JÉSUS-CHRIST I DYASIN FE'N BO LUC KLELI'N 2 - NYANMIƐN NDƐ'N 1998

Jésus i awuliɛ

¹ Blɛ sɔ'n nun, famiɛn Sezar Ogist waan be `klɛ sran nga be o i mɛn nun'n be kwlaa be dunman.

² Kɛ be ´klɛ sran'm be dunman klikli sɔ'n, wuun Kiriniis yɛ ɔ sie Siri nin-ɔn.

³ Be kwlaa be ko klɛ be dunman be bɔbɔ be klɔ'm be su.

⁴ Zozɛf kusu fin Nazarɛt klɔ'n su, Galile mɛn nun, yɛ ɔ ɔli Zide mɛn'n nun David i klɔ bɔ be flɛ i Bɛtleɛm'n su, yɛlɛ kɛ ɔ ti David awlofuɛ, yɛ ɔ ti i osufuɛ.

⁵ Ɔ ɔli kɛ ɔ nin Mari b'ɔ trɛli i ase bɔ ɔ'a wunnzɛ'n be ´ko klɛ be dunman.

⁶ Kɛ be o lɔ'n, i ba wulɛ'n juli,

⁷ nan ɔ'a wu i talua ba'n yasua. Ɔ cicili i wun lɛli i nnɛn'm be like diwlɛ'n nun, yɛlɛ kɛ b'a nyan-man sikewlɛ aofuɛ sua'n nun lɔ.

Bua sunianfuɛ'm be nin anz mun

⁸ Mɛn kunngba sɔ'n nun'n, bua sunianfuɛ'm be la blo lɔ be nian be bua'm be su kɔnguɛ.

⁹ E Min Nyanmiɛn'n i anz kun fiteli be nyrun, yɛ e Min Nyanmiɛn yili i wun nglo nyannyannyan kleli be nan srɛ a kun be dan kpa.

¹⁰ Sanngɛ anz'n seli be kɛ: «Nán srɛ kun amun mlɔnmlɔn, m ma bo jasin fɛ kun kle amun b'ɔ wa jɔ sran'm be kwlaa be klun.

¹¹ Yɛlɛ kɛ ndɛkɛn David klɔ lɔ'n, b'a wu Defuɛ kun b'a man amun, ɔ ti Krist, ɔ ti e Min .

¹² Nzɔliɛ nga amun ´fa si i'n yɛ: amun wa wun ba nɔnman kun bɔ b'a cici i wun ɔ la nnɛn'm be like diwlɛ nun, i-ɔ .»

¹³ Kpɛkuun Nyanmiɛn su lɔ sran akpi-ngbingbi'm be nun akpasua dan kun be wa ukali anz kun'n su, be manmannin Nyanmiɛn seli kɛ:

¹⁴ «Man Nyanmiɛn manmanlɛ'n tɛ nyanmiɛn su lɔ, yɛ man sran bɔ Nyanmiɛn klun jɔ bé wun asiɛ'n su wa'n, bé wun jɔ be.»

¹⁵ Kɛ anz'm be nin be tili nun bɔ be ɔli nyanmiɛn su lɔ'n, bua sunianfuɛ'm be seli be wiengu kɛ: « Man e wɔ Bɛtleɛm lɔ trelele, e ko nian sa ng'ɔ yo lɔ bɔ e Min Nyanmiɛn'n kan kleli ye'n.»

¹⁶ Be ɔli ndɛndɛ kpa. Be toli Mari nin Zozɛf, ɔ nin ba nɔnman'n b'ɔ la nnɛn'm be like diwlɛ nun'n be lɔ.

¹⁷ Kɛ be wunnin bakan'n, be kɛnnin i wun ndɛ nga anz'n kan kleli be'n kleli be.

¹⁸ Be kwlaa nga be tili ndɛ nga bua sunianfuɛ'm be kan kleli be'n, ɔ boli bé nuan.

¹⁹ Mari fali ndɛ sɔ'n kwlaa sieli i klun, yɛ ɔ buli i akunndan.

