JÉSUS-CHRIST I DYASIN FE'N BO LUC KLELI'N 17 - NYANMIƐN NDƐ'N 1998

Sa tɛ yolɛ

¹ Yɛ Jésus seli i sɔnnzɔnfuɛ'm be kɛ: «Like ng'ɔ man sran'm bé ti nun saci'n, san be ´yo, sanngɛ sran ng'ɔ yo i sɔ like liɛ'n, i yako!

² Sɛ be fa yɛbuɛ nin dan kun be minndɛ i kɔmin be yi i jenvie nun'n, ɔ flunman tra kɛ ɔ `saci ba kanngan nga'm be nun kun ti nun'n.

³ I sɔ'n ti'n, an `sasa amún wun. Sɛ ɔ niaan kun yo wɔ sa'n, flɛ i tu i fɔ, sɛ ɔ kpata wɔ'n, yaci.

⁴ Yɛ sɛ cɛn ba kunngba'n nun ɔ yo wɔ sa kpɛ nso'n, sɛ i kpɛ nso sɔ'n ɔ wa kpata wɔ'n, yaci.»

Nyanmiɛn sulafilɛ

⁵ Le kun be bɔ e Min'n sunmannin be'n be seli i kɛ: «Man e anwlɛn man e lafi Nyanmiɛn su kpa.»

⁶ Yɛ e Min'n seli be kɛ: «Sɛ an lafi Nyanmiɛn su bɔ kaan b'ɔ ju kɛ mutard mma sa'n, sɛ an se waka ng'ɔ o yɛ'n kɛ ɔ `tu i bo ko jran jenvie nun'n, ɔ ´kɔ.»

Like nga junman difuɛ'n yo-ɔ ɔ ti su'n

⁷ «?Amun nun onin yɛ sɛ ɔ lɛ i sran kun bɔ sɛ ɔ di fie o, sɛ ɔ ta nnɛn o, kɛ ɔ fin blo lɔ ju lɛ cɛ'n, ɔ se i kɛ ɔ bla wa tran ase di like-ɔ?

⁸ ?Nán nga b'ɔ se i'n yɛlɛ kɛ ɔ `tɔn like mɛn i, yɛ ɔ `kaci i tralɛ'n nan ɔ `fa aliɛ'n blɛ i man ɔ di i liɛ ka nan i kusu a di i liɛ?

⁹ ?Ɔ ´yo i sran sɔ'n i mo nga b'ɔ seli i kɛ ɔ `yo b'ɔ yoli'n ti?

¹⁰ Amun kusu, kɛ an ko yo kwlaa nga be seli amun kɛ an yo'n, amun ´se kɛ: ‹E ti kɛ junman difuɛ bɔ y'a yo-man like fi sa, nga be seli e kɛ e yo'n, yɛ e yoli-ɔ.› »

Jésus yoli kokowefuɛ blu be juejue

¹¹ Kɛ Jésus ´kɔ Zerizalɛm'n, ɔ sinnin Samari nin Galile be afiɛn.

¹² Kɛ ɔ juli klɔ kun su b'ɔ ´wlu klɔ'n nun'n, ɔ nin kokowefuɛ blu be yiali, be jrannin mmua lɔ

¹³ be kpan seli kɛ: «Baba Jésus, si ye aunnvuɛ, yo e ye!»

¹⁴ Kɛ Jésus wunnin be'n, ɔ seli be kɛ: «An `fa amún wun ko kle Nyanmiɛn nyrun jranfuɛ mun .» Kɛ be ´kɔ'n kpɛkuun bé wun a sa.

¹⁵ Kɛ be nun kun wunnin kɛ i wun a sa'n, ɔ sɛli i sin, kɛ ɔ ´ba'n ɔ kpan manman Nyanmiɛn.

¹⁶ Ɔ wa kotoli Jésus bo, ɔ lɛli i ase. Bian sɔ'n ti Samarifuɛ.

¹⁷ Yɛ Jésus seli kɛ: «?Be sran blu'n be ngba bé wun a sa-man? ?Yɛ be ngwlan nga'm be li?

¹⁸ ?Ɔ yo sɛ yɛ y'a wun-man sran fi bɔ san nvle wie nunfuɛ nga kunngba yɛ ɔ wa lali Nyanmiɛn ase-ɔ?»

