JÉSUS-CHRIST I DYASIN FE'N BO LUC KLELI'N 22 - NYANMIƐN NDƐ'N 1998

Jésus i wun ndɛ cicilɛ

¹ Kɛ kpaun bɔ kpaun ayre nun-man nun'n i cɛn bɔ be flɛ i Delɛ-cɛn'n ɔ wa ju'n,

² Nyanmiɛn nyrun jranfuɛ dandan mun nin mmla klefuɛ mun be kunndɛli sa wafa nga be ´yo nan b'a nyan Jésus aamiɛn b'a kun i'n yɛlɛ kɛ srɛ kunnin be sran'm bé wun.

³ Zidas Iskariɔt b'ɔ ti Jésus i sɔnnzɔnfuɛ blu-nin-nnyɔn'm be nun kun'n, kɛ ɔ ´yo sɔ'n, wuun Satan ɔ'a fɛ i mlɔnmlɔn.

⁴ Ɔ ko wunnin Nyanmiɛn nyrun jranfuɛ dandan mun nin sonja ngbɛn-ngbɛn mun bé wun nan ɔ'a kle be like ng'ɔ ´yo nan ɔ'a fa Jésus a man be'n.

⁵ Be klun jɔli, yɛ be seli kɛ be ´mɛn i sika.

⁶ Ɔ kplinnin su, yɛ ɔ kunndɛli cɛn ng'ɔ ti kpa b'ɔ ´fɛ i man be b'ɔ su yo-man nzra nun nin-ɔn.

Jésus nin i sɔnnzɔnfuɛ mun be dili Delɛ-cɛn'n

⁷ Kɛ kpaun bɔ kpaun ayre nun-man nun'n i cɛn bɔ i nun yɛ be kun Delɛ-cɛn'n i bua'n ɔ juli'n ,

⁸ Jésus sunmannin Piɛr nin Zan, ɔ seli be kɛ: «An `ko tɔn Delɛ-cɛn aliɛ'n man e ko di.»

⁹ Be usɛli i kɛ: «?Nin yɛ a klo kɛ e ko tɔn i-ɔ?»

¹⁰ Yɛ ɔ seli be kɛ: «Kɛ amun ´kpɛn klɔ lɔ cɛ'n, amun nin yasua kun ´yia, nzue jin i ti su, an `su i su an `wlu awlo ng'ɔ wlu nun'n nun wie.

¹¹ An `se awlofuɛ'n kɛ: ‹Nja waan e bla nan a kle ye wɔ aofuɛ sua'n man ɔ nin i sɔnnzɔnfuɛ mun be wa di Delɛ-cɛn'n nun.›

¹² Yɛ ɔ ´kle amun nglo sua ba dan kun bɔ b'a siesie i nun ninnge'n kwlaa, lɛ yɛ amun `tɔn i-ɔ.»

¹³ Kɛ be ɔli'n, be wunnin ninnge nga Jésus kleli be'n nan b'a tɔn Delɛ-cɛn'n aliɛ'n.

Kɔminiɔn falɛ'n i ba kpɛlɛ

¹⁴ Kɛ like dilɛ'n juli'n, Jésus nin sran blu-nin-nnyɔn b'ɔ sunmannin be'n be wa trannin aliɛ'n sin.

¹⁵ Yɛ ɔ seli be kɛ: «Sa ng'ɔ yo n fɛ bɔ m buli i akunndan'n, yɛlɛ kɛ min nin amun ´di Delɛ-cɛn nga nan man wun nyrɛnnɛn.

¹⁶ Afin nanwlɛ, n su di-man wie kun lele san cɛn nga e ´di i kpafuɛ'n Nyanmiɛn mɛn'n nun lɔ'n.»

¹⁷ Ɔ fali klowa kun, ɔ lali Nyanmiɛn ase nan ɔ'a se kɛ: «An `de, amun kwlaa amun `nɔn like ng'ɔ o nun'n.

¹⁸ Afin nanwlɛ, kɛ ɔ fin ndɛ'n, n su nɔn-man vinyi mma nzue kun lele san cɛn nga Nyanmiɛn sielɛ blɛ'n ɔ'a ju'n.»