²⁰ Kɛ bua sunianfuɛ'm be ´sa be sin'n, be manmannin Nyanmiɛn, yɛ be yili i ayɛ ndɛ nga be tili'n, nin like nga be wunnin i'n i kwlaa ti. Afin i kwlaa'n ɔ nin nga be kan kleli be'n yoli kun.

Jésus i klɛn wlalɛ

²¹ Kɛ bakan'n dili le mɔcuɛ'n, be wa wlɛli i klɛn, be tɔnnin i dunman Jésus, dunman nga anz'n dun mmua kleli nan i nin wa wunnzɛ i nin-ɔn.

Jésus i Nyanmiɛn sa nun fa wlalɛ

²² Kɛ bé wun saun yolɛ cɛn bɔ be klɛli i Moiz mmla nun'n wieli'n, be fɛ i ɔli Zerizalɛm e Min Nyanmiɛn sa nun wlalɛ , afin be klɛli i e Min Nyanmiɛn mmla'n nun kɛ:

²³ «Sɛ sran o, sɛ nnɛn o, be talua ba kwlaa b'ɔ ti yasua'n, be `fɛ i man e Min Nyanmiɛn'n .»

²⁴ Be ko yili tɛ'n kɛ be klɛli i e Min Nyanmiɛn i mmla nun'n sa. Be klɛli i kɛ be fa ablioso nnyɔn annzɛ okunmomo ba nnyɔn yɛ be fa yi tɛ sɔ nin-ɔn .

²⁵ Kɛ ɔ ´yo sɔ'n, wuun bian kun o Zerizalɛm, be flɛ i kɛ Simeɔn. Bian sɔ'n ti sran nanwlɛfuɛ, ɔ sro Nyanmiɛn kpa. Ɔ minndɛ Izraɛl i wla cicilɛ'n, yɛ Nyanmiɛn Wawɛ'n yɛ ɔ sie i-ɔ.

²⁶ Nyanmiɛn man i Wawɛ'n bo su klɛli i kɛ san ɔ ´wun e Min Nyanmiɛn i Krist'n nan ɔ'a wu.

²⁷ Nyanmiɛn Wawɛ'n fɛ ɔli Nyanmiɛn i sua'n nun. Kɛ Jésus i si nin i nin be fɛ i ɔli Nyanmiɛn i sua'n nun kɛ be ´yo nga be klɛli i mmla'n nun kɛ be yo'n,

²⁸ Simeɔn fa bakan'n i sa su, ɔ manmannin Nyanmiɛn, ɔ seli kɛ:

²⁹ «Nannan, ndɛ nga a kannin'n ɔ'a ju, m bɔ n ti ɔ sran'n, man min atin man n wɔ blɛlɛlɛ siɛn'n.»

³⁰ Afin m bɔbɔ m'an wun defuɛ'n bɔ a fa mannin ye'n nin min nyinma.

³¹ Defuɛ'n bɔ a fa sieli sran'm be kwlaa be nyrun'n.

³² «Ɔ ti kɛ wia'n sa, ɔ wa kpaja nvle bɔ be ti-man Zuif'n be nyrun,» yɛ ɔ ti ɔ sran Izraɛlfuɛ'm be anyrunnyan like .

³³ Ba i wun ndɛ ng'ɔ kannin'n, ɔ boli i si nin i nin bé nuan.

³⁴ Simeɔn yrali i nuan mannin be, nan ɔ'a se i nin Mari kɛ: «Nian, ba ng'ɔ o yɛ'n, ɔ o lɛ Izraɛlfuɛ'm be sunman be ase finlɛ'n ti, yɛ ɔ o lɛ be sunman kusu bé su manlɛ'n ti. Ɔ wa yo kɛ like kun bɔ be wa kɛn i wun ndɛ tɛ sa,

³⁵ bɔ i ti sran kpanngban be anwlɛn'n nun akunndan'n ɔ ´fite su. Yɛ wɔ, wɔ anwlɛn'n ɔ wa kpɛ ɔ klun.»