¹⁹ I sin ɔ seli bian sɔ'n kɛ: «Jao kɔ! Kɛ a lafi su kɛ n kwla yo wɔ juejue'n ti, w'a yo juejue.›

Nyanmiɛn sielɛ'n i nzɔliɛ

²⁰ Le kun Farizifuɛ'm be seli Jésus kɛ ɔ kle be blɛ nga Nyanmiɛn wa sie sran mun'n, yɛ ɔ seli be kɛ: «Nyanmiɛn i sran'm be sielɛ'n ɔ ti-man like bɔ be wun kɛ i yɛ ɔ ´ba yɛ'n.

²¹ Be su se-man kɛ: ‹An `nian, ɔ o wa annzɛ ɔ o le sa, afin sran nga Nyanmiɛn sie be'n, be o amun nun wa.› »

²² Yɛ ɔ seli i sɔnnzɔnfuɛ'm be kɛ: «Cɛn wie amún wla wa lo m bɔ n kacili Sran'n kɛ amun ´wun min cɛn ba kunngba cɛ, sanngɛ an su wun-man min.

²³ Be wa se amun kɛ: ‹N wo wa, n wo le sa.› Nán an wanndi wɔ n kunndɛlɛ.

²⁴ Afin kɛ nyanmiɛn'n kpa sin i bue kun lɔ b'ɔ kpaja ju i bue kun lɔ'n, cɛn nga m bɔ n kacili Sran'n m ´ba'n, kɛ ɔ wa yo sɔ-ɔ.

²⁵ Sanngɛ san n ´dun mmua n wun nyrɛnnɛn dan kpa, yɛ ajulisufuɛ nga'm be su sɔ-man min nun.

²⁶ Kɛ m bɔ n kacili Sran'n m ma ba'n, sa nga sran'm be yoli i Noe blɛ su'n, sa kunngba'n yɛ be ´yo-ɔ:

²⁷ Be di like, be nɔn nzan, be ja bla nin bian, be fa be mma mun man bian, lele fa ju cɛn nga Noe wluli mmeli nun'n, nzue dan'n tɔli nan ɔ'a nunnun be kwlaa .

²⁸ I kunngba'n, ɔ wa yo kɛ Lɔt blɛ su'n sa bɔ sran'm be di like, be nɔn nzan, be to ninnge, be yo be ninnge atɛ, be di fie, yɛ be kplan sua.

²⁹ Sanngɛ cɛn nga Lɔt fin Sodɔm lɔ fiteli'n, sin nin sufru be fin nyanmiɛn su lɔ guali kɛ nzue sa nan ɔ'a nunnun be kwlaa .

³⁰ Kɛ m bɔ n kacili Sran'n mín wun nglo yilɛ cɛn'n nun ɔ wa yo sɔ-ɔ.

³¹ Cɛn sɔ nun'n, sran ng'ɔ o i sua ti gbagblagba'n su bɔ i ninnge'm be o sua lɔ'n, kɛ ɔ jra'n, nán man ɔ ko fa be, yɛ sran ng'ɔ o fie su'n, nán mɛn i kusu sɛ i sin.

³² An `bu Lɔt yi'n i liɛ'n i akunndan nian .

³³ Sran nga i waan ɔ ´sɛsɛ i nguan'n, ɔ ´kpɛ i nguan'n sin, sanngɛ sran ng'ɔ kpɛ i nguan'n sin'n, ɔ ´nyɛn i ekun.

³⁴ An `nian, kɛ cɛn sɔ'n ju'n, sɛ sran nnyɔn be la bɛ kun su kɔnguɛ'n, be ´fa kun be ´yaci kun lɛ.

³⁵ Yɛ bla nnyɔn bɔ be su si like siliɛ kun nun'n, be ´fa kun be ´yaci kun lɛ. [

³⁶ Yasua nnyɔn bɔ be o fie kun su'n, be ´fa kun, be ´yaci kun lɛ.]»

³⁷ Yɛ i sɔnnzɔnfuɛ'm be usɛli i kɛ: «?Nannan, ninfan yɛ sa sɔ'm be ´yo-ɔ?» Yɛ ɔ seli be kɛ: « Lika nga like fuɛn o lɛ'n, lɛ yɛ apɛtɛkuasi'm be yia-a.»