¹⁹ I sin ɔ fali kpaun, kɛ ɔ lali Nyanmiɛn ase'n, ɔ bubuli nun fa mannin be, ɔ seli kɛ: «Kpaun ng'ɔ o yɛ'n ti min wunnɛn i nzɔliɛ, [amun ti yɛ n su fa man-an. An `yo i kɛ nga n ´yo i yɛ'n sa, man amún wla kpɛn n su.»

²⁰ Kɛ be wieli like'n di'n, ɔ fali klowa'n mannin be nan ɔ'a se kɛ: «Like ng'ɔ o klowa nga nun'n, ɔ ti min mmoja, ti kle aenguɛ uflɛ nga Nyanmiɛn waan ɔ nin amun tra'n i nzɔliɛ, amun ti yɛ be su wa guɛ i ase-ɔ.]

²¹ Sanngɛ an `nian, sran ng'ɔ fa min man sran mun'n, é sa la talie kun .

²² M bɔ n kacili Sran'n n su kɔ kɛ be di sieli su'n sa, sanngɛ sran ng'ɔ fa min man sran mun'n, i yako!»

²³ Kpɛkuun be su usa-usa be wiengu nan be ´wun sran ng'ɔ wa yo i sɔ sa liɛ'n .

Sran ng'ɔ ti dan tra be kwlaa'n

²⁴ Akplowa kun kusu tɔli be afiɛn kɛ be ´wun be nun sran nga be bu i sran tra be kwlaa'n.

²⁵ Yɛ Jésus seli be kɛ: «Nvle'm be famiɛn'm be tin be sran'm be su, yɛ be flɛ be ngbɛn-ngbɛn mun Ye Yofuɛ.

²⁶ Amun liɛ'n su yo-man sɔ, sanngɛ amun nun'n sran ng'ɔ ti dan'n, man ɔ yo i wun kɛ amun nun bakan sa, yɛ sran ng'ɔ sie sran'n, man ɔ yo i wun kɛ junman difuɛ sa.

²⁷ ?Sran ng'ɔ ti aliɛ sin'n, ɔ nin sran ng'ɔ isa aliɛ'n, be nun onin yɛ ɔ ti dan-an? ?Nán sran ng'ɔ ti aliɛ'n sin yɛ ɔ ti dan-an? Sanngɛ n liɛ'n, n wo amun afiɛn kɛ junman difuɛ sa.

²⁸ Sa ng'ɔ tɔli n su'n, i kwlaa nun amu'an yaci-man n le.

²⁹ Ɔ man kɛ n Si sieli n famiɛn'n, n kusu n ´sie amun famiɛn

³⁰ nan tabli nga n ´di su min mɛn'n nun lɔ'n, an ´di su wie, yɛ n ´sie amun bia su man be ´fa Izraɛl nvle blu-nin-nnyɔn mun ba amún ja su.»

Jésus seli kɛ Piɛr wa se kɛ ɔ si-mɛn

³¹ Yɛ e Min'n seli Simɔn kɛ: «Simɔn, Simɔn, nian Satan srɛli amún wun atin, i waan ɔ ´sa amun nian .

³² Sanngɛ n kan ɔ ndɛ n kleli Nyanmiɛn kɛ n su bɔ a lafi'n, nán man a kpɔnzɔ. Ɔ kusu sɛ a kaci'n, wla ɔ niaan'm be fanngan.»

³³ Piɛr seli i kɛ: «Nannan, m'an wie min wun tanndan kɛ sɛ be ´wla wɔ bisua o, sɛ be ´kun wɔ o, min nin wɔ e ´kɔ-ɔ.»

³⁴ Yɛ Jésus seli kɛ: «Piɛr, nanwlɛ kpa'n, ndɛkɛn sɛ a nian se-man kɛ a si-man min sɔ kpɛn nsan'n, akɔ nyinman'n su bo-man.»

Pata, nin trɔ, nin tokofi

³⁵ Yɛ ɔ seli be ekun kɛ: «?Kɛ n sunmannin amun bɔ n seli amun kɛ kɛ amun ´kɔ'n nán an fa pata, nin trɔ, ɔ nin ngbabua'n, amún sa miannin like wie wun?» Yɛ be waan: «E sa ɔ'a mian-man like fi wun.»