³⁶ Nyanmiɛn nuan ijɔfuɛ bla kun kusu o lɛ, be flɛ i kɛ Ani, Faniɛl b'ɔ fin Azɛr osu nun'n, i wa-a. Ɔ'a yo oke kpa. Kɛ be wuli i'n, ɔ'a si-man yasua fi san i wun b'ɔ jɛli i'n. Be trannin afuɛ nso, i wun'n wuli,

³⁷ ɔ'a ja-man bian kun. Ɔ'a di afuɛ ablaɔcuɛ-nin-nnan, ɔ tu-mɛn i bo Nyanmiɛn i sua'n nun. Ɔ su Nyanmiɛn kɔnguɛ nin wia nun, ɔ kpɛ srɛ nun yɛ ɔ srɛ Nyanmiɛn.

³⁸ Bla sɔ'n kusu bali lɛ dɔ kunngba sɔ'n su, ɔ manmannin Nyanmiɛn, yɛ ɔ kannin Jésus ndɛ kleli be kwlaa nga be minndɛ kɛ Nyanmiɛn `de Zerizalɛmfuɛ mun'n.

Be Nazarɛt kɔlɛ

³⁹ Kɛ be wieli i kwlaa nga be klɛli i e Min Nyanmiɛn i mmla'n nun kɛ be yo'n, be ɔli be klɔ Nazarɛt, Galile mɛn'n nun.

⁴⁰ Bakan'n yoli kpa, ɔ nyinnin klanman. Ɔ si ngwlɛlɛ dan kpa, yɛ Nyanmiɛn man i like ng'ɔ yo be'n, be yo ye .

Sa nga Jésus yoli i Nyanmiɛn i sua'n nun i bakan nun'n

⁴¹ Afuɛ kwlaa Jésus i si nin i nin be kɔ Zerizalɛm Delɛ-cɛn dilɛ .

⁴² Kɛ ɔ dili afuɛ blu-nin-nnyɔn'n, be ɔli cɛn'n i dilɛ kɛ be fa yo i titi'n sa.

⁴³ Kɛ be wieli cɛn'n di bɔ be ´sa be sin'n, Jésus kali Zerizalɛm lɔ, sanngɛ i si nin i nin be si-man sɔ.

⁴⁴ Be bu i kɛ ɔ o be bɔ be nin be kɔ'n be nun. Be dili le kun atin nun be kunndɛli i be fuɛ nin be janvuɛ'm be nun,

⁴⁵ sanngɛ b'a wun-mɛn i. Be sali bé sin ɔli Zerizalɛm i kunndɛlɛ.

⁴⁶ Kɛ ɔ dili le nsan'n, be ko wunnin i Nyanmiɛn i sua'n nun Zuif'm be ninnge klefuɛ'm be afiɛn, ɔ tie be ndɛ bɔ be kan'n yɛ ɔ usa be sa.

⁴⁷ Be kwlaa nga be tili i ndɛ'n, i ngwlɛlɛ'n nin sa b'ɔ tɛ be su'n, ɔ boli bé nuan.

⁴⁸ Kɛ i si nin i nin be wunnin i'n, bé nuan boli bé wun, yɛ i nin seli i kɛ: «?N wa, nguɛ ti yɛ a yo e sɔ-ɔ? Min nin ɔ́ si y'a kunndɛ ɔ lele, é nyin a blo dan kpa.»

⁴⁹ Yɛ ɔ seli be kɛ: « ?Nguɛ ti yɛ an kunndɛ min-ɔn? ?An si-man kɛ min Si ninnge'm be mian ń sa-a?»

⁵⁰ Sanngɛ b'a wun-man ndɛ sɔ'n b'ɔ kan kleli be'n i wlɛ.

⁵¹ Kɛ ɔ yoli sɔ'n, ɔ nin be ɔli Nazarɛt, i nyin yi be. I nin fa sa sɔ'n sieli i klun.

⁵² Kɛ Jésus ´nyin'n, wuun i ngwlɛlɛ'n ´kɔ i nyrun, yɛ i wun yo Nyanmiɛn nin sran'm be fɛ.