, sran nnyɔn be su kɔ klɔ kun bɔ be flɛ i Emais su. Klɔ sɔ'n, ɔ nin Zerizalɛm be afiɛn ju kilo blu-nin-kun.

¹⁴ Kɛ be ´kɔ'n, be su koko sa ng'ɔ yoli'n i kwlaa su yalɛ.

¹⁵ Kɛ bé nuan tɛ o yalɛ sɔ'n su bɔ be ´koko kɔ'n, Jésus bɔbɔ wa toli be su nan ɔ nin be a san nun.

¹⁶ Sanngɛ b'a wun-mɛn i sran wlɛ.

¹⁷ Ɔ usali be kɛ: «?Nguɛ yalɛ yɛ an koko kɔ-ɔ?» Yɛ be jrannin-ɔn, be nyrun'n tuun.

¹⁸ Be nun kun bɔ be flɛ i kɛ Kleɔpas'n usɛli i kɛ: «?A wo ɔ liɛ nin bɔ sa ng'ɔ yoli Zerizalɛm wa'n w'a wun-man nun-ɔn?»

¹⁹ Yɛ ɔ usali be kɛ: «?Nguɛ sa-a?» Yɛ be seli i kɛ: «Sa nga be yoli Jésus b'ɔ fin Nazarɛt'n, i ndɛ yɛ e kan-an. Ɔ ti Nyanmiɛn nuan ijɔfuɛ b'ɔ yo sa kekleekle b'ɔ si ijɔ kpa Nyanmiɛn nin sran'm be nyrun.

²⁰ I kunlɛ bɔ e Nyanmiɛn nyrun jranfuɛ dandan mun nin é su ngbɛn mun be kunndɛ kɛ be kun i'n ti'n be fɛ i mannin sran mun, i sin be boboli i waka'n su.

²¹ E lafi i su kɛ i yɛ ɔ wa de Izraɛlfuɛ mun-ɔn, sanngɛ kɛ be yoli i sa sɔ'n, i le nsan yɛ.

²² Kusu bla wie'm bɔ be wo e nun'n, be yoli sa kun b'ɔ bo é nuan kpa: be jao ɔli ndia'n su lɔ nglɛmun ndɛ kpa'n, sanngɛ b'a wun-mɛn i fuɛn'n.

²³ Be wa seli ye kɛ anz wie'm be yili bé wun nglo kleli be, yɛ be seli be kɛ ɔ'a cɛn.

²⁴ E nun wie'm be ɔli ndia'n su lɔ, be wunnin like nga bla'm be kɛnnin i ndɛ'n weiin, sanngɛ b'a wun-man Jésus bɔbɔ.»

²⁵ Yɛ Jésus seli be kɛ: «An wun-man sa wlɛ, yɛ ndɛ nga Nyanmiɛn nuan ijɔfuɛ'm be kannin'n, an ka-man lɛ fɛ-mɛn i ngba su!

²⁶ ?B'a se-man kɛ Krist ´wun nyrɛnnɛn nan ɔ'a trɛn i bia'n su?»

²⁷ Yɛ ɔ yiyi i bɔbɔ wun ndɛ bɔ be klɛli i Nyanmiɛn Ndɛ'n kwlaa nun'n i nun kleli be-ɔ. Ɔ boli i bo Moiz nin Nyanmiɛn nuan ijɔfuɛ'm be kwlaa be ndɛ'n nun.

²⁸ Kɛ be juli klɔ nga be kɔ su'n i tiwa lɛ'n, Jésus waan ɔ ´kɔ i nyrun ekun.

²⁹ Yɛ be srɛli i kɛ ɔ sie like, afin aliɛ'n ɔ'a san wia'n su wa tɔ. Yɛ ɔ ko sieli like-ɔ.

³⁰ Kɛ be trannin aliɛ'n sin'n, ɔ fali kpaun, ɔ lali Nyanmiɛn ase, yɛ ɔ bubuli nun fa mannin be.

³¹ Yɛ be wunnin i wlɛ kɛ Jésus-ɔ, kpɛkuun ɔ'a mlin be nyrun.

³² Yɛ be seli be wiengu kɛ: «?Kɛ ɔ ´kan ndɛ kle ye b'ɔ ´yiyi Nyanmiɛn Ndɛ nga be klɛli'n nun kle ye atin'n nun lɔ'n, ɔ yo e fɛ dan, nɛ́n i-ɔ?»