³⁶ Yɛ ɔ seli be kɛ: «Sanngɛ siɛn'n, sran ng'ɔ lɛ pata'n man ɔ fa, yɛ nga kusu b'ɔ lɛ trɔ'n man ɔ fa, sran ng'ɔ lɛ-man tokofi'n, man ɔ yo i tralɛ'n i atɛ ɔ fa to wie.

³⁷ Afin nanwlɛ, mín wun ndɛ nga be klɛli i kɛ: ‹Be kɛ i wlali sa tɛ yofuɛ'm be nun'n,› san ɔ ´kpɛn su. Yɛ mín wun ndɛ'n i kwlaa su wa wie su kpɛn .»

³⁸ Yɛ be seli kɛ: «Nannan, nian, tokofi nnyɔn yɛ.» Yɛ ɔ seli be kɛ: «Ɔ ju.»

Jésus ko srɛli Nyanmiɛn Zɛtsemane lɔ

³⁹ Kɛ ɔ fiteli'n, ɔ ɔli Olivie Oka'n su lɔ kan ɔ kɔ lɔ titi'n, nan i sɔnnzɔnfuɛ'm b'a su i su.

⁴⁰ Kɛ be juli lika sɔ nun lɔ'n, ɔ seli be kɛ: «An `srɛ Nyanmiɛn kɛ nán man Lakafuɛ'n laka amun.»

⁴¹ Nan ɔ'a yaci be lɛ ɔ'a ɔ i nyrun lɔ kaan, yɛ ɔ kotoli nan ɔ'a se Nyanmiɛn kɛ:

⁴² «N Si, sɛ ɔ ti ɔ klun su'n, man nyrɛnnɛn wie nga to fuan min! Sanngɛ nán yo nga n klo kɛ ɔ yo su'n, sanngɛ yo nga a klo kɛ a ´yo i su'n.» [

⁴³ Yɛ anz kun fin Nyanmiɛn su lɔ ɔ wa wlɛli i fanngan-an.

⁴⁴ Kɛ i awlaboɛ'n ´yo dan'n, ɔ miɛn i nyin kan ndɛ kle Nyanmiɛn cinnjin kpa, nvufle kpa'n tu i pataa, nvufle sɔ'n ɔ kaci kɛ mmoja sa, ɔ gua srosrosrosro.]

⁴⁵ Kɛ ɔ fin kan ɔ ko srɛli Nyanmiɛn lɛ'n, b'ɔ wa toli i sɔnnzɔnfuɛ'm be lɛ'n, awlaboɛ'n ti b'a fɛ lafilɛ'n ɔ'a fa be. Yɛ ɔ usali be kɛ:

⁴⁶ «?Nguɛ ti yɛ an lafi-ɔ? An `jao srɛ Nyanmiɛn kɛ nán man Lakafuɛ'n laka amun»

Jésus i tralɛ

⁴⁷ I nuan nian tɔ-man, kpɛkuun be ´nian-an, sran mun yɛ be ´ba yɛ'n. Bian nga be flɛ i kɛ Zidas b'ɔ ti i sɔnnzɔnfuɛ blu-nin-nnyɔn'm be nun kun'n, ɔ dun mmua be nyrun. Ɔ wunngeli Jésus wun lɛ to i sa yili i kɔmin.

⁴⁸ Yɛ Jésus seli i kɛ: «?A ´to ɔ sa yi m bɔ n kacili Sran'n n kɔmin yɛ a ´fa min man sran mun-ɔn?»

⁴⁹ Kɛ be nga be nin Jésus o lɛ'n be wunnin sa nga be su wa yo'n, be usɛli i kɛ: «?Nannan, e fin be tokofi?»

⁵⁰ Yɛ be nun kun fɛli i tokofi'n finnin Nyanmiɛn nyrun jranfuɛ'm be su kpɛn i sran'n nan ɔ'a kpɛ i su fama'n.

⁵¹ Yɛ Jésus seli kɛ: «An `yaci be lɛ!» I sin ɔ kannin bian sɔ'n i su'n nan ɔ'a mɛntɛn i osu'n nun.

⁵² Yɛ Jésus seli Nyanmiɛn nyrun jranfuɛ dandan mun, nin Nyanmiɛn i sua nun sonja kpɛnngbɛn mun, nin mɛn kpɛnngbɛn'm bɔ be bɛli i tralɛ'n be kɛ: «An fa tokofi nin waka an ba kɛ an wa tra kodiawiefuɛ sa.

⁵³ Cɛn kwlaa min nin amun yɛ e o Nyanmiɛn i sua nun-ɔn, amu'an tra-man min, siɛn'n amun nin aosin'n amun blɛ liɛ'n yɛ ɔ'a ju-ɔ.»

Piɛr seli kɛ ɔ si-man Jésus

⁵⁴ Kɛ be trali Jésus'n, be fɛ i ɔli Nyanmiɛn nyrun jranfuɛ'm be su kpɛn'n i lika lɔ. Piɛr suli i su, sanngɛ ɔ'a mɛntɛn-mɛn i.

⁵⁵ Be trɔli sin awlo afiɛn lɛ, be ti i wun lɛ, Piɛr kusu wa trannin be wun lɛ wie.

⁵⁶ Afanniɛn kun wunnin Piɛr kɛ ɔ ti sin'n wun lɛ, ɔ niɛnnin siin, ɔ seli kɛ: «Bian nga su i su wie.»

⁵⁷ Sanngɛ ɔ fɛli i nuan kekle ɔ seli kɛ: «Mmo, n si-mɛn i mlɔnmlɔn.»

⁵⁸ Kɛ ɔ cɛli kan ekun'n, sran uflɛ wunnin i, yɛ ɔ seli i kɛ: «Wɔ, a o minniɛn sɔ'm be nun wie.» Yɛ Piɛr seli i kɛ: «Nja, n nun-man be nun wie o!»

⁵⁹ Kɛ ɔ cɛli lɔuun kan'n, sran uflɛ ekun jrannin su kpa ɔ seli kɛ: «Nanwlɛ, bian nga nin i yɛ be sin-ɔn, afin Galilefuɛ-ɔ.»

⁶⁰ Yɛ Piɛr seli i kɛ: «Ɔ liɛ'n, ndɛ kpa nga a kan'n, n wun-mɛn i wlɛ.» I nuan nian tɔ-man kpɛkuun akɔ nyinman'n ɔ'a bo.

⁶¹ Yɛ e Min'n kpɛli i nyin niannin Piɛr siin, yɛ Piɛr wla kpɛnnin e Min'n i ndɛ'n b'ɔ kan kleli i'n su-ɔ. Ɔ seli i kɛ: «Ndɛkɛn a ´se kɛ a si-man min sɔ kpɛ nsan, nan akɔ nyinman'n ɔ'a bo.»

⁶² Ɔ fiteli guasu lɔ, i ya bɔ yo i'n ti, nan ɔ'a sun dan kpa.

Be yoli Jésus finfin yɛ be boli i

⁶³ Be nga be nian Jésus su'n be yoli i finfin, be boli i,

⁶⁴ be boli i zaga be usɛli i kɛ: «?Wan yɛ ɔ boli wɔ-ɔ?»

⁶⁵ Yɛ be kpɛli i nzowa tɛtɛ kpa ekun.

Jésus i jɔlɛ difuɛ dandan'm bé ja su fa kɔlɛ

⁶⁶ Kɛ aliɛ cɛnnin'n, Zuif'm be kpɛnngbɛn mun nin Nyanmiɛn nyrun jranfuɛ dandan mun, ɔ nin mmla klefuɛ mun be yiali. Be fa Jésus ɔli be jɔlɛ difuɛ dandan'm bé ja su.

⁶⁷ Be seli i kɛ: «Sɛ wɔ yɛ a ti Krist'n, kan kle ye.» Yɛ Jésus seli be kɛ: «Sɛ n kan kle amun'n, an su fa-man su mlɔnmlɔn,

⁶⁸ yɛ sɛ n usa amun sa'n, an su tɛ-man n su.

⁶⁹ Sanngɛ kɛ ɔ fin ndɛ'n, «M bɔ n kacili Sran'n n wa tran Nyanmiɛn i fama su .»

⁷⁰ Yɛ be kwlaa be usɛli i kɛ: «?Wuun, a ti Nyanmiɛn Wa?» Yɛ ɔ seli be kɛ: «Nga n ti'n yɛ amún nuan o su lɛ-ɔ.»

⁷¹ Yɛ be seli kɛ: «Y'a ti i bɔbɔ nuan nun siɛn'n. ?Lalofuɛ sɛ yɛ e kunndɛ i ekun-ɔn?»