JÉSUS-CHRIST I DYASIN FE'N BO LUC KLELI'N 23 - NYANMIƐN NDƐ'N 1998

Jésus i Pilat ja su fa kɔlɛ

¹ Be kwlaa be jao fa Jésus ɔli Pilat ja su.

² Kɛ be juli lɔ'n yɛ be tɔli sa nga ti yɛ be sɛnmɛnnin i'n i kanlɛ su-ɔ, be seli kɛ: «E wun kɛ bian nga saci e nvle'n, i waan, nán man be su lapo man Sezar, yɛ i li waan ɔ ti Krist, i waan ɔ ti famiɛn.»

³ Yɛ Pilat usɛli i kɛ: «?A ti Zuif'm be famiɛn?» Yɛ i waan: «Ɛɛn, yɛ ɔ́ nuan o su lɛ-ɔ.»

⁴ Pilat seli Nyanmiɛn nyrun jranfuɛ dandan mun nin sran nga be yiali lɛ'n be kɛ: «N wun-man sa tɛ fi bian nga wun.»

⁵ Sanngɛ be jrannin su kekle kpa, be seli kɛ: «Kɛ ɔ ´kle sran'm be like'n, ɔ wlawla be. Ɔ boli i bo Galile lɔ, ɔ sinnin Zide mɛn wunmuan'n nun lele ɔ'a fa ju wa.»

Jésus i Erɔd ja su fa kɔlɛ

⁶ Kɛ Pilat tili i sɔ'n, ɔ usali sɛ ɔ ti Galilefuɛ o.

⁷ Kɛ be seli i kɛ ɔ fin Erɔd asa su'n, ɔ fɛ i ko mannin Erɔd. Kɛ ɔ ´yo sɔ'n, wuun Erɔd kusu o Zerizalɛm lɛ cɛn sɔ'n nun.

⁸ Kɛ Erɔd wunnin Jésus'n, i klun jɔli dan kpa, yɛlɛ kɛ ɔ'a cɛ kpa ɔ klo kɛ ɔ ´si i i dunman'n bɔ be bo b'ɔ ti'n ti, yɛ kusu ɔ bu i kɛ ɔ wa yi atrɛ wie nan ɔ ´wun i.

⁹ Ɔ usali Jésus sa kpanngban kpa, sanngɛ ɔ'a tɛ-man wie fi su .

¹⁰ Nyanmiɛn nyrun jranfuɛ dandan mun nin mmla klefuɛ bɔ be o lɛ'n, be jao kɛnnin i wun ndɛ tɛtɛ kpa.

¹¹ Erɔd nin i sonja mun be yoli i finfin, be srili i, be wlɛli i wun tralɛ klanman kpa nan b'a fɛ i a ko man Pilat .

¹² Le kunngba sɔ'n, Erɔd nin Pilat bɔ laa be di-man'n, be yoli janvuɛ.

Be seli kɛ be `kun Jésus

¹³ Pilat yiali Nyanmiɛn nyrun jranfuɛ dandan mun nin kpɛnngbɛn mun ɔ nin sran mun, ɔ seli be kɛ:

¹⁴ «Kɛ an ´fa bian nga blɛ min'n, an seli n kɛ ɔ saci sran mun. Sanngɛ amun `nian, m'an usɛ i sa amun nyrun wa, m'an wun-man kɛ sa nga ti yɛ an sɛnmɛnnin i'n i wie fi ti i nzuɛn.

¹⁵ Yɛ Erɔd kusu ɔ'a wun-man sa fi i wun, ɔ man ɔ fɛ i blɛli ye ekun. Nanwlɛ, bian sɔ'n ɔ'a yo-man sa fi b'ɔ nin kunlɛ fata-a.

¹⁶ I sɔ'n ti, m ´yo man be bo i nan n ´yaci i nun.» [

¹⁷ Bé cɛn dilɛ kwlaa nun san ɔ ´yaci bisuafuɛ kun nun man be.]

¹⁸ Yɛ be kwlaa be kpan seli kɛ: «Kun bian nga nan yi Barabas man ye.»

