JÉSUS-CHRIST I DYASIN FE'N BO LUC KLELI'N 21 - NYANMIƐN NDƐ'N 1998

Angboti bla kun i Nyanmiɛn sika yilɛ

¹ Jésus mɛnnin i nyin su yɛ ɔ wunnin anyanbeunfuɛ'm bɔ be su yi be sika nga be fa man Nyanmiɛn'n ´guɛ i sika guawlɛ'n nun.

² Ɔ wunnin angboti bla yalɛfuɛ kun kusu b'ɔ fa jɛtɛ mma kanngan nnyɔn guali nun.

³ Yɛ ɔ seli kɛ: «Nanwlɛ, angboti bla yalɛfuɛ nga i sika liɛ'n b'ɔ yili'n, ɔ tra be kwlaa be liɛ'n,

⁴ afin be nga'm be liɛ nga be yi guali sika guawlɛ nun'n, ɔ bu-man be kplɛ, sanngɛ bla nga liɛ'n, ɔ yili i yalɛ liɛ kan'n. I kwlaa ng'ɔ lɛ i b'ɔ fa di like'n yɛ ɔ fa mannin-ɔn.»

Jésus kannin Nyanmiɛn i sua'n i sacilɛ ndɛ

⁵ Kɛ sran wie'm be ´kan yɛbuɛ nglanman nin ninnge bɔ sran'm be fa mannin Nyanmiɛn bɔ be fa yoli Nyanmiɛn i sua'n i klanman'n i ndɛ'n, Jésus seli kɛ:

⁶ «Cɛn kun wa ju bɔ like nga amun wun be yɛ'n, be kwlaa be ´saci. Yɛbuɛ fi su kɛ-mɛn i wiengu yɛbuɛ su b'ɔ su kan gua-man-an.»

Sa nzɔliɛ nin yalɛ klelɛ

⁷ Be usali Jésus kɛ: «?Nja, blɛ onin yɛ sa sɔ'm be ´yo-ɔ? ?Yɛ like onin yɛ ɔ kle kɛ sa sɔ'm be wa yo-ɔ?»

⁸ Yɛ ɔ seli be kɛ: «An `sasa amún wun, nán man be laka amun, afin sran kpanngban be wa fa n dunman'n be ´se kɛ be yɛ be ti Krist nin-ɔn, yɛ be ´se kɛ blɛ'n ɔ'a mantan. Nán an fa su.

⁹ Kɛ amun ´ti alɛ nin kpɛnngbɛn'm bé wun jaolɛ ndɛ'n, nán srɛ kun amun, afin kannzɛ ɔ yo sɛ, san sa sɔ'm be ´yo, sanngɛ mɛn'n su ka-man lɛ wie-man.»

¹⁰ Yɛ ɔ seli be ekun kɛ: «Nvle kun wa jao nvle kun wun, yɛ famiɛn kun wa jao i wiengu famiɛn kun wun .

¹¹ Asiɛ'n wa keje dan kpa, yɛ lika wie'm be nun'n, tukpacɛ bɔ sa ndɛndɛ'n ɔ wa sɔn, yɛ awe wa kpɛn. Be wa wun like sroesroe wie mun nin abonuan sa dandan Nyanmiɛn su lɔ.

¹² Sanngɛ be ´dun mmua tra amun kle amun yalɛ, be ´fa amun kɔ Nyanmiɛn ndɛ suanlɛ nin i srɛlɛ sua'm be nun, be ´wla amun bisua, be ´fa amun kɔ famiɛn mun nin kpɛnngbɛn'm bé ja su min ti.

¹³ Kɛ be ´yo amun sɔ'n, man amun ´kwla kan min ndɛ'n kle be.

¹⁴ I sɔ'n ti'n, an `fa sie amun klun kpa, nán an dun mmua bu ndɛ nga amun ´kan nan amu'an nyan amún ti'n i akunndan.

¹⁵ Afin m bɔbɔ yɛ n ´fa ndɛ nga amun ´kan'n wla amún nuan-an, yɛ m bɔbɔ yɛ n ´kle amun ngwlɛlɛ-ɔ, ɔ man amun kpɔfuɛ'm be su kwla kpalo-man amún nuan yɛ be su si-man amun akplowa.

¹⁶ Amún si nin amun nin, nin amun niaan mun nin amun tranfuɛ mun, ɔ nin amun janvuɛ mun bɔbɔ, be yɛ be ´fa amun man sran mun-ɔn, yɛ sran'm be ´kun amun nun wie mun.

¹⁷ Min ti sran'm be kwlaa be ´kpɔ amun.

¹⁸ Sanngɛ amún ti ndrɛ kun sa su mlin-man .