³³ Bé ja osu kunngba'n nun lɛ'n, be jao sali bé sin Zerizalɛm, be toli Jésus sɔnnzɔnfuɛ blu-nin-kun mun ɔ nin be wiengu nga be yiali lɛ'm be lɛ.

³⁴ Bé nuan o su be su kan kɛ: «E Min'n cɛnnin sakpa, Simɔn wunnin i.»

³⁵ Yɛ be nnyɔn'n be kusu be kannin sa nga be wunnin i atin nun lɔ'n kleli be. Kɛ ɔ ´bubu kpaun nun bɔ be wunnin i wlɛ'n, be kan kleli be ekun.

Jésus wun b'ɔ yi kleli i sɔnnzɔnfuɛ mun'n

³⁶ Bé nuan nian tɔ-man, kpɛkuun i bɔbɔ a kpɛn be afiɛn lɛ, ɔ seli be kɛ: «An `gua amún wla ase.»

³⁷ Be kpitili, yɛ srɛ kunnin be dan kpa, afin be buli i kɛ wunmiɛn-ɔn.

³⁸ Yɛ ɔ usali be kɛ: «?Nguɛ ti yɛ amun akunndan sanngan sɔ bɔ an bu akunndan kɛ nga sa-a?

³⁹ An `nian min sa'n nin min ja'n, min-ɔn, an `fa amún sa fuafua mín wun nian, wunmiɛn'm be lɛ-man wunnɛn nin owie kɛ nga n lɛ i yɛ'n sa.»

⁴⁰ Kɛ ɔ seli be sɔ'n, ɔ fɛli i sa'n nin i ja'n kleli be.

⁴¹ Sanngɛ ɔ nin i sɔ'n ngba'n, bé wun b'ɔ bliblili be'n nin bé nuan b'ɔ boli bé wun'n ti'n, ɔ yoli be laliɛ nun, yɛ ɔ usali be kɛ: «?An lɛ like diwa wie wa?»

⁴² Yɛ be fali jue kɛɛnwa sin kun mɛnnin i-ɔ.

⁴³ Ɔ sɔli nun nan ɔ'a di i be nyrun lɛ.

⁴⁴ I sin ɔ seli be kɛ: «Ndɛ nga yɛ kɛ min nin amun tɛ o lɛ'n n kan kleli amun nin-ɔn, n kɛnnin i kɛ mín wun ndɛ nga be klɛli i Moiz mmla nun'n, nin Nyanmiɛn nuan ijɔfuɛ'm be ndɛ'n nun'n, ɔ nin Nyanmiɛn Jue fluwa be nun'n, san i kwlaa'n ´kpɛn su.»

⁴⁵ Yɛ ɔ man be wunnin Nyanmiɛn Ndɛ nga be klɛli'n i wlɛ-ɔ.

⁴⁶ Nan ɔ'a se be kɛ: «Ndɛ sɔ'n be klɛli i kɛ: Krist ´wun nyrɛnnɛn yɛ i le nsan su ɔ ´cɛn .

⁴⁷ Yɛ i dunman nun be ´kan kle nvle-nvle be nunfuɛ'm be kwlaa kɛ be kaci be nzuɛn'n nan Nyanmiɛn yaci sa nga be yoli i'n cɛ be. Be ´bo i kanlɛ'n bo Zerizalɛm wa.

⁴⁸ Amun yɛ an ti sa sɔ'm be kanfuɛ-ɔ.

⁴⁹ An `nian, like nga n Si seli kɛ ɔ ´blɛ amun'n, m bɔbɔ n yo man like sɔ'n ɔ ´ba. Ɔ man amun kusu an `tran klɔ'n su wa lele man Nyanmiɛn tin amun ka .»

Jésus i nyanmiɛn su kɔlɛ

⁵⁰ Ɔ fa be ɔli lele Betani nuan lɔ, ɔ mɛnnin i sa'n su ɔ yrali i nuan kɛ Nyanmiɛn jran bé sin.

⁵¹ Kɛ ɔ ´yrɛ i nuan sɔ'n, wuun ɔ nin be su ti nun, yɛ Nyanmiɛn mɛn i su ɔli nyanmiɛn su lɔ-ɔ.

⁵² I sɔnnzɔnfuɛ'm be kusu, kɛ be kotoli be mɛnmɛnnin i'n, bɔ be ´sa bé sin Zerizalɛm'n, be klun ti jɔwa dan kpa.

⁵³ Be tran Nyanmiɛn i sua'n nun, be lɛ i ase tititi.