¹⁹ Barabas sɔ'n wlawla sran mun klɔ'n su, ɔ kunnin sran, i sɔ'n ti yɛ be wlɛli i bisua-a.

²⁰ Pilat kan ndɛ kleli be ekun, i waan ɔ ´yaci Jésus nun,

²¹ sanngɛ be kpan se kɛ: «Bobo i! Bobo i!»

²² I kpɛ nsan su'n, Pilat usali be kɛ: «?Nguɛ sa bɔ cɛ yɛ ɔ yoli-ɔ? M'an wun-man sa ng'ɔ yoli b'ɔ nin kunlɛ fata-a. I sɔ'n ti'n, n yo man be ´bo i nan n ´yaci i nun.»

²³ Sanngɛ be jrannin su kpa, be kpan seli kɛ ɔ `bobo i. Be kpannin lele ɔ kali be liɛ'n su.

²⁴ Ɔ man Pilat yoli nga be waan ɔ yo man be'n.

²⁵ Bian ng'ɔ wlawla sran mun'n, b'ɔ kunnin sran'n, bɔ i ti yɛ be wlɛli i bisua'n, ɔ yacili i nun mannin be nan ɔ'a fa Jésus a man be kɛ be yo i kɛ be klo kɛ be ´yo i'n.

Jésus i waka'n su bobolɛ

²⁶ Kɛ be ´fɛ i kɔ'n, be trali Sirɛnifuɛ wie bɔ be flɛ i kɛ Simɔn'n, b'ɔ fin blo ɔ su ba'n, nan b'a fa Jésus i waka'n b'a suɛ i kɛ ɔ sua su i su.

²⁷ Sran kpanngban kpa be nin bla wie'm bɔ be fin be wue'n nun'n, be sun be su i su.

²⁸ Jésus kpɛli i nyin bla sɔ'm bé wun lɔ, yɛ ɔ seli be kɛ: «Zerizalɛm bla mun, nán an sun min, an `sun amun bɔbɔ nin amun mma mun

²⁹ yɛlɛ kɛ cɛn wie be ´se kɛ: ‹Klunkpanfuɛ nin bla ng'ɔ nian bo-man akpue le'n, bɔ ɔ'a man-man ba nyɔnflɛn le'n, i liɛ su ti ye!›

³⁰ Yɛ be ´se kɛ: ‹Oka mun ee, amun tɔ e su o! Kpɔlɛ mun ee, amun kata e su o !›

³¹ ?Sɛ be yo waka mɔnnɛn kɛ nga sa'n, i kee'n kusu ɔ ´yo i liɛ sɛ?»

³² Sa tɛ yofuɛ nnyɔn bɔ be waan be ´kun be'n, kɛ be ´fa Jésus kɔ'n, be fa be kusu ɔli wie .

³³ Kɛ be juli lika nga be flɛ i Ti Kongloman'n nun lɛ'n, be boboli i nin sa tɛ yofuɛ nnyɔn'm be lɛ, kun wo i fama su kun wo i bɛ su.

³⁴ Yɛ Jésus seli kɛ: «N Si, yaci bé wun sa'n cɛ be, afin sa nga be ´yo i lɛ'n, be wun-mɛn i wlɛ.» Be tuli i tralɛ'm bé wun fɔtɔ be fali .

³⁵ Sran'm be jin lɛ yɛ be niɛn i-ɔ. Ngbɛn-ngbɛn'm be kusu be srili i, be seli kɛ: «Ɔ deli sran wie mun, sɛ i yɛ ɔ ti Krist bɔ Nyanmiɛn fɛ i sieli'n, man ɔ de i bɔbɔ wun!»

³⁶ Sonja'm be kusu be wunngeli i wun lɛ be yoli i finfin, be fali vinɛgri wie fa tinngɛli i nyrun , yɛ be seli kɛ:

³⁷ «Sɛ a ti Zuif'm be famiɛn'n, de ɔ wun.»

³⁸ Yɛ be klɛli i ti su lɛ kɛ: Zuif'm be famiɛn'n yɛ.

³⁹ Sa tɛ yofuɛ'm bɔ be sende lɛ'n, kun dili i tɛ, ɔ seli kɛ: «?Nán wɔ yɛ ɔ waan a ti Krist nin-ɔn? De ɔ wun nan de ye wie!»

⁴⁰ Sanngɛ kun'n ijɔli i, ɔ seli kɛ: «?A sro-man Nyanmiɛn? Sa kunngba nga be waan be ´yo i'n, be ´yo e wie.

⁴¹ E liɛ'n ti i nuan su, afin sa nga e yoli'n, i nuan sa yɛ y'a nyɛn i-ɔ, sanngɛ bian nga liɛ'n ɔ'a yo-man sa fi.»

⁴² Yɛ ɔ seli kɛ: «Jésus, blɛ nga a wa di ɔ famiɛn'n, bu min akunndan.»

⁴³ Yɛ Jésus kusu seli i kɛ: «Nian, man n kan ndɛ kun n kle wɔ, ndɛkɛn min nin wɔ e ´ju Nyanmiɛn i lika klanman'n nun lɔ.»

Jésus i wulɛ

⁴⁴ Kɛ ɔ ´yo sɔ'n, wuun wia'n su wa jran. Kpɛkuun aosin'n wlali lika'n kwlaa lele fa juli nnɔsua wia nun.

⁴⁵ Wia'n kacili tuun, yɛ tannin dan'n bɔ be fa kpɛ Nyanmiɛn i sua nun'n, ɔ kpacili i afiɛn sɛsɛsɛ .

⁴⁶ Jésus kpannin kekle kpa ɔ seli kɛ: «N Si, wa fa min o !» Kɛ i nuan tɔli cɛ'n yɛ ɔ kali nun-ɔn.

⁴⁷ Kɛ sonja ya su kpɛn'n wunnin sa sɔ'n, ɔ manmannin Nyanmiɛn yɛ ɔ seli kɛ: «Bian nga ti nanwlɛfuɛ sakpa.»

⁴⁸ Be nga be bali sa sɔ'n bo'n, kɛ be wunnin sa ng'ɔ yoli bɔ be ´sa bé sin kɔ'n, be fin be wue'n nun.

⁴⁹ Be kwlaa nga be si Jésus'n, be nin bla nga be fin Galile be bali i sunmanlɛ'n, be jran mmua lɔ be nian sa nga be su yo'n.

Jésus i sielɛ

^50-51 Bian kun o lɛ, be flɛ i kɛ Zozɛf. Ɔ ti sran kpa, ɔ ti nanwlɛfuɛ, ɔ minndɛ cɛn nga Nyanmiɛn ´fɛ i mɛn'n. Ɔ fin Zuif'm be klɔ kun bɔ be flɛ i Arimate'n su. Ɔ ti jɔlɛ difuɛ'm be nun kun, sanngɛ ndɛ nga be nga'm be kannin'n ɔ nin sa nga be yoli'n, ɔ'a jɔ-mɛn i klun.

⁵² Ɔ ɔli Pilat wun lɔ, ɔ ko srɛli Jésus fuɛn'n.

⁵³ Kɛ ɔ yili i'n, ɔ fa tannin kpa kun cicili i nan ɔ'a sie i ndia bɔ be kpɛli i yɛbuɛ nun bɔ be nian sie-man sran nun le'n i nun.

⁵⁴ Cɛn sɔ'n ti Zuif'm be wun buabualɛ cɛn, wuun wunmiɛn-delɛ-cɛn'n ɔ su wa wlu awlo.

⁵⁵ Yɛ bla nga be nin Jésus fin Galile bali'n, be su Zozɛf su be ko niannin ndia'n, ɔ nin wafa nga be fa sieli i'n.

⁵⁶ Kɛ be sali bé sin'n, be ko yoli ayre fannin nin nyanngo. Yɛ wunmiɛn-delɛ-cɛn nun'n, be trannin ase deli wunmiɛn, afin kɛ ɔ ti sɔ be mmla'n nun-ɔn .