¹⁹ Sɛ an tra amun anwlɛn'n, amun ´nyan amún ti.»

Jésus kannin Zerizalɛm i sacilɛ ndɛ

²⁰ «Kɛ amun ´wun kɛ sonja'm b'a sin a yia Zerizalɛm'n, an `si kɛ i sacilɛ a ju.

²¹ Man be nga be o Zide mɛn nun'n, be wanndi wɔ oka'n su lɔ, yɛ be nga be o Zerizalɛm klɔ'n su lɛ'n, man be jao lɛ, nán man be nga be o blo'n be sa bé sin klɔ lɛ.

²² Kɛ ɔ ´yo nan ndɛ nga be klɛli'n i kwlaa ɔ'a kpɛn su'n, blɛ sɔ'n nun'n, Nyanmiɛn wa tu sran'm be fɔ dan kpa .

²³ Blɛ sɔ'n nun'n, wunnzɛfuɛ nin bla ta'm be ´wun be nyrun! Afin nyrɛnnɛn'n ɔ ´yo dan mɛn nga nun, yɛ Nyanmiɛn ´fa ya sran nga'm bé wun.

²⁴ Be ´fa tokofi kun be, be ´tra be lomuɛn kɔ nvle'm be kwlaa nun, yɛ be bɔ be ti-man Zuif'n, be ´saci Zerizalɛm lele san be blɛ liɛ'n i nuan ´ju .»

Jésus b'ɔ kacili Sran'n i balɛ

²⁵ «Be wa wun like wie wia'n nin anglo'n, ɔ nin nzraama'm bé su, awlaboɛ'n ´yo dan nvle'm be nun. Jenvie'n i bolɛ b'ɔ ´bo b'ɔ ´tɛ'n ti'n, ɔ man sran'm be su si-man sa nga be ´fa yo bé wun-ɔn .

²⁶ Sa sroesroe ng'ɔ wa ju asiɛ'n su'n ti, sran'm be wawɛ'n ´tɔ blo, Nyanmiɛn su lɔ ninnge ngbli-ngbli'm be nun wa keje.

²⁷ Yɛ be ´wun M Bɔ N Kacili Sran'n kɛ n wo nyanmiɛn ble'n su n su ba , m ´ba yasua su, min nyrun nyannyan kɛ sɛnzɛ'n sa, ɔ yo sro.

²⁸ Kɛ amun ´wun kɛ sa sɔ'm be su yo'n, an `jao jran, an `man amún ti'n su, kɛ ɔ ´yo sɔ'n, wuun an su wa nyan amún ti.»

Figie'n i su ndɛ

²⁹ Yɛ ɔ buli nyanndra kun kleli be. Ɔ seli kɛ: «An `nian figie'n nin waka kun nga mun.

³⁰ Kɛ amun ´wun kɛ be su fɛfɛ'n, amun bɔbɔ an si kɛ munngun'n su mantan.

³¹ I kunngba nin-ɔn, amun kusu kɛ amun ´wun kɛ sa sɔ'm be su yo'n, an `si kɛ Nyanmiɛn sielɛ blɛ'n ɔ'a mantan.

³² Nanwlɛ, sran nga be o lɛ'n, be su wie-man wu nan sa sɔ'm b'a yo.

³³ Nyanmiɛn b'ɔ la nglo lɔ plaii'n nin asiɛ'n be ´sin, sanngɛ min ndɛ'n i blɛ'n su sin-man le.»

Jésus seli be kɛ be tran minndɛ

³⁴ An `sasa amún wun, nán an yo aliɛ safuɛ mun nin nzanboɛfuɛ mun, nán an koko ninnge'm be ti, sɛ an yo sɔ'n, ɔ cɛ-man nan cɛn sɔ'n ɔ'a fu amun nun.

³⁵ Afin cɛn sɔ'n ɔ wa fu sran bɔ be o mɛn wunmuan'n nun'n be kwlaa be nun kɛ aya sa.

³⁶ I sɔ'n ti, an `tran minndɛ i cɛn kwlaa, an `srɛ Nyanmiɛn nan an kwla fite sa b'ɔ wa ba mɛn nun'n i kwlaa i nun nan amun `kwla jran m bɔ n kacili Sran'n min nyrun.

³⁷ Blɛ sɔ nun'n, Jésus kle like Nyanmiɛn i sua'n nun wia nun, yɛ kɔnguɛ ɔ kɔ Olivie Oka'n su lɔ.

³⁸ Kɛ aliɛ ko cɛn'n, nglɛmun sran'm be kwlaa be nin i yia Nyanmiɛn i sua'n nun be wa tie i ndɛ